Johane

1 Kumatalikilo Ijwi wakaliko, alimwi Ijwi wakali a Leza, alimwi Ijwi wakali leza.* 2 Ooyu kumatalikilo wakali aa Leza. 3 Zyintu zyoonse zyakaba kwiinda mulinguwe, alimwi kunyina cintu nociba comwe cakaba kakunyina nguwe.

Eeco icakaba 4 kwiinda mulinguwe bwakali buumi, alimwi buumi bwakali mumuni wabantu. 5 Alimwi mumuni ulamunika mumudima, pele mudima tiiwauzunda pe mumuni.

6 Kwakali muntu wakatumwa kuba mwiiminizi wa Leza: izyina lyakwe wakali Johane. 7 Ooyu muntu wakaboola kali kamboni, kutegwa azyikupe bumboni bwamumuni, kuti bantu bamisyobo yoonse basyome kwiinda mulinguwe. 8 Tanaakali ngomumuni ooyo pe, pele wakaboola kuti ape bumboni bwamumuni ooyo.

9 Imumuni wini-wini uumunikila bantu bamisyobo yoonse wakali afwaafwi kusika munyika. 10 Wakaliko munyika, alimwi nyika yakaba kwiinda mulinguwe, pele nyika tiiyakamuzyiba. 11 Wakaboola kucisi cakwabo, pele bantu bakwabo tiibakamutambula. 12 Pele aabo boonse bakamutambula wakabapa nguzu zyakuba bana ba Leza, nkaambo bakali kusyoma muzyina lyakwe; 13 alimwi bakazyalwa ikutali kwiinda mubulowa naa kwiinda mukuyanda kwamubili naa kwiinda mukuyanda kwamuntu, pele mukuyanda kwa Leza.

14 Aboobo Ijwi wakaba muntu* akukkala akati kesu, alimwi twakabubona bulemu bwakwe, ibulemu bwasimuzyalwaalikke kuli bausyi; alimwi wakazwide luzyalo lwa Leza akasimpe. 15 (Johane wakapa bumboni kujatikizya nguwe, inzya, mubwini ooyu ngonguwe wakoompolola kati: “Ooyo uuboola musyule lyangu waunka kumbele lyangu, nkaambo wakaliko mebo kanditanaba.”) 16 Nkaambo kuzwa kuli zyeezyo nzyajisi mubunji, toonse twakatambula luzyalo lwa Leza lulibedelede ilutamani. 17 Nkaambo Mulawo wakapegwa kwiinda muli Musa, luzyalo lwa Leza akasimpe zyakaba kwiinda muli Jesu Kilisito. 18 Kunyina muntu wakamubona kale Leza nociba ciindi comwe; ccita leza simuzyalwaalikke ooyo uuli acamba ca Usyi ngonguwe wakamupandulula.

19 Lino oobu mbobumboni mbwaakapa Johane iba Juda nobakatuma bapaizi aba Levi kulinguwe kuzwa ku Jelusalemu kuyoomubuzya kuti: “Ino nduwe ni?” 20 Eelyo wakazumina, tanaakakazya pe pele wakazumina wati: “Mebo tandili Kilisito pe.” 21 Alimwi bakamubuzya kuti: “Ino nduwe ni? Sena nduwe Elija?” Wakati: “Tandili nguwe.” “Sena nduwe musinsimi ooyo wakasinsimwa?” Wakaingula kuti: “Peepe!” 22 Aboobo bakamubuzya kuti: “Ino nduwe ni? Kotwaambila kutegwa tukabape bwiinguzi aabo batutuma. Ino waamba kuti nduwe ni?” 23 Wakati: “Ndime jwi lyayooyo woongolola munkanda kuti, ‘Amululamike nzila ya Jehova,’ mbubonya bwakaamba musinsimi Izaya.” 24 Lino aabo bakatumwa bakazwide kuba Falisi. 25 Aboobo bakamubuzya mubuzyo kabati: “Ino nkaambo nzi ncobbapatizya ikuti kotali Kilisito naa Elija antela musinsimi ooyo wakasinsimwa?” 26 Johane wakabaingula, ulaamba: “Mebo ndibbapatizya mumaanzi. Akati kanu kwiimvwi mu-ntu ngomutazyi, 27 ooyo uuboola musyule lyangu, pele ngonditeeleli kwaangununa ntambo zyampato zyakwe.” 28 Eezyi zyintu zyakacitikila ku Betaniya mutala lya Jodano, ooko Johane nkwaakali kubbapatizyila.

29 Buzuba bwakatobela wakabona Jesu kaboola kulinguwe, mpoonya wakaamba kuti: “Amubone, Mwanaambelele wa Leza ooyo uugusya zibi zyanyika! 30 Ooyu ngonguwe ngundakaamba kuti, Musyule lyangu kuboola muntu waunka kumbele lyangu, nkaambo wakaliko mebo kanditanaba. 31 Ambebo tiindakamuzyi, pele kaambo nkindakaboolela kandibbapatizya mumaanzi nkakuti ayubununwe kuba Isilayeli.” 32 Johane awalo wakapa bumboni, kati: “Ndakabona muuya kuuseluka mbuli nziba kuzwa kujulu, alimwi wakakkala alinguwe. 33 Andime tiindakamuzyi, pele ngoonya Ooyo iwakandituma kuti kandibbapatizya mumaanzi wakandaambila kuti, ‘Ooyo ngoyoobona kuti muuya waseluka akukkala alinguwe, ooyu ngonguwe uubbapatizya mumuuya uusalala.’ 34 Alimwi ndakalibonena, eelyo ndakapa bumboni bwakuti ooyu Mwana wa Leza.”

35 Buzuba bwakatobela Johane wakaliimvwi abasikwiiya bakwe bobilo, 36 alimwi naakabona Jesu keenda wakati: “Amubone, Mwanaambelele wa Leza!” 37 Alimwi basikwiiya bakwe aabo bobilo bakamumvwa kaamba, aboobo bakamutobela Jesu. 38 Mpoonya Jesu wakacenguluka, eelyo naakabona kuti balamutobela, wakababuzya kuti: “Ino muyandaula nzi?” Bakati kulinguwe: “Labbi, (izyina ilyaamba kuti Mwiiyi lyasandululwa,) ino ukkala kuli?” 39 Wakati kuli mbabo: “Kamuboola, eelyo mulakubona.” Aboobo bakaunka akubona nkwaakali kukkala, eelyo bakakkala anguwe buzuba oobo; alimwi ciindi cakali afwaafwi kusika awoola lyakkumi.* 40 Anduleya munyina wa Simoni Petulo ngumwi wabaabo bobilo bakamvwa nzyaakaamba Johane akumutobela Jesu. 41 Kusaanguna ooyu wakajana munyina, Simoni, akumwaambila kuti: “Twamujana Mesiya” (izyina ilyaamba kuti Kilisito lyasandululwa.) 42 Wakamutola kuli Jesu. Lino Jesu naakamulanga wakati: “Nduwe Simoni mwana wa Johane; unooitwa kuti Kefa” (izyina lisandululwa kuti Petulo).

43 Ibuzuba bwakatobela Jesu wakali kuyanda kuunka ku Galilaya. Aboobo wakajana Filipo akumwaambila kuti: “Koba sikunditobela.” 44 Lino Filipo wakali kuzwa ku Betesaida, mumunzi mwakali kukkala Anduleya a Petulo. 45 Filipo wakajana Natanayeli akumwaambila kuti: “Twamujana ooyo ngwaakalemba Musa mu Mulawo uulembedwe amu Basinsimi, Jesu waku Nazaleta, mwana wa Josefa.” 46 Pele Natanayeli wakati kulinguwe: “Sena kuli cibotu cinga cazwa mu Nazaleta?” Filipo wakati kulinguwe: “Koboola ubone.” 47 Jesu wakabona Natanayeli kaboola kulinguwe alimwi kujatikizya nguwe wakati: “Amubone, mu Isilayeli uunyina lweeno noluceya.” 48 Natanayeli wakamubuzya kuti: “Ino wakandizyibila kuli?” Jesu wakamwiingula kuti: “Katanakwiita Filipo, nowacili munsi lyamukuyu, ndalikubwene.” 49 Natanayeli wakamwiingula kuti: “Labbi, ncobeni uli Mwana wa Leza, uli Mwami wa Isilayeli.” 50 Jesu wakamubuzya kuti: “Sena wasyoma nkaambo ndakwaambila kuti ndalikubwene munsi lyamukuyu? Uyoobona zyintu zipati kwiinda zyeezyi.” 51 Alimwi wakamwaambila kuti: “Ncobeni nobaalumi nywebo ndimwaambila kuti, Muyoobona julu kalijalukide alimwi abangelo ba Leza kabatanta kuya nkuko akuseluka kuboola ku Mwana wamuntu.”