Babetesi
15 Nokwakainda ciindi, mumazuba aakutebula wiiti, Samusoni wakaunka kuyooswaya mukaintu wakwe, wakatolelezya akana kampongo. Wakati: “Ndiyanda kunjila muŋanda yamukaintu wangu, kuzyuli.”* Pele bausyi mukaintu ooyo bakamukasya. 2 Bakati: “Ndakali kuyeeya kuti, ‘Tocimuyandi pe.’+ Aboobo ndakamukwasya kumweenzinyoko,+ umwi wabaabo bakakusindikila abwiinga. Sena musyoonto wakwe tali mubotu kwiinda nguwe? Kobweza nguwe mucibaka cakwe.” 3 Nokuba boobo Samusoni wakati kulimbabo: “Lweendo oluno ba Filisiti tabakonzyi kundipa mulandu kuti naa ndabacitila bubi.”
4 Aboobo Samusoni wakaunka, eelyo wakajata bamwaaba bali 300. Mpoonya wakabaanga micila bobilo-bobilo akwaangilila minzenge mpoiswaanganina micila. 5 Kumane wakayasya minzenge akubalekezya bamwaaba kuti banjile mumyuunda yamaila yaba Filisiti. Aboobo zyoonse wakazyuumpa, maila aakaangidwe mumisunta, maila aakaimvwi, kubikkilizya amyuunda yamisaansa amasamu aamaolifa.
6 Ba Filisiti bakabuzya kuti: “Ino nguni wacita boobu?” Mpoonya bakaambilwa kuti: “Ngu Samusoni, mukwe wamuna Timina, nkaambo wakakwasya muka Samusoni kumweenzinyina+ iwakamusindikila abwiinga.” Kumane ba Filisiti bakaunka kuyoomuumpa mukaintu antoomwe abausyi.+ 7 Mpoonya Samusoni wakati kulimbabo: “Mbomwacita boobu, tandikooleka mane ndimupilusizye cibi.”+ 8 Eelyo wakabalwana akujaya banji, kumane wakaunka kuyookkala mumpangala* yandomba ya Itamu.
9 Kumane ba Filisiti bakaboola akuyaka nkambi mu Juda alimwi bakali kweendeenda mu Lehi.+ 10 Mpoonya ba Juda bakati: “Ino nkaambo nzi ncomwaboola kuzootulwana?” Balo bakati: “Twaboola kuzoojata* Samusoni, kutegwa tumucite mbubonya mbwaakatucita.” 11 Aboobo baalumi ba Juda bali 3,000 bakaunka kumpangala* yandomba ya Itamu akwaambila Samusoni kuti: “Sena tozyi kuti ba Filisiti batubeda bami?+ Ino nkaambo nzi ncootucitila boobu?” Wakati kulimbabo: “Ndabacita mbubonya mbobakandicita ambebo.” 12 Pele balo bakati kulinguwe: “Twaboola kuzookujata* akukwaaba mumaanza aaba Filisiti.” Mpoonya Samusoni wakati: “Amukonke kulindime kuti tamukoondibukila.” 13 Mpoonya bakamwaambila kuti: “Peepe, tulakwaanga buyo akukwaaba mumaanza aabo; pele tatukookujaya pe.”
Aboobo bakamwaanga antambo zyobilo zipya akumugwisya mumpangala. 14 Samusoni naakasika ku Lehi, ba Filisiti bakoongolola cakukondwa nobakamubona. Mpoonya muuya wa Jehova wakamupa nguzu,+ eelyo ntambo izyakali kumaanza aakwe zyakaba mbuli ntali buyo zyapya mulilo, alimwi nketani zyakanyenguluka kumaanza aakwe.+ 15 Kumane Samusoni wakajana mweebo wambongolo uutanayuma; wakaubweza akuubelesya kujaya baalumi bali 1,000.+ 16 Mpoonya Samusoni wakati:
“Ndajaya basinkondoma amweebo wambongolo—akubalundaika mumilwi!
“Ndajaya baalumi bali 1,000 amweebo wambongolo.”+
17 Naakamana kwaamba boobo, wakausowa mweebo ooyo akuulika busena oobo kuti Ramati-lehi.*+ 18 Mpoonya wakafwa nyota, kumane wakaita Jehova akwaamba kuti: “Nduwe wapa lufwutuko oolu lupati mumaanza aamubelesi wako. Sena lino indijaye nyota akujatwa abantu batapalwidwe?” 19 Aboobo Leza wakaandula nyika mucilindi cakali ku Lehi, eelyo mwakatalika kuzwa maanzi.+ Lino naakanywa, nguzu zyakwe zyakapiluka alimwi wakabukuluka. Nkakaambo kaako busena oobo wakabuulika kuti Eni-hakore,* ibuli mu Lehi kusikila sunu.
20 Aboobo Samusoni wakabeteka bana Israyeli mumazuba aaba Filisiti myaka iili 20.+