2 Bakorinto
12 Ndileelede kulilumbaizya. Tacigwasyi pe; pele lino ndilabandika zilengaano zigambya alimwi aziyubunuzyo zya Mwami. 2 Kuli muntu umwi uukamantene a Kilisito ngondizyi, ooyo myaka iili kkumi aine yainda wakakwempelwa kujulu lyatatu. Lino tandizyi naa wakakwempwa kali amubili wanyama naa pe; Leza alikke nguuzyi. 3 Inzya, muntu uuli boobo ndilimuzyi, pe-le tandizyi naa wakali amubili wanyama naa wakalaandeene amubili, Leza nguuzyi. 4 Ncondizyi ncakuti wakakwempelwa mupaladaiso akumvwa majwi aataambiki alimwi aatazumizyidwe kwaambwa amuntu. 5 Ndilalilumbaizya kujatikizya muntu ooyo, pele lwangu ndemwini tandikonzyi kulilumbaizya pe, ccita buyo kujatikizya kubula nguzu kwangu. 6 Nkaambo nokuba kuti ndayanda kulilumbaizya, tandikooba mufwubafwuba pe, nkaambo ndilaamba zyakasimpe. Pele ndalikasya kucita boobo, ikutegwa kutabi muntu naba omwe uundilumbaizya kapati kwiinda zyintu nzyabona kandicita naa nzyamvwa kandaambaula, 7 akaambo buyo kakutambula ziyubunuzyo eezyo zigambya.
Aboobo, ikutegwa nditalisumpuli cakwiindilila, ndakayaswa bumvwa mumubili, imungelo wa Saatani kuti kanduuma lyoonse, ikutegwa nditalisumpuli cakwiindilila. 8 Aboobo kujatikizya ceeci, ndakakombelezya Mwami ziindi zyotatwe kuti andisongole bumvwa oobo. 9 Pele walo wakandaambila kuti: “Luzyalo lwangu lulizyulide kulinduwe; nkaambo nguzu zyangu zilalondolwa mukubula nguzu kwako.” Aboobo, ndilalilumbaizya cakukondwa kujatikizya kubula nguzu kwangu, ikutegwa nguzu zya Kilisito zizumanane kuba atala lyangu mbuli tente. 10 Aboobo ndilabotelwa eelyo nonditajisi nguzu, nonditukilwa, nondibula ziyandika, nondipenzyegwa akucitikilwa mapenzi aambi akaambo ka Kilisito. Nkaambo eelyo nonditajisi nguzu, ndendilyo nondijisi nguzu kapati.
11 Ndaba mufwubafwuba. Ndinywe mwakandipa kuba boobo, nkaambo mwakeelede kundilumbaizya. Nkaambo nokuba kuti tandibalwi pe, kunyina cintu nociba comwe ncondakalezya kubatumwa banu bacibwene kwiinda boonse. 12 Mubwini, izitondezyo zyamutumwa zyakatondezyegwa akati kanu akuliyumya kupati, alimwi akwiinda muzitondezyo azyintu zigambya alimwi amilimo mipati. 13 Nkaambo ino mbungano zimwi zyoonse zyakajisi coolwe nzi ncomwatakajisi nywebo kunze lyakuti tiindakaba mukuli uuminya kulindinywe? Ndalomba mundilekelele cibi eeci.
14 Amubone! Eeci nciindi catatu kandilibambilide kuboola kulindinywe, pele tandikooba mukuli uuminya pe. Nkaambo tandiyandi lubono lwanu pe, pele ncondiyanda ndinywe; nkaambo bana tabalangilwi kuyobweda bazyali babo lubono pe, pele bazyali mbabalangilwa kuyobweda bana babo. 15 Mebo cilandibotela kapati kusowa zyintu zyangu zyoonse akulitakata cakumaninina lwangu ndemwini akaambo kabuumi bwanu. Ikuti mebo kandimuyanda kapati, sena nywebo mweelede kundiyanda asyoonto? 16 Pele kufwumbwa mbozyibede zyintu, cipati ncakuti tiindamuminya pe. Nokuba boobo, mwaamba kuti, ndakabelesya “lweeno” alimwi ndakamucitila “cabucenjezu.” 17 Akati kabaabo mbondakatuma kulindinywe, sena kuli nindakamuunina kwiinda muli mbabo? 18 Ndakalomba Tito kuti aboole kulindinywe alimwi ndime ndakamutuma imukwesu ooyo ngobali limwi. Sena Tito wakamuunina? Peepe, kunyina naakasola abuniini. Sena tiitwakakamantene mumizeezo anguwe? Sena tiitwakali kweenda mumukondo omwe anguwe?
19 Sena ciindi coonse mwali kuyeeya kuti twali kusola kulilulamika kulindinywe? Nkuumbele lya Leza nkotwaambila kujatikizya Kilisito. Pele, nobayandwa, zyintu zyoonse nzyotucita nzyakumuyaka. 20 Nkaambo ndiliyoowede kuti ambweni ndaakuboola, tandikamujani mbuli mbondali kuyanda alimwi andime ambweni tandinooli mbuli mbomwali kuyanda, pele muciindi caboobo, ndiyoojana kuti kuli kulwana, ibbivwe, bukali, mazwanga, kutamikizyanya, kuvwiyana, kulisumpula alimwi alupyopyongano. 21 Ambweni ndaakuboola alimwi, Leza wangu uyoonduusya nsoni kumbele lyanu, eelyo inga ndaakulila bantu banji aabo bakabisya musyule, pele batanaempwa kubusofwaazi, bwaamu alimwi abukkale bwabo busesemya mbobakapona.