34 “Mpoonya kumamanino aaciindi eeco,+ mebo nde Nebukadinezara, ndakalungumana akulanga kujulu, alimwi maano aangu akajokela mulindime; ndakatembaula Mupatikampatila, alimwi ndakamutembaula akumulemeka ooyo uupona lyoonse alyoonse mane kukabe kutamani, nkaambo bweendelezi bwakwe mbweendelezi butamani abwalo bwami bwakwe mbwami bwakuzyalani azyalani.+ 35 Bantu boonse bakkala munyika babonwa buyo kuti taakwe mbobabede, alimwi walo ulacita kweelana akuyanda kwakwe akati kamakamu aakujulu alimwi abantu bakkala munyika. Kunyina naba omwe uukonzya kumukasya+ nokuba kumubuzya kuti, ‘Ino ucita nzi?’+