Bakolose

4 Nywebo nobasimalelo, amubacitile ziluleme alimwi zyeelede bazike banu, kamuzyi kuti anywebo mulijisi Simalelo kujulu.

2 Amuyume kupaila, kamupakamene lyoonse mumupailo akulumba. 3 Aciindi nciconya kamutupailila andiswe, kutegwa Leza atujalwide mulyango wakuti twaambe jwi, twaambilizye maseseke aakwe aajatikizya Kilisito, aayo aandipede kwaangwa muntolongo; 4 kutegwa ndaapandulule munzila yeelede.

5 Amuzumanane kweenda cabusongo akati kabantu bakunze, alimwi kamucibelesya kabotu ciindi coonse ncomujisi. 6 Majwi aanu kaakondelezya lyoonse, aalweezyedwe kabotu amunyo kutegwa muzyibe mbomweelede kumwiingula muntu umwi aumwi.

7 Tukiko, imukwesu ngweyandisya, imubelesi uusyomeka alimwi muzikema mu Mwami, uyoomuzyibya makani oonse aajatikizya ndime. 8 Ndilamutuma kulindinywe kutegwa muzyibe mbotubede, akuti amukkazyike myoyo. 9 Walo antoomwe a Onesimo, imukwesu uusyomeka alimwi ngweyandisya, ooyo uuzwa akati kanu, bayoomwaambila zyintu zyoonse zicitika okuno.

10 Alisitako, imwaangema wamwaanzya, alimwi wamwaanzya awalo Maako imweeninyina Banaba, (ooyo ngomwakalaililwa kuti mumutambule ikuti naa wasika kulindinywe,) 11 alimwi a Jesu ooyo uutegwa Jusito, aaba bali akati kabaabo bapalwidwe. Aaba balikke mbabasimilimoma kujatikizya Bwami bwa Leza, alimwi mbambabo ibanduumbulizya kapati. 12 Epafula, imuzike wa Kilisito Jesu, ooyo uuzwa akati kanu, wamwaanzya. Ulalitakata lyoonse mumipailo yakwe kujatikizya ndinywe, kutegwa kumamanino mukaime kamuzulide alimwi kamusinizyide cakumaninina muzyintu zyoonse ziyanda Leza. 13 Nkaambo mebo ndili kamboni wakwe kuti ulalitakata kubelekela ndinywe abaabo bali ku Laodikeya alimwi aku Helapoli.

14 Luka, imusilisi uuyandwa wamwaanzya, alimwi awalo De-ma wamwaanzya. 15 Amundaanzyizye bakwesu bali ku Laodikeya amucizyi Numfa alimwi ambungano iiswaanganina muŋanda yakwe. 16 Lino mwaakumana kulubala lugwalo oolu akati kanu, amukacite bubambe bwakuti lukabalwe akumbungano yabana Laodikeya alimwi akuti andinywe mukalubale oolo luzwa ku Laodikeya. 17 Alimwi amwaambile Akipo kuti: “Kozumanana kubikkila maano kumulimo ngowakazumina mu Mwami kuti wuuzuzikizye.”

18 Mebo nde Paulo, ndamulembela kwaanzya kwangu ooku ajanza lyangu ndemwini. Kamuziyeeya lyoonse nketani zyangu. Luzyalo lwa Leza alube andinywe.