Bahebrayo
9 Icizuminano cakusaanguna cakalijisi milawo yamulimo uusetekene abusena bwaco busalala bwaanyika. 2 Nkaambo mutente kwakayakidwe kaanda kakusaanguna oomo mwakali cibikkilo camalambe, tebulu, amikamu yacinkwa yacituuzyo; alimwi aaka kaitwa kuti “Busena Busalala.” 3 Pele kusyule amulembo wakusitilizya wabili kwakali kaanda kamutente kakali kwiitwa kuti “Busena Busalalisya.” 4 Mukaanda aaka, mwakali cakutentela tununkilizyo cangolida abbokesi lyacizuminano lyakazilulwidwe ngolida koonse-koonse, oomo imwakali kabiya kangolida kakajisi mana alimwi amusako wa Aloni iwakasonsa alimwi amabwe aapapalete aacizuminano; 5 pele atala abbokesi kwakali bakkelubi babulemu ibakali kuvwumbilila civwunisyo cabbokesi cakumanya zibi. Pele lino tacili ciindi cakubandika bumpiyompiyo boonse bwazyintu eezyi pe.
6 Izyintu eezyi nozyakamana kuyakwa munzila eeyi, ibapaizi bali kunjila mukaanda kamutente kakusaanguna ciindi coonse kuyoocita milimo iisetekene; 7 pele mupaizi mupati ulanjila alikke mukaanda kabili ciindi comwe amwaka, alimwi tanjili buyo katakwe bulowa, oobo mbwalituulila lwakwe mwini alimwi akujatikizya zibi zyabantu nzyobakacita mukutazyiba. 8 Aboobo muuya uusalala ulacisalazya kuti nzila yakunjila mubusena busalala tiiyakaninga kulibonya eelyo tente lyakusaanguna nolyakaciliko. 9 Itente ndimunya eeli ncikozyanyo cakuciindi ecino, alimwi kweelana abubambe oobu, izipego alimwi azipaizyo zilatuulwa. Nokuba boobo, eezyi tazikonzyi pe kupa muntu uucita mulimo uusetekene kuba amanjezyeezya aalondokede. 10 Zijatikizya buyo zyakulya, zyakunywa alimwi anzila ziindene-indene zyakusalazya bantu alimwi azyintu.* Zyakali milawo iijatikizya mubili alimwi zyakeelede kutobelwa kusikila ciindi cibikkidwe cakululamika zyintu.
11 Pele, Kilisito naakaboola kali mupaizi mupati wazyintu zibotu izicitikide kale, wakainda mutente lipati alimwi lilondokede kwiinda leelyo lyakayakwa amaanza aabantu, nkokuti, litali lyazilenge zyaansi aano pe. 12 Wakanjila mubusena busalala, ikutali abulowa bwampongo abwaboombe pe, pele wakanjila abulowa bwakwe mwini iciindi comwe buyo akutujanina lufwutuko lutamani. 13 Nkaambo ikuti bulowa bwampongo abwabapoho alimwi atwe lyamoombe mupwizi lisansailwa baabo basofwaazyigwa kazisalazya muntu kusikila nkwasalala kumubili, 14 sena ibulowa bwa Kilisito, ooyo wakalituula kanyina kampenda kuli Leza ikwiinda mumuuya uutamani, tabukonzyi kwiinda aawo na ikusalazya manjezyeezya eesu kumilimo iifwide kutegwa tubelekele Leza uupona mulimo uusetekene?
15 Nkakaambo kaako ncali simwiimaakati wacizuminano cipya ikutegwa, akaambo kakuti wakafwa kutegwa kwiinda mucinunuzyo abaangunune kuzibi zyabo nzyobakacita mucizuminano cakusaanguna, aabo bakaitwa bakonzye kutambula cisyomezyo calukono lutamani. 16 Nkaambo nokuli cizuminano, imuntu ooyo sikubamba cizuminano weelede kufwa. 17 Nkaambo cizuminano cili amulimo ikuti umwi wafwa, mbwaanga tacijisi nguzu aciindi cimbi eelyo muntu sikubamba cizuminano nacipona. 18 Aboobo acalo cizuminano cakusaanguna tiicakatalisyigwa kakunyina bulowa pe. 19 Nkaambo Musa naakamana kwaambila bantu boonse imalailile oonse aali mu Mulawo, wakabweza bulowa bwaboombe abwampongo antoomwe amaanzi aboya busalala pyu alimwi ahisopo akusansaila bbuku eelyo alimwi abantu boonse, 20 kaamba kuti: “Oobu mbulowa bwacizuminano eeco Leza ncaamulailila kuti kamucibamba.” 21 Alimwi wakasansaila bulowa oobo kutente aazibelesyo zyoonse zyamulimo uusalala. 22 Inzya, kweelana a Mulawo, ibunji bwazyintu zilasalazyigwa abulowa, alimwi ccita kuti bulowa bwatilwa, kunyina pe uukonzya kulekelelwa zibi.
23 Aboobo cakaleelede kuti zikozyanyo zyazyintu zyakujulu zisalazyigwe kwiinda munzila eezyi, pele zyalo zyintu zyakujulu ziyandika zipaizyo zibotu kapati. 24 Nkaambo Kilisito tanaakanjila mubusena busalala bwakabambwa amaanza aabantu pe, ibuli ncikozyanyo buyo cazyintu zini-zini, pele wakanjila kujulu kwini buya, kutegwa lino akalibonye kumbele lya Leza akaambo kandiswe. 25 Eeci tiicakaba boobo ikutegwa kalituula lyoonse, mbuli leelyo mupaizi mupati nanjila mubusena busalala mwaka amwaka abulowa ibutali bwakwe. 26 Ikuti nocali boobo, nokwali kuyandika kuti kapenga lyoonse kuzwa kumatalikilo aanyika.* Pele lino walibonya ciindi comwe buyo kumamanino aabweende bwazyintu bwiindene-indene kuti amanizye cibi kwiinda mucipaizyo cakwe mwini. 27 Alimwi mbubonya bantu mbobalangilwa kufwa ciindi comwe buyo, mpoonya kuzwa waawo ndubeta, 28 mbubonya buyo awalo Kilisito wakatuulwa ciindi comwe buyo kuti abweze zibi zyabanji; alimwi ciindi cabili aakulibonya takalibonyi akaambo kacibi* pe alimwi uyoobonwa abaabo basungweede kumuyandaula kujatikizya lufwutuko lwabo.