1 Samuele
20 Mpoonya Davida wakatija kuzwa ku Nayoti ku Rama. Aboobo wakaboola akwaambila Jonatani kuti: “Ino ndakacita nzi?+ Ino mulandu nzi alimwi ncibi nzi ncindakacita kuli bauso cakuti bayande kundijaya?” 2 Amvwe boobo Jonatani wakati kulinguwe: “Eeco tacikonzyi kucitika!+ Tokoofwa pe. Bona! Bataata tabakonzyi kucita cintu cili coonse cipati naa ciniini kakunyina kundaambila. Ino inga bataata bandisisa buti makani aaya? Eeci tacikacitiki pe.” 3 Pele Davida wakakonka alimwi wakati: “Cakutadooneka bauso balizyi kuti ulandiyanda,+ aboobo balakonzya kwaamba kuti, ‘Mutamwaambili Jonatani makani aaya nkaambo ulausa.’ Pele mbubonya Jehova mbwali muumi alimwi anduwe mboli muumi, kwasyaala buyo aniini kuti ndifwe!”+
4 Mpoonya Jonatani wakaambila Davida kuti: “Kufwumbwa ncotiiambe ndilakucitila.” 5 Kumane Davida wakati kuli Jonatani: “Juunza ulakkala mwezi,+ aboobo mebo ndeelede kuyoolya antoomwe amwami; weelede kundileka kuti nduunke kutegwa ndikayube musyokwe mane kusikila zoona kumangolezya. 6 Ikuti naa bauso bakandizule, ukabaambile kuti, ‘Davida wakandikombelezya kuti ndimuzumizye kuti aunke cakufwambaana kumunzi wakwe ku Betelehemu,+ nkaambo kuli cipaizyo cicitwa amwaka camukwasyi woonse.’+ 7 Ikuti naa bakaingule kuti, ‘Mbubo,’ nkokuti kuli luumuno kumubelesi wako. Pele ikuti naa bakanyeme, masimpe ulazyiba kuti bakanzide kundicita cintu cibi. 8 Kotondezya luyando lutamani kulindime,+ nkaambo wakapangana andime ndemubelesi wako cizuminano ca Jehova.+ Pele kuti naa ndilijisi mulandu,+ kondijaya nduwenya yebo. Ino unditolela nzi kuli bauso?”
9 Amvwe boobo Jonatani wakati: “Tacikonzyeki kuyeeya kucita cintu camusyobo ooyo kujatikizya nduwe! Ikuti ndazyiba kuti bataata bakanzide kukucitila cintu cibi, sena inga tiindakwaambila?”+ 10 Mpoonya Davida wakati kuli Jonatani: “Ino nguni uyoondaambila naa bauso bakaingule cabukali?” 11 Jonatani wakati kuli Davida: “Boola tweende musyokwe.” Aboobo boonse bobilo bakaunka musyokwe. 12 Eelyo Jonatani wakaambila Davida kuti: “Jehova Leza wa Israyeli abe kamboni kuti ndiyoobandika abataata juunza naa zoona aciindi ncicona ecino. Ikuti naa makani ali kabotu kujatikizya nduwe, nkokuti ndiyooboola kuzookwaambila. 13 Pele kuti naa bataata bakanzide kukucitila cintu cibi, aacite oobo Jehova pele ikapati kuli Jonatani ikuti naa nditakwaambili akukuleka kuti uunke muluumuno. Jehova abe anduwe+ mbubonya mbwaakali abataata.+ 14 Sena tokoonditondezya luyando lutamani lwa Jehova nondicili muumi anoliba leelyo ndaakufwa?+ 15 Utakaleki kutondezya luyando lutamani kuli bamuŋanda yangu,+ noliba leelyo Jehova aakunyonyoona basinkondonyina boonse ba Davida anyika.” 16 Aboobo Jonatani wakapanga cizuminano abamuŋanda ya Davida kati, “Jehova uyoociyeeya akubapa mulandu basinkondonyina Davida.” 17 Aboobo Jonatani wakapa Davida kukonka alimwi kujatikizya luyando ndwaakajisi kulinguwe, nkaambo wakali kumuyanda mbuli mbwaakali kuliyanda mwini.+
18 Mpoonya Jonatani wakati kulinguwe: “Juunza ulakkala mwezi,+ alimwi uyoozulwa nkaambo kunyina uuyookkala acuuno cako. 19 Mubuzuba bwatatu uyakwiindila kuzulwa, lino weelede kuunka kubusena nkookayubide buzuba* obuya akuzookkala afwaafwi abbwe eeli. 20 Mpoonya ndiyoofwusa mivwi yotatwe kulubazu lumwi lwabbwe eeli, mbuli kuti kuli cintu ncondiyasa. 21 Eelyo ndaakutuma mubelesi wangu, ndiyoomwaambila kuti, ‘Koya ukalete mivwi.’ Ikuti naa ndikamwaambile kuti, ‘Bona! Mivwi ili kulubazu lwako oolu, koya ukaibweze,’ nkokuti weelede kuboola, nkaambo mbubonya Jehova mbwali muumi caamba luumuno, nkokuti zyoonse zili buyo kabotu alimwi kunyina ntenda. 22 Pele kuti naa ndikamwaambile kuti, ‘Bona! Mivwi yawida kumbele lyako,’ nkokuti weelede kuunka, nkaambo Jehova wakutuma kuti uunke. 23 Kujatikizya cisyomezyo ncotwakapangana yebo andime,+ Jehova aabe akati kesu kukabe kutamani.”+
24 Aboobo Davida wakayuba musyokwe. Lino nowakakkala mwezi, mwami wakakkala acuuno cakwe kuti alye.+ 25 Mwami wakalikkede acuuno cakwe mbuli lyoonse afwaafwi abwaanda. Jonatani wakalilangene anguwe, eelyo Abineri+ wakakkede kulubazu lwa Saulo, pele kunyina wakakkede acuuno ca Davida. 26 Lino mubuzuba oobo Saulo kunyina ncaakaamba, pele mumoyo wakati: ‘Kuli cacitika kulinguwe icapa kuti asofwaale.+ Masimpe, kweelede kuti ulisofweede.’ 27 Buzuba bwakatobela kuzwa mwezi nowakakkala, cuuno ca Davida cakazumanana kacinyina muntu. Mpoonya Saulo wakabuzya Jonatani mwanaakwe kuti: “Ino nkaambo nzi mwana wa Jese+ ncaataboolela kuzoolya, ijilo asunu?” 28 Jonatani wakavwiila Saulo kuti: “Davida wakandikombelezya kuti ndimuzumizye kuti aunke kumunzi wakwe ku Betelehemu.+ 29 Wakati, ‘Akaka kondizumizya kuti nduunke, nkaambo tujisi cipaizyo camukwasyi kumunzi wesu alimwi mupati wangu wakandaambila kuti nkajanike. Aboobo ikuti naa wandifwida luzyalo, akaka kondileka ndifwambaane kuunka kutegwa ndikabone banabokwesu.’ Nkakaambo kaako ncaataboolela kutebulu lyamwami.” 30 Mpoonya Saulo wakamunyemena kapati Jonatani akumwaambila kuti: “Yebo omwana wamukaintu muzangi, sena uyeeya kuti tandizyi kuti ulamvwana amwana wa Jese walo uutiikuusye nsoni yebo alimwi abanyoko?* 31 Mazuba oonse mwana wa Jese ngali muumi anyika, bwami bwako tabukakkazikizyigwi pe.+ Aboobo lino kotuma bantu bakamuyandaule akumuleta okuno nkaambo weelede kufwa.”*+
32 Pele Jonatani wakavwiila Saulo bausyi kuti: “Ino nkaambo nzi nkayelede kujailwa?+ Ino wacita nzi?” 33 Mpoonya Saulo wakafwusa sumo kutegwa ayase Jonatani,+ eelyo Jonatani wakazyiba kuti bausyi bakakanzide kumujaya Davida.+ 34 Mpoonya aawo Jonatani wakanyamuka kuzwa atebulu kanyemede kapati alimwi mubuzuba oobo bwabili kuzwa mwezi nowakakkala tanaakalya cakulya cili coonse nkaambo wakausa kujatikizya Davida+ akaambo kakuti bausyi bakamusampaula.
35 Lino mafwumofwumo Jonatani wakaunka musyokwe amubelesi wakwe mulombe abusena mpobakapangene a Davida.+ 36 Mpoonya wakaambila mubelesi wakwe kuti: “Kozuza, kondiletela mivwi njondifwusa.” Mpoonya mubelesi wakazuza, eelyo Jonatani wakafwusa muvwi kumbele lyamubelesi ooyo. 37 Lino mubelesi naakasika abusena aawo nkowakawida muvwi ngwaakafwusa Jonatani, Jonatani wakaita mubelesi akwaamba kuti: “Sena muvwi tiiwawida kumbele lyako?” 38 Mpoonya Jonatani wakaita mubelesi wakwe akwaamba kuti: “Fwambaana koya! Utamuki!” Eelyo mubelesi wa Jonatani wakaibweza mivwi akuboola kuli simalelaakwe. 39 Mubelesi kunyina ncaakazyiba; ccita buyo Jonatani a Davida balikke mbibakazyi icakali kucitika. 40 Kumane Jonatani wakapa zilwanyo zyakwe kumubelesi wakwe akumwaambila kuti: “Koya, kozitola kumunzi.”
41 Lino mubelesi naakaunka, Davida wakanyamuka kuzwa mpaakabede kulubazu lwakumusanza. Kumane wakafwugama akuvwuntama ansi ziindi zyotatwe, mpoonya bakatalika kumyontana akulila, pele Davida ngowakalilisya kwiinda. 42 Jonatani wakati kuli Davida: “Koya muluumuno mbwaanga toonse tobilo twakonka+ muzina lya Jehova kuti, ‘Jehova abe akati kandime anduwe alimwi aakati kalunyungu lwangu alunyungu lwako lyoonse mane kukabe kutamani.’”+
Mpoonya Davida wakanyamuka akuunka, eelyo awalo Jonatani wakapiluka kumunzi.