Milimo
24 Nokwakainda mazuba osanwe mupaizi mupati Hananiya wakaboola abapati bamwi antoomwe asimilawo umwi uutegwa Tetulo, eelyo bakamulungulwida mweendelezi kujatikizya mulandu wa Paulo. 2 Lino naakaitwa, Tetulo wakatalika kumupa mulandu kati:
“Oolemekwa Felike, mbwaanga tukkede muluumuno kapati akaambo kanduwe akuti zyintu zibotu zyalusumpuko zilacitwa mucisi eeci kwiinda mubweendelezi bwako bwabusongo, 3 ziindi zyoonse alimwi amumasena oonse tulalutambula luumuno cakulumba kapati. 4 Pele kutegwa nditakumanini ciindi, ndakulomba kuti kwaciindi cisyoonto buyo utuswiilile cakukkazyika moyo. 5 Nkaambo tuzyi kuti mwaalumi ooyu ngusikubusya manyongwe alimwi upa bantu kubukila cisi akati kaba Juda boonse munyika yoonse alimwi ngomusololi wankamu yabukombi yabana Nazaleta. 6 Alimwi wakasola kusofwaazya tempele, aboobo twakamujata. 7* — 8 Wamubuzyisisya ulalimvwida omwini kuti nzyamasimpe zyintu zyoonse eezyi nzyotumupeda mulandu.”
9 Naakaamba boobo ba Juda abalo bakanjilila kumulwana amajwi, kabazuminizya kuti zyintu eezyi zyakali zyamasimpe. 10 Eelyo mweendelezi naakamuzumizya kuti aambe, Paulo wakaingula kuti:
“Akaambo kakuti ndilizyi kabotu kuti uli mubetesi wacisi eeci kwamyaka minji, ndilaangulukide kuliiminina, 11 nkaambo ulakonzya kulivwuntauzyila omwini akuzyiba kuti takunainda mazuba aali kkumi mwaabili kuzwa ciindi mebo nindakatantide kuya kukukomba ku Jelusalemu; 12 alimwi kunyina nobakandijana kandikazyanya amuntu uuli woonse mutempele nokuba kuyunga nkamu yabantu kuti italisye manyongwe, mube muzikombelo naa mubusena bumwi mumunzi woonse. 13 Alimwi kunyina nobanga bazisinizya kulinduwe zyintu eezyi nzyobanditamikizya lino. 14 Pele ndilakazumina kaambo aaka kulinduwe kakuti, ndileenda kweelana anzila eeyo njibaamba kuti ‘nkamu yabukombi yabuzangi,’ alimwi munzila eeyi mondibelekela mulimo uusetekene kuli Leza wabamatata, mbwaanga ndilazisyoma zyintu zyoonse zyaambidwe mu Mulawo alimwi azilembedwe mu Basinsimi; 15 alimwi ndilijisi bulangizi kuli Leza, ibulangizi mbobajisi abalo baalumi aaba, kuti kuyooba bubuke bwabantu baluleme abataluleme. 16 Aboobo ndilasoleka lyoonse kuba amanjezyeezya aasalala kuli Leza akubantu. 17 Eelyo nokwakainda myaka minji ndakasika kutegwa ndiletele bantu bamucisi cangu zipego zyaluse akutuula zituuzyo kuli Leza. 18 Lino nondakali kucita zyintu eezyi bakandijana mutempele kandisalazyidwe kweelana amulawo, pele tiindakali ankamu yabantu naa kutalisya lupyopyongano. Pele kwakali ba Juda bamwi bazwa kucooko ca Asiya, 19 aabo ibali kweelede kuti kabaliko kumbele lyako akundipa mulandu, ikuti ncobeni kabajisi kaambo kali koonse andime. 20 Naa ibaalumi aaba mbabonya baliko abaambe beni mulandu ngobakandijanina nindakaimvwi kumbele lya Nkuta Mpati Yaba Juda, 21 kunze lyakaambo komwe aaka nkindakoompolola nindakaimvwi akati kabo kuti, ‘Ndilabetekwa aano sunu kumbele lyanu akaambo kabulangizi bwakubuka kwabafwu!’”
22 Pele akaambo kakuti Felike wakalaazyi kabotu makani aajatikizya Nzila eeyi, wakawiimika mulandu akwaamba kuti: “Ndiyoomukosweda makani aanu aaya kufwumbwa aakusika Lusiya imweendelezi wabasikalumamba.” 23 Alimwi wakalailila silutwe wabasikalumamba kuti Paulo abikkwe muntolongo, pele kalyeendelela, akuti atakasyi muntu uuli woonse akati kabeenzinyina kumukutaukila.
24 Nokwakainda mazuba aali mbwaabede Felike wakasika antoomwe amukaintu wakwe imu Juda Dulusila, alimwi wakatuma mulomo kwiita Paulo eelyo wakamuswiilila kujatikizya kusyoma muli Kilisito Jesu. 25 Pele naakali kwaamba makani aabululami, kulilesya alimwi alubeta luboola, Felike wakayoowa akwaamba kuti: “Mbubo koya lino, pele ndaakujana ciindi cibotu ndiyookutumina mulomo alimwi.” 26 Pele alimwi ciindi eeco wakali kulangila kuti Paulo ulamupa mali aacisinka mulomo. Eeci ncaakali kumwiitila-itila alimwi akubandika anguwe. 27 Pele nokwakainda myaka yobilo, Felike wakalidwa cuuno a Pokiyo Fesito; alimwi akaambo kakuti Felike wakayanda kukkomaninwa aba Juda, wakamusiya muntolongo Paulo.