Milimo
4 Lino Petulo a Johane nobakacili kwaambaula abantu, kwakabbuka basilutwe babapaizi, silutwe wabalindizi baatempele alimwi aba Saduki. 2 Bakalinyemede nkaambo batumwa aaba bakali kuyiisya bantu alimwi akwaambilizya caantangalala bubuke bwa Jesu kuzwa kubafwu; 3 eelyo bakabajata akubabikka muntolongo kusikila buzuba bwakatobela, nkaambo akali kale mangolezya. 4 Nokuba boobo, ibanji akati kabaabo bakaswiilila makani aayo bakasyoma, aboobo mweelwe wabaalumi wakatiisike ku 5,000.
5 Buzuba bwakatobela, kwakabungana beendelezi baba Juda, bapati alimwi abalembi mu Jelusalemu 6 (alimwi kwakali Anasi silutwe wabapaizi, Kayafa, Johane, Alekizanda alimwi abasazinyina banji basilutwe wabapaizi), 7 eelyo bakaimika batumwa aabo akati kabo akutalika kubabuzya kuti: “Ninguzu zyani naa ndizyina lyani ndimwakabelesya kucita ceeci?” 8 Mpoonya Petulo, kazwide muuya uusalala wakati kuli mbabo:
“Nobeendelezi babantu anobapati, 9 ikuti obuno buzuba tubetekelwa mulimo mubotu wakacitwa kumuntu uuciswa alimwi ikuti muyanda kuzyiba wakamuponya muntu ooyu, 10 amuzyibe nywebo nyoonse abantu bamu Isilayeli boonse kuti muzyina lya Jesu Kilisito muna Nazaleta ooyo ngomwakagagaila acisamu pele Leza ngwaakabusya kuzwa kubafwu, nkwiinda mulinguwe imuntu ooyu ncaimvwi kumbele lyanu kaponede. 11 Eeli ‘ndebbwe nywebo nobayaki ndyomwakabona kuti linyina mpindu ilyaba mutwe wakukaswi lino.’ 12 Kunze lyaboobo, kunyina lufwutuko mumuntu uuli woonse, nkaambo kunyina zyina limbi munyika lyapegwa kubantu ndyotweelede kufwutulwa andilyo.”
13 Lino nobakabona busicamba bwa Petulo a Johane akuzyiba kuti tiibakayiide kapati alimwi bakali bantu buyo, bakagambwa kapati. Mpoonya bakazyiba kuti bakali kweenda a Jesu. 14 Nobakali kulanga mwaalumi ooyo wakaponesyegwa kaimvwi ambabo, bakabula cakwaamba. 15 Aboobo bakabalailila kuti bazwide anze aaŋanda ya Nkuta Mpati Yaba Juda, mpoonya bakatalika kulivwiya, 16 kabaamba kuti: “Ino tubacite buti baalumi aaba? Nkaambo ncobeni, bacita cintu cigambya icabonwa abantu boonse bakkala mu Jelusalemu; alimwi tatukonzyi kucikaka pe. 17 Nokuba boobo, ikutegwa mpuwo eeyi itazumanani kumwaika kubantu bambi, atubakonge kuti batacaambi kabili muzyina eeli kumuntu uuli woonse.”
18 Bamane kwaamba boobo bakabaita akubalailila kuti bataambi cili coonse nokuba kuyiisya muzyina lya Jesu kuli koonse. 19 Pele Petulo a Johane bakaingula kuti: “Naa cililuleme mumeso aa Leza kumvwida ndinywe muciindi cakumvwi-da Leza, amulisalile nobeni. 20 Pele swebo, tatukonzyi kuleka kwaamba zyintu nzyotwakabona akumvwa.” 21 Aboobo, nobakamana kubakonga lwabili, bakabaangununa mbwaanga bakanyina kaambo kali koonse kakubasubwida alimwi bakali kuyoowa bantu, nkaambo bantu boonse bakali kutembaula Leza kujatikizya ceeco cakacitikide. 22 Nkaambo muntu ooyo wakaponesyegwa munzila yamaleele wakajisi myaka yakuzyalwa yiinda kumakumi one.
23 Nobakaangununwa bakaunka kubasyominyina akuyoobalwiida nzyobakabaambila basilutwe babapaizi alimwi abapati. 24 Nobakamvwa makani aaya boonse caantoomwe bakapaila kuli Leza balaamba:
“O Mwami Singuzuzyoonse, nduwe wakalenga julu, nyika, lwizi azyintu zyoonse zili mumo, 25 alimwi kwiinda mumuuya uusalala wakaamba kumulomo wataateesu Davida, mubelesi wako kuti, ‘Nkaambo nzi masi ncaakanyongana alimwi abantu ncobakali kuyeeyesya zyintu zyabuyo? 26 Bami bamunyika eeyi bakalibambila alimwi beendelezi bakabungana antoomwe kuti balwane Jehova amunanike wakwe.’ 27 Nokuba boobo, Heloda a Pontiyo Pilato abamasi alimwi abantu bamu Isilayeli bakabungana antoomwe mumunzi ooyu ikutegwa balwane mubelesi wako uusalala Jesu, ooyo ngowakananika, 28 ikutegwa bacite ceeco munguzu zyako amukuyanda kwako ncowakasalila limwi kuti cicitike. 29 Lino Jehova, koswiilila kukonga kwabo alimwi kopa bazike bako kuzumanana kukanana ijwi lyako cabusicamba, 30 notandabika janza lyako kuponya bantu, alimwi akucita zitondezyo azyintu zigambya kwiinda muzyina lyamubelesi wako uusalala Jesu.”
31 Eelyo nobakamana kukombelezya boobu, busena oomo mobakaswaangene antoomwe bwakazungaanizyigwa; alimwi boonse bakazula muuya uusalala alimwi bakali kukanana ijwi lya Leza cabusicamba.
32 Kunze lyaboobo, inkamu yabantu aabo bakasyoma yakali amoyo omwe amuzeezo omwe, alimwi kunyina naba omwe wakali kwaamba kuti zyintu nzyaakajisi zyakali zyakwe alikke; pele bakali kwaabana zyintu zyoonse. 33 Alimwi batumwa bakazumanana kupa bumboni canguzu kapati kujatikizya bubuke bwa Mwami Jesu; alimwi luzyalo lupati lwa Leza lwakali aali mbabo boonse. 34 Mubwini kunyina wakabulide cintu akati kabo; nkaambo boonse ibakajisi myuunda naa maanda bakali kuzisambala akuleta mali aakajanwa 35 akwaapa batumwa. Mpoonya batumwa bakali kwaabanya bantu, umwi aumwi kweelana akubula kwakwe. 36 Aboobo Josefa ooyo batumwa ngobakaulika izyina lyakuti Banaba, ilyaamba kuti Mwana Waluumbulizyo lyasandululwa, imu Levi uukkala ku Kupulo, 37 wakasambala nyika njaakajisi eelyo mali ngaakajana wakaaleta akwaapa batumwa.