MALILO
א [Aleph]*
1 Maawe munzi iwakazwide bantu waile kusyaala ulikke buyo!+
Maawe ooyo iwakajisi bantu banji akati kamasi waile kuba mbuli mukamufwu!+
Maawe ooyo iwakali namalelo akati kazyooko waile kuba muzike uubeleka milimo yacibbalo!+
ב [Beth]
2 Masiku uloomba kulila,+ eelyo misozi yakwe ileenda mumasaya aakwe.
Taakwe muntu naba omwe akati kabaabo boonse bamuyanda uuliko kuti amuumbulizye.+
Beenzinyina boonse bamwaaba; baba basinkondonyina.+
ג [Gimel]
3 Juda watolwa mubuzike+ kapenzyegwa alimwi akucita milimo iiminya yabuzike.+
Ukkede akati kamasi;+ tajani busena bwakulyookezyela.
Boonse aabo bamupenzya bamuboolela kali mumapenzi.
ד [Daleth]
4 Nzila zitozya ku Ziyoni ziluujisi koomoka, nkaambo kunyina uuboola kupobwe.+
Milyango yakwe yoonse yanyonyoonwa;+ bapaizi bakwe balatongela.
Banakalindu* bakwe baluuside, alimwi walo ulipengede mumoyo.
ה [He]
5 Basinkondonyina lino baba basimalelaakwe;* balwani bakwe tabalibilikide.+
Nkaambo Jehova nguwamuletela mause akaambo kansotoko zyakwe zinji.+
Bana bakwe batolwa kabali baange kumbele lyabasinkondonyina.+
ו [Waw]
6 Mwana musimbi wa Ziyoni wamaninwa bweebesi bwakwe boonse.+
Basilutwe bakwe bali buyo mbuli insya zyatajana macelelo,
Alimwi bayaabweenda kabakatede kumbele lyayooyo uubatandaanya.
ז [Zayin]
7 Mumazuba aakupenzyegwa kwakwe alimwi nabulide kwakukkala, Jerusalemu wayeeya
Zintu zyoonse ziyandisi nzyaakajisi kumazuba aakaindi.+
Ciindi bantu bakwe nobakaabwa mumaanza aabasinkondonyina alimwi walo naatakajisi mugwasyi,+
ח [Heth]
8 Jerusalemu wacita cibi cipati.+
Nkakaambo kaako waba cintu cisesemya.
Boonse aabo bakali kumulemeka bamusampaula, nkaambo babona mantanda aakwe.+
Awalo lwakwe ulatongela+ alimwi wacenguluka kazimujisi nsoni.
ט [Teth]
9 Busofwaazi bwakwe buli mumisinsi yakwe.
Tanaakayeeya mazuba aaboola kumbele lyakwe.+
Kuwa kwakwe kwakali kuyoosya; tajisi wakumuumbulizya pe.
O Jehova, kobona mapenzi aangu, nkaambo sinkondoma walitukumuna kapati.+
י [Yod]
10 Sinkondo watandabika janza lyakwe kuzintu zyoonse ziyandisi zyamukaintu ooyu.+
Nkaambo walo waabona masi kaanjila mucikombelo cakwe,+
Aayo ngookalailide kuti taayelede kunjila mumbungano yako.
כ [Kaph]
11 Bantu bakwe boonse balatongela; bayandaula zyakulya.+
Zintu zyabo ziyandisi bazicincanya acakulya kutegwa bazumanane kupona.*
Kolanga, O Jehova ulabona kuti mebo ndaile kuba mbuli mukaintu* wabuyo.
ל [Lamed]
12 Sena tacikwe makani kulindinywe nyoonse nomwiinda munzila?
Amulange mubone!
Sena kuli macise aali mbuli macise aaya ngondaletelwa,
Aayo Jehova ngaaleta kuti andipe kupenga mubuzuba bwabukali bwakwe buvwilima mbuli mulilo?+
מ [Mem]
13 Kuzwa kujulu watuma mulilo mumafwuwa aangu,+ alimwi waabombya oonse.
Wabikka lunsabwe kuteya maulu aangu; wanditanda kuti ndijoke munsi.
Wandipa kuba mukaintu uusiidwe alikke.
Ndilicisidwe buzuba boonse.
נ [Nun]
14 Nsotoko zyangu zyaangwa akupangwa mbuli joko, wazizambaila ajanza lyakwe.
Zyabikkwa munsingo yangu, aboobo nguzu zyangu zyamana.
Jehova wandaaba mumaanza aabaabo mbonditakonzyi kulwana.+
ס [Samekh]
15 Jehova wabatapaula baalumi boonse basinguzu mulindime.+
Wandiitila nkamu kuti indilwane, kutegwa ipwayaule balombwana bangu.+
Jehova walyatauka nakalindu, imwana musimbi wa Juda mucikandilo camisaansa.+
ע [Ayin]
16 Akaambo kazintu eezyi ndilalila;+ meso aangu eenda misozi.
Nkaambo muntu uukonzya kunduumbulizya, naa kundikatalusya uli kulamfwu kapati andime.
Bana bangu banyonyoonwa, nkaambo sinkondoma wazunda.
פ [Pe]
17 Ziyoni watambika maanza aakwe;+ tajisi wakumuumbulizya.
Jehova walailila kuti Jakobo bamulwane basinkondonyina boonse aabo bamuzingulukide.+
Jerusalemu waba cintu cisesemya kulimbabo.+
צ [Tsade]
18 Jehova uliluleme,+ nkaambo mebo ndazangila milawo yakwe.*+
Amuswiilile, nywebo nobantu nyoonse, mubone macise aangu.
Banakalindu* bangu abalombwana bangu batolwa mubuzike.+
ק [Qoph]
19 Ndabakwiilila aabo bandiyanda, pele balo bandaaba.+
Bapaizi bangu alimwi abamadaala bangu bafwa mumunzi,
Ciindi nibali kuyandaula cakulya kutegwa bazumanane kupona.*+
ר [Resh]
20 Bona, O Jehova, nkaambo ndilipengede kapati.
Mwida lyangu* mwakwasa.
Moyo wangu wanyongana mukati kangu, nkaambo ndazanga citaambiki.+
Anze ipanga lyabajaya bana;+ amwalo muŋanda muli buyo lufwu.
ש [Shin]
21 Bantu bamvwa mbonditongela; kunyina wakunduumbulizya pe.
Basinkondoma boonse baamvwa mapenzi aandijisi.
Basekelela, nkaambo yebo nduwe wacicita.+
Nokuba boobo, uyoobuleta buzuba mbookaambilizya,+ ciindi balo nobayooba mbuli ndime.+
ת [Taw]
22 Bubi bwabo boonse abusike kumbele lyako, alimwi utabeengeleli pe,+
Mbubonya mbowatandeengelela mebo akaambo kansotoko zyangu zyoonse.
Nkaambo intongelo zyangu nzinji, awalo moyo wangu waciswa.
א [Aleph]
2 Maawe Jehova wavwumba mwana musimbi wa Ziyoni mukkumbi lyabukali bwakwe!
Bweebesi bwa Israyeli wabufwusila anyika kuzwa kujulu.+
Kunyina naaciyeeya cilyatilo camaulu aakwe+ mubuzuba bwabukali bwakwe.
ב [Beth]
2 Jehova waamena kakunyina kwaafwida lubomba maanda oonse aa Jakobo.
Kanyemede wakolomona maanda aakwabilidwe aamwana musimbi wa Juda.+
Wabuwisyila ansi akubusampaula bwami+ abasilutwe bakwe.+
ג [Gimel]
3 Mubukali bupati wamanizya nguzu* zyoonse zya Israyeli.
Wagwisya janza lyakwe lyalulyo ciindi sinkondo naasika,+
Muli Jakobo waluujisi kuumpa mbubonya mbuli mulilo uumpa zintu zyoonse zili munsi-munsi.+
ד [Daleth]
4 Woongomeka* buta bwakwe mbuli sinkondo; janza lyakwe lyalulyo lililibambilide kuuma mbuli mulwani;+
Wakaluujisi kujaya aabo boonse banonezya kulanga.+
Alimwi watila bukali bwakwe mbuli mulilo+ mutente lyamwana musimbi wa Ziyoni.+
ה [He]
5 Jehova waba mbuli sinkondo;+
Wamumena Israyeli.
Wazimena ngazi zyakwe zyoonse;
Waanyonyoona maanda aakwe oonse aakwabilidwe.
Aboobo wapa kuti kulila akoomoka kuvwule mumwana musimbi wa Juda.
ו [Waw]
6 Civwuka cakwe wacimwayaula+ mbubonya mbuli katungu mumuunda.
Jehova wapa kuti pobwe alimwi asabata zilubwe mu Ziyoni,
Alimwi mubukali bwakwe buyoosya talemeki mwami amupaizi.+
ז [Zayin]
7 Jehova wacikaka cipaililo cakwe;
Wasampaula cikombelo cakwe.+
Waaba malambo aangazi zyanguwo zikwabilidwe mumaanza aasinkondo.+
Boongolola ajwi lipati muŋanda ya Jehova,+ mbubonya mbuli mubuzuba bwapobwe.
ח [Heth]
8 Jehova wakanza kunyonyoona bulambo bwamwana musimbi wa Ziyoni.+
Watandabika ntambo yakupimya.+
Kunyina naalesya janza lyakwe kuti linyonyoone.*
Alimwi upa kuti citantaala cilundikidwe abulambo zyoomoke.
Zyoonse antoomwe zyamaninwa nguzu.
ט [Teth]
9 Milyango yanguwo yabbila munyika.+
Wanyonyoona akutyolaula mpingizyo zyanguwo.
Bami banguwo abasilutwe banguwo bali akati kamasi.+
Takucikwe mulawo* pe; nobaba basinsimi banguwo kunyina nobajana cilengaano kuli Jehova.+
י [Yod]
10 Bamadaala bamwana musimbi wa Ziyoni bakkala ansi kabaumwine wi.+
Balitila mavwu amitwe yabo akusama zisani zyamasaka.+
Banakalindu bamu Jerusalemu bavwuntama, mane mitwe yabo yasika ansi.
כ [Kaph]
11 Meso aangu alema akaambo kamisozi yeenda.+
Mwida lyangu* mwakwasa.
Muni wangu watilwa ansi akaambo kakuwa kwamwana musimbi* wabantu bangu,+
Akaambo kakunetuka kwabana baniini alimwi abavwanda mumabuwa aabuleya aamunzi.+
ל [Lamed]
12 Baluujisi kubuzya bamanyina kuti, “Ino ali kuli maila alimwi awaini?”+
Ciindi nobanetuka mbubonya mbuli muntu wajaigwa mumabuwa aabuleya aamunzi,
Ciindi buumi bwabo nobumana kabali mumaanza aabamanyina.
מ [Mem]
13 Ino ncikozyanyo nzi ncondikonzya kukupa kuti bube bumboni,
Ino ndilakukozyanisya anzi, yebo omwana musimbi wa Jerusalemu?
Ino ndilakweelanya anzi kutegwa ndikuumbulizye, yebo onakalindu, omwana musimbi wa Ziyoni?
Nkaambo lunyonyooko lwako ndupati mbubonya mbuli lwizi.+ Ino nguni uukonzya kukuponya?+
נ [Nun]
14 Zilengaano nzyobabona basinsimi bako kujatikizya nduwe nzyabuyo alimwi tazigwasyi,+
Alimwi kunyina nobacibikka atuba cinyonyoono cako kutegwa bakuvwune kubwaange,+
Pele ciindi coonse bali kukubonena buyo zilengaano zyakubeja alimwi atwaambo tusowa.+
ס [Samekh]
15 Basimweendanzila boonse bakukambila maanza cakukufwubaazya.+
Basiba milosi akaambo kakugambwa+ alimwi bapukunya mitwe yabo akaambo kamwana musimbi wa Jerusalemu, kabaamba kuti:
“Sena ooyu tauli ngomunzi uulya ngobakali kwaamba kuti, ‘Munzi weebeka kapati, uupa nyika yoonse kukkomana’?”+
פ [Pe]
16 Basinkondonyoko boonse bakwaasamwida milomo yabo.
Basiba milosi alimwi akuluma ntwino, kabaamba kuti: “Twamumena.+
Oobu mbobuzuba mbotwali kulindila!+ Bwasika, eelyo twabubona!”+
ע [Ayin]
Wamwayaula kakunyina kutondezya lubomba.+
Wapa kuti sinkondo akondwe akaambo kanduwe; wayungizya nguzu* zyasinkondonyoko.
צ [Tsade]
18 Myoyo yabo yakwiilila Jehova, yebo obulambo bwamwana musimbi wa Ziyoni.
Kopa kuti misozi ikunke mbubonya mbuli kalonga isyikati amasiku.
Utalyookezyi pe, liso lyako* litayozyi pe.
ק [Qoph]
19 Konyamuka! Koomoka masiku kumatalikilo aaciindi cakulinda.
Zyoonse zili mumoyo wako kozitila kuli Jehova mbubonya mbuli maanzi.
Kotambika maanza aako kulinguwe akaambo kabuumi bwabana bako,
ר [Resh]
20 Bona, O Jehova, komulanga ooyo ngoocitila boobu cakuteengelela.
Sena bamatumbu beelede kuzumanana kulya bana* babo bakulizyalila, ibana bakazyalwa kabajinkide,+
Sena mupaizi amusinsimi beelede kujailwa mucikombelo ca Jehova?+
ש [Shin]
21 Mulombe amudaala baalabana ansi mumigwagwa kabafwide.+
Banakalindu* bangu abalombwana bangu bajaigwa apanga.+
Yebo wabajaya mubuzuba bwabukali bwako; wabajaya kakunyina kubafwida lubomba.+
ת [Taw]
22 Yebo waita zintu ziyoosya kuzwa mumbazu zyoonse mbuli kuti waziita kubuzuba bwapobwe.+
Mubuzuba bwabukali bwa Jehova, kunyina muntu wakatija naa kufwutuka;+
Aabo mbondakazyala* alimwi mbondakalela, sinkondoma wakabamana kubajaya.+
א [Aleph]
3 Ndendime mwaalumi iwabona mapenzi akaambo kamusako wabukali bwakwe.
2 Wanditanda akundipa kweenda mumudima, ikutali mumumuni.+
3 Masimpe, uluujisi kunduuma cakwiinduluka-induluka ajanza lyakwe buzuba boonse.+
ב [Beth]
4 Wapa kuti mubili wangu alukanda lwangu zimane;
Watyolaula mafwuwa aangu.
5 Wandisinkila; wandizinguluka amusamu uujaya+ alimwi amapenzi.
6 Wandipa kukkala mumasena aasiya mbi mbubonya mbuli bantu ibakafwa kaindi.
ג [Gimel]
7 Wandisinkila abwaanda, cakuti tandikonzyi kutija;
Wandaanga nketani zyamukuba zilemu.+
8 Alimwi ciindi nendoompolola kuti ndigwasyigwe kandipengede kapati mumoyo, walo ulaukaka* mupailo wangu.+
9 Wasinka nzila zyangu amabwe aapandawidwe;
Wapilinganya migwagwa yangu.+
ד [Daleth]
10 Wandiyubilila kuti andivwaampile mbuli munyama wabutambo uutegwa bbeya, mbuli syuumbwa uuyubilila.+
12 Woongomeka* buta bwakwe, alimwi wandibikka kuti ndibe mbaakani yamivwi njawaala.
ה [He]
13 Wayasa insa zyangu amivwi* yamunkomo yakwe.
14 Ndaile kuba cintu cisesya kubantu boonse, balandiimba munyimbo zyabo buzuba boonse.
15 Wandizuzya zintu zilula lu alimwi wandikkutya mululwe.+
ו [Waw]
17 Yebo wandimanina luumuno; ndaciluba cintu cibotu.
18 Aboobo ndaamba kuti: “Bweebesi bwangu bwamana, antoomwe abulangizi mbondajisi kuli Jehova.”
ז [Zayin]
19 Koyeeya mapenzi aangu ambondituntulika,+ mululwe alimwi amusamu uujaya.+
20 Masimpe yebo uyooyeeya, eelyo uyakooka kutegwa undigwasye.+
21 Eeci ndiyoociyeeya mumoyo wangu; nkakaambo kaako ndinootondezya muuya wakulindila.+
ח [Heth]
23 Lulabukuluka lyoonse mafwumofwumo;+ yebo ulasyomeka kapati.+
24 Ndaamba kuti, “Jehova ncaabilo cangu,+ aboobo ngonguwe ngondinoolindila.”+
ט [Teth]
25 Jehova mubotu kuli yooyo uumulangila,+ kumuntu uuzumanana kumuyandaula.+
26 Ncibotu kulindila lufwutuko lwa Jehova+ koumwine.*+
27 Ncibotu kuti muntu anyamune joko lyakwe mubukubusi bwakwe.+
י [Yod]
28 Akkale alikke akuumuna buyo, ciindi Leza naabikka joko alinguwe.+
29 Anjizye mulomo wakwe mubulongo;+ ambweni kucili bulangizi.+
30 Ape saya lyakwe kuli yooyo uumuuma; atambule masampu aakwe aakkwene.
כ [Kaph]
31 Nkaambo Jehova takootusowela limwi buya mane kukabe kutamani.+
32 Nokuba kuti ngonguwe wapa kuti tuuse, ulatufwida luse kweelana aluyando lwakwe lutamani lupati.+
33 Nkaambo mumoyo wakwe tayeeyi zyakupenzya naa kuusisya bana babantu.+
ל [Lamed]
34 Kulyatauka baange boonse bamunyika kunsi aamaulu,+
35 Akupa kuti muntu atacitilwi bululami kumbele lya Mupatikampatila,+
36 Alimwi akumucitila cabumpelenge muntu ciindi nabetekelwa kaambo kakwe
—Jehova taziyandi zintu zili boobu pe.
מ [Mem]
37 Aboobo, ino nguni uukonzya kwaamba cintu akupa kuti cicitike, ikuti Jehova tanaalailila kuti cibe boobo?
38 Kumulomo wa Mupatikampatila
Takuzwi zintu zibotu antoomwe azintu zibi.
39 Nkaambo nzi muntu muumi ncayelede kutongooka kujatikizya mapenzi ngaaliletela akaambo kacibi cakwe mwini?+
נ [Nun]
40 Atuzilingule akuzilanga-langa nzila zyesu,+ eelyo atupiluke kuli Jehova.+
41 Atulombe camoyo woonse alimwi akutambika maanza eesu kuli Leza uuli kujulu:+
42 “Swebo twabisya alimwi twazanga,+ aboobo yebo kunyina nootulekelela pe.+
ס [Samekh]
43 Cabukali wabikka cisinkilizyo kuti tutakusikili;+
Watutandaanya akutujaya kakunyina kutufwida lubomba.+
44 Watusinkila akkumbi lipati, kutegwa mupailo wesu utasiki kulinduwe.+
45 Wapa kuti tube makololo amafwuse akati kabantu bamasi.”
פ [Pe]
46 Basinkondoma boonse batwaasamwida milomo yabo.+
47 Buyoofwu alimwi antenda nzyezyaba caabilo cesu,+ twasaalwa alimwi twanyonyoonwa.+
48 Misozi iluujisi kweenda kuzwa mumeso aangu akaambo kalunyonyooko lwamwana musimbi wabantu bangu.+
ע [Ayin]
49 Meso aangu taaleki kulila, taayozyi pe,+
50 Kusikila mane Jehova alange ansi akubona kuzwa kujulu.+
51 Meso aangu andiletela buumba akaambo kabana basimbi boonse bamumunzi wangu.+
צ [Tsade]
52 Basinkondoma bandivwima mbuli kayuni, kakunyina kaambo.
53 Bakosola buumi bwangu mucilindi; bakaluujisi kundifwusa mabwe.
54 Maanzi akapaya atala aamutwe wangu, eelyo ndakaamba kuti: “Kwamana ndafwa!”
ק [Qoph]
55 Ndakaita zina lyako, O Jehova, kuzwa ansi eeni mucilindi cilamfwu.+
56 Komvwa jwi lyangu; utasinki kutwi kwako nendikwiilila lugwasyo, nendilomba kulemununwa.
57 Yebo wakaswena afwaafwi mubuzuba nendakakwiita. Wakaamba kuti: “Utayoowi pe.”
ר [Resh]
58 Yebo, O Jehova, wandiiminina mukubeteka kaambo kangu, wanununa buumi bwangu.+
59 Yebo, O Jehova, wabubona bubi mbondacitilwa; ndakomba kondibetekela kabotu kaambo kangu.+
60 Wacibona cisubulo coonse ncibakanzide kundipa, waabona makanze oonse ngobajisi aakundilwana.
ש [Sin] naa [Shin]
61 Wamvwa mbobandisampaula, O Jehova, imakanze oonse ngobajisi aakundilwana,+
62 Ulaamvwide majwi aazwa kumilomo yabaabo bandilwana ambobalivwiya-vwiya kuti bandilwane buzuba boonse.
63 Kobalanga; kufwumbwa naa balikkede naa baliimvwi, balandifwubaazya munyimbo zyabo!
ת [Taw]
64 O Jehova, uyoobasubula kweelana amicito yabo.
65 Uyoobapa kuba amyoyo miyumu, nkaambo oobu mbombubo mboyoobasinganya.
66 Uyoobatandaanya cabukali akubajaya kuzwa kunsi lyamajulu aako, O Jehova.
א [Aleph]
4 Maawe ngolida iyakali kuŋaima yaleka kumweka, inzya ingolida mbotu!+
Maawe mabwe aamubusena busalala+ amwaika mumigwagwa yoonse!*+
ב [Beth]
2 Ma! Ibana basankwa bayandwa kapati ba Ziyoni, aabo ibakali kweelanisyigwa* angolida iisalazyidwe,
Baile kubonwa buyo mbuli kuti ninongo zyabulongo,
Milimo yamaanza aamubumbi!
ג [Gimel]
3 Nobaba bamwaaba balapa zibele zyabo kuti banyonsye bana babo,
Pele walo mwana musimbi wabantu bangu waba silunya,+ mbubonya mbuli mpowani zyamunkanda.+
ד [Daleth]
4 Mulaka wamwana uucinyonka wanamatila kucilakula cakwe akaambo kanyota.
Bana balomba cakulya,+ pele kunyina naba omwe uubapa.+
ה [He]
5 Aabo ibakali kulya budodoodo balilede mumigwagwa akaambo kakufwa nzala.*+
Aabo bakakomezyegwa kabasama zisani zidula zisalala pyu+ bakumbata mabbunta aamulota.
ו [Waw]
6 Cisubulo* camwana musimbi wabantu bangu ncipati kwiinda cisubulo cacibi ca Sodoma,+
Ooyo iwakanyonyoonwa mukaindi kaniini buyo, alimwi iwatakagwasyigwa amaanza aamuntu naba omwe.+
ז [Zayin]
7 Ba Naziri+ bakali kutuba buu kwiinda caanda, bakali kutuba kwiinda mukupa.
Mibili yabo yakali kusalala kwiinda tubwe tusalala twamulwizi; bakali mbuli mabwe mayandisi aasafilo aabalangala.
ח [Heth]
8 Pele lino basiya mbi kwiinda malasya;*
Tabacizyibiki mumigwagwa.
Lukanda lwabo lwanyana akunamatila kumafwuwa aabo;+ lwayuminina mbuli cisamu ciyumu.
ט [Teth]
9 Aabo ibajaigwa apanga bali kabotu kwiinda baabo bajaigwa anzala,+
Aabo ibawizuka, ibayasigwa akaambo kakubula cakulya cizwa mumuunda.
י [Yod]
10 Maanza aabamatumbu ibalaalweetelelo ajika bana babo bakulizyalila.+
Baba cakulya ncobalya ciindi nobalila lunyonyooko lwamwana musimbi wabantu bangu.+
כ [Kaph]
Wayasya mulilo mu Ziyoni, ooyo uumpa ntalisyo zyanguwo zyoonse.+
ל [Lamed]
12 Bami bamunyika alimwi abantu boonse ibakkala munyika mbotu tiibakasyoma
Kuti mulwani alimwi asinkondo inga banjila mumilyango ya Jerusalemu.+
מ [Mem]
13 Akaambo kazibi zyabasinsimi banguwo, azinyonyoono zyabapaizi banguwo,+
Ibakatila bulowa bwabalulami mukati kanguwo.+
נ [Nun]
14 Baingaila mumigwagwa mbuli boofwu.+
Basofwaazyigwa abulowa,+
Cakuti kunyina naba omwe uukonzya kujata zisani zyabo.
ס [Samekh]
15 “Kamuzwa aawa! Mulisofweede!” oobo mbobabaambila. “Kamuzwa aawa! Kamuzwa aawa! Mutatugumi pe!”
Nkaambo baba basimutuntuli alimwi baile kwiingaila.
Akati kamasi bantu baamba kuti: “Aaba tabakonzyi kukkala andiswe okuno.*+
פ [Pe]
16 Busyu bwa Jehova bwabamwaya;+
Takabalangi kabili akubakkomanina.
Bantu tabakabalemeki bapaizi,+ nokuba kubacitila zibotu bamadaala.”+
ע [Ayin]
17 Noliba lino meso eesu akatala kulangila lugwasyo lutako.+
Twaluujisi kulangila lugwasyo kuzwa kucisi citakonzyi kutufwutula.+
צ [Tsade]
18 Batuvwima kabatobelezya mikondo yesu+ cakuti tiitwali kukonzya kweendeenda mumabuwa eesu aabuleya.
Mamanino eesu aswena afwaafwi; mazuba eesu amana, nkaambo mamanino eesu asika.
ק [Qoph]
19 Aabo ibakali kututandaanya bakalaalubilo kapati kwiinda basikwaze bauluka mujulu.+
Bakatutandaanya atala aamalundu; bakatuyubilila munkanda.
ר [Resh]
20 Muya ngotuyoya mumpemo zyesu, nkokuti imunanike wa Jehova,+ wajatwa mudindi lyabo,+
Ooyo ngotwakali kwaamba kuti: “Tunookkala mucimvwule cakwe akati kamasi.”
ש [Sin]
21 Kosekelela alimwi kokondwa, yebo omwana musimbi wa Edomu,+ ookkede mucisi ca Uzi.
Pele nkapu iyakwiinzyigwa akulinduwe,+ eelyo uyookolwa akweenda mantanda.+
ת [Taw]
22 Cisubulo cacinyonyoono cako camana, yebo omwana musimbi wa Ziyoni.
Takakutoli limbi mubuzike pe.+
Pele lino ulabikkila maano kucinyonyoono cako, yebo omwana musimbi wa Edomu.
Uyoozivwumbula zibi zyako.+
5 O Jehova, koyeeya catucitikila.
Kolanga ubone mbotwasampuka.+
2 Lukono lwesu lwaabwa mumaanza aabeenzu, maanda eesu aabwa mumaanza aabamuzwakule.+
3 Twaile kuba bamucaala ibatakwe bausyi; bamamama bali mbuli bamukabafwu.+
4 Maanzi eesu aakunywa tuula buya amali,+ azyalo nkuni zyesu nzyakuula buya.
5 Aabo batutandaanya bali afwaafwi kutujata munsingo;
Twalema kapati, pele tiibatuleka kuti tupumune.+
6 Twatambika janza lyesu kuli Egepita+ akuli Asuri+ kutegwa tujane cakulya cikonzya kutukkutya.
7 Bamataateesu ibakabisya tabaciko pe, pele swebo ndiswe twanyamuna zinyonyoono zyabo.
8 Babelesi mbabatweendelezya lino; kunyina uutukwempa kuti atuvwune mumaanza aabo.
9 Twabikka buumi bwesu muntenda kuti tujane cakulya,+ akaambo kapanga lyamunkanda.
10 Lukanda lwesu lwapya kapati mbuli bbibi lyamulilo, akaambo kanzala iicisa.+
11 Basofwaazya* bamakaintu bamu Ziyoni, abanakalindu bamuminzi ya Juda.+
12 Basilutwe bakaangililwa akuleleenga kujanza lyabo lyomwe,+ abalo bamadaala tiibakalemekwa pe.+
13 Balombwana banyamuna ziyo, abalo balombe baladadalika kabanyamwide nkuni zilemu.
14 Bamadaala tabaciko kumulyango wamunzi;+ balombwana tabaciimbi nyimbo aziimbyo zyabo.+
15 Lukkomano lwamana mumyoyo yesu; kuzyana kwesu kwasanduka kuba kulila.+
16 Musini wakumutwe wesu waloka. Maawe kulindiswe, nkaambo twabisya!
17 Moyo wesu waciswa akaambo kaceeci,+
Aalo meso eesu abaya akaambo kazintu eezyi,+
18 Akaambo kakuti Cilundu ca Ziyoni caba matongo;+ bamwaaba lino baleendeenda alincico.
19 Pele yebo O Jehova, ulikkede acuuno cako cabwami lyoonse mane kukabe kutamani.
Cuuno cako cabwami cinooliko mumazyalani oonse.+
20 Ino nkaambo nzi ncootuluba mane kukabe kutamani akutusiya kwaciindi cilamfwu boobu?+
21 Kotujola kulinduwe, O Jehova, eelyo swebo tulajokela cakulisungula.+
Kobukulusya mazuba eesu mbuli mbwaakabede kaindi.+
22 Nokuba boobo, yebo totuyandi pe, watukakilalyo.
Wazumanana kutunyemena kapati.+
Zyaandaano 1-4 ninyimbo zyamalila izilembedwe kweelana ambwaatobelana mabala aa Chihebrayo, naa zilembedwe cakutobelana.
Naa “Basimbi.”
Mu Chihebrayo, “basilutwe bakwe.”
Naa “akukkomana.”
Naa “babukulusye buumi.”
Mukaintu waambwa aawa ngu Jerusalemu.
Mu Chihebrayo, “mulomo wakwe.”
Naa “Basimbi.”
Naa “babukulusye buumi.”
Mu Chihebrayo, “Mala aangu.”
Mu Chihebrayo, “wagonka meja oonse.”
Mu Chihebrayo, “Walyata.”
Naa “Wanyonyoona.”
Mu Chihebrayo, “limene.”
Naa “malailile.”
Mu Chihebrayo, “Mala aangu.”
Majwi aakuti “mwana musimbi” ambweni atondezya kweetezyegwa.
Mu Chihebrayo, “wasumpula lwija.”
Mu Chihebrayo, “mwana musimbi waliso lyako.”
Mu Chihebrayo, “kumbele aamigwagwa yoonse.”
Naa “micelo.”
Naa “Basimbi.”
Naa “mbondakazyala kabali buyo kabotu.”
Naa “ulausinkila.”
Naa ambweni, “wandootobeka.”
Mu Chihebrayo, “Walyata.”
Mu Chihebrayo, “abana.”
Naa “kokkazikide moyo.”
Mu Chihebrayo, “kumbele aamigwagwa yoonse.”
Naa “kuyandika mbubonya mbuli.”
Mu Chihebrayo, “kabagonkeledwe.”
Mu Chihebrayo, “Cibi.”
Mu Chihebrayo, “kusiya.”
Naa “kukkala okuno kabali bamuzwamasi.”
Naa “Bajata.”