Jeremiya

44 Ndeeli jwi lyakamusikila Jeremiya kuti aambile ba Juda boonse ibakali kukkala mucisi ca Egepita,+ aabo ibakali kukkala ku Migidoli,+ ku Tahapanesi,+ ku Nofi*+ alimwi amucisi ca Patirosi:+ 2 “Mboobu mbwaamba Jehova wamakamu, Leza wa Israyeli, ‘Nywebo mwalibonena mapenzi oonse ngondakaletela Jerusalemu+ aminzi yoonse ya Juda, eelyo sunu yaba matongo buyo, kunyina muntu uukkala mulinjiyo.+ 3 Eeci cakacitika akaambo kazintu zibi nzyobakacita kuti bandinyemye kwiinda mukuunka kuyakuumpa zipaizyo+ alimwi akubelekela baleza bambi aabo mbobatakazyi balo, nywebo nebaba bamauso.+ 4 Lino mebo ndakazumanana kumutumina babelesi bangu boonse basinsimi, ndakali kubatuma cakwiinduluka-induluka,* akwaamba kuti: “Akaka mutaciti cintu eeci cisesemya ncendisulaikide.”+ 5 Pele balo tiibakaswiilila pe, nokuba kuteya matwi aabo kutegwa baleke kucita zibi zyabo kwiinda mukutaumpa zipaizyo kuli baleza bambi.+ 6 Aboobo bukali bwangu akunyema kwangu zyakatilwa, alimwi zyakavwilima muminzi ya Juda amumigwagwa ya Jerusalemu, eelyo yakanyonyooka akuba matongo mane kusikila sunu.’+

7 “Lino mboobu mbwaamba Jehova, Leza wamakamu, Leza wa Israyeli, ‘Ino nkaambo nzi ncomuliletela mapenzi mapati, cakuti baalumi abamakaintu boonse, bana basyoonto alimwi abavwanda boonse, bayoonyonyoonwa mucisi ca Juda, limwi kubule uusyala akati kanu? 8 Nkaambo nzi ncomuyanda kundinyemya amilimo yamaanza aanu kwiinda mukuumpa zipaizyo kuli baleza bambi mucisi ca Egepita ooko nkomwaunka kuyookkala? Muyoonyonyoonwa eelyo muyooba cintu cisinganizyidwe alimwi cisampaulwa akati kamasi oonse aamunyika.+ 9 Sena mwailuba micito mibyaabi yabamauso amicito mibyaabi yabami ba Juda,+ micito mibyaabi yabamakaintu babo+ alimwi amicito mibyaabi yanu amicito mibyaabi yabamakaintu banu,+ eeyo yakacitwa mucisi ca Juda amumigwagwa ya Jerusalemu? 10 Kusikila sunu kunyina nobalicesya pe,* kunyina nobayoowa pe+ nokuba kweenda mumulawo wangu akutobela malailile ngondakamupa nywebo alimwi abamauso.’+

11 “Aboobo mboobu mbwaamba Jehova wamakamu, Leza wa Israyeli, ‘Amubone ndikanzide kumuletela mapenzi akunyonyoona cisi ca Juda coonse mbocizulwa. 12 Alimwi ndiyoobweza bantu basyeede baku Juda aabo ibakakanzide kuunka kucisi ca Egepita kuti bakaakukkale nkuko, eelyo boonse bayoomana doo mucisi ca Egepita.+ Bayoojaigwa apanga, alimwi nzala iyoobamana; kuzwa kumuntu-muntu buyo kusikila kumuntu uulemenede, bayoojaigwa apanga alimwi anzala. Eelyo bayooba cintu citukilwa, cigambya, cisinganizyidwe alimwi cisampaulwa.+ 13 Ndiyoobasubula aabo bakkala mucisi ca Egepita mbubonya mbondakasubula Jerusalemu apanga, nzala alimwi acilwazi.+ 14 Alimwi bantu basyeede baku Juda aabo ibaunka kuyookkala mucisi ca Egepita tabakatiji nokuba kufwutuka kuti bapilukile kucisi ca Juda. Bayooyandisya kuti bapiluke akuyookkala nkuko, pele tabakapiluki pe, ccita buyo bantu basyoonto ibayootija.’”

15 Lino baalumi boonse ibakazyi kuti bamakaintu babo bakali kuumpa zipaizyo kuli baleza bambi, alimwi abamakaintu boonse ibakaimvwi ooko, ibakapangide nkamu mpati, alimwi abantu boonse ibakali kukkala mucisi ca Egepita,+ ku Patirosi,+ bakaingula Jeremiya kuti: 16 “Tatukooliswiilila pe jwi ndyootwaambila muzina lya Jehova. 17 Alimwi buya swebo tulacita zintu zyoonse nzyotwaamba amulomo wesu; tulaumpa zipaizyo kuli Namalelo Wajulu* akumutilila zituuzyo zinyugwa,+ mbubonya swebo, bamataateesu, bami besu alimwi abasilutwe besu mbobakacita muminzi ya Juda amumigwagwa ya Jerusalemu, ciindi notwakali kukkuta cinkwa akukkala kabotu, notwatakali kubona mapenzi aali woonse. 18 Kuzwa ciindi notwakaleka kuumpa zipaizyo kuli Namalelo Wajulu* alimwi akumutilila zituuzyo zinyugwa, twabulilwa zintu zyoonse, alimwi twamana doo akaambo kapanga alimwi anzala.”

19 Mpoonya bamakaintu bakayungizya kuti: “Alimwi ciindi swebo notwakali kuumpa zipaizyo kuli Namalelo Wajulu* alimwi akumutilila zituuzyo zinyugwa, sena twakamupangila zituuzyo zyazibunge zili mucinkozya cakwe akumutilila zituuzyo zinyugwa kakunyina kuzumizyigwa abamalumi besu?”

20 Mpoonya Jeremiya wakaambila bantu boonse, nkokuti baalumi abamakaintu babo alimwi abantu boonse ibakali kumuvwiila, wakati: 21 “Zipaizyo nzyomwakali kutuula muminzi ya Juda amumigwagwa ya Jerusalemu+ nywebo, bamauso, bami banu, basilutwe banu abantu bamucisi, Jehova wakaziyeeya alimwi zyakaboola mumoyo wakwe! 22 Aboobo kumamanino Jehova tanaakacili kukonzya kukkazika moyo akaambo kamicito yanu mibi alimwi azintu zisesemya nzyomwakacitide, aboobo cisi canu cakanyonyooka akuba cintu cigambya alimwi cisinganizyidwe, imutakwe muntu uukkala mumo, mbubonya mbocibede sunu.+ 23 Akaambo kakuti mwakaumpa zipaizyo alimwi mwakamubisyila Jehova kwiinda mukutaswiilila jwi lya Jehova alimwi akutatobela mulawo wakwe, malailile aakwe alimwi aziyeekezyo zyakwe, ncimwasikilwa mapenzi aaya, mbubonya mbocibede sunu.”+

24 Jeremiya wakazumanana kwaambila bantu boonse abamakaintu boonse kuti: “Amumvwe jwi lya Jehova, nywebo nyoonse nobantu bamu Juda nemuli mucisi ca Egepita. 25 Mboobu mbwaamba Jehova wamakamu, Leza wa Israyeli, ‘Ncimwaamba amilomo yanu nywebo nobaalumi abamakaintu banu, mwacizuzikizya amaanza aanu, nkaambo mwaamba kuti: “Ncobeni tulazizuzikizya zikonke zyesu zyakuumpa zipaizyo kuli Namalelo Wajulu* alimwi akumutilila zituuzyo zinyugwa.”+ Ncobeni nywebo nobamakaintu mulazizuzikizya zikonke zyanu alimwi mulazicita eezyo nzyomwakonkezya.’

26 “Aboobo amumvwe jwi lya Jehova, nywebo nyoonse nobantu baku Juda nomukkala mucisi ca Egepita: ‘“Amubone ndakonkezya zina lyangu lipati,” mbwaamba Jehova, “kuti zina lyangu talikaambwi kabili amuntu uuli woonse waku Juda+ uukonka mucisi coonse ca Egepita, kuti, ‘Masimpe, Mwami Singuzuzyoonse Jehova mbwali muumi!’+ 27 Amubone ndilipakamene kuti ndibaletele mapenzi ikutali bubotu;+ bantu boonse baku Juda ibali mucisi ca Egepita bayoojaigwa apanga alimwi anzala, kusikila mane bakalobe.+ 28 Mbasyoonto buyo ibayoolitija panga akujokela kucisi ca Juda kuzwa kucisi ca Egepita.+ Mpoonya bantu boonse baku Juda ibayoosyaala aabo ibakanjila mucisi ca Egepita kuti bakakkale mumo bayoozyiba naa ndijwi lyani lyazuzikizyigwa, naa ndijwi lyangu naa ndilyabo!”’”

29 “‘Lino eeci ncecitondezyo kulindinywe,’ mbwaamba Jehova, ‘cakuti ndiyoomusubula mubusena oobu, kutegwa mukazyibe kuti majwi aangu aakuti muyoosikilwa mapenzi ayoozuzikizyigwa ncobeni. 30 Mboobu mbwaamba Jehova: “Amubone ndaaba Farao Hofra, mwami wa Egepita, mumaanza aabasinkondonyina amumaanza aabaabo bayanda kumujaya,* mbubonya mbondakaaba Mwami Zedekiya wa Juda mumaanza aa Mwami Nebukadinezara wa Babuloni, ooyo iwakali sinkondonyina alimwi iwakali kuyanda kumujaya.”’”+