22 “‘Lino ikuti naa mwalubizya akwaalilwa kutobela milawo yoonse eeyi Jehova njaamba kuli Musa, 23 zyoonse Jehova nzyaakamulailila kwiinda muli Musa kuzwa kubuzuba oobo Jehova mbwaakamulailila nzizyo kumazyalani aanu, 24 ikuti naa kwakaba kulubizya eelyo mbungano tiiyakazyiba, nkokuti mbungano yoonse yeelede kupa mupoho uucili mwana kuti abe cituuzyo cuumpwa kacili bweema bununkilila kuli Jehova, acituuzyo caco camaila alimwi acituuzyo caco cinyugwa kweelana ambocicitwa lyoonse,+ alimwi akana kampongo kacituuzyo cazibi.+