Milimo
14 Lino ku Ikoniyo bakanjila antoomwe mucikombelo caba Juda alimwi bakaambaula kabotu cakuti nkamu mpati yaba Juda aba Giliki bakaba basyomi. 2 Pele ba Juda batakasyoma bakanyonganya bantu bamasi akubayunga kuti babukile bakwesu. 3 Aboobo bakatola ciindi cilamfwu kabaambaula cabusicamba munguzu zya Jehova, ooyo wakacitila bumboni kujwi lyaluzyalo lwakwe kwiinda mukubapa kucita zitondezyo azyintu zigambya. 4 Nokuba boobo, bantu banji bamumunzi bakaandaana; bamwi bakali kubbazu lyaba Juda pele bamwi bakali kubbazu lyabatumwa. 5 Lino bantu bamasi aba Juda antoomwe abeendelezi babo nobakali kuyanda kutalika kubapenzya akubapwaya mabwe, 6 batumwa aabo bakaambilwa makani aaya, eelyo bakatijila kuminzi ya Lukawoniya, Lusitulo, Debe akumasena aaengelede. 7 Ooko bakazumanana kwaambilizya makani mabotu.
8 Lino mu Lusitulo kwakakkede mwaalumi umwi wakalemene maulu. Wakali mulema kuzwa naakazyalwa alimwi kunyina buzuba naakeendede. 9 Imwaalumi ooyu wakali kuswiilila Paulo naakali kwaambaula. Lino Paulo naakamulangisisya akubona kuti wakajisi lusyomo lwakuti inga waponesyegwa, 10 wakati ajwi pati: “Koimikila.” Eelyo wakasotoka akutalika kweenda. 11 Makamu aabantu nobakabona ncaakacita Paulo, bakoompolola mumwaambo wa Chilukawoniya kuti: “Baleza baba mbuli bantu alimwi batuselukila!” 12 Mpoonya Banaba bakatalika kumwiita kuti ngu Zusi, pele Paulo bakati ngu Heme, nkaambo nguwakali kusololela mukwaambaula. 13 Alimwi tempele lya Zusi lyakali anze amunzi, eelyo mupaizi wa Zusi wakaleta basune amisini yamaluba kumilyango alimwi wakali kuyanda kutuula zipaizyo antoomwe ankamu yabantu.
14 Pele batumwa, Banaba a Paulo nobakamvwa makani aaya, bakazapula zisani zyabo zyaatala, babalikila munkamu yabantu eeyo akoompolola 15 kuti: “Nobaalumi, ino nkaambo nzi ncomucitila zyintu eezyi? Andiswe tuli bantu buyo ibalezya mbubonya mbuli ndinywe. Twaambilizya makani mabotu kulindinywe kuti muzifwutatile zyintu eezyi zyabuyo akusandukila kuli Leza uupona, iwakalenga julu, nyika, lwizi azyintu zyoonse zili mumo. 16 Mumazyalani aamusyule bamasi boonse wakabalekela kutobela nzila zyabo beni, 17 nokuba kuti mubwini taakalilekela kubula bumboni nkaambo wakacita zibotu kwiinda mukumupa mvwula kuzwa kujulu aziindi eelyo nokuba micelo minji, alimwi wakamupa zyakulya zinji akuzuzya myoyo yanu akubotelwa.” 18 Pele nokuba kuti bakaamba majwi aaya, tiicakabaubila pe kukasya makamu aabantu kubatuulila zipaizyo.
19 Pele kwakasika ba Juda kuzwa ku Antiyokeya aku Ikoniyo alimwi bakoongelezya makamu aabantu, eelyo bakamupwaya mabwe Paulo akumukwelela anze aamunzi, kabayeeya kuti wakalifwide. 20 Nokuba boobo, basikwiiya nobakamuzinguluka, wakanyamuka akunjila mumunzi ooyo. Alimwi buzuba bwakatobela wakaunka a Banaba ku Debe. 21 Alimwi nobakaambilizya makani mabotu mumunzi ooyo akugwasya bantu banji kuba basikwiiya, bakapilukila ku Lusitulo, ku Ikoniyo aku Antiyokeya. 22 Ooko bakayumya-yumya myoyo yabasikwiiya, ikubakulwaizya kuzumanana mulusyomo akwaamba kuti: “Tweelede kwiinda mumapenzi manji kutegwa tukanjile mu Bwami bwa Leza.” 23 Kunze lyaboobo, bakabasalila baalu mumbungano imwi aimwi alimwi, nobakapaila akuliimya kulya, bakabasiya mumaanza a Jehova ooyo ngobakasyoma.
24 Mpoonya bakainda mu Pisidiya akunjila mu Pamfiliya, 25 eelyo nobakamana kukambauka jwi mu Pege, bakaselemukila ku Ataliya. 26 Mpoonya kuzwa kooko bakatanta bwato akuunka ku Antiyokeya, ooko bakwesu nkobakabapede mumaanza a Leza kuti abatondezye luzyalo lwakwe kutegwa bacite mulimo ooyo lino ngobakamanizyide.
27 Nobakasika ku Antiyokeya akubunganya mbungano, bakatalika kubalwiida zyintu zinji nzyaakacita Leza kwiinda muli mbabo, akuti wakajalula nzila* kuli bamasi kuti batambule lusyomo. 28 Aboobo bakakkala abasikwiiya kwaciindi cilamfwu.