Ciyubunuzyo
6 Lino ndakabona eelyo Mwanaambelele naakanamatula cimwi cazinamatizyo, alimwi ndakamvwa cimwi cazilenge zyuumi zyone kacaamba ajwi pati lili mbuli muzumo, kuti: “Boola!” 2 Mpoonya ndakalanga akubona bbiza lituba; lino ooyo wakatantide alindilyo wakajisi buta; alimwi wakapegwa musini, eelyo wakaunka kayaabuzunda akuti amanizye kuzunda.
3 Mpoonya naakanamatula cinamatizyo cabili, ndakamvwa cilenge cuumi cabili kacaamba kuti: “Boola!” 4 Eelyo kwakazwa limbi, ibbiza lisalala pyu mbuli mulilo; mpoonya ooyo wakatantide alindilyo wakazumizyigwa kugusya luumuno anyika ikutegwa bantu batalike kujayana; alimwi wakapegwa panga pati.
5 Mpoonya naakanamatula cinamatizyo catatu, ndakamvwa cilenge cuumi catatu kacaamba kuti: “Boola!” Eelyo ndakalanga akubona ibbiza lisiya; alimwi ooyo wakatantide alindilyo wakajisi cikkelo mujanza lyakwe. 6 Alimwi ndakamvwa icakali kulimvwisya mbuli kuti ndijwi lizwa akati kazilenge zyuumi zyone lyakati: “Kkilo lyomwe lyamaila lilaulwa dinali lyomwe, makkilo otatwe aabbaale alaulwa dinali lyomwe; alimwi mutaanyonyooni pe mafwuta aaolifa alimwi awaini.”
7 Mpoonya naakanamatula cinamatizyo cane, ndakamvwa jwi lyacilenge cuumi cane kalyaamba kuti: “Boola!” 8 Eelyo ndakalanga akubona bbiza lituba-tuba; alimwi ooyo wakatantide alindilyo wakajisi zyina lyakuti Lufwu. Alimwi Cikkalilo Cabafwu* cakali kumutobela munsi-munsi. Eelyo eezyi zyakapegwa nguzu kucibeela cane canyika, zyakujaya apanga damfwu, anzala azilwazi zijaya alimwi abanyama bamusyokwe bamunyika.
9 Mpoonya naakanamatula cinamatizyo casanu, kunsi aacipaililo ndakabona buumi bwabaabo bakajaigwa akaambo kajwi lya Leza alimwi akaambo kabumboni mbobakapa. 10 Eelyo bakaita ajwi pati, balaamba: “Ino nkusikila lili O Mwami Singuzuzyoonse, uusalala alimwi wamasimpe notiibaleke buyo kakunyina kubabeteka akubasubula akaambo kabulowa bwesu aabo bakkala anyika?” 11 Mpoonya umwi aumwi wabo wakapegwa cisani cilamfwu cituba; alimwi bakaambilwa kuti balyookezye kwakaindi akamwi kaniini, kusikila mane uzulile mweelwe wabazikenyina alimwi abanabokwabo ibakali afwaafwi kujaigwa mbubonya mbobakajaigwa.
12 Lino ndakabona eelyo naakanamatula cinamatizyo cacisambomwi, mpoonya kwakaba kuzungaana kupati kwanyika; alimwi zuba lyakasiya mbi mbuli cisani caboya cisiya, imwezi woonse wakasalala mbuli bulowa, 13 inyenyeezi zyakujulu zyakalokela anyika, mbubonya mukuyu wazungaanizyigwa aguwo pati mboumbulumusya nkuyu zyawo zikwange ansi. 14 Mpoonya ijulu lyakazwa mbuli bbuku lyakuvwunga ilivwungwa, alimwi zilundu zyoonse ansumbu zyoonse zyakagusyigwa mumasena aazyo. 15 Mpoonya bami bamunyika, basizyuuno zyaatala, beendelezi babasikalumamba, ibavwubi, bantu bayumu, ibazike boonse alimwi abantu boonse baangulukide bakayuba mumampangala amumyala yamumalundu. 16 Eelyo balazumanana kwaambila zilundu amyala kuti: “Amutulimbe akutusisa kubusyu bwa Yooyo uukkede acuuno cabwami akubukali bwa Mwanaambelele, 17 nkaambo bwasika buzuba bupati bwabukali bwabo, eelyo ino nguni uukonzya kwiima?”