1 Makani
21 Lino Saatani* wakabukila bana Israyeli akuyunga Davida kuti ababale.+ 2 Aboobo Davida wakaambila Joabu+ silutwe wabantu kuti: “Koya ukabale bana Israyeli kuzwa ku Beere-seba kusikila ku Dani;+ wamana undaambile kutegwa ndizyibe mweelwe wabo.” 3 Pele Joabu wakati: “Jehova abavwuzye bantu bakwe ziindi zili 100 ! Sena boonse tabali babelesi bako omwami simalelaangu? Ino nkaambo nzi ncoyanda kucita boobu osimalelaangu? Nkaambo nzi ncoyanda kuletela bana Israyeli mulandu?”
4 Pele ijwi lyamwami lyakazunda majwi aa Joabu. Aboobo Joabu wakazwa akuunka mu Israyeli yoonse, naakamana wakapiluka ku Jerusalemu.+ 5 Lino Joabu wakapa Davida mweelwe wabantu bakabalwa. Baalumi bana Israyeli boonse ibakajisi mapanga bakali 1,100,000, eelyo baalumi ba Juda ibakajisi mapanga bakali 470,000.+ 6 Pele ba Levi abana Benjamini tanaakababala,+ nkaambo ijwi lyamwami lyakamusesemya Joabu.+
7 Lino makani aaya tanaakamukkomanisya Leza mwini-mwini, aboobo wakabasubula bana Israyeli. 8 Kumane Davida wakati kuli Leza mwini-mwini: “Ndabisya+ kapati akaambo kacintu eeci ncindacita. Lino akaka kondilekelela cibi eeci ndemubelesi wako+ nkaambo ndacita cabufwubafwuba kapati.”+ 9 Eelyo Jehova wakaambila Gadi,+ sizilengaano wa Davida kuti: 10 “Koya ukamwaambile Davida kuti, ‘Mboobu mbwaamba Jehova: “Ndakubikkila zintu zyotatwe kuti usale. Kosala comwe akati kanzizyo ncoyanda kuti ndikucitile.”’” 11 Aboobo Gadi wakaunka kuli Davida akumwaambila kuti: “Mboobu mbwaamba Jehova, ‘Kosala comwe, 12 sena kube nzala myaka yotatwe,+ naa myezi yotatwe yakutandaanizyigwa abasinkondonyoko akujaigwa apanga,+ naa kube panga lya Jehova mazuba otatwe–cilwazi cijaya munyika+–kuti mungelo wa Jehova alete lunyonyooko+ mucilawo coonse ca Israyeli?’ Lino koyeeya akusala ncondeelede kuyoomwaambila ooyo iwandituma kulinduwe.” 13 Aboobo Davida wakaambila Gadi kuti: “Makani aaya andikatazya kapati. Andilombe buyo kuwida mumaanza aa Jehova nkaambo luse lwakwe ndupati kapati;+ pele utandilekeli kuwida mumaanza aamuntu pe.”+
14 Mpoonya Jehova wakatuma cilwazi cijaya+ mu Israyeli cakuti kwakafwa bantu bali 70,000 akati kabana Israyeli.+ 15 Alimwi Leza mwini-mwini wakatuma mungelo ku Jerusalemu kutegwa aunyonyoone munzi; pele mbwaakatiicitile buyo boobo, Jehova wakabona lunyonyooko oolo alimwi wakausa* akaambo kamapenzi aayo;+ aboobo wakaambila mungelo iwakali kunyonyoona kuti: “Mbubo lino!+ Kolesya janza lyako.” Lino mungelo wa Jehova wakaliimvwi afwaafwi acuumino camaila ca Orinani*+ muna Jebusi.+
16 Lino Davida naakatambya meso aakwe, wakabona mungelo wa Jehova uliimvwi akati kanyika ajulu katondekede panga+ lyakwe ku Jerusalemu. Mpoonya aawo Davida abaalu, kabasamide zisani zyamasaka+ bakavwuntama ansi.+ 17 Lino Davida wakati kuli Leza mwini-mwini: “Sena tandili ndime ndakaamba kuti bantu babalwe? Mebo ndime ndakabisya, alimwi ndime ndakalubizya;+ pele mbelele eezyi–ino zyacita nzi? O Jehova Leza wangu, janza lyako alibe alindime alimwi aaŋanda yataata; pele utaleti penzi eeli kubantu bako.”+
18 Mpoonya mungelo wa Jehova wakaambila Gadi+ kuti aambile Davida kuti aunke kuyooyakila Jehova cipaililo acuumino camaila ca Orinani muna Jebusi.+ 19 Aboobo Davida wakaunka kweelana amajwi ngaakamwaambila Gadi muzina lya Jehova. 20 Lino Orinani wakali kuuma wiiti. Naakacebuka, wakabona mungelo, eelyo bana bakwe bone mbaakali limwi bakayuba. 21 Ciindi Davida naakaunka nkwaakabede, Orinani wakalanga akubona Davida, mpoonya aawo wakazwa kucuumino camaila akuyoovwuntama ansi kumbele lya Davida. 22 Mpoonya Davida wakati kuli Orinani: “Kondisambala* busena aali cuumino camaila kutegwa ndiyakile Jehova cipaililo. Undisambale amuulo uukkwene, kutegwa cilwazi eeci cijaya bantu cilesyegwe.”+ 23 Pele Orinani wakati kuli Davida: “Omwami simalelaangu kocibweza akucita kufwumbwa ncoyanda.* Bona, ndilakupa ŋombe zyazituuzyo zyuumpwa alimwi acilayi cakuumya maila+ kuti cibe nkuni awiiti kuti ube cituuzyo camaila. Ndilakupa zyoonse eezyi.”
24 Nokuba boobo, Mwami Davida wakati kuli Orinani: “Peepe, pele ndilacuula buya amuulo uukkwene, nkaambo nsikoobweza cintu cako akucipa kuli Jehova naa kutuula zipaizyo zyuumpwa eezyo nzyondatabbadelela.”+ 25 Aboobo Davida wakapa Orinani mali aabusena oobo aalema masyekeli* aangolida aali 600. 26 Kumane Davida wakayakila Jehova cipaililo+ nkukonya ooko akutuula zipaizyo zyuumpwa azipaizyo zyalumvwano, eelyo wakakwiilila Jehova, mpoonya wakamwiingula kwiinda mukutuma mulilo+ kuzwa kujulu akuboola acipaililo cacituuzyo cuumpwa. 27 Kumane Jehova wakalailila mungelo+ kuti apilusye panga mucikutu calyo. 28 Aciindi eeco, Davida naakabona kuti Jehova wamwiingula kucuumino camaila ca Orinani muna Jebusi, wakazumanana kutuula zipaizyo nkukonya ooko. 29 Pele tente lyakukombela lya Jehova eelyo Musa ndyaakaimikide munkanda alimwi acipaililo cazituuzyo zyuumpwa aciindi eeco zyakali kubusena bwamujulu bwakukombela ku Gibeoni.+ 30 Lino Davida tanaakali kukonzya kuunka nkuko kuyoobuzya kuli Leza nkaambo wakali kuyoowa panga lyamungelo wa Jehova.