Bahebrayo

12 Aboobo lino, akaambo kakuti tuzingulukidwe ankamu* mpati boobu yabakamboni, aswebo atuzisowe zyoonse zitulemena alimwi acibi eeco cifwambaana kutuzambaila, alimwi atubalike cakuliyumya mukusiyana nkotubikkilidwe kumbele, 2 mbotugamikide meso ku Musololi Mupati alimwi Uulondola lusyomo lwesu, Jesu. Nkaambo akaambo kalukkomano ndwaakabikkilidwe kumbele wakaliyumya acisamu cakupenzyezya, wakaubaula kuusyigwa nsoni, alimwi lino ulikkede kujanza lyalulyo lyacuuno cabwami ca Leza. 3 Ncobeni, amumuyeeyesye ooyo wakaliyumya naakali kusampaulwa boobu abasizibi aabo mukucita boobo ibakali kulinyonyoona lwabo beni, kutegwa mutakatali pe akutyompwa.

4 Mukulwana cibi eeco, tamunalwana kusikila nkobutika buya bulowa bwanu, 5 alimwi mwakulubila limwi kukombelezya ikumwaamba kuti muli bana, kwakuti: “Mwanaangu, utalunyansyi pe lulayo luzwa kuli Jehova, nokuba kulenda moyo nolulamikwa anguwe; 6 nkaambo kufwumbwa ooyo ngwayanda Jehova ulamulaya; mane buya, ulamukwibbaula* uuli woonse ngwatambula kuba mwanaakwe.”

7 Mweelede kuliyumya nkaambo eeyo ninzila imwi yakulaigwa kwanu. Leza umucitila mbuli bana bakwe. Nkaambo ino mwana uuli buti uutalaigwi abausyi? 8 Pele ikuti nomwatakalaigwa nyoonse, ncobeni nomuli bana bamusyokwe, ibatali bana bamuŋanda. 9 Kunze lyaboobo, bamatata bakumubili bakali kutulaya, alimwi twakali kubalemeka. Sena tatweelede kulibombya kwiinda waawo kuli Taata wabuumi bwesu bwakumuuya kutegwa tupone? 10 Nkaambo bakatulaya kwaciindi cisyoonto kweelana anzyobakali kubona kuti nzibotu, pele Leza walo ucita boobo kuti tugwasyigwe ikutegwa tusalale mbubonya mbulinguwe. 11 Masimpe, kunyina lulayo lukkomanisya nolupegwa, pele lulausisya; nokuba boobo kuzwa waawo luzyala mucelo waluumuno abululami kuli baabo ibakayiisyigwa andulo.

12 Aboobo amwaayumye maanza aalebukide amazwi aagonkeledwe, 13 alimwi amuzumanane kululamika nzila zyamaulu aanu, kutegwa cibeela cilemene citazwi munswaanganino yamafwuwa, pele kuti ciponesyegwe. 14 Amusungwaale kuyandaula luumuno abantu boonse, alimwi akusalala nkaambo ikuti muntu katasalali takonzyi kuyoomubona Mwami pe. 15 Kamulangisisya kuti kutabi muntu naba omwe uukakilwa kujana luzyalo lwa Leza akuti kutameni muyanda uuli woonse uulula akutalisya mapenzi ikutegwa banji batasofwaazyigwi anguwo; 16 alimwi akati kanu kutabi sibwaamu naa muntu uuli woonse uutabikkili maano kuzyintu zisetekene, mbuli Esau ooyo iwakaaba zyoolwe zyakwe zyakuba mutaanzi kuzyalwa kwiinda mukuzicincanya acakulya comwe buyo. 17 Nkaambo mulizyi kuti eelyo naakayanda kukona cilongezyo eeco wakakakwa, nkaambo nokuba kuti wakasolekesya amisozi kucinca mizeezo yabausyi, tanaakazwidilila pe.

18 Nkaambo tiimwasika afwaafwi aceeco ncomukonzya kujata alimwi icivwilima mulilo, alimwi icijisi kkumbi lisiya amudima uusiya mbi alimwi aguwo pati libbubbula, 19 alimwi akulila kwamweembo ajwi lyaambaula, eelyo lyakapa kuti bantu ibakalimvwa bakombelezye kuti kutabi majwi aambi ngobaambilwa. 20 Nkaambo tiibakakonzya kuliyumya kumulawo wakuti: “Ikuti naba munyama waciguma cilundu, weelede kupwaigwa mabwe.” 21 Kunze lyaboobo, eezyo zyakalibonya zyakali kuyoosya kapati cakuti Musa wakati: “Ndiliyoowede alimwi akukankama.” 22 Pele nywebo musikide afwaafwi a Cilundu ca Ziyoni alimwi amunzi wa Leza uupona, Jelusalemu wakujulu, akumakamu-makamu aabangelo aatabaliki, 23 amuswaangano mupati, akumbungano yabataanzi kuzyalwa ibalembedwe kujulu, akuli Leza ooyo Mubetesi waboonse, akubuumi bwakumuuya bwabaluleme aabo ibalondolwa, 24 akuli Jesu simwiimaakati wacizuminano cipya, akubulowa bwakasansailwa, ibwaambaula munzila mbotu kapati kwiinda bulowa bwa Abelo.

25 Amucenjele kuti mutakakilwi kuswiilila yooyo waambaula. Nkaambo ikuti naa tiibakafwutuka aabo bakakakilwa kuswiilila yooyo wakali kubapa kucenjezya kwa Leza anyika, swebo tunooli muntenda mpati yakutafwutuka ikuti twamuunduluzya ooyo waambaula kuzwa kujulu. 26 Kuciindi eeco ijwi lyakwe lyakazungaanya nyika, pele lino wasyomezya kuti: “Alimwi ndiyoozungaanya ikutali buyo nyika ilikke pe, pele ajulu.” 27 Lino ibbala lyakuti “Alimwi” lyaamba kugusyigwa kwazyintu izizungaanizyigwa—nkokuti izyintu zyakapangwa*—ikutegwa izyintu eezyo izitazungaanizyigwi zizumanane kubako. 28 Aboobo, lino mbotwabona kuti tuyootambula Bwami butakonzyi kuzungaanizyigwa, atuzumanane kulukkomanina luzyalo lwa Leza, kutegwa kwiinda mulindulo tukonzye kubelekela Leza mulimo uusetekene munzila yeelede cakuyoowa Leza akumulemeka kapati. 29 Nkaambo alimwi Leza wesu mulilo uusyukutya.