Bahebrayo

1 Ikaindi Leza wakali kwaambaula ziindi zinji alimwi amunzila zinji kuli bamatata kwiinda mubasinsimi. 2 Lino kumamanino aamazuba aaya watwaambila kwiinda mu Mwanaakwe, ooyo ngwaakasala kuba sikukona wazyintu zyoonse, alimwi kwiinda mulinguwe wakapanga bweende bwazyintu bwiindene-indene. 3 Walo nkokumweka kwabulemu bwa Leza acikozyanyo cini-cini cambwabede Leza, alimwi zyintu zyoonse ulazibamba kuti kazipona ajwi lyanguzu zyakwe; alimwi naakamana kusalazya zibi zyesu wakakkala kujanza lyalulyo lya Mupati mumasena aakujulu. 4 Aboobo walo wakaba mupati kwiinda bangelo, nkaambo wakakona zyina libotu kapati kwiinda lyabo.

5 Mucikozyanyo, nguni akati kabangelo Leza ngwaakaambila kuti: “Uli mwanaangu; imebo sunu, ndaba bauso”? Alimwi akuti: “Mebo lwangu ndiyooba bausyi, alimwi walo kumugama uyooba mwanaangu”? 6 Pele alimwi aleta Mwanaakwe Mutaanzi kuzyalwa kubantu munyika, waamba kuti: “Alimwi ibangelo ba Leza boonse abamufwugamine.”

7 Alimwi, ikujatikizya bangelo waamba kuti: “Ucita bangelo bakwe kuba myuuya, ababelesi bakwe kuba mulilo uuvwilima.” 8 Pele kujatikizya Mwanaakwe waamba kuti: “Leza ncuuno cako cabwami lyoonse mane kukabe kutamani, alimwi nkoli yabwami bwako ninkoli yabululami. 9 Wakayanda bululami, alimwi wakasula bubi. Nkakaambo kaako Leza, Leza wako, wakakunanika mafwuta aalutangalo manji kwiinda beenzinyoko.” 10 Alimwi waamba kuti: “O Mwami, kumatalikilo nduwe ookabikka ntalisyo yanyika, alimwi imajulu milimo yamaanza aako. 11 Lino nyika amajulu ziyoonyonyooka, pele yebo unooliko lyoonse; alimwi zyoonse buyo ziyoomana mbubonya mbuli cisani, 12 alimwi uyoozivwunga mbubonya mbuli jansi, mbuli cisani; alimwi ziyoocincigwa, pele yebo uli mbubonya mbuli lyoonse, alimwi myaka yako tiikagoli pe.”

13 Pele ino nguni akati kabangelo Leza ngwaakaambila kuti: “Kkala kujanza lyangu lyalulyo, kusikila ndikabikke basinkondonyoko bakabe cilyatilo camaulu aako”? 14 Sena boonse tabali myuuya iibeleka mulimo uusalala, ibatumwa kubelekela baabo ibayookona lufwutuko?