Johane
15 “Mebo ndili musaansa wini-wini, alimwi Taata ngomulimi. 2 Imutabi wangu uuli woonse uutazyali micelo ulaukwezyula, alimwi uuli woonse uuzyala micelo ulaukokweda ikutegwa usalale akuzyalisya micelo. 3 Nywebo mulisalede kale akaambo kamajwi ngendamwaambila. 4 Amuzumanane kukamantana andime, andime ndizumanane kukamantana andinywe. Mbubonya mutabi mbuutakonzyi kuzyala micelo ulikke ccita kuti kuuli kucinyina, mbubonya buyo anywebo tamukonzyi kuzyala micelo, ccita kuti mwazumanana kukamantana andime. 5 Mebo ndili cinyina, nywebo muli mitabi. Ooyo mebo anguwe ngotukamantene limwi lyoonse, nguuzyala micelo minji; nkaambo tamukonzyi kucita cili coonse kakunyina ndime. 6 Ikuti muntu katazumanani kukamantana andime, ulakwezyulwa mbuli mutabi alimwi ulayuma; eelyo bantu balaibungika mitabi eeyo akwiiwaala mumulilo, eelyo ilapya. 7 Ikuti mwazumanana kukamantana andime akubamba majwi aangu; mwaakulomba cintu cili coonse ncomuyanda muyoocitilwa. 8 Taata ulalemekwa muli ceeci, ikuti muzumanane kuzyala micelo minji akulitondezya kuti muli basikwiiya bangu. 9 Mbubonya Taata mbwaali kundiyanda ambondali kumuyanda nywebo, amuzumanane muluyando lwangu. 10 Ikuti mwaibamba milawo yangu, mulazumanana muluyando lwangu, mbubonya mbondaibamba milawo ya Taata akuzumanana muluyando lwakwe.
11 “Ndamwaambila zyintu eezyi kutegwa mukondwe mbondikondedwe akuti kukondwa kwanu kuzulile. 12 Ndamupa mulawo ooyu, wakuti muyandane mbubonya mbondali kumuyanda nywebo. 13 Kunyina uujisi luyando lwiinda loolu, cakuti muntu umwi atuulile beenzinyina buumi bwakwe. 14 Munooli beenzuma ikuti kamucita nzyondimulailila. 15 Tandicimwaambi kuti muli bazike, nkaambo muzike tazyi ncacita simalelo wakwe. Pele ndimwaamba kuti muli beenzuma, nkaambo ndamuzyibya zyintu zyoonse nzindakamvwa kuli Taata. 16 Tamuli ndinywe mwakandisala pe, pele ndime ndakamusala akumutuma kuti muzumanane kuzyala micelo akuti micelo yanu kiiliko lyoonse; ikutegwa kufwumbwa ncomumulomba Taata kwiinda muzyina lyangu, akamupe ncico.
17 “Ndamulailila zyintu eezyi ikutegwa kamuyandana. 18 Ikuti nyika yamusula, mulizyi kuti yakandisula mebo kaitanasula ndinywe. 19 Ikuti nimwali banyika, inyika niyali kumukkomanina nkaambo muli banjiyo. Lino akaambo kakuti tamuli banyika, pele ndakamusala kuzwa munyika, akaambo kaceeci nyika ilamusula. 20 Amuyeeye majwi ngendakamwaambila kuti, Imuzike tali mupati kwiinda simalelo wakwe. Ikuti bakandipenzya mebo, bayoomupenzya andinywe; ikuti bakaatobela majwi aangu, bayooatobela amajwi aanu. 21 Pele bayoocita zyintu zyoonse eezyi zyakumukazya akaambo kazyina lyangu, nkaambo tabamuzyi ooyo wakandituma. 22 Ikuti nindatakaboola akubandika kuli mbabo, nobatajisi cibi; pele lino banyina cilitamizyo kujatikizya cibi cabo. 23 Ooyo uundisula, ulamusula awalo Taata. 24 Ikuti nendatakabacitila milimo yatakacitwa amuntu uuli woonse, nobatajisi cibi; pele lino babona alimwi bandisula mebo a Taata. 25 Pele eeci cakacitika kutegwa azuzikizyigwe majwi aalembedwe mu Mulawo wabo aakuti, ‘Bakandisula kakunyina kaambo.’ 26 Aakusika mugwasyi ooyo ngondiyoomutumina kuzwa kuli Taata, imuuya wakasimpe, walo uuzwa kuli Taata, ooyo uyoondicitila bumboni; 27 alimwi andinywe, mweelede kundicitila bumboni nkaambo mwali andime kuzwa nindakatalika.