1 Makani

11 Mukuya kwaciindi, bana Israyeli boonse bakabungana antoomwe kuli Davida ku Hebroni+ akumwaambila kuti: “Bona! Swebo tuli zifwuwa zyako anyama yako.*+ 2 Kaindi, ciindi Saulo naakali mwami, yebo ndonduwe wakali kusololela bana Israyeli kunkondo.*+ Alimwi Jehova Leza wako wakakwaambila kuti: ‘Yebo nduwe uuyakweembela bantu bangu bana Israyeli alimwi nduwe uuyooba musololi wabo.’”+ 3 Aboobo baalu bana Israyeli boonse bakaboola kumwami ku Hebroni, eelyo Davida wakapanga cizuminano ambabo ku Hebroni kubusyu bwa Jehova. Mpoonya Davida bakamunanika kuba mwami wa Israyeli+ kweelana ajwi ndyaakaamba Jehova kwiinda muli Samuele.+

4 Mpoonya Davida abana Israyeli boonse bakaunka ku Jerusalemu, nkokuti ku Jebusi,+ ooko ikwakali kukkala bana Jebusi.+ 5 Bana Jebusi bakasampaula Davida kabati: “Tokanjili mumunzi uuno pe.”+ Nokuba boobo, Davida wakauzunda munzi uukwabilidwe wa Ziyoni,+ ooyo lino wiitwa kuti Munzi wa Davida.+ 6 Aboobo Davida wakati: “Kufwumbwa utiisaangune kujaya bana Jebusi ulaba musololi asilutwe.” Eelyo Joabu+ mwana wa Zeruya wakasaanguna kuunka, aboobo wakaba musololi. 7 Mpoonya Davida wakakkala mubusena bukatazya kusika. Nkakaambo kaako bakabwiita kuti Munzi wa Davida. 8 Wakatalika kuyaka munzi kuzinguluka koonse, kuzwa ku Citantaala* kusikila kumasena aazingulukide, eelyo Joabu wakayakulula masena aambi aamunzi. 9 Aboobo Davida wakali kuyaabuba anguzu,+ alimwi Jehova wamakamu wakali anguwe.

10 Lino mbaaba basololi babasikalumamba basinguzu ba Davida ibakamugwasyilizya mubwami bwakwe antoomwe abana Israyeli boonse kuti abe mwami kweelana ajwi lya Jehova ndyaakasyomezya bana Israyeli.+ 11 Ngooyu mulongo wabasikalumamba basinguzu ba Davida: Jasobeamu+ mwana wamuna Hakimoni, silutwe wabapati botatwe.+ Wakabweza sumo lyakwe akujaya bantu bainda ku 300 aciindi comwe.+ 12 Iwakali kumutobela wakali Eleazara+ mwana wa Dodo muna Ahohi.+ Wakali akati kabasikalumamba basinguzu botatwe. 13 Wakali aa Davida ku Pasi-damimu,+ ooko ba Filisiti nkobakabungene kuti balwane nkondo. Lino kwakali muunda wakazwide bbaale, eelyo bantu bakatija akaambo kaba Filisiti. 14 Pele walo wakaima akati kamuunda akuukwabilila alimwi wakazumanana kubajaya ba Filisiti, aboobo Jehova wakabafwutula aluzundo* lupati.+

15 Botatwe akati kabasilutwe bali 30 bakaunka kundomba, kuli Davida kumpangala ya Adulamu,+ ciindi mpi yaba Filisiti niyakayakide nkambi mu Kkuti* lya Refaimu.+ 16 Aciindi eeco Davida wakali mumpangala, alimwi nkambi yabasikalumamba yaba Filisiti yakali mu Betelehemu. 17 Kumane Davida wakaamba ncaakali kulombozya naakati: “Eelo kaka inga cabota kuti ndanywa maanzi aamumukalo waku Betelehemu+ uuli kumulyango wamunzi!” 18 Mpoonya aawo baalumi botatwe basinguzu bakanjila canguzu munkambi yaba Filisiti akuteka maanzi mumukalo waku Betelehemu iwakali kumulyango wamunzi akwaatola kuli Davida; pele Davida wakakaka kwaanywa, eelyo wakaatila ansi kuli Jehova. 19 Wakati: “Cilatondwa kulindime mumeso aa Leza wangu kuti ndicite boobu! Sena ndinywe bulowa bwabaalumi aaba ibabikka buumi bwabo muntenda?+ Buumi bwabo bwali muntenda nobali kuleta maanzi aaya.” Aboobo wakakaka kwaanywa. Eezyi nzyezintu nzyobakacita basikalumamba bakwe basinguzu botatwe.

20 Abisai+ mwanookwabo a Joabu,+ wakaba silutwe wabaalumi bambi botatwe; wakabelesya sumo lyakwe kujaya bantu bainda ku 300, alimwi wakali ampuwo mbuli babaya botatwe.+ 21 Akati kabambi botatwe, wakali kulemekwa kwiinda baabo bobilo alimwi wakaba silutwe wabo; nokuba boobo tanaakeelana abaabo botatwe bakusaanguna.

22 Benaya+ mwana wa Jehoyada wakali mwaalumi sicamba* iwakacita milimo minji mu Kabizeeli.+ Wakajaya bana basankwa bobilo ba Arieli waku Moabu, alimwi wakaselemukila mucilindi akujaya syuumbwa mubuzuba bwacaanda.+ 23 Alimwi wakajaya mwaalumi muna Egepita mubbabbani–iwakali kulampa tukokola tosanwe.*+ Nokuba kuti muna Egepita ooyo wakajisi sumo mujanza lyakwe ilyakali mbuli cisamu cabasikuluka,+ Benaya wakamuunkila ankoli akumunyanga sumo muna Egepita akumujaya asumo lyakwe.+ 24 Eezyi nzyezintu Benaya mwana wa Jehoyada nzyaakacita, alimwi wakaba ampuwo mbubonya mbuli yabasikalumamba basinguzu botatwe. 25 Nokuba kuti wakali kulemekwa kapati kwiinda baabo bali makumi otatwe, tanaakeelana abotatwe bakusaanguna.+ Nokuba boobo Davida wakamusala kuba silutwe wabalindizi bakwe.

26 Lino akati kabaalumi basinguzu bamakamu aabasikalumamba kwakali Asaheli+ mwanookwabo a Joabu, Elihanani mwana wa Dodo waku Betelehemu,+ 27 Samoti muna Harori, Helezi muna Peloni, 28 Ira+ mwana wa Ikesi muna Tekowa, Abiezeri+ muna Anatoti, 29 Sibekai+ muna Husati, Ilai muna Ahohi, 30 Maharai+ muna Netofati, Heledi+ mwana wa Baana muna Netofati, 31 Itai mwana wa Ribai waku Gibea umwi wabana ba Benjamini,+ Benaya muna Piratoni, 32 Hurai wakutulonga* twaku Gaasi,+ Abiyeli muna Aribati, 33 Azimaveti muna Baharumi, Eliaba muna Syaaliboni, 34 bana ba Hasemu muna Gizoni, Jonatani mwana wa Sage muna Harari, 35 Ahiamu mwana wa Sakari muna Harari, Elifali mwana wa Uri, 36 Heferi muna Mekerati, Ahija muna Peloni, 37 Heziro muna Karimeli, Naarai mwana wa Ezibai, 38 Joeli mwanookwabo a Natani, Mibari mwana wa Hagiri, 39 Zeleki muna Amoni, Naharai muna Beroti, sikunyamuna zilwanyo wa Joabu mwana wa Zeruya; 40 Ira muna Itiri, Garebi muna Itiri, 41 Uriya+ muna Heti, Zabadi mwana wa Alai, 42 Adina mwana wa Siza muna Rubeni, silutwe wabana Rubeni wakali abantu bali 30; 43 Hanani mwana wa Maaka, Josafati muna Mitini, 44 Uzia muna Asterati, Sama a Jeieli ibana ba Hotamu muna Aroeri; 45 Jediyaeli mwana wa Simiri, Joha mwanookwabo muna Tizi; 46 Elieli muna Mahavi, Jeribai a Josaviya ibana basankwa ba Elinaamu a Itima muna Moabu; 47 Elieli, Obedi a Jasiyeli muna Mezobai.