Johane
20 Mubuzuba bwakusaanguna bwansondo Maliya Magadalene wakafwuma kusika kucuumbwe, ansi kaacisiya-siya, pele wakabona kuti bbwe lyakaligusyidwe kale kucuumbwe. 2 Aboobo wakabalika akusika kuli Simoni Petulo akuli sikwiiya umbi, ooyo Jesu ngwaakali kuyanda, eelyo wakati kuli mbabo: “Bamugusya Mwami mucuumbwe, pele tatuzyi nkobamulazika.”
3 Mpoonya Petulo asikwiiya umbi ooyo bakanyamuka akuya kucuumbwe. 4 Boonse bobilo bakatalika kubalika antoomwe, pele sikwiiya umbi ooyo wakabalika kapati akumusiya Petulo, eelyo wakasaanguna kusika kucuumbwe. 5 Alimwi naakooka akusondela mukati, wakabona buyo milembo ansi pele tanaakanjila. 6 Mpoonya Simoni Petulo awalo wakasika kazyaabumutobela, eelyo wakanjila mucuumbwe. Alimwi wakaibona milembo ansi. 7 Cisani eeco icakali kumutwe wakwe tiicakali antoomwe amilembo eeyo imbi, pele cakalivwungidwe cilikke mubusena bomwe. 8 Mpoonya sikwiiya umbi ooyo wakasaangunide kusika kucuumbwe awalo wakanjila mukati, eelyo wakabona alimwi wakasyoma. 9 Nkaambo tiibakaninga kulumvwisya lugwalo lwaamba kuti wakeelede kubuka kuzwa kubafwu. 10 Aboobo basikwiiya bakajokela kuminzi yabo.
11 Pele Maliya wakaliimvwi anze lyacuumbwe kalila. Mpoonya kacilila, wakooka akusondela mucuumbwe 12 eelyo wakabona bangelo bobilo basamide zituba kabakkede umwi kumutwe aumbi kumaulu aawo mubili wa Jesu mpowakalede. 13 Mpoonya bakati kulinguwe: “Omukaintu, ino ulila nzi?” Wakati kuli mbabo: “Bamugusya Mwami wangu, pele tandizyi nkobamuzikkila.” 14 Naakamana kwaamba boobo, wakacenguluka akubona Jesu kaimvwi, pele tanaakazyiba kuti wakali Jesu. 15 Jesu wakamubuzya kuti: “Omukaintu, ino ulila nzi? Nguni ngoyandaula?” Lino walo kayeeya kuti wakali mubelesi wamumuunda, wakati kulinguwe: “Ikuti naa waubweza mubili wakwe, kondaambila nkowauzikka, eelyo ndiyooubweza.” 16 Jesu wakati kulinguwe: “Maliya!” Naakacenguluka, wakati kulinguwe mu Chihebulayo: “Labboni!” (nkokuti “Mwiiyi!”) 17 Jesu wakati kulinguwe: “Koleka kundijatilila. Nkaambo tandinatanta kuli Taata. Pele koya kubakwesu ukabaambile kuti, ‘Ndilatanta kuli Taata alimwi a Bauso, kuli Leza wangu a Leza wanu.’” 18 Maliya Magadalene wakaunka akutola mulumbe kuli basikwiiya kati: “Ndamubona Mwami!” Eelyo wakabaambila nzyaakaamba.
19 Lino nokwakaba kumangolezya mubuzuba mbubonya oobo bwakusaanguna bwansondo, zijazyo kazikkiidwe oomo mobakabede basikwiiya akaambo kakuyoowa ba Juda, Jesu wakasika akwiima akati kabo akubaambila kuti: “Amube aluumuno.” 20 Naakamana kubaambila boobu, wakabatondezya maanza aakwe oonse alimwi amumabambo. Mpoonya basikwiiya bakakondwa kumubona Mwami. 21 Jesu wakabaambila alimwi kuti: “Amube aluumuno. Mbubonya Taata mbwaakandituma, andime ndilamutuma.” 22 Naakamana kwaamba boobu wakabafwulida muya akubaambila kuti: “Amutambule muuya uusalala. 23 Ikuti mwalekelela zibi zyabantu bali boonse, balalekelelwa nzizyo; eelyo nomutalekeleli zibi zyabantu bali boonse, tabalekelelwi.”
24 Pele Tomasi, umwi wabali kkumi ababili, iwakali kwiitwa kuti Wamaanga, tanaakali ambabo Jesu naakaboola. 25 Aboobo basikwiiya bambi bakali kumwaambila kuti: “Twamubona Mwami!” Pele wakati kuli mbabo: “Ccita kuti ndizibone zilonda zyampikili mumaanza aakwe akubikka munwe wangu muzilonda zyampikili alimwi akubikka janza lyangu mumabambo aakwe, nsikoosyoma pe.”
26 Lino kwiinde mazuba aali lusele, basikwiiya bakwe alimwi bakali muŋanda, awalo Tomasi wakali ambabo. Jesu wakanjila, nokuba kuti zijazyo zyakalikkiidwe, eelyo wakaima akati kabo akwaamba kuti: “Amube aluumuno.” 27 Mpoonya wakati kuli Tomasi: “Bikka munwe wako aawa ubone maanza aangu, alimwi leta janza lyako akulibikka mumabambo aangu. Eelyo koleka kutasyoma akutalika kusyoma.” 28 Tomasi wakamwiingula kuti: “O Mwami wangu alimwi Leza wangu!” 29 Jesu wakati kulinguwe: “Sena wasyoma lino akaambo kakuti wandibona? Balikkomene aabo ibasyoma kabatanabona.”
30 Masimpe, Jesu wakacita azimbi zitondezyo zinji kuli basikwiiya bakwe, izitalembedwe mubbuku eeli. 31 Pele eezyi zyalembwa kutegwa musyome kuti Jesu ngu Kilisito Mwana wa Leza, akuti akaambo kakusyoma mukabe abuumi kwiinda muzyina lyakwe.