Luka
9 Mpoonya wakaita ibali kkumi ababili akubapa nguzu zyakutanda madaimona akuponya malwazi. 2 Aboobo wakabatuma kuyookambauka Bwami bwa Leza akuponya, 3 eelyo wakati kuli mbabo: “Kutabi cintu ncomutolelezya mulweendo, noiba nkoli noiba nkomo yacakulya, nociba cinkwa naaba mali aansiliva; nokuba kuba acisani cimbi ambali.* 4 Pele kufwumbwa nkomunjila muŋanda, amukkale oomo kusikila mukazwe ooko. 5 Alimwi kufwumbwa ooko bantu nkobatamutambuli, mwaakuzwa mumunzi ooyo amukakunkumune lusuko kumaulu aanu kuti bukabe bumboni bwakubacenjezya.” 6 Mpoonya bakatalika lweendo bainda kumunzi amunzi mucilawo coonse, kabayaabwaambilizya makani mabotu akuponya bantu koonse-koonse.
7 Lino Heloda, mweendelezi wacibeela cacooko, wakaamvwa makani oonse aakali kucitika, alimwi wakagambwa kapati nkaambo bamwi bakali kwaamba kuti Johane wakabusyigwa kubafwu, 8 pele bamwi bakali kwaamba kuti Elija walibonya, ibambi bakali kwaamba kuti umwi wabasinsimi bansiku wabuka. 9 Heloda wakati: “Johane ndakamukosola mutwe. Aboobo, ino nguni ooyu ngundimvwa kuti ucita zyintu eezyo?” Eelyo wakali kuyanda kuti amubone.
10 Lino batumwa nobakapiluka bakamulwiida zyintu zyoonse nzyobakacita. Mpoonya wakaunka ambabo kubusena butakwe bantu mumunzi uutegwa Betesaida. 11 Pele makamu aabantu naakazyiba akamutobela. Eelyo wakabatambula kabotu akutalika kubaambila zya Bwami bwa Leza, alimwi wakabaponya bakali kuyandika kuponesyegwa. 12 Lino buzuba bwakali kuya kumagolelo. Mpoonya bali kkumi ababili bakaboola akumwaambila kuti: “Kobaambila bantu kuti baunke muminzi amutunzi tweengelede bakaliyandawide aakoona azyakulya, nkaambo okuno tuli musyokwe.” 13 Pele wakabaambila kuti: “Amubape zyakulya.” Bakati: “Tujisi buyo mikamu yosanwe answi zyobilo, ccita kuti swebo tuunke tukabaulile zyakulya bantu boonse aaba.” 14 Kwakali baalumi batandila ku 5,000. Pele wakaambila basikwiiya bakwe kuti: “Amubakkazyike mutukamu, kakamu akamwi kakajisi bantu batandila kumakumi osanwe.” 15 Aboobo bakacita oobo akubakkazyika boonse. 16 Mpoonya wakabweza zinkwa zyosanwe answi zyobilo, wakalanga kujulu, wakazileleka akuzikomoona mpoonya wakazipa basikwiiya bakwe kuti baabanye nkamu yabantu. 17 Aboobo boonse bakalya akukkuta, alimwi bakabwezelela zyakacaala, imitaanga iili kkumi aibili yabufwefwelenga.
18 Kumane naakali kupaila alikke, basikwiiya bakwe bakaboola antoomwe kulinguwe, eelyo wakababuzya kuti: “Ino makamu aabantu aamba kuti ndime ni?” 19 Mukwiingula bakamwaambila kuti: “Johane Mubbapatizi, pele bamwi balati Elija, alimwi bamwi baamba kuti umwi wabasinsimi ibansiku wabuka.” 20 Mpoonya wakababuzya kuti: “Ino nywebo mwaamba kuti ndime ni?” Petulo wakaingula kuti: “Nduwe Kilisito wa Leza.” 21 Lino wakasitikizya kubalailila kuti bataambili muntu uuli woonse makani aaya, 22 pele wakati: “Mwana wamuntu weelede kwiinda mumapenzi manji akukakwa abapati, basilutwe babapaizi alimwi abalembi akujaigwa, mpoonya akubusyigwa mubuzuba bwatatu.”
23 Mpoonya wakayaambele kubaambila boonse kuti: “Ikuti umwi kayanda kunditobela, aliimye, anyamune cisamu cakwe cakupenzyezya abuzuba, alimwi akuzumanana kunditobela. 24 Nkaambo kufwumbwa uuyanda kufwutula buumi bwakwe uyoobusweekelwa, pele kufwumbwa uusweekelwa buumi bwakwe akaambo kandime nguuyoobufwutula. 25 Mubwini, mbubotu nzi mbwakonzya kujana muntu ikuti wavwuba nyika yoonse, pele wasweekelwa buumi bwakwe naa wanyonyookelwa zyintu zyoonse? 26 Nkaambo kufwumbwa uufwa bweemya akaambo kandime amajwi aangu, Mwana wamuntu uyoofwa bweemya kumuntu ooyu aakuboola mubulemu bwakwe abwa Bausyi abwabangelo basalala. 27 Pele ncobeni ndimwaambila kuti: Nkobali bamwi ibaimvwi aano batakafwi kusikila bakasaangune kubona Bwami bwa Leza.”
28 Nokwakainda mazuba aatandila kulusele kaambide majwi aaya, wakatola Petulo, Johane alimwi a Jakobo akutanta ambabo acilundu kuyoopaila. 29 Lino naakali kupaila, ciwa cabusyu bwakwe cakasanduka azisani zyakwe zyakatuba bu akunyengema. 30 Alimwi amubone! Baalumi bobilo bakali kubandika anguwe; baalumi aabo bakali Musa a Elija. 31 Aaba bakalibonya mubulemu akutalika kubandika zyakuzwa kwakwe anyika ooko nkwaakeelede kuzuzikizya ku Jelusalemu. 32 Lino Petulo abaabo mbaakali limwi bakafwide ŋonzi, pele nobakasinsimuka bakabona bulemu bwakwe abaalumi aabo bobilo ibakaimvwi anguwe. 33 Lino aaba nobakali kwaandaana anguwe, Petulo wakaambila Jesu kuti: “Mufwundisi, ncibotu kuti tukkale aano, aboobo atubikke matente otatwe, lyako, lya Musa alya Elija.” Pele tanaakacizyi pe ncaakali kwaamba. 34 Pele naakali kwaamba makani aaya kwakaba kkumbi, lyakatalika kubavwumbilila. Lino nolyakabavwumbilila kkumbi eelyo bakayoowa kapati. 35 Mpoonya mukkumbi mwakamvwugwa jwi lyakati: “Ooyu Mwanaangu, ooyo wasalwa. Amumuswiilile.” 36 Nokwakamvwugwa jwi, Jesu wakajanika kuti uli alikke. Pele bakaumuna buyo alimwi kumazuba aayo kunyina ngobakalwiida zyintu eezyo nzyobakabona.
37 Mubuzuba bwakatobela, nobakaseluka acilundu, kwakamucinga nkamu yabantu impati. 38 Lino amubone! Mwaalumi umwi munkamu wakoompolola wati: “O Mwiiyi, ndakulomba undilangile mwanaangu musankwa nkaambo ngusimuzyalwaalikke, 39 alimwi bona! Kuli muuya uumunjila, mpoonya aawo mwana ulakwiila, alimwi ulamusuntusya akumugusya ccovwu kumulomo, ulamucuzula alimwi tuumuleki kufwambaana. 40 Lino ndalibalombede basikwiiya bako kuti bautande, pele baalilwa.” 41 Mukwiingula Jesu wakati: “Nywebo nozyalani linyina lusyomo alimwi nobasicinguni, ino ndilakkala andinywe akumukkazyikila moyo kwaciindi cilamfwu buti? Komuleta kuno mwanaako.” 42 Pele noliba leelyo naakacili kuboola, idaimona eelyo lyakamuwisizya ansi akumusuntusya. Pele Jesu wakaukalalila muuya ooyu uusofweede akumuponya mulombe ooyo akumutola kuli bausyi. 43 Bantu boonse bakagambwa kapati akaambo kanguzu zya Leza zitalivwulili.
Lino bantu boonse nobakaci-li kugambwa zyintu eezyi zyoonse nzyaakali kucita, wakaambila basikwiiya bakwe kuti: 44 “Amwaaswiililisye akwaayeeya majwi aaya, nkaambo Mwana wamuntu uyooabwa mumaanza aabantu.” 45 Pele tiibakakamvwisya kaambo nkaakali kwaamba. Atwaambe kuti kakalisisidwe kuli mbabo kuti batazyibi ncokakali kwaamba, alimwi bakali kuyoowa kumubuzya kujatikizya kaambo aaka.
46 Mpoonya bakatalika kukazyanya mulicabo kuti naa nguni wakali mupati akati kabo. 47 Lino mbwaanga Jesu wakalizyi mbobakali kuyeeya mumyoyo yabo, wakabweza mwana musyoonto, wamwiimika kumbali lyakwe, 48 akubaambila kuti: “Kufwumbwa uutambula mwana musyoonto ooyu muzyina lyangu ulanditambula andime, alimwi kufwumbwa uunditambula ulamutambula ayooyo wakandituma. Nkaambo ooyo uucita zyintu mbuli muniini akati kanu nyoonse, ngomupati.”
49 Eelyo Johane wakaingula wati: “Mufwundisi, twakabona muntu umwi katanda madaimona kwiinda mukubelesya zyina lyako alimwi twakasola kumukasya nkaambo takutobeli antoomwe andiswe.” 50 Pele Jesu wakamwaambila kuti: “Mutasoli kumukasya nobaalumi nywebo, nkaambo ooyo uutamulwani uli kulubazu lwanu.”
51 Lino mazuba aakuti atolwe kujulu naakali kuyaabuswena, wakakanza kuya ku Jelusalemu. 52 Aboobo wakatuma basikwiiya bakwe bamwi kumbele lyakwe. Eelyo bakaunka akunjila mumunzi waba Samaliya kuti bakamubambile zyintu, 53 pele tiibakamutambula pe, nkaambo wakakanzide kuya ku Jelusalemu. 54 Aboobo basikwiiya bakwe, ba Jakobo a Johane nobakabona boobo bakamubuzya kuti: “Mwami, sena ulayanda kuti twaambile mulilo uboole kuzwa kujulu kutegwa ubanyonyoone?” 55 Pele wakacenguluka akubakalalila. 56 Aboobo bakaunka kumunzi uumbi.
57 Lino nobakali kuyaabweenda munzila, muntu umwi wakamwaambila kuti: “Ndilakutobela kufwumbwa nkounka.” 58 Eelyo Jesu wakamwaambila kuti: “Bamwaaba balijisi malyango abayuni bamujulu balijisi ziteente, pele Mwana wamuntu tajisi akooneka mutwe.” 59 Mpoonya wakati kumuntu umwi: “Koba sikunditobela.” Imwaalumi ooyo wakati: “Koleka saansi nduunke ndikaakuzikke bataata.” 60 Pele wakamwaambila kuti: “Leka bafwu bazikke bafwu babo, pele yebo koya ukaambilizye Bwami bwa Leza koonse-koonse.” 61 Aumbi wakati: “Ndilakutobela Mwami, pele saansi kondizumizya ndikalaye bamuŋanda yangu.” 62 Jesu wakamwaambila kuti: “Kunyina muntu uujatide jamba pele uulanga zyintu zili musyule weelela Bwami bwa Leza.”