Bakolose
2 Nkaambo ndiyanda kuti muzyibe mbondipenga kapati akaambo kandinywe abaabo bali ku Laodikeya alimwi abaabo boonse batanandibona cantongolameso. 2 Eeci cili boobo ikutegwa baumbulizyigwe akuti bakamantane muluyando. Munzila eeyi banoojisi lubono, nkokuti kumvwisya kwini-kwini alimwi kusinizizye kubikkilizya aluzyibo lwini-lwini lujatikizya maseseke aa Leza, nkokuti Kilisito. 3 Mulinguwe molusisidwe kabotu-kabotu lubono loonse lwabusongo alimwi aluzyibo. 4 Ndaamba boobu kutegwa kutabi muntu uuli woonse uumweena amakani aakoongelezya. 5 Masimpe, tandili andinywe kumubili, pele ndili andinywe kumuuya, eelyo ndilakondwa nondibona mbomuzicita kabotu zyintu alimwi akuyuma kwalusyomo lwanu muli Kilisito.
6 Aboobo, mbubonya mbomwakamuzumina Kilisito Jesu Mwami, amuzumanane kweenda kamukamantene anguwe, 7 kamusimpide miyanda akuyakwa mulinguwe alimwi akukkalikila mulusyomo lwanu, mbubonya mbomwakayiisyigwa, alimwi lusyomo lwanu kaluvwula cakufwasuka nomupa kulumba.
8 Amucenjele kutegwa kutabi muntu uumoongelezya kuti mucegwe kwiinda mubusongo bwabantu alweeno, kweelana atunsiyansiya twabantu azyintu zitakwe mulimo zyamunyika eeyi ikutali kweelana a Kilisito. 9 Nkaambo mulinguwe mobubede bube bwa Leza boonse. 10 Aboobo kunyina ncomubulide pe akaambo kanguwe, ooyo uuli ngomutwe wamfwulumende zyoonse abweendelezi boonse. 11 Kwiinda mulinguwe anywebo mwakapalulwa abupalule bwatakacitwa amaanza abantu kwiinda mukugusya nyama yamubili wacibi. Mwakapalulwa abupalule buswaangene a Kilisito. 12 Nkaambo mwakazikkwa antoomwe anguwe mulubbapatizyo lwakwe, alimwi kwiinda mulinguwe anywebo mwakabusyigwa antoomwe anguwe akaambo kalusyomo lwanu muzyintu zyakacitwa anguzu zya Leza, ooyo wakamubusya kuzwa kubafwu.
13 Kunze lyaboobo, nokuba kuti mwakalifwide mumilandu yanu alimwi amukutapalulwa kwamibili yanu, Leza wakamupa kuba baumi antoomwe anguwe. Wakatulekelela milandu yesu yoonse cabuuya 14 alimwi wakamwaya ceeco cakalembedwe ajanza icakajisi malailile alimwi icakali kutukazya. Wakacigusya kwiinda mukucigagaila acisamu cakupenzyezya. 15 Wakazunda mfwulumende abeendelezi banzizyo kwiinda munguzu zyacisamu cakupenzyezya alimwi wakababikka antangalala ikutondezya kuti wakabazunda akubasololela kabeenda mbuli nkamu yazundwa.
16 Aboobo kutabi muntu naba omwe uumubeteka mumakani aakulya akunywa naa kujatikizya pobwe naa kusekelela mwezi mupya naa Sabata. 17 Zyintu eezyo ncimvwule buyo cazyintu ziciboola kumbele, pele icintu cini-cini ngu Kilisito. 18 Kutabi muntu naba omwe uumunyanga bulumbu bwanu ooyo uukkomanina kulicesya kwakubeja akukomba bangelo, “uuli kulubazu” lwazyintu nzyaakabona. Mubwini muntu ooyo akaambo kamizeezo yakwe yanyama uulisumpula kakunyina kaambo keni-keni, 19 alimwi tajatilide kumutwe wakwe, kuli yooyo uupa kuti mubili woonse kausaninwa akunungwa kabotu-kabotu mumanungo alimwi amilambi, alimwi akukomena kweelana akukomezya kwa Leza.
20 Ikuti naa mwakafwa antoomwe a Kilisito kuzyintu zitakwe mulimo zyamunyika eeyi, nkaambo nzi ncomupona mbuli kuti mucili banyika kwiinda mukuzumanana kutobela milawo yakuti, 21 “Utajati, utalabili, utagumi,” 22 nkokuti ikwaamba zyintu zyoonse izinyonyoonwa kwiinda mukubelesyegwa? Eeci cileendelana amilawo alimwi anjiisyo zyabantu. 23 Nokuba kuti zyintu eezyo zilibonya mbuli kuti nzyabusongo mukukomba kwakulipangila, mukulicesya kwakubeja, akupenzya mubili, tazigwasyi pe mukulwana zisusi zyamubili.