LWIIMBO LWA SOLOMONI
1 Ndoolu lwiimbo lwiinda nyimbo zyoonse, ilwiimbo lwa Solomoni:+
3 Kununkilila kwamafwuta aako nkubotu.+
Izina lyako lili mbuli mafwuta aanunkilila aatilwa.+
Ncobakuyandila basimbi.
4 Konditola;* atutije.
Mwami wandinjizya mumaanda aakwe aamukati!
Atukondwe akusekelela antoomwe.
Atutembaule* luyando ndotondezya kwiinda waini.
Nkakaambo kaako basimbi ncobakuyanda.
5 Ndikasimbi kasiya, pele kabotu, nobana basimbi bamu Jerusalemu,
Ndili mbuli matente aa Kedara,+ mbuli milembo+ yakumatente aa Solomoni.
6 Mutandilangi akaambo kakuti ndilasiya,
Nkaambo zuba lyakanduumpa.
Banabokwesu basankwa bakandinyemena;
Bakandibikka kuti kandilanganya myuunda yamisaansa,
Pele muunda wangu wamisaansa tiindakaulanganya pe.
7 Kondaambila, yebo omuyandwa wangu,
Nkoembelela butanga bwako,+
Nkotola butanga kuti bubuwe ciindi camasyikati.
Ino nkaambo nzi ncondeelede kuba mbuli mukaintu uulivwumbide mulembo kumutwe*
Akati kamatanga aabeenzinyoko?”
8 “Ikuti naa tozyi, yebo omusimbi weebeka kapati akati kabamakaintu,
Koya omukamwini koyaabutobelezya mikondo yabutanga
Ukeembele twana twampongo zyako kumbali aamatente aabeembezi.”
9 “Yebo omusimbi wangu ooyandwa, ndakukozyanisya abbiza lizyazi* akati kankalaki zya Farao.+
10 Masaya aako aboneka kabotu akaambo kazilisakatizyo,*
Nsingo yako iboneka kabotu akaambo kabulungu mbosamide.
11 Tulakupangila zilisakatizyo zyangolida
Zibikkidwe nsiliva.”
12 “Mwami nakkede kutebulu lyakwe lili mbuli mubalo,
13 Kulindime, muyandwa wangu uli mbuli kakomo katununkilizyo twamuro+
Ikali akati kankolo zyangu masiku.
14 Kulindime, muyandwa wangu uli mbuli cikama cacisyango cahena+
Akati kamyuunda yamisaansa yaku Eni-gedi.”+
15 “Langa! Eelo kaka uli mubotu, yebo omusimbi wangu ooyandwa.
Langa! Eelo kaka uli mubotu. Meso aako ali mbuli meso aanziba.”+
16 “Langa! Ayebo uli mubotu, yebo omuyandwa wangu, alimwi ulakondelezya.+
Bulo bwesu buli akati kamatuvwu mateteete.
17 Misemu yaŋanda* yesu njazisamu zyakkedari,
Masomo ngazisamu zyamulombe.
2 “Mbubonya mbuli mpana akati kamamvwa
Mbwabede muyandwa wangu akati kabana basimbi.”
3 “Mbubonya mbuli cisamu camaapele akati kazisamu zyamusyokwe,
Mbwabede muyandwa wangu akati kabana basankwa.
Ndiliyandide kapati kukkala mucimvwule cakwe,
Alimwi mucelo wakwe ulanona kapati mukanwa lyangu.
4 Wakandinjizya muŋanda yapobwe,*
Alimwi ndembela yakwe iyakali kundivwupaula nduyando.
5 Amundikatalusye azibbuubbu zyamisaansa miyumu;+
Amundikkutye amicelo yamaapele,
Nkaambo luyando lwandijaya.
6 Ijanza lyakwe lyalumwensyi lili kunsi aamutwe wangu,
Alimwi janza lyakwe lyalulyo lilindikumbatide.+
7 Ndikonkezya ndinywe, nobana basimbi bamu Jerusalemu,
Kwiinda muli bananja alimwi ansya+ zyamusyokwe kuti:
Mutasoli kubusya naa kukulwaizya luyando mulindime ccita mane lulitalikile lwini.+
8 Ndimvwide jwi lyamuyandwa wangu!
Amubone! Nguulya ulaboola,
Uzyaabutanta malundu, uzyaabusotauka atulundu.
9 Muyandwa wangu uli mbuli nanja, mbuli mwana wansya.+
Nguulya wiimvwi kunze aabwaanda bwesu,
Kalanga amawindo,
Kasondela mumawindo aabupulo-pulo.
10 Muyandwa wangu waambaula, wandaambila kuti:
‘Nyamuka, omuyandwa wangu,
Yebo omusimbi wangu mubotu, boola tweende.
11 Bona! Mupeyo wamana.*
Imvwula yamana, yaunka.
12 Maluba-luba alibonya mucisi,+
Ciindi cakukwezyula zisyango casika,+
Alimwi kulila kwanziba kulalimvwisya mucisi cesu.+
13 Inkuyu zyakusaanguna zyatalika kubizwa mumukuyu;+
Misaansa yafwulula akununkilila.
Nyamuka, boola, yebo omuyandwa wangu.
Omusimbi wangu mubotu, boola tweende.
14 Yebo onziba yangu iili muŋanzi zyamandomba,+
Mubusena busisikide bwakujeleele,
Leka nkubone, ndimvwe jwi lyako,+
Nkaambo jwi lyako lilakondelezya alimwi uboneka kabotu.’”+
15 “Amutujatile bamwaaba,
Bamwaaba bacili baniini ibanyonyoona myuunda yamisaansa,
Nkaambo myuunda yesu yamisaansa yafwulula.”
16 “Muyandwa wangu nguwangu, ambebo ndili wakwe.+
17 Kusikila mane kawo kaunge ciindi camasyikati azyalo zimvwiide zizimaane,
Kojokela cakufwambaana, omuyandwa wangu,
Koba mbuli nanja+ naa mbuli mwana wansya+ uuli azilundu zitwaandaanya.*
3 “Imasiku nindakali abulo bwangu,
Ndakayandaula muyandwa wangu+ wanditolela moyo.
Ndakamuyandaula, pele tiindakamujana pe.+
2 Aboobo ndakaamba kuti, Ndilabuka akuunka kandiyaabweendeenda mumunzi;
Ndilamuyandaula muyandwa wangu iwanditolela moyo,
Mumigwagwa amumabuwa aabuleya.
Ndakamuyandaula, pele tiindakamujana pe.
3 Balindizi ibakali kweendeenda mumunzi bakandijana.+
Aboobo ndakababuzya kuti, ‘Sena kuli nomwamubona muyandwa wangu wanditolela moyo?’
4 Mbondakabaindila buyo
Ndakamujana muyandwa wangu iwakanditolela moyo.
Ndakamujatisya, tiindakamuleka pe kuti aunke
Kusikila mane ndamunjizya muŋanda yabaama bakandizyala,+
Muŋanda yamukati yabaabo bakandiyumwide mwida.
5 Ndikonkezya ndinywe, nobana basimbi bamu Jerusalemu,
Kwiinda muli bananja alimwi ansya zyamusyokwe kuti:
Mutasoli kubusya naa kukulwaizya luyando mulindime ccita mane lulitalikile lwini.”+
6 “Ino ncinzi eeci ciboola kuzwa munkanda mbuli misumpuululu yabusi,
Cinunkilila tununkilizyo twamuro atwalibano,
Atununkilizyo twabusu twamisyobo yoonse twasimakwebo?”+
7 “Amubone! Ncuuno ca Solomoni.
Baalumi basinguzu bali 60 balicizingulukide,
Kuzwa kubaalumi basinguzu ba Israyeli,+
8 Boonse buyo bajisi mapanga,
Boonse buyo baliyiisyidwe kulwana munkondo,
Umwi aumwi ujisi panga akasolo kakwe
Kuti alikwabilile kuzintu ziyoosya masiku.”
9 “Ncuuno cabwami ca Mwami Solomoni
Ncaakalipangila kuzwa kuzisamu zyaku Lebano.+
10 Tusemu twancico wakatupanga ansiliva,
Zyakuyaama zyancico nzyangolida.
Cikkalilo cancico ncaboya bwambelele bwakanyikwa mumubala wacisombo;
Mocili mukati cakabotezyegwa caluyando
Abana basimbi bamu Jerusalemu.”
11 “Nobana basimbi bamu Ziyoni, amuzwe muunke
Mukabone Mwami Solomoni
Uusamide musini ngobakamupangila banyina+
Buzuba naakali kukwata,
Ibuzuba niwakakondwa moyo wakwe.”
4 “Bona! Uli mubotu, omuyandwa wangu.
Bona uli mubotu.
Meso aako ali mbuli meso aanziba, mucitambala cako.
Masusu aako ali mbuli butanga bwampongo
Ziselemuka kumalundu aa Gileadi.+
2 Meno aako ali mbuli butanga bwambelele zyazwa aakugelwa
Izyazwa mukusanzyigwa,
Zyoonse buyo zizyala maanga,
Alimwi akati kanzizyo kunyina iisowa bana banjiyo.
3 Milomo yako ili mbuli katambo kasubila,
Alimwi nzyoamba zilakondelezya.
Mbuli cipaanzi camucelo wapomegranite
Mbwaabede masaya aako mucitambala cako.
4 Nsingo yako+ ili mbuli ngazi ya Davida,+
Iyakayakwa amabwe aayalene
Alinjiyo aanzikidwe ntobo zili 1,000,
Inzya ntobo zyoonse zyabaalumi basinguzu izili mbuli mubalo.+
6 “Mane kawo kaunge ciindi camasyikati azyalo zimvwiide zizimaane,
Ndilaunka mulweendo lwangu kutozya kucilundu catununkilizyo twamuro
Alimwi akukalundu katununkilizyo twalibano.”+
8 Katuya antoomwe kuzwa ku Lebano, onabwiinga wangu,
Katuya antoomwe kuzwa ku Lebano.+
Koselemuka kuzwa atala aacilundu ca Amana,*
Kuzwa atala aacilundu ca Seniri, aca Herimoni,+
Kuzwa moomo mukkala basyuumbwa, kuzwa kumalundu aabasiluwe.
9 Wanditolela moyo+ omucizyi wangu, nabwiinga wangu,
Wanditolela moyo noondilanga ciindi comwe buyo ameso aako,
Abulungu bomwe bwakukawenje kako.
10 Eelo kaka luyando ndotondezya lulakondelezya,+ omucizyi wangu, nabwiinga wangu!
Eelo kaka luyando ndotondezya ndubotu kwiinda waini,+
Alimwi bweema bwamafwuta aako bulanunkilila kapati kwiinda tununkilizyo twamisyobo yoonse!+
11 Milomo yako ilosya mulolo wacimbulwe cabuci,+ onabwiinga wangu.
Buci amukupa zili kunsi aamulaka wako,+
Alimwi bweema bwazisani zyako buli mbuli bweema bwaku Lebano.
12 Omucizyi wangu, onabwiinga wangu, uli mbuli muunda uukkiidwe,
Inzya muunda uukkiidwe, ikasensa kajalilidwe.
13 Mitabi* yako niparadaiso* yamapomegranite
Iijisi micelo mibotu kapati, zisyango zyahena kubikkilizya azisyango zyanardo,
14 Nardo+ asaferone, minsale*+ asinamoni,+
Kubikkilizya amisyobo yoonse yazisamu zyatununkilizyo twalibano, muro amaaloye,+
Antoomwe atununkilizyo toonse tubotu kapati.+
15 Yebo uli kasensa kamumuunda, mugoti wamaanzi mabotu aatayuminini,
Alimwi atulonga tukunka kuzwa ku Lebano.+
16 Kobuka, Omuwo wakunyika;
Koboola, Omuwo wakumusanza.
Kounga* mumuunda wangu.
Bweema bwatununkilizyo twanguwo abumwaike.”
“Muyandwa wangu aanjile mumuunda wakwe
Akulya micelo yanguwo mibotu kapati.”
5 “Ndanjila mumuunda wangu,+
Omucizyi wangu, nabwiinga wangu.
Ndacela tununkilizyo twamuro alimwi amicelo yangu iinunkilila.+
Ndalya cimbulwe cabuci cangu alimwi abuci bwangu;
Ndanywa waini amukupa wangu.”+
“Amulye, nywebo nomumvwana!
Amunywe akukolwa luyando ndomutondezyanya!”+
2 “Ndiloona, pele moyo wangu ulalanga.+
Ndamvwa kukonkomona kwamuyandwa wangu!”
“Kondijalwida, Omucizyi wangu, omuyandwa wangu,
Onziba yangu, yebo ookwaangu, oonyina kampenda!
Nkaambo mutwe wangu wateta akaambo kamume,
Masusu aangu ateta akaambo kamalosi aamasiku.”+
3 “‘Ndacisamununa kale cisani cangu.
Sena ndicisame alimwi?
Ndasamba kale kumaulu.
Sena ndaabisye alimwi?’
4 Mpoonya muyandwa wangu wakagwisya janza lyakwe akapulo kakucijazyo,
Eelyo moyo wangu wakaduntaana akaambo kanguwe.
5 Ndakabuka, kuti ndimujalwide muyandwa wangu;
Maanza aangu akali kulosya-losya tununkilizyo twamuro,
Ayalo minwe yangu yakali kungwenga mafwuta aamuro,
Akali kulokela azijatilizyo zyacikulukulu.
6 Ndakajalwida muyandwa wangu,
Pele walo wakaluunkide, wakalisakene.
Ndakanyongana naakaunka.
Ndakamuyandaula, pele tiindakamujana pe.+
Ndakamwiita, pele tanaakandivwiila pe.
7 Balindizi ibakali kweendeenda mumunzi bakandijana.
Bakanduuma akundicisa.
Balindizi bamalambo bakandinyanga mulembo* wangu.
8 Ndikonkezya ndinywe, nobana basimbi bamu Jerusalemu kuti:
Ikuti naa mumujane muyandwa wangu,
Mumwaambile kuti luyando lwandijaya.”
9 “Yebo omukaintu weebeka kapati akati kabamakaintu,
Ino muyandwa wako ubainda buti bayandwa bamwi?
Ino muyandwa wako ubainda buti bayandwa bamwi,
Cakuti watukonkezya boobu?”
10 “Muyandwa wangu ulamweka alimwi ulasalala;
Nguulibonya kapati akati kabantu bali 10,000.
11 Mutwe wakwe uli mbuli ngolida, ngolida mbotu kapati.
Masusu aakwe ali mbuli mitabi yakakunka* iiyuuna,
Alasiya mbi mbuli cikwangala.
12 Meso aakwe ali mbuli nziba zili kutugelo twamaanzi,
Izisamba mumukupa,
Zikkede mumabali-bali aacizyiba cizwide.
13 Imasaya aakwe ali mbuli mubundu watununkilizyo,+
Zilwi zyamaluba aanunkilila.
Milomo yakwe ili mbuli mpana, ilosya-losya mafwuta aamuro.+
14 Maanza aakwe nzibulunge zyangolida, zibikkidwe mabwe aakulusolito.
Ida lyakwe lili mbuli meja aabazovwu aacumbidwe alimwi aabikkidwe mabwe aasafilo.
15 Maulu aakwe ali mbuli misemu yabbweluuma iinjizyidwe muzikkazikilo zyangolida mbotu kapati.
Ciwa cakwe cili mbuli Lebano, ncibotu kapati mbubonya mbuli zisamu zyakkedari.+
Ooyu nkakalungu kangu kaamoyo, ngomuyandwa wangu, nobana basimbi bamu Jerusalemu.”
6 “Yebo omubotu kwiinda bamakaintu boonse,
Ino waya kuli muyandwa wako?
Ino watozya kuli muyandwa wako?
Leka tukugwasye kumuyandaula.”
2 “Muyandwa wangu waselemukila kumuunda wakwe,
Kumibundu yazisyango zinunkilila,
Kukweembela mumyuunda
Akuyoocela mpana.+
3 Mebo ndili wakwe muyandwa wangu,
Awalo muyandwa wangu nguwangu.+
Walo uleembela akati kampana.”+
4 “Uli mubotu mbuli Tiriza,*+ omuyandwa wangu,+
Uli mubotu mbuli Jerusalemu,+
Ulakondelezya kapati mbuli makamu aabasikalumamba bazingulukide ndembela zyabo.+
Masusu aako ali mbuli butanga bwampongo
Ziselemuka kumingenyu yaku Gileadi.+
6 Meno aako ali mbuli butanga bwambelele
Izyazwa aakusanzyigwa,
Zyoonse buyo zizyala maanga,
Alimwi akati kanzizyo kunyina iisowa bana banjiyo.
7 Mbuli cipaanzi camucelo wapomegranite
Mbwaabede masaya aako mucitambala cako.
9 Pele kuli buyo omwe ooyo uuli nenziba yangu,+ ooyo ookwangu uutakwe kampenda.
Kuli buyo omwe ooyo uuli alikke kuli banyina.
Walo ngobayanda* kapati banyina bakamuzyala.
Bana basimbi nobamubona, balamulumbaizya;
Banamalelo abamwanakasuwa abalo balamutembaula kabati.
10 ‘Ino nguni ooyu uumweka* mbuli bucedo,
Mubotu mbuli mwezi uuzwide,
Uusalala mbuli mumuni wazuba,
Uukondelezya kapati mbuli makamu aabasikalumamba bazingulukide ndembela zyabo?’”+
11 “Ndakaselemukila kumuunda wazisamu zyamicelo iili mbuli nyemu+
Kutegwa ndikabone naa ndelema zyakasonsa mukkuti,*
Kutegwa ndikabone naa musaansa wakasyuuka,*
Akuti naa zisamu zyamapomegranite zyakafwulula.
13 “Joka, joka okuno, yebo omu Sulamiwe!
Joka, joka okuno,
Kutegwa tukubone!”
“Nkaambo nzi ncomumulanga mu Sulamiwe?”+
“Uli mbuli cizyano cankamu zyobilo!”*
7 “Maulu aako mabotu kapati mumpato zyako,
Omusimbi uulemekwa!
Zibelo zyako zibulungene zili mbuli zilisakatizyo,
Imulimo wamaanza aasimilimo uucibwene.
2 Ikkombo lyako lili mbuli mutiba uubulungene.
Kutabuli waini uuvweledwe kulindilyo.
Ida lyako nkalwi kawiiti,
Kazingulukidwe mpana koonse-koonse.
3 Inkolo zyako zyobilo zili mbuli twana twansya tobilo,
Ibana bamaanga bananja.+
4 Insingo yako+ ili mbuli ngazi yakapangizyigwa ameja aabazovwu.+
Impemo yako ili mbuli ngazi yaku Lebano,
Iilangide ku Damasiko.
5 Imutwe wako uli mbuli Karimeli,+
Alimwi masusu aako*+ ali mbuli boya bwambelele bwakanyikwa mumubala wacisombo.+
Mwami watolelwa moyo* akaambo kambwaalileka-leka masusu aako malamfwu.
6 Eelo kaka uli mubotu, alimwi ulakondelezya kaka
Yebo omusimbi ooyandwa, ulakondelezya kwiinda zintu zyoonse zikondelezya kapati!
7 Ciimo cako cili mbuli kakunka,
Alimwi nkolo zyako zili mbuli zikama zyamicelo yakakunka.+
8 Ndakaamba kuti, ‘Ndilakatanta kakunka
Kutegwa ndijate mitabi yankako iijisi micelo.’
Inkolo zyako azibe mbuli zikama zyamisaansa,
Bweema bwamuya wako abube mbuli micelo yamaapele,
9 Awalo mulomo* wako aube mbuli waini mubotu kapati.”
“Autelemuke kuya mukati kumuyandwa wangu,
Aweende kabotu-kabotu aamilomo yabaabo balede.
10 Mebo ndili wamuyandwa wangu,+
Awalo ulandiyanda kapati.
12 Atufwume kubuka, tuunke kumyuunda yamisaansa
Kutegwa tukabone naa musaansa wasyuuka,*
Naa maluba-luba apampanuka,+
Naa zisamu zyamapomegranite zyafwulula.+
Eelyo ooko ndiyookutondezya mbondikuyanda.+
Kuli micelo mipya alimwi ayakaindi,
Eeyo njindakuyobweda yebo omuyandwa wangu.
8 “Eelo kaka nooli mbuli mwanookwesu,
Iwakanyonka nkolo zyabaama!
Nokunga ikuti ndakujana anze, nindali kukumyonta,+
Alimwi nokwanyina muntu uukonzya kundisampaula.
Inga ndakupa waini uujisi tununkilizyo kuti unywe,
Imusinza wapangwa lino-lino kuzwa kumicelo yamapomegranite.
3 Ijanza lyakwe lyalumwensyi nokunga lili kunsi aamutwe wangu,
Alimwi janza lyakwe lyalulyo nokunga lilandikumbata.+
4 Ndikonkezya ndinywe, nobana basimbi bamu Jerusalemu kuti:
Mutasoli kubusya naa kukulwaizya luyando mulindime ccita mane lulitalikile lwini.”+
5 “Ino nguni ooyu uuboola kuzwa munkanda,
Kayeeme amuyandwa wakwe?”
“Ndakakubusya munsi aacisamu camaapele.
Okuya banyoko bakamyongwa nobakakuyumwide mwida.
Inzya, okuya banyoko bakamvwa kucisa nobakakutumbuka.
6 Kondibikka mbuli ciganto amoyo wako,
Mbuli ciganto ajanza lyako,
Nkaambo luyando lulaanguzu mbubonya mbuli lufwu,+
Akwalo kulipa cakumaninina takunyoneki mbubonya mbuli Cuumbwe.*
Mabangabanga aandulo mabangabanga aamulilo uuvwilima, inzya mabangabanga aa Ja.*+
Ikuti naa muntu wapa mbono zyoonse zyamuŋanda yakwe kuti aule luyando,
Masimpe bantu balakonzya kuzisampaula.”
8 “Tujisi mucizyi uucili muniini,+
Alimwi tajisi nkolo.
Ino tuyoomucita buti mucizyi wesu
Ibuzuba mbwayooselwa?”
9 “Ikuti kali bwaanda,
Tuyooyaka nsonje yalubaya yansiliva alinguwe,
Pele ikuti kali cijazyo,
Tuyoomusinkila apulanga lyacisamu cakkedari.”
10 “Mebo ndili bwaanda,
Alimwi nkolo zyangu zili mbuli ngazi.
Aboobo mumeso aakwe ndili
Mbuli muntu uukkede muluumuno.
11 Solomoni wakajisi muunda wamisaansa+ ku Baala-hamoni.
Muunda ooyo wamisaansa wakaubikka mumaanza aabasikuulanganya.
Umwi aumwi wabo wakali kuleta mali aansiliva aali 1,000 kuzwa kumicelo yanguwo.
12 Ndilaamuunda wamisaansa uutanduumyi musako.
Mali aansiliva aali 1,000 ngaako yebo Solomoni,
Mpoonya mali aali 200 ngabaabo balanganya micelo yanguwo.”
13 “Yebo ookkede mumyuunda,+
Balongwe baswiilila jwi lyako.
Ambebo andiliswiilile.”+
14 “Fwambaana, omuyandwa wangu,
Kobalikisya mbuli nanja+
Naa mbuli mwana wansya
Atala aamalundu aatununkilizyo.”
Mu Chihebrayo, “Kondikwelela kulinduwe.”
Naa “Atwaambe zya.”
Naa “citambala camalila.”
Naa “kubbiza lyangu lizyazi.”
Naa ambweni, “akati kamasusu aako malamfwu aawosedwe.”
Mu Chihebrayo, “nardo.”
Naa “yaŋanda mpati.”
Mu Chihebrayo, “muŋanda yawaini.”
Naa “Mainza ainda.”
Naa ambweni, “azilundu zyaandukide.” Naa “azilundu zya Bete.”
Naa “aacilundu cilangene a Lebano.”
Naa ambweni, “Lukanda.”
Naa “muunda.”
Ooyu munsale uununkilila.
Naa “Kounga kabotu-kabotu.”
Naa “citambala.”
Naa ambweni, “mbuli zibunga zyamicelo yatukunka.”
Mu Chihebrayo, “Cilakula.”
Naa “Munzi Uutaliboteli.”
Mu Chihebrayo, “nguusalala.”
Mu Chihebrayo, “uulanga ansi.”
Naa “mukalonga.”
Naa “wakafwulula.”
Naa “balisungwide.”
Naa “cizyano ca Mahanaimu.”
Mu Chihebrayo, “masusu aali mumutwe wako.”
Naa “ulaangidwe.”
Mu Chihebrayo, “cilakula.”
Naa “wafwulula.”
Mamandirake yakali micelo iyakali kubonwa kuti ilakonzya kugwasya mukaintu kuti amite.
Naa “Cikkalilo Cabafwu.” Amubone Bupanduluzi Bwamabala.
“Ja” nkufwiinsyigwa kwazina lyakuti Jehova.