Baroma
10 Bakwesu, nceyandisya mumoyo wangu akubakombelezyela kuli Leza, ncakuti bakafwutulwe. 2 Inzya, ndilazumina kuti mbasungu kubelekela Leza; pele ikutali kweelana aluzyibo lwini-lwini; 3 nkaambo mbwaanga tiibakabuzyi bululami bwa Leza, pele bakali kusoleka kulibikkila bululami bwabo beni, tiibakalibombya pe kubululami bwa Leza. 4 Nkaambo Kilisito ngamamanino aa Mulawo, kutegwa muntu uuli woonse uusyoma abe mululami.
5 Nkaambo Musa wakalemba kuti muntu uucita bululami bwaambwa mu Mulawo unoopona akaambo kambubo. 6 Pele kujatikizya bululami bujanwa akaambo kalusyomo, Magwalo aamba kuti: “Utalibuzyi mumoyo wako kuti, ‘Nguni utiitante kujulu?’ nkokuti, kuyooselusya Kilisito; 7 naa kuti, ‘Nguni utiinjile mumulindi uutagoli?’ nkokuti, kuyoobusya Kilisito kuzwa kubafwu.” 8 Pele ino Magwalo aamba nzi? Aamba kuti, “Ijwi lili munsi andinywe, mukanwa mwanu amumyoyo yanu”; nkokuti, “jwi” lyalusyomo, eelyo ndyotukambauka. 9 Nkaambo ikuti kamwaambilizya caantangalala ‘ijwi eelyo lili mukanwa mwanu,’ kuti Jesu ngo Mwami, akusyoma mumyoyo yanu kuti Leza wakamubusya kuzwa kubafwu, muyoofwutulwa. 10 Nkaambo muntu utondezya lusyomo ndwajisi mumoyo kutegwa abe mululami, pele amulomo wakwe ulaambilizya antangalala kutegwa ajane lufwutuko.
11 Nkaambo Magwalo aamba kuti: “Kunyina naba omwe uusyoma mulinguwe uuyootyompwa.” 12 Nkaambo kunyina kwiindana akati kamu Juda amu Giliki, nkaambo Mwami wabo boonse ngumwi buyo, uupa zileleko zinji kuli boonse aabo bamwiita. 13 Nkaambo “woonse wiita zyina lya Jehova uyoofwutulwa.” 14 Pele ino balamwiita buti ooyo ngobatasyomi? Alimwi ino mbuti mbobakonzya kumusyoma ooyo ngobatanamvwide? Alimwi ino balamvwa buti kakunyina uukambauka? 15 Alimwi ino balakambauka buti batatumwa? Mbubonya mbokulembedwe kuti: “Taaliboteli kaka maulu abaabo baambilizya makani mabotu aazyintu zibotu!”
16 Nokuba boobo, tabali boonse bakaazumina makani mabotu. Nkaambo Izaya waamba kuti: “Jehova, ino nguni wakasyoma zyintu nzyobakamvwa kulindiswe?” 17 Aboobo lusyomo lujanwa buyo lyamana kumvwugwa jwi. Alimwi jwi lilamvwugwa muntu naamba kujatikizya Kilisito. 18 Nokuba boobo, andibuzye kuti, Sena tiibakamvwa? Nkaambo kayi, “majwi aabo akamvwugwa munyika yoonse, alimwi mulumbe wabo wakamwaika kusikila kumagolelo aanyika.” 19 Nokuba boobo, alimwi andibuzye kuti, Sena bana Isilayeli tiibakazyiba? Kusaanguna Musa waamba kuti: “Ndiyoomupa kuba abbivwe kwiinda mubantu ibatali musyobo; ndiyoomunyemya kwiinda mumusyobo mufwubafwuba.” 20 Pele Izaya ulaamba cabusicamba kuti: “Ndakajanwa abaabo ibatakali kundilangaula; ndakazyibwa abaabo ibatakali kubuzya zyandime.” 21 Pele kujatikizya bana Isilayeli waamba kuti: “Buzuba boonse ndali kutandabika maanza aangu kubantu bataswiilili ibanyansya.”