Joshua
9 Lino bami boonse ibakali kumbo lya Jordano+ nobakaamvwa makani aaya, aabo ibakali mumalundu, mu Sepela, munkomwe yoonse ya Lwizi Lupati*+ alimwi akumbele lya Lebano–bana Heti, bana Amori, bana Kanana, bana Perizi, bana Hivi abana Jebusi+– 2 bakatalika kulibunga-bunga antoomwe kuti balwane Joshua abana Israyeli.+
3 Bana Gibeoni+ abalo bakamvwa ncaakacita Joshua kumunzi wa Jeriko+ awa Ai.+ 4 Aboobo bakacita camaano kwiinda mukubweza bulilu mumasaka aazapaukide ambongolo zyabo, ankomo zyawaini zyakaindi zidonkaukide izyaangilidwe-angilidwe; 5 alimwi bakasama ampato zyakaindi zisumidwe-sumidwe azisani zizapaukide. Zinkwa zyoonse zyabulilu bwabo zyakali ziyumu nta alimwi zikomaukide. 6 Mpoonya bakaunka kuli Joshua abaalumi bana Israyeli kunkambi iyakali ku Giligala+ akumwaambila kuti: “Twazwa kunyika yakule. Lino amupange cizuminano andiswe.” 7 Pele baalumi bana Israyeli bakaambila bana Hivi+ kuti: “Ambweni mukkala afwaafwi andiswe. Aboobo ino inga twapanga buti cizuminano andinywe?”+ 8 Kumane bakaingula Joshua kuti: “Tuli babelesi bako.”*
Mpoonya Joshua wakababuzya kuti: “Ino ndinywe bani, alimwi mwazwa kuli?” 9 Bakati kulinguwe: “Tobabelesi bako twazwa kunyika yakule+ nkaambo kazina lya Jehova Leza wanu, nkaambo twakamvwa mpuwo yakwe azintu zyoonse nzyaakacita mu Egepita,+ 10 alimwi azyoonse nzyaakacita kubami bobilo babana Amori ibakali mutala* lya Jordano, Sihoni+ Mwami wa Hesiboni a Ogi+ Mwami wa Basani, iwakali mu Asitaroti. 11 Aboobo baalu besu abantu boonse bamunyika yesu bakatwaambila kuti, ‘Amubweze bulilu, muunke mukaswaangane ambabo. Mukabaambile kuti: “Tulaba babelesi banu;+ lino amupange cizuminano andiswe.”’+ 12 Zinkwa zyesu eezyi notwakazibweza zyakacili kupya buzuba mbotwakanyamuka kumaanda eesu kuboola kokuno. Pele lino amubone, zyayuma nta akukomauka.+ 13 Azyalo nkomo eezyi zyawaini zyakacili zipya notwakazizuzya waini, pele lino zyadonkauka.+ Azyalo zisani zyesu ampato zyesu zyazakala akaambo kakulampa kwamusinzo.”
14 Mpoonya baalumi bana Israyeli bakabweza bulilu bwabo bumwi akubulanga-langa, pele kunyina nobakabuzya kuli Jehova.+ 15 Eelyo Joshua wakamvwana kuti kakkala muluumuno ambabo+ akupanga cizuminano ambabo kuti batajaigwi, alimwi oobu mbombubo basilutwe bambungano mbobakakonka kulimbabo.+
16 Lino nokwakainda mazuba otatwe kuzwa nobakapanga cizuminano ambabo, bakamvwa kuti bakali kukkala afwaafwi, mubusena mbubonya oobo. 17 Mpoonya mubuzuba bwatatu bana Israyeli bakanyamuka akuunka kuminzi yabo; mazina aaminzi yabo ngaaya: Gibeoni,+ Kefira, Beeroti a Kiriyati-jearimu.+ 18 Pele bana Israyeli kunyina nobakabalwana pe, nkaambo basilutwe bambungano bakakonka kulimbabo muzina lya Jehova+ Leza wa Israyeli. Aboobo mbungano yoonse yakatalika kutongooka basilutwe. 19 Mpoonya basilutwe boonse bakaambila mbungano yoonse kuti: “Mbwaanga swebo twakakonka kulimbabo muzina lya Jehova Leza wa Israyeli, tatuzumizyidwe kubacisa pe. 20 Mboobu mbotutiicite: Tatukoobajaya pe, kutegwa bukali bwa Leza butatusikili akaambo kacikonke ncotwakakonka kulimbabo.”+ 21 Alimwi basilutwe bakati: “Amubaleke kabapona, pele ababe basikutebba nkuni abasikuteka maanzi aambungano yoonse.” Oobu mbombubo basilutwe mbobakabasyomezya.
22 Lino Joshua wakabaita akubaambila kuti: “Ino nkaambo nzi ncomwakatucengela, nomwakati, ‘Tukkala kule kapati,’ kakuli mukkede akati kesu?+ 23 Kuzwa sunu mulisinganizyidwe,+ alimwi lyoonse munooli bazike basikutebba nkuni abasikuteka maanzi aaŋanda ya Leza wangu.” 24 Mpoonya bakavwiila Joshua kuti: “Nkaambo kakuti tobabelesi bako twakaambilwa cakusinizya kuti Jehova Leza wanu wakalailila mubelesi wakwe Musa kuti amupe nyika yoonse akujaya bantu boonse bakkala mumo kubusyu bwanu.+ Aboobo twakayoowa kapati kuti mulatujaya,+ nkakaambo kaako twakacita boobu.+ 25 Lino tuli mumaanza aako. Kotucita kufwumbwa ncobona kuti ncibotu alimwi ciluleme.” 26 Aboobo wakabacitila mbubonya oobo; wakabavwuna kumaanza aabana Israyeli, eelyo kunyina nobakabajaya pe. 27 Pele mubuzuba oobo Joshua wakababikka kuba basikutebba nkuni abasikuteka maanzi aambungano+ amaanzi aacipaililo ca Jehova kusikila sunu,+ abusena oobo Leza mbwaakasala.+