2 Samuele
8 Mukuya kwaciindi, Davida wakabazunda ba Filisiti+ akubakoma,+ eelyo ba Filisiti Davida wakabanyanga munzi wa Metegi-ama.
2 Wakabazunda bana Moabu+ akubalazika ansi alimwi wakabapima antambo. Wakapima milongo yobilo kuti ijaigwe eelyo mulongo omwe wakauleka kuti kaucipona.+ Bana Moabu bakaba babelesi ba Davida alimwi bakali kumupa mutelo.+
3 Davida wakazunda Hadadezeri mwana wa Rehobu mwami wa Zoba+ ciindi naakali kuunka kuyoobukulusya bweendelezi bwakwe ku Mulonga wa Firate.+ 4 Davida wakajata basimabbiza ba Hadadezeri ibali 1,700 abasikalumamba beenda amaulu ibali 20,000. Mpoonya Davida wakakosaula milambi yamabbiza oonse aakwela nkalaki,+ pele wakasiya buyo aali 100.
5 Ciindi bana Siriya baku Damasiko+ nibakaboola kugwasya Mwami Hadadezeri wa Zoba, Davida wakajaya bana Siriya+ bali 22,000. 6 Mpoonya Davida wakabikka impi mu Siriya yaku Damasiko, eelyo bana Siriya bakaba babelesi ba Davida alimwi bakali kumupa mutelo. Jehova wakapa Davida luzundo* kufwumbwa nkwaakali kuunka.+ 7 Alimwi Davida wakabweza ntobo zyangolida kuzwa kubabelesi ba Hadadezeri akuzileta ku Jerusalemu.+ 8 Kuzwa ku Beta* aku Berota, iminzi ya Hadadezeri, Mwami Davida wakabweza mukuba munji kapati.
9 Lino Mwami Toi* wa Hamati+ wakamvwa kuti Davida wakaizunda mpi yabasikalumamba yoonse ya Hadadezeri.+ 10 Aboobo Toi wakatuma Joramu mwanaakwe ku Mwami Davida kuti akamwaanzye akumulumbaizya akaambo kakulwana Hadadezeri akumuzunda (nkaambo ziindi zinji Hadadezeri wakali kulwana Toi), alimwi wakatolelezya azintu zyansiliva, zyangolida, alimwi azyamukuba. 11 Mwami Davida wakazyaaba zintu eezyi kuli Jehova antoomwe ansiliva alimwi angolida nzyaakabweza kuzwa kumisyobo yoonse njaakakoma:+ 12 kuzwa kubana Siriya, bana Moabu,+ bana Amoni, ba Filisiti,+ bana Amaleki+ azintu zyakasaalwa izyakazwa kuli Hadadezeri+ mwana wa Rehobu mwami wa Zoba. 13 Alimwi Davida wakaba ampuwo naakazwa mukujaya bana Edomu ibali 18,000 mu Kkuti lya Munyo.+ 14 Wakabikka basikalumamba mu Edomu. Wakabikka nkambi zyabasikalumamba mu Edomu moonse alimwi bana Edomu boonse bakaba babelesi ba Davida.+ Jehova wakapa Davida luzundo* kufwumbwa nkwaakali kuunka.+
15 Davida wakazumanana kweendelezya bana Israyeli boonse,+ alimwi Davida wakali kubeteka bantu bakwe+ boonse cabululami.+ 16 Joabu+ mwana wa Zeruya wakali silutwe wampi yabasikalumamba, eelyo Jehosafati+ mwana wa Ahiludi wakali sikulemba* makani. 17 Zadoki+ mwana wa Ahitubi a Ahimeleki mwana wa Abiyatara bakali bapaizi, mpoonya Seraya wakali mulembi. 18 Benaya+ mwana wa Jehoyada wakali silutwe wabana Kereti abana Peleti.+ Bana ba Davida bakaba basilutwe.*