Milimo
26 Mpoonya Agilipa wakaambila Paulo kuti: “Wazumizyigwa kulyaambilila omwini.” Eelyo Paulo wakatandabika janza lyakwe akutalika kulyaambilila kuti:
2 “Kujatikizya zyintu zyoonse nzyobanditamikizya ba Juda, O Mwami Agilipa, ndilikkomene kuti nkuumbele lyako nkonditiilyaambilile buzuba obuno, 3 ikapati nkaambo ulizizyi kabotu ziyanza zyoonse alimwi amanyongwe aali akati kaba Juda. Aboobo ndakulomba kuti undiswiilile cakukkazyika moyo.
4 “Mubwini, ibuumi mbondakali kupona kuzwa kubukubusi akati kamusyobo wangu amu Jelusalemu bulizyibidwe kabotu aba Juda boonse 5 ibakandizyi musyule, alimwi inga bapa bumboni kuti kabayanda, ikuti ndakali mu Falisi uuzitobela kapati njiisyo zyakakamu kabukombi bwesu. 6 Pele lino ndiliimvwi aano kandibetekwa akaambo kabulangizi mbondijisi bwacisyomezyo Leza ncaakaambila bamatata; 7 kakuli misyobo yesu iili kkumi aibili ilangila kuzuzikizyigwa kwacisyomezyo eeci kwiinda mukulitakata kumumanina mulimo uusetekene masiku asyikati. Ibulangizi oobu mbondijisi mbobandipeda mulandu iba Juda, O mwami.
8 “Nkaambo nzi ncomutasyomi nywebo nobaalumi kuti Leza ulabusya bafwide? 9 Mebo lwangu, ndakalisinizyide kuti ndakeelede kucita zyintu zinji zyakukazya Jesu muna Nazaleta. 10 Eeci ncindakacita ncobeni mu Jelusalemu alimwi basalali banji ndakabaanga muntolongo kweelana anguzu nzyobakandipede basilutwe babapaizi; alimwi nobakapegwa mulandu wakujaigwa, ndakazuminizya. 11 Alimwi kwiinda mukubasubula ziindi zinji muzikombelo zyabo zyoonse, ndakasoleka kubasinikizya kutama lusyomo lwabo; alimwi mbwaanga ndakali mukali kapati mumakani aaya, ndakasika nkondibatobela nomuba muminzi yeengelede kuyoobapenzya.
12 “Kandijisi bubi kucita zyintu eezyi, cimwi ciindi nindakali kweenda kuya ku Damasiko kandipedwe bweendelezi anguzu zyoonse kuzwa kuli basilutwe babapaizi, 13 munzila acilungulungu, O mwami, ndakabona mumuni uumwekesya kwiinda mumuni wazuba iwakamweka kuzwa kujulu kundizinguluka mebo alimwi abaabo mbotwakali kweenda limwi. 14 Alimwi toonse notwakawida ansi ndakamvwa jwi mumwaambo wa Chihebulayo liti, ‘Saulo, Saulo, ino undipenzyezya nzi? Ulalicisa buyo omwini ikuti uzumanane kuzisansa misembele zidyunsyo.’ 15 Pele ndakati, ‘Ino nduwe ni, Mwami?’ Eelyo Mwami wakati: ‘Ndime Jesu ooyo ngopenzya. 16 Nokuba boobo, nyamuka akwiimikila. Nkaambo ncindalibonya kulinduwe, ikutegwa ndikusale kuba mubelesi wangu akamboni wazyintu nzyowalibonena azyintu nzyondiyookutondezya kumbele kujatikizya ndime; 17 ndanookuvwuna kubantu aaba abantu bakuzisi nkonditiikutume, 18 kuyoojalula meso aabo, kuyoobagwisya mumudima akubanjizya mumumuni akubagwisya kubweendelezi bwa Saatani kubaleta kuli Leza, kutegwa balekelelwe zibi akutambula lukono lupegwa baabo basalazyigwa akaambo kalusyomo lwabo mulindime.’
19 “Aboobo, O Mwami Agilipa, tiindakacikazya pe cilengaano eeco cakujulu, 20 pele kusaanguna abaabo bakali ku Damasiko, mpoonya abakali mu Jelusalemu alimwi amucisi coonse ca Judaya akuli bamasi, ndakatola mulumbe wakuti beelede kweempwa akusandukila kuli Leza kwiinda mukucita milimo yeendelana akweempwa kwabo. 21 Eeci ncicakapa kuti ba Juda bandijate mutempele akuyanda kundijaya. 22 Pele akaambo kakuti ndakapegwa lugwasyo kuzwa kuli Leza, ndazumanana kusikila buzuba buno kupa bumboni kubantu-bantu buyo abapati, alimwi tandaambi cintu cili coonse ccita buyo zyintu zyakaambwa a Basinsimi a Musa kuti zyakali kuyoocitika, 23 kuti Kilisito wakali kuyoopenga, alimwi mbwaakali kunooli wakusaanguna kubusyigwa kuzwa kubafwu, wakali kuyookambauka makani aamumuni kubantu aaba alimwi akuli bamasi.”
24 Lino naakali kulyaambilila makani aaya, Fesito wakaamba ajwi pati kuti: “Wasondoka Paulo! Lwiiyo lwaatala lwakupa kusondoka!” 25 Pele Paulo wakati: “Tandisondokede pe, Oolemekwa Fesito, pele ndaamba twaambo twamasimpe alimwi twamaano. 26 Mubwini, imwami ngondaambila cakutayoowa ulaazyi kabotu makani aaya; nkaambo ndilisinizyide kuti kunyina kaambo mumakani aaya nkotazyi, nkaambo zyintu eezyi tiizyakacitilwa kunze aacuulu pe. 27 Sena yebo, O Mwami Agilipa, ulabasyoma basinsimi? Ndilizyi kuti ulabasyoma.” 28 Pele Agilipa wakaambila Paulo kuti: “Muciindi cisyoonto buyo inga wandisandula kuba Munakilisito.” 29 Mpoonya Paulo wakati: “Kulomba kwangu kuli Leza nkwakuti mube muciindi cisyoonto naa cilamfwu yebo alimwi aboonse buyo ibandiswiilila sunu babe mbubonya mbuli ndime, kugwisya buyo nketani eezyi.”
30 Mpoonya mwami wakanyamuka, eelyo mweendelezi, Benike abaalumi mbobakakkede limwi bakanyamuka abalo. 31 Pele nobakali kuzwa bakatalika kwaambaula akati kabo kabati: “Imwaalumi ooyu kunyina cintu ncacita ceelede kumupa kujaigwa naa kwaangwa.” 32 Alimwi Agilipa wakaambila Fesito kuti: “Imwaalumi ooyu naangununwa ikuti naatakalomba kuti mulandu wakwe utolwe kuli Kaisala.”