ESITA

1 Lino mumazuba aa Ahasuera* ooyo iwakalela muzyooko zili 127+ kuzwa ku India kusikila ku Etiopiya,* 2 mumazuba aayo Mwami Ahasuera naakakkede acuuno cakwe cabwami, muŋanda yamwami iikwabilidwe yaku Susani,*+ 3 mumwaka watatu wabulelo bwakwe, wakapangila basilutwe bakwe boonse ababelesi bakwe ipobwe. Impi yabasikalumamba yabana Persia+ a Mediya,+ bantu balemekwa abasilutwe bazyooko bakaliko, 4 eelyo wakabatondezya lubono lwabwami bwakwe bukankamanisya alimwi abulemu bwabupati bwakwe kwamazuba manji, imazuba aali 180. 5 Naakamana mazuba aaya, mwami wakapanga pobwe lyamazuba aali ciloba lyabantu boonse ibakajanika kuŋanda yamwami iikwabilidwe yaku Susani,* balemekwa abantu buyo, mulubuwa lwamuunda wamwami. 6 Kwakali masani aatuba aalengelela, milembo mibotu amasani aamubala wajulu aakaangilidwe kuntambo zilukidwe, ntambo zyamasani aaboya bwambelele bwamubala wacisombo kazyaangidwe kuninga zyansiliva, kumisemu yamabwe luuma, alimwi azyuuno zyangolida ansiliva izyakali acibuye cakayalidwe mabwe luuma aasalala, mabwe luuma aatuba, ngale amabwe luuma aasiya.

7 Waini wakali kupedwa munkapu zyangolida; nkapu eezyo zyakaliindene-indene, alimwi waini ngwaakapa mwami wakali munji kapati kweelana abuvwubi bwakwe. 8 Kunyina wakabikkilidwe mulawo wakunywa,* nkaambo mwami wakaambilide balupati-pati bamuŋanda yakwe boonse kuti umwi aumwi inga wanywa mbuli mbwayanda.

9 Awalo Namalelo Vasiti+ wakabambila bamakaintu pobwe kuŋanda yabwami ya Mwami Ahasuera.

10 Mubuzuba bwaciloba ciindi mwami naakakondedwe kapati akaambo kawaini, wakaambila Mehumani, Bizita, Haribona,+ Bigita, Abagata, Zeta a Kaaka, basinkuta bali ciloba ibakali kubelekela Mwami Ahasuera, 11 kuti bamulete Namalelo Vasiti kumbele lyamwami kasamide amusini wabwami* kutegwa atondezye bantu abasilutwe bubotu bwakwe, nkaambo wakali kweebeka kapati. 12 Pele Namalelo Vasiti wakazumanana kukaka kuti aunke kweelana ajwi lyamwami kwiinda muli basinkuta bakwe. Eeci cakamunyemya kapati mwami alimwi wakalutila.

13 Mpoonya mwami wakaambaula abaalumi basongo ibakazyi ziyanza zyakuciindi eeco* (nkaambo oobu mbombubo mwami mbwaakali kukosola makani aakwe kwiinda mulibaabo boonse ibakazyi mulawo akubeteka milandu, 14 alimwi aabo ibakali kuboola afwaafwi anguwe bakali ba Kaasena, Seta, Adamata, Tarisi, Meresi, Maasena a Memukani, basilutwe ba Persia a Mediya bali ciloba,+ ibakali kukonzya kusika kumwami alimwi bakajisi zyuuno zyaatala mubwami). 15 Mwami wakabuzya kuti: “Kweelana amulawo, ino acitwe buti Namalelo Vasiti akaambo kakutamvwida malailile aa Mwami Ahasuera ngaakaamba kwiinda muli basinkuta bakwe?”

16 Mpoonya Memukani wakaima kumbele lyamwami abasilutwe akwaamba kuti: “Namalelo Vasiti tanaabisizya buyo mwami alikke pe,+ pele wabisizya basilutwe boonse alimwi abantu boonse bali muzyooko zyoonse zya Mwami Ahasuera. 17 Nkaambo ncaacita namalelo ciyoozyibwa kuli bamakaintu boonse, eelyo bayootalika kunyansya bamalumi babo kabati, ‘Mwami Ahasuera kumugama wakalailila kuti Namalelo Vasiti wakwe aletwe kumbele lyakwe, pele wakamukakila.’ 18 Sunu bamakaintu babasilutwe ba Persia a Mediya ibazyiba ncaacita namalelo bayakwaamba mbubonya oobo kuli bamalumi babo, nkokuti basilutwe bamwami boonse, eelyo kuyooba kusampaulana kapati akunyemezyanya. 19 Ikuti naa cili kabotu kumwami, aalailile alimwi akulembwe mumilawo yaba Persia a Mediya iitacincwi+ kuti Vasiti atakabooli kabili kumbele lya Mwami Ahasuera; alimwi mwami aape bulemu bwakwe bwabwami kumukaintu uumbi uuli kabotu kwiinda nguwe. 20 Lino mulawo ngwatiipange mwami waakwaambilizyigwa mubwami bwakwe boonse ibupati, bamakaintu boonse bayoolemeka bamalumi babo, babe balupati-pati naa bantu buyo.”

21 Muzeezo ooyu wakamubotela mwami alimwi abasilutwe, aboobo mwami wakacita ncaakaamba Memukani. 22 Aboobo mwami wakatuma magwalo muzyooko zyakwe zyoonse,+ cooko cimwi acimwi cakalembelwa kweelana ambocakali kulemba,* akubantu bamwi abamwi kweelana amwaambo wabo, kutegwa mwaalumi uuli woonse azumanane kuba silutwe muŋanda yakwe akuti bamuŋanda yakwe kabaambaula mwaambo wabantu bakwe.

2 Nozyakainda zintu eezyi, ciindi bukali bwa Mwami Ahasuera+ nibwakamana, wakayeeya ncaakacita Vasiti+ alimwi acisubulo ncaakakanzide kumupa.+ 2 Mpoonya balindizi bamwami bakaamba kuti: “Mwami aayandawidwe basimbi banakalindu beebeka. 3 Alimwi mwami asale bantu muzyooko zyoonse zili mubwami bwakwe+ kuti babunganye basimbi banakalindu boonse beebeka kuŋanda yamwami iikwabilidwe yaku Susani,* kuŋanda yabamakaintu. Beelede kuti kabalanganizyigwa a Hegai+ muzibe wamwami uulanganya bamakaintu alimwi kabananikwa mafwuta aakubabotya.* 4 Eelyo musimbi ngwatiikakkomanine mwami uyooba namalelo mubusena bwa Vasiti.”+ Muzeezo ooyu wakamubotela mwami alimwi oobo mbwaakacita.

5 Kwakali mwaalumi umwi mu Juda iwakali muŋanda yamwami iikwabilidwe yaku Susani*+ wazina lya Moodekai+ mwana wa Jairi mwana wa Simeyi mwana wa Kisi muna Benjamini,+ 6 iwakatoledwe kali mwaange kuzwa ku Jerusalemu antoomwe abantu ibakatolwa kabali baange kucisi cimbi antoomwe a Mwami Jekoniya*+ wa Juda, ooyo Mwami Nebukadinezara wa Babuloni ngwaakatola kali mwaange. 7 Ngonguwe wakali kulela* Hadasa,* nkokuti Esita, imwana musimbi wamwanookwabo abausyi,+ nkaambo wakali mucaala. Musimbi ooyu wakali mubotu alimwi weebeka. Ciindi nibakafwa bausyi abanyina, Moodekai wakamubweza akumulela mbuli mwanaakwe. 8 Lino mulumbe wamwami amulawo wakwe nozyakaambilizyigwa, aleelyo basimbi banji nobakabunganizyigwa antoomwe kuŋanda yamwami iikwabilidwe yaku Susani* kabalanganizyigwa a Hegai,+ awalo Esita wakatolwa kuŋanda yamwami akuba mumaanza aa Hegai iwakali kulanganya bamakaintu.

9 Lino musimbi ooyu wakamubotela Hegai, aboobo wakatalika kumufwida luzyalo* alimwi cakufwambaana wakalailila kuti kananikwa mafwuta aakumubotya*+ alimwi akupegwa cakulya caalubazu, alimwi wakamupa basimbi ibakasalwa ibali ciloba kuzwa kuŋanda yamwami. Kunze lyaboobo, wakamulonzya walo abasimbi bakwe aabo akubatola kubusena bubotu kapati muŋanda yabamakaintu. 10 Esita tanaakaamba cili coonse kujatikizya bantu bakwe+ naa basazinyina, nkaambo Moodekai+ wakamulailila kuti ataambili muntu naba omwe.+ 11 Buzuba abuzuba Moodekai wakali kulyeenzyeezya mulubuwa lwaŋanda yabamakaintu kuti abone mbwaakali kupona Esita alimwi ambwaakali kubambwa.

12 Musimbi umwi aumwi wakali kupegwa ciindi cakunjila ku Mwami Ahasuera musyule lyakubambwa mbobeelede kubambwa bamakaintu kwamyezi iili 12, nkaambo oobu mbobulamfwu bwaciindi icakali kutolwa kunanika basimbi mafwuta aakubabotya*–myezi iili cisambomwe bakali kunanikwa mafwuta aamuro+ eelyo myezi iimbi iili cisambomwe bakali kunanikwa mafwuta aamabbona+ amafwuta aaindene-indene aakubabotya.* 13 Mpoonya casika ciindi cakuti musimbi umwi aumwi aunke kumwami, alimwi kufwumbwa ncaalomba wakali kupegwa kuti aunke acalo kuŋanda yamwami kuzwa kuŋanda yabamakaintu. 14 Mangolezya wakali kunjila eelyo mafwumofwumo wakali kupiluka kuŋanda yabamakaintu yabili iyakali kulanganizyigwa a Syasyagazi muzibe wamwami+ iwakali kulanganya bamwanakasuwa. Tanaakali kunjila alimwi kumwami ccita kuti mwami wamukkomanina akumwiita azina lyakwe.+

15 Lino nicakasika ciindi cakuti Esita mwana wa Abihaili mwanookwabo abausyi Moodekai, ooyo ngwaakali kulela mbuli mwanaakwe+ kuti anjile kumwami, tanaakalomba cili coonse ccita buyo ncaakamwaambila Hegai muzibe wamwami iwakali kulanganya bamakaintu. (Lino Esita bakali kumuyanda boonse ibakali kumubona.) 16 Mpoonya Esita wakatolwa ku Mwami Ahasuera kuŋanda yakwe yabwami mumwezi wa 10, nkokuti mwezi wa Tebeta,* mumwaka waciloba+ wabulelo bwakwe. 17 Lino mwami wakamuyanda Esita kwiinda basimbi bambi boonse, cakuti wakafwidwa luzyalo akutondezyegwa luyando lutamani kumwami kwiinda banakalindu bambi boonse. Eelyo mwami wakamusamika musini wabwami* kumutwe akumubikka kuba namalelo+ mubusena bwa Vasiti.+ 18 Mpoonya mwami wakabambila basilutwe ababelesi bakwe boonse ipobwe lipati, pobwe lya Esita. Eelyo mwami wakaangununa bantu muzyooko zyoonse akuzumanana kupa zipego kweelana ambwaakali kukonzya mwami.

19 Lino banakalindu*+ nobakabunganizyigwa antoomwe ciindi cabili, Moodekai wakalikkede kumulyango wamwami. 20 Esita tanaakaamba cili coonse kujatikizya basazinyina abantu bakwe+ mbubonya mbwaakamulailila Moodekai; alimwi Esita wakali kucita nzyaakali kumulailila Moodekai mbubonya mbwaakali kucita naakali kulelwa anguwe.+

21 Lino kuciindi eeco Moodekai naakakkede kumulyango wamwami, basinkuta bamwami bobilo Bigitani a Teresi, balindizi bamilyango, bakanyema kapati akukanza kumujaya Mwami Ahasuera. 22 Pele makani aaya akazyibwa kuli Moodekai, eelyo mpoonya aawo wakaambila Namalelo Esita. Kumane Esita wakaambila mwami muzina lya Moodekai. 23 Aboobo makani aaya akavwuntauzyigwa akujanwa kuti ngamasimpe, eelyo Bigitani a Teresi bakaanzikwa acisamu; mpoonya makani aaya akalembwa mubbuku lyamakani aakaindi aamazuba aayo mwami kalangilila.+

3 Nozyakainda zintu eezyi, Mwami Ahasuera wakasumpula Hamani+ mwana wa Hamedata muna Agagi+ akumubikka acuuno caatala kwiinda basilutwe bambi boonse mbaakali limwi.+ 2 Mpoonya babelesi boonse bamwami ibakali kumulyango wamwami bakali kumukotamina akumuvwuntamina Hamani, nkaambo oobo mbombubo mbwaakalailila mwami kujatikizya nguwe. Pele walo Moodekai wakakaka kumukotamina nokuba kumuvwuntamina. 3 Aboobo babelesi bamwami ibakali kumulyango wamwami bakaambila Moodekai kuti: “Ino nkaambo nzi ncosotoka malailile aamwami?” 4 Buzuba abuzuba bakali kumwaambila oobo, pele tanaakali kubaswiilila pe. Mpoonya bakamwaambila Hamani kutegwa babone naa ulamuleka buyo Moodekai kuzumanana kucita mbwaakali kucita;+ nkaambo wakalibaambilide kuti mu Juda.+

5 Lino Hamani naakabona kuti Moodekai wakali kukaka kumukotamina nokuba kumuvwuntamina, wakanyema kapati.+ 6 Pele tanaakacibona kuba camaano kujaya buyo Moodekai alikke nkaambo bakalimwaambilide kujatikizya bantu ba Moodekai. Aboobo Hamani wakatalika kuyandaula nzila yakunyonyoona ba Juda boonse ibakali mubwami boonse bwa Ahasuera, nkokuti bantu ba Moodekai boonse.

7 Lino mumwezi wakusaanguna, nkokuti mwezi wa Nisani,* mumwaka wa 12+ wabulelo bwa Mwami Ahasuera, bakawaala Puri+ (nkokuti Cisolo) kubusyu bwa Hamani kuti bazyibe buzuba amwezi nobayoocita oobo, eelyo cisolo cakawida mwezi wa 12, nkokuti mwezi wa Ada.*+ 8 Mpoonya Hamani wakaambila Mwami Ahasuera kuti: “Kuli musyobo umwi wabantu bamwaikide akati kabantu+ muzyooko zyoonse zyabwami bwako,+ milawo yabo iliindene ayabantu boonse; tabatobeli milawo yamwami alimwi mwami tayelede kubaleka buyo. 9 Ikuti naa cili buyo kabotu kumwami, akulembwe mulawo wakuti bantu aaba bajaigwe. Mebo ndilabbadela matalenta* aansiliva aali 10,000 aakubbadela bantu batiibeleke mulimo ooyu.”

10 Mpoonya mwami wakagwisya nweenwe yakwe yakusimbya+ kujanza lyakwe akwiipa kuli Hamani+ mwana wa Hamedata muna Agagi,+ ooyo iwakali sinkondonyina aba Juda. 11 Kumane mwami wakati kuli Hamani: “Nsiliva alimwi abantu aaba zyapegwa kulinduwe, kuti ubacite kufwumbwa ncobona kuti ncibotu.” 12 Kumane balembi bamwami+ bakaitwa mubuzuba bwa 13 bwamwezi wakusaanguna. Bakalemba magwalo+ kweelana azintu zyoonse Hamani nzyaakalailila baleli bazisi bamwami, beendelezi bazyooko ibakali kweendelezya zyooko ziindene-indene abasilutwe bamakamu aabantu alimwi cooko cimwi acimwi cakalembelwa kweelana ambocakali kulemba* akubantu bamwi abamwi kweelana amwaambo wabo. Magwalo aaya akalembwa muzina lya Mwami Ahasuera akubikkwa zidinto anweenwe yakusimbya yamwami.+

13 Magwalo akatumwa kwiinda mubatumwa muzyooko zyoonse zyamwami, aalailila kuti kube kujaya akunyonyoona ba Juda boonse, balombe abamadaala, bana abamakaintu mubuzuba bomwe, nkokuti mubuzuba bwa 13 bwamwezi wa 12, nkokuti mwezi wa Ada,+ alimwi akubanyanga mbono zyabo.+ 14 Pepa lyamalailile aakali mumagwalo lyakamwaigwa mbuli mulawo muzyooko zyoonse akwaambilizyigwa kubantu boonse kutegwa balibambile buzuba oobo. 15 Lino ibatumwa bakaunka cakufwambaana+ akaambo kamajwi aamwami; mulawo wakapegwa kuzwa kuŋanda yamwami iikwabilidwe yaku Susani.*+ Eelyo mwami a Hamani bakakkala akutalika kunywa waini, pele munzi wa Susani* wakali mulupyopyongano.

4 Lino Moodekai+ naakamvwa zyoonse zyakali kucitika,+ wakazapula zisani zyakwe, wakasama zisani zyamasaka akulibikka mulota. Kumane wakaunka akati kamunzi, kayaabulila cakoongolola. 2 Wakagolela buyo amulyango wamwami nkaambo kunyina wakeelede kunjila amulyango wamwami kasamide zisani zyamasaka. 3 Alimwi muzyooko zyoonse+ kufwumbwa jwi amulawo wamwami nkowakasika, kwakali kulila kupati akati kaba Juda, kubikkilizya akuliimya kulya,+ kukwiila akoomoka. Banji bakali kwaalabana mumulota kabasamide zisani zyamasaka.+ 4 Lino basimbi ibakali kukutaukila Esita abazibe bakwe nobakaboola kuzoomwaambila makani aaya, namalelo wakanyongana kapati. Mpoonya wakatumya zisani kuli Moodekai kutegwa asame muciindi camasaka, pele wakazikaka. 5 Kumane Esita wakaita Hataki umwi wabazibe bamwami ooyo mwami ngwaakabikkide kulanganya namalelo, eelyo Esita wakamutuma kuyoobuzya Moodekai eeci ncocakali kwaamba alimwi acakali kucitika.

6 Aboobo Hataki wakaunka kuli Moodekai kubbuwa lyabuleya lyamumunzi ilyakali kumbele lyamulyango wamwami. 7 Mpoonya Moodekai wakamwaambila zyoonse zyakamucitikila alimwi amali aagaminide+ aayo Hamani ngaakasyomezya kupa kuciyobwedo camwami kuti ba Juda banyonyoonwe.+ 8 Alimwi wakamupa pepa aakalembedwe mulawo iwakapegwa ku Susani*+ wakuti banyonyoonwe. Wakeelede kumutondezya pepa eeli Esita akumupandulwida alimwi akumulailila+ kuti aunke kumwami kuyoomulomba kuti abafwide luzyalo akuyoomukombelezya mwami cacigaminina kujatikizya bantu bakwe.

9 Hataki wakapiluka akwaambila Esita ncaakaamba Moodekai. 10 Mpoonya Esita wakaambila Hataki akumulailila kuti akaambile Moodekai+ kuti: 11 “Babelesi bamwami boonse abantu bamuzyooko zyamwami balizyi kuti, ikuti naa mwaalumi naa mukaintu wanjila mulubuwa lwamwami+ lwamukati kataitidwe, kuli mulawo omwe buyo wakuti: Weelede kujaigwa; ccita buyo kuti naa mwami wamutondeka nkoli yabwami yangolida.+ Lino kwainda mazuba aali 30 katandiiti mwami.”

12 Lino Moodekai naakaambilwa ncaakaamba Esita, 13 wakaingula Esita kuti: “Utayeeyi kuti akaambo kakuti yebo uli muŋanda yamwami ulakonzya kufwutuka kwiinda ba Juda bamwi boonse. 14 Nkaambo ikuti naa yebo uumune buyo aciindi eeci, lugwasyo alufwutuko lwaba Juda lulazwa kubusena bumbi;+ pele yebo abamuŋanda yauso muyoofwa. Alimwi ino nguni uuzyi, ambweni akaambo kakufwutula bantu bako muciindi cili boobu ncookabeda namalelo.”+

15 Mpoonya Esita wakaingula Moodekai kuti: 16 “Koya uyobolole ba Juda boonse bali mu Susani* antoomwe, muliimye kulya+ akaambo kandime. Mutalyi nokuba kunywa kwamazuba otatwe,+ syikati amasiku. Andime abasimbi bangu tulaliimya kulya. Mpoonya ndiyakuunka kumwami nokuba kuti nkutyola mulawo, eelyo ikuti naa ndiyoofwa, andikafwe buyo.” 17 Aboobo Moodekai wakaunka akucita zyoonse nzyaakamulailila Esita.

5 Lino mubuzuba bwatatu+ Esita wakasama zisani zyabwami akuyakwiima mulubuwa lwamukati lwaŋanda yamwami iluli kumbele lyaŋanda yamwami, ciindi mwami naakakkede acuuno cakwe cabwami muŋanda yabwami kalangide kumulyango waŋanda eeyo. 2 Mwami mbwaakamubonena buyo Namalelo Esita kaimvwi mulubuwa, wakamufwida luzyalo, eelyo mwami wakatondeka nkoli yakwe yabwami+ yangolida iyakali mujanza lyakwe kuli Esita. Aboobo Esita wakaboola afwaafwi akujata nkoli yabwami nkoili kumbele.

3 Mpoonya mwami wakabuzya Esita kuti: “Ino ujisi makani nzi Namalelo Esita? Ino ulomba nzi? Nokuba kuti walomba cisela cabwami bwangu, ulapegwa!” 4 Eelyo Esita wakaingula kuti: “Ikuti naa ncibotu kulinduwe omwami, uboole yebo a Hamani+ sunu kupobwe ndindakubambila.” 5 Aboobo mwami wakaambila baalumi bakwe kuti: “Amumwaambile Hamani aboole cakufwambaana kweelana ambwaamba Esita.” Aboobo mwami a Hamani bakaunka kupobwe ndyaakabamba Esita.

6 Ciindi nobakali kunywa waini, mwami wakaambila Esita kuti: “Ino uyanda nzi? Ulapegwa ncoyanda! Alimwi ino ulomba nzi? Nokuba kuti walomba cisela cabwami bwangu, ulapegwa!”+ 7 Esita wakavwiila kuti: “Ncondiyanda alimwi akulomba nceeci, 8 Ikuti naa omwami wandifwida luzyalo akuti naa cakubotela kundipa ncondiyanda akucita kweelana akulomba kwangu, nkokuti yebo a Hamani mukaboole kupobwe ndendiyoomubambila juunza; eelyo ndiyoocita kweelana amboamba yebo omwami.”

9 Buzuba oobo Hamani wakaunka kakkomene akukondwa mumoyo. Pele Hamani naakabona Moodekai kumulyango wamwami akuti tanaakanyamuka nokuba kukankama akaambo kanguwe, Hamani wakanyema kapati akaambo ka Moodekai.+ 10 Nokuba boobo Hamani wakalijata akunjila buyo muŋanda yakwe. Mpoonya wakatumya mulomo wakuti beenzinyina alimwi a Zeresi+ mukaintu wakwe baboole. 11 Kumane Hamani wakatalika kulidunda akaambo kakuvwula kwabuvwubi bwakwe, bana banji mbaakajisi,+ zintu zyoonse mwami nzyaakamucitila kuti amusumpule alimwi ambwaakamusumpula atala lyabasilutwe ababelesi bamwami.+

12 Mpoonya Hamani wakati: “Kuyungizya waawo, Namalelo Esita tanaakatamba muntu uuli woonse ccita buyo ndime amwami kupobwe ndyaakabamba.+ Alimwi ajuunza ndilitambidwe kulinguwe antoomwe amwami.+ 13 Pele zyoonse eezyi tazindikkomanisyi kufwumbwa buyo kuti kandimubona Moodekai imu Juda kakkede kumulyango wamwami.” 14 Aboobo Zeresi mukaintu wakwe alimwi abeenzinyina boonse ba Hamani bakati kulinguwe: “Akusimpikwe cisamu cilampa tukokola tuli 50 * kuya mujulu. Mpoonya mafwumofwumo ukaambile mwami kuti Moodekai aanzikwe alincico.+ Kumane ukaunke kupobwe kokkomene.” Muzeezo ooyu wakamubotela Hamani, aboobo wakalailila kuti kusimpikwe cisamu.

6 Lino masiku aayo mwami wakaba acilabila.* Aboobo wakalailila kuti aletelwe bbuku lyamakani aakaindi,+ eelyo bakamubalila makani aayo mwami. 2 Mubbuku eelyo kwakajanika makani Moodekai ngaakaambide kujatikizya Bigitani a Teresi, basinkuta bamwami bobilo, balindizi bamilyango ibakakanzide kujaya Mwami Ahasuera.+ 3 Mpoonya mwami wakabuzya kuti: “Ino Moodekai wakalemekwa buti alimwi mbulumbu nzi mbwaakapegwa akaambo kaceeci ncaakacita?” Eelyo babelesi bamwami bakati: “Kunyina ncaakacitilwa pe.”

4 Eelyo mwami wakati: “Ino nguni uuli mulubuwa?” Lino Hamani wakaliboolede mulubuwa lwaanze+ lwaŋanda yamwami kutegwa azikwaambile mwami kuti aanzike Moodekai acisamu eeco ncaakamubambila.+ 5 Mpoonya babelesi bamwami bakati kulinguwe: “Ngu Hamani+ uuli mulubuwa.” Aboobo mwami wakati: “Amumwaambile anjile.”

6 Lino Hamani naakanjila, mwami wakamubuzya kuti: “Ino ncinzi ncayelede kucitilwa muntu ooyo mwami ngwaayanda kulemeka?” Eelyo mumoyo wakwe Hamani wakati: “Nguni uumbi mwami ngwanga wayanda kulemeka kunze aandime?”+ 7 Aboobo Hamani wakati kumwami: “Imuntu ooyo mwami ngwaayanda kulemeka, 8 abamuletele cisani cabwami+ eeco ncasama mwami alimwi abbiza ndyatanta kalisamikidwe musini wabwami amutwe walyo. 9 Mpoonya cisani cabwami alimwi abbiza zyeelede kupegwa kuli umwi wabasilutwe bamwami balemekwa, mpoonya cisani eeco beelede kucisamika muntu ooyo mwami ngwaayanda kulemeka akumutansika abbiza mubbuwa lyabuleya lyamunzi. Beelede koongolola kabati: ‘Oobu mbwayelede kucitilwa muntu ooyo mwami ngwaayanda kulemeka!’”+ 10 Mpoonya aawo mwami wakati kuli Hamani: “Fwambaana! Kobweza cisani abbiza, mpoonya ucite mbubonya mboozwa akwaamba kuli Moodekai imu Juda uukkede kumulyango wamwami. Ucite zyoonse nzyowaamba, utasiyi nociba comwe pe.”

11 Aboobo Hamani wakabweza cisani abbiza, eelyo wakamusamika Moodekai+ akumutansika abbiza akumwiinzya mubbuwa lyabuleya lyamunzi kayaaboongolola kumbele lyakwe kuti: “Oobu mbwayelede kucitilwa muntu ooyo mwami ngwaayanda kulemeka!” 12 Kuzwa waawo Moodekai wakapiluka kumulyango wamwami, pele Hamani wakaunka cakufwambaana kuŋanda yakwe kayaabulila alimwi kalivwumbide kumutwe. 13 Lino Hamani naakalwiida Zeresi+ mukaintu wakwe abeenzinyina boonse zintu zyoonse zyakamucitikila, bantu bakwe basongo alimwi a Zeresi mukaintu wakwe bakamwaambila kuti: “Ikuti naa Moodekai ooyu waba kale acuuno caatala kwiinda nduwe kali walunyungu lwaba Juda, tokoomuzunda pe; pele ulawa kubusyu bwakwe.”

14 Lino nibakacili kwaambaula anguwe basinkuta bamwami bakasika akutola Hamani cakufwambaana kupobwe ndyaakapangide Esita.+

7 Aboobo mwami a Hamani+ bakaunka kuti bakapobole antoomwe a Namalelo Esita. 2 Lino mubuzuba bwabili nibakali kunywa waini, mwami alimwi wakati kuli Esita: “Ino uyanda nzi Namalelo Esita? Ulapegwa ncoyanda! Alimwi ino ulomba nzi? Nokuba kuti walomba cisela cabwami bwangu, ulapegwa!”+ 3 Namalelo Esita wakavwiila kuti: “Ikuti naa omwami wandifwida luzyalo akuti naa ncibotu mumeso aako, ndilomba kuti undivwune mebo antoomwe abantu bangu.+ 4 Nkaambo mebo abantu bangu twaabwa+ kuti tujaigwe akunyonyoonwa.+ Nikwali kuti twasambalwa buyo kuti tube bazike baalumi abamakaintu, nindaumuna buyo. Pele mapenzi aaya taayelede kulekwa buyo pe, nkaambo awalo mwami alamujatikizya.”

5 Mpoonya Mwami Ahasuera wakabuzya Namalelo Esita kuti: “Ino ngwani ooyo, alimwi ino uli kuli ooyo walipa kucita cintu cili boobu?” 6 Esita wakati: “Mwaalumi ooyo uutulwana alimwi sinkondoma, ngu Hamani ooyu mubi.”

Eelyo Hamani wakayoowa kapati akaambo kamwami anamalelo. 7 Mwami wakanyamuka kanyemede kuzwa apobwe lyawaini akuunka mumuunda wamwami, pele Hamani wakanyamuka kulomba Namalelo Esita kuti amuvwune, nkaambo wakabona kuti mwami takoomuleka buyo katamusubuli. 8 Lino mwami wakapiluka kuŋanda yapobwe ikwakali kunywigwa waini kuzwa kumuunda wamwami, eelyo wakajana kuti Hamani wakaliliwaalide acuuno aawo Esita mpaakabede. Mpoonya mwami wakakankamuka kuti: “Sena uyanda kumujata namalelo kandilangilila muŋanda yangu?” Lino mwami kacaambaula, Hamani bakamuvwumba kubusyu. 9 Lino Haribona+ umwi wabasinkuta bamwami wakati: “Alimwi kuli cisamu cilampa tukokola tuli 50 * Hamani ncaakabambilide Moodekai+ ooyo iwakavwuna mwami.+ Nkocili cilisimpikidwe kuŋanda ya Hamani.” Amvwe boobo mwami wakati: “Amumwaanzike alincico.” 10 Aboobo Hamani bakamwaanzika acisamu ncaakabambilide Moodekai, eelyo bukali bwamwami bwakamana.

8 Lino buzuba oobo Mwami Ahasuera wakapa Namalelo Esita ŋanda ya Hamani,+ sinkondonyina aba Juda;+ alimwi awalo Moodekai wakaboola kumwami, nkaambo Esita wakamwaambila mwami kuti Moodekai wakali musazinyina.+ 2 Mpoonya mwami wakagwisya nweenwe+ yakwe yakusimbya njaakanyanga Hamani akwiipa Moodekai. Eelyo Esita wakabikka Moodekai kulanganya ŋanda ya Hamani.+

3 Kuyungizya waawo, Esita alimwi wakaambaula amwami. Wakaliwaala kumaulu aakwe akulila akumukombelezya kuti agwisye bubi bwa Hamani muna Agagi amakanze mabi ngaakajisi kujatikizya ba Juda.+ 4 Mwami wakatondeka nkoli yabwami yangolida kuli Esita,+ eelyo Esita wakanyamuka akwiima kumbele lyamwami. 5 Mpoonya wakati: “Ikuti naa ncibotu mumeso aako omwami, akuti naa wandifwida luzyalo akuti naa cileelede kulinduwe alimwi akuti naa ndakubotela, akulembwe mulawo wakuti atatobelwi magwalo aakalembwa, aayo aajisi makanze mabi aa Hamani+ mwana wa Hamedata muna Agagi+ ngaakalemba kuti ba Juda boonse ibali muzyooko zyamwami banyonyoonwe. 6 Ino mebo inga ndaumuna buti kandibwene mapenzi aayoosikila bantu bangu alimwi ino inga ndaliyumya buti kandilangilila lunyonyooko lwabasazima?”

7 Aboobo Mwami Ahasuera wakaambila Namalelo Esita a Moodekai mu Juda kuti: “Amubone! Ŋanda ya Hamani ndaipa kuli Esita,+ alimwi ndakalailila kuti Hamani aanzikwe acisamu+ akaambo kamakanze aakwe aakulwana* ba Juda. 8 Lino mulakonzya kulemba magwalo muzina lyamwami kwiiminina ba Juda kweelana ancomubona kuti ncibotu mumeso aanu eelyo mwaadinte anweenwe yakusimbya yamwami, nkaambo kufwumbwa calembwa muzina lyamwami akudintwa anweenwe yakusimbya yamwami tacikonzyi kucincwa pe.”+

9 Aboobo balembi bamwami bakaitwa mumwezi watatu nkokuti mwezi wa Siva,* mubuzuba bwa 23, eelyo bakalemba zyoonse nzyaakalailila Moodekai kuba Juda, baleli bazisi,+ beendelezi abasilutwe bazyooko+ kuzwa ku India kusikila ku Etiopiya, nkokuti ibali muzyooko zili 127, cooko cimwi acimwi cakalembelwa kweelana ambocakali kulemba* akubantu bamwi abamwi kweelana amwaambo wabo, abalo ba Juda kweelana akulemba kwabo* amwaambo wabo.

10 Mpoonya wakalemba magwalo muzina lya Mwami Ahasuera akwaadinta anweenwe yakusimbya yamwami+ akwaatuma kwiinda mubatumwa basimabbiza; balo ibakabelesya mabbiza aakali kuzuza kapati aayo aakavwubilwa kubelesyegwa mumulimo wamwami. 11 Mumagwalo aayo mwami wakazumizya ba Juda ibakali muminzi yoonse iindene-indene kuti babungane antoomwe akukwabilila maumi aabo, akuti banyonyoone cooko akujaya nkamu zyoonse zyabantu izyakali kubacitila lunya aabo ibakali kuyoobalwana, nobaba bamakaintu naa bana alimwi akubanyanga zintu zyabo.+ 12 Eeci cakeelede kucitwa mubuzuba bomwe muzyooko zyoonse zya Mwami Ahasuera, mubuzuba bwa 13 bwamwezi wa 12, nkokuti mwezi wa Ada.*+ 13 Makani aakalembedwe mupepa lyamalailile akeelede kuba mulawo muzyooko zyoonse. Akeelede kwaambilizyigwa kubantu boonse kutegwa ba Juda balibambile buzuba oobo kujolela basinkondonyina.+ 14 Batumwa ibakali kutanta mabbiza aakali kubelesyegwa mumulimo wamwami bakaunka cakufwambaana akaambo kamajwi aamwami. Alimwi mulawo wakapegwa kuzwa muŋanda yamwami iyakakwabilidwe yaku Susani.*+

15 Lino Moodekai wakazwa kubusyu bwamwami kasamide cisani cabwami camubala wajulu amulembo mubotu kapati, wakalisamide amusini mupati wangolida ajansi lyamulembo mubotu aboya bwambelele bwamubala wacisombo.+ Eelyo munzi wa Susani* wakoongolola cakukondwa. 16 Lino ba Juda bakakkalwa myoyo,* bakakondwa, bakasekelela alimwi akulemekwa. 17 Alimwi muzyooko zyoonse amuminzi yoonse, kufwumbwa ooko malailile amulawo wamwami nkozyakasika, ba Juda bakakondwa, kukkomana, kupanga mapobwe alimwi akusekelela. Lino bantu banji bamucisi bakatalika kulyaamba kuti abalo mba Juda+ akaambo kakuyoowa ba Juda.

9 Lino mubuzuba bwa 13 bwamwezi wa 12, nkokuti mwezi wa Ada,*+ eelyo nocakasika ciindi cakuzuzikizya majwi aamwami amulawo wakwe,+ nkokuti buzuba basinkondonyina baba Juda nobakali kuyeeya kuti balabazunda, zintu zyakacinca. Ba Juda mbabakazunda basinkondonyina aaba ibakabasulide.+ 2 Ba Juda bakabungana antoomwe muminzi yabo muzyooko zyoonse zya Mwami Ahasuera+ kuti bajaye baabo ibakali kuyanda kubacisa, alimwi kunyina muntu naba omwe wakabayumina nkaambo bantu boonse bakabayoowa.+ 3 Alimwi basilutwe boonse bazyooko, baleli bazisi,+ beendelezi bazyooko alimwi abaabo bakali kubeleka mulimo wamwami bakali kugwasya ba Juda, nkaambo bakali kuyoowa Moodekai. 4 Nkaambo Moodekai wakaba anguzu+ kapati muŋanda yamwami alimwi mpuwo yakwe yakali kuyaabumvwigwa muzyooko zyoonse akaambo kakuti mwaalumi ooyu wakali kuyaabwiindila kuba anguzu.

5 Ba Juda bakabajaya akubanyonyoona basinkondonyina boonse apanga; bakabacita kufwumbwa mbobayanda aabo ibakabasulide.+ 6 Lino mu Susani*+ imunzi wamwami uukwabilidwe, ba Juda bakajaya akunyonyoona bantu bali 500. 7 Alimwi bakajaya Pasandata, Dalaponi, Asapata, 8 Porata, Adalia, Aridata, 9 Pamasata, Arisai, Aridai a Vaizata, 10 ibana bali 10 ba Hamani mwana wa Hamedata sinkondonyina waba Juda.+ Pele nobakamana kubajaya, tiibakabweza zintu zyabo zili zyoonse pe.+

11 Mubuzuba oobo mweelwe wabaabo bakajaigwa mu Susani* imunzi wamwami uukwabilidwe, wakasika kumwami.

12 Mwami wakaambila Namalelo Esita kuti: “Mu Susani* imunzi wamwami uukwabilidwe, ba Juda bajaya akunyonyoona bantu bali 500 kubikkilizya abana ba Hamani bali 10. Ino mbuti mwalo muzyooko zimbi zyamwami?+ Ncinzi ncoyanda lino? Ulapegwa ncoyanda. Sena kuli cimbi ncolomba? Ulapegwa ncolomba.” 13 Esita wakaingula kuti: “Ikuti naa ncibotu mumeso aamwami,+ kozumizya ba Juda bali mu Susani* kuti juunza bakacite kweelana amulawo wasunu;+ alimwi kozumizya kuti bana ba Hamani bali 10 baanzikwe acisamu.”+ 14 Aboobo mwami wakalailila kuti kucitwe mbubonya oobo. Lino mulawo wakapegwa mu Susani* alimwi bana ba Hamani bali 10 bakaanzikwa.

15 Ba Juda ibakali mu Susani* bakabungana alimwi antoomwe mubuzuba bwa 14 bwamwezi wa Ada,+ eelyo bakajaya bantu bali 300 mu Susani,* pele tiibakabweza zintu zyabo zili zyoonse pe.

16 Ba Juda bambi ibakali muzyooko zyamwami abalo bakabungana antoomwe kuti bakwabilile maumi aabo.*+ Bakajolela basinkondonyina+ akujaya bantu bali 75,000 akati kabaabo ibakabasulide; pele tiibakabweza zintu zyabo zili zyoonse pe. 17 Oobo bwakali buzuba bwa 13 bwamwezi wa Ada, eelyo mubuzuba bwa 14 bakalyookezya alimwi bakabupanga kuba buzuba bwapobwe akusekelela.

18 Ba Juda ibakali mu Susani* bakabungana antoomwe alimwi mubuzuba bwa 13+ amubuzuba bwa 14,+ eelyo mubuzuba bwa 15 bakalyookezya alimwi bakabupanga kuba buzuba bwapobwe akusekelela. 19 Nkakaambo kaako ba Juda ibakali muzyooko zyeengelede bakapanga buzuba bwa 14 bwamwezi wa Ada kuba buzuba bwakusekelela+ akupobola akukondwa alimwi aciindi cakupana zyakulya.+

20 Moodekai+ wakazilemba zintu eezyi akutuma magwalo kuba Juda boonse ibakali muzyooko zyoonse zya Mwami Ahasuera, izyakali afwaafwi azyakali kule. 21 Wakabalailila kuti lyoonse kababamba buzuba bwa 14 abwa 15 bwamwezi wa Ada mwaka amwaka, 22 nkaambo mumazuba aayo ba Juda bakalyookezya kukunyonganizyigwa abasinkondonyina alimwi mumwezi ooyo kuusa kwabo kwakacinca kuba kusekelela alimwi buzuba bwakulila kwabo bwakaba buzuba bwakukondwa.+ Mazuba aayo bakeelede kwaacita kuba mazuba aakusekelela aakupobola aciindi cakupana zyakulya alimwi akupa zipego kubacete.

23 Eelyo ba Juda bakazumina kuzumanana kusekelela ooku nkobakatalika, alimwi akucita nzyaakabalembela Moodekai. 24 Nkaambo Hamani+ mwana wa Hamedata muna Agagi,+ sinkondonyina waba Juda boonse wakajisi makanze aakunyonyoona+ ba Juda alimwi wakalailila kuti kuumwe Puri,+ nkokuti Cisolo, kutegwa abanyonganye akubanyonyoona. 25 Pele Esita naakaboola kubusyu bwamwami, mwami wakapa malailile kwiinda mukulemba kuti:+ “Amuleke makanze aakwe mabi ngaakajisi kujatikizya ba Juda+ apiluke amutwe wakwe”; eelyo bakamwaanzika walo abana bakwe acisamu.+ 26 Nkakaambo kaako mazuba aayo akaitwa kuti Purimu, akaambo kacisolo citegwa Puri.*+ Aboobo akaambo kamakani oonse aakalembedwe mulugwalo oolu alimwi anzyobakabona kujatikizya makani aaya azintu zyakabacitikila, 27 ba Juda bakazuminana kuti balo abana babo abaabo boonse ibakalikamantanya kulimbabo,+ banoosekelela mazuba aaya obilo akucita kweelana amakani aakalembedwe kujatikizya ngawo aciindi cibikkidwe mwaka amwaka. 28 Mazuba aaya akeelede kuyeeyegwa akubambwa mumazyalani woonse, mumukwasyi umwi aumwi, mucooko cimwi acimwi amumunzi umwi aumwi; alimwi aaya mazuba aa Purimu tanaakeelede kuleka kubambwa akati kaba Juda alimwi akeelede kuyeeyegwa lyoonse akati kalunyungu lwabo.

29 Mpoonya Namalelo Esita imwana wa Abihaili a Moodekai mu Juda bakalemba munguzu zyabwami kusinizya lugwalo oolu lwabili kujatikizya Purimu. 30 Kumane Moodekai wakatuma magwalo kuba Juda boonse ibakali muzyooko zili 127+ mubwami bwa Ahasuera,+ aakajisi majwi aaluumuno alimwi akasimpe, 31 ikusinizya kuti mazuba aa Purimu abambwa muziindi zyawo zibikkidwe mbubonya Moodekai mu Juda a Namalelo Esita mbobakabalailila+ kucita alimwi ambobakazuminana kucita+ balo abana babo mumakani aakuliimya+ kulya akulilila lugwasyo.+ 32 Mulawo ngwaakabikka Esita wakaasinizya makani aaya aa Purimu,+ eelyo akalembwa mubbuku.

10 Mwami Ahasuera wakatalisya cibbalo mucilawo cakwe coonse alimwi amunsumbu zyakulwizi.

2 Milimo yakwe yoonse yanguzu njaakacita kubikkilizya amakani oonse aabupati bwa Moodekai+ mbwaakasumpulwa amwami,+ alilembedwe mubbuku lyamakani aakaindi+ aakuciindi cabami ba Mediya a Persia.+ 3 Nkaambo Moodekai mu Juda wakali wabili ku Mwami Ahasuera. Wakali kulemekwa kapati akati kaba Juda akuyandwa abanabokwabo banji. Wakali kubacitila zintu zibotu bantu bakwe alimwi wakali kwaamba majwi aaluumuno kulunyungu lwabo loonse.