Ciyubunuzyo
20 Lino ndakabona mungelo kaseluka kuzwa kujulu kajisi kkii yamulindi uutagoli alimwi anketani mpati mujanza lyakwe. 2 Mpoonya wakajata simwaaba, imuzoka ooyo wakaindi, uuli ngo Diabolosi alimwi Saatani, akumwaanga kwamyaka iili 1,000. 3 Eelyo wakamuwaala mumulindi uutagoli, wakaujala akumusinkila ikutegwa ateeni limbi masi kusikila mane ikamane eeyo myaka iili 1,000. Zyaakumana zyintu eezyi weelede kwaangununwa kwakaindi kaniini.
4 Mpoonya ndakabona zyuuno zyabwami, alimwi aabo ibakakkede alinzizyo bakapegwa nguzu zyakubeteka. Inzya, ndakabona buumi bwabaabo ibakajaigwa* akaambo kabumboni mbobakacitila Jesu alimwi akaambo kakwaamba zya Leza. Aabo tiibakakomba munyama naa cikozyanyo cakwe alimwi tiibakatambula caando ankumo yabo akujanza lyabo. Mpoonya bakaba baumi akulela kabali bami antoomwe a Kilisito kwamyaka iili 1,000. 5 (Ibafwu bamwi boonse bakasyaala tiibakaba baumi kusikila noyakamana eeyo myaka iili 1,000.) Oobu mbubuke bwakusaanguna. 6 Ulikkomene alimwi ulasalala kufwumbwa uuli alubazu mububuke bwakusaanguna oobu; aali baaba ilufwu lwabili talujisi nguzu pe, pele bayooba bapaizi ba Leza aba Kilisito, alimwi bayooba bami balela antoomwe anguwe kwamyaka iili 1,000.
7 Lino mboiyoomanina buyo eeyo myaka iili 1,000, Saatani uyooangununwa akugusyigwa muntolongo yakwe, 8 eelyo uyoounka kuyooena masi aayo aali muzyooko zyone zyanyika, nkokuti Gogo a Magogo, kuti akaabunganye antoomwe kunkondo. Imweelwe wabo uli mbuli musenga wakulwizi. 9 Eelyo bakamwaika munyika yoonse akuzinguluka nkambi yabasalali alimwi amunzi uuyandwa kapati. Pele mulilo wakaloka kuzwa kujulu akubaumpa mane balota. 10 Mpoonya Diabolosi iwakali kubeena wakawaalwa muzyiba lyamulilo asulufa, oomo munyama alimwi amusinsimi wakubeja mobakabede kale; eelyo bayoopenzyegwa isyikati amasiku lyoonse mane kukabe kutamani.
11 Alimwi ndakabona cuuno cabwami cituba icipati alimwi ayooyo uukkede alincico. Inyika alimwi ajulu zyakatija kumbele lyakwe, alimwi tiizyakajaninwa busena buli boonse. 12 Mpoonya ndakabona bafwu, ibapati abaniini, kabaimvwi kumbele lyacuuno cabwami, eelyo mabbuku aakuvwunga akavwungululwa. Pele ibbuku lyakuvwunga limbi lyakavwungululwa; eeli ndibbuku lyabuumi. Mpoonya bafwu bakabetekwa kweelana azyintu eezyo zilembedwe mumabbuku aakuvwunga aayo, kweelana amilimo yabo. 13 Lino lwizi lwakabaleka bafwu ibakali mulindulo, alwalo lufwu a Cikkalilo Cabafwu* zyakabaleka bafwu ibakali mulinzizyo, eelyo aaba bakabetekwa umwi aumwi kweelana amilimo yakwe. 14 Mpoonya lufwu a Cikkalilo Cabafwu zyakawaalwa muzyiba lyamulilo. Eeli zyiba lyamulilo liiminina lufwu lwabili. 15 Kunze lyaboobo, kufwumbwa ooyo watakajanwa kalembedwe mubbuku lyabuumi wakawaalwa muzyiba lyamulilo eelyo.