Baroma
4 Mbwaanga cili boobo, ino tulaamba nzi kujatikizya Abulahamu taateesu wakunyama? 2 Mucikozyanyo, ikuti Abulahamu naakaambwa kuti mululami akaambo kamilimo, naakajisi kaambo kakulilumbaizya; pele ikutali kuli Leza pe. 3 Nkaambo, ino kayi lugwalo lwaamba buti? “Abulahamu wakasyoma Jehova, eelyo Leza wakamubona kuti mululami.” 4 Lino kumuntu uubeleka imali ngavwola taaboni kuti nduzyalo pe, pele waabona kuti ncikwelete. 5 Pele muntu uutasyomi milimo yakwe mwini, pele uusyoma Leza ooyo uukonzya kwaamba sizibi kuti mululami, imuntu uuli boobo ubonwa kuti mululami akaambo kalusyomo lwakwe. 6 Mbubonya awalo Davida mbwaamba zyalukkomano lwamuntu ooyo Leza ngwaamba kuti mululami ikutali akaambo kamilimo kuti: 7 “Balikkomene aabo balekelelwa milandu yabo abaabo bavwumbilwa zibi zyabo; 8 ulikkomene muntu ooyo Jehova ngwatabikkilili zibi zyakwe.”
9 Aboobo sena lukkomano oolu lusikila buyo bantu bapalwidwe naa lulabasikila abantu batapalwidwe? Nkaambo twaamba kuti: “Abulahamu wakabonwa kuti mululami akaambo kalusyomo lwakwe.” 10 Ino wakali mubukkale buli buti naakabonwa kuti mululami? Sena ndeelyo naakapalwidwe naa katanapalulwa? Talili leelyo naakapalwidwe pe, pele ndeelyo naatakaningapalulwa. 11 Alimwi wakatambula citondezyo nkokuti bupalule, kacili cisinizyo cabululami kwiinda mulusyomo ndwaakajisi katanapalulwa, kutegwa abe usyi wabaabo boonse bajisi lusyomo nobatapalwidwe, ikutegwa babonwe kuti mbalulami; 12 alimwi akuti abe usyi walunyungu lupalwidwe, ikutali buyo kuli baabo batobela bupalule bwakumubili, pele akuli baabo ibalutobela kapati lusyomo oolo ndwaakajisi taateesu Abulahamu katanapalulwa.
13 Nkaambo Abulahamu naa lunyungu lwakwe tiibakatambula cisyomezyo cakuti uyooba sikukona nyika kwiinda mumulawo pe, pele nkwiinda mubululami akaambo kalusyomo lwakwe. 14 Nkaambo ikuti aabo beendelezyegwa amulawo mbaasikukona, nkokuti lusyomo luba lwabuyo acisyomezyo cajaigwa. 15 Mulawo nguupa kuti muntu asikilwe bukali, pele nokutakwe mulawo akwalo kusotoka mulawo takuko.
16 Aboobo wakapegwa cisyomezyo akaambo kalusyomo ikutegwa kwiinda muluzyalo lwa Leza cisyomezyo eeco cisinizyigwe kulunyungu lwakwe loonse, ikutali buyo kuli baabo batobela Mulawo pele akuli baabo batobela lusyomo lwa Abulahamu ooyo uuli ngutaateesu toonse. 17 (Cili boobo kweelena ambokulembedwe kuti: “Ndakusala kuti ube usyi wamisyobo minji.”) Cisyomezyo eeci cakaambwa kumbele lya Leza Ooyo ngwaakali kusyoma, uubusya bafwide akwaamba zyintu zitanacitika mbuli kuti zilicitikide kale. 18 Nokuba kuti kwakanyina kaambo kakubeda abulangizi, pele akaambo kabulangizi wakasyoma kuti ulakonzya kuba usyi wamisyobo minji kweelana amajwi akaambwa aakuti: “Oobu mboluyooba lunyungu lwako.” 19 Alimwi nokuba kuti lusyomo lwakwe tiilwakamana, wakayeeya mubili wakwe lino iwakali kubonwa kuti ulifwide kale, mbwaanga wakali amyaka iitandila kumwaanda, alimwi akuti Sala tanaakali kuzyala. 20 Pele akaambo kacisyomezyo ca Leza tanaakazungaana pe mulusyomo akutalika kudooneka, pele wakayuma akaambo kalusyomo lwakwe, wakalemeka Leza 21 alimwi wakalisinizyide cakumaninina kuti eezyo nzyaakasyomezya wakali kukonzya kuzizuzikizya. 22 Akaambo kaceeci “wakabonwa kuti mululami.”
23 Pele majwi aakuti “wakabonwa kuti mululami” taakalembelwa Abulahamu alikke pe, 24 pele alatujatikizya andiswe notweelede kubonwa boobo nkaambo tulamusyoma ooyo wakabusya Jesu Mwami wesu kuzwa kubafwu. 25 Wakajaigwa akaambo kamilandu yesu alimwi wakabusyigwa kutegwa Leza atubone kuti tuliluleme.