EZEKIELI

1 Mumwaka wa 30, mubuzuba bwasanu bwamwezi wane, eelyo nindakali akati kabantu bakatolwa mubuzike + kumbali aamulonga wa Kebara,+ majulu akajaluka eelyo ndakatalika kubona zilengaano zya Leza. 2 Mubuzuba bwasanu bwamwezi, nkokuti, mumwaka wasanu Mwami Jehoyakini+ katoledwe mubuzike, 3 ijwi lya Jehova lyakamusikila Ezekieli* mwana wa Buzi imupaizi mucisi caba Kasidi+ kumbali aamulonga wa Kebara. Ooko janza lya Jehova lyakamusikila.+

4 Lino nindakali kulanga, ndakabona guwo+ lyuungisya kaliboola kuzwa kunyika, alimwi kwakali kkumbi lipati alimwi amulilo uuvwilima*+ kalizingulukidwe amumuni uutowa, alimwi mumulilo ooyo mwakali cintu icakali kulibonya mbuli ngolida iivweledwe ansiliva.+ 5 Mukati kanguwo mwakali zintu izyakali kulibonya mbuli zilenge zyuumi zyone,+ cimwi acimwi cakali kulibonya mbuli muntu. 6 Cimwi acimwi cakajisi masyu one amababa one.+ 7 Maulu aanzizyo akaloololokede, eelyo zituta zyamaulu aanzizyo zyakali mbuli zyamoombe, alimwi kunsi kwazituta kwakali kumweka-mweka mbuli kuŋaima kwamukuba uucumbidwe.+ 8 Zyakajisi maanza aamuntu kunsi aamababa aazyo kumabazu aazyo one, alimwi zyoonse zyone zyakajisi masyu amababa. 9 Mababa aanzizyo akali kugumana, bbaba limwi abbabanyina. Tiizyakali kunyona nizyakali kweenda; cimwi acimwi cakali kugama buyo kumbele.+

10 Lino mboobu mbwaakali kulibonya masyu aanzizyo: Zyoonse zyone zyakajisi busyu bwamuntu alimwi abusyu bwasyuumbwa+ kululyo, zyakajisi busyu bwamupoho+ kulumwensyi alimwi zyoonse zyone zyakajisi busyu+ bwasikwaze.+ 11 Oobu mbombubo mbwaakabede masyu aanzizyo. Mababa aanzizyo akali kubabama atala aanzizyo. Cimwi acimwi cakajisi mababa obilo aakali kugumana, alimwi amababa obilo aakali kuvwumba mibili yanzizyo.+

12 Cimwi acimwi cakali kugama buyo kumbele, kufwumbwa ooko muuya nkowakali kuyanda kuti zyuunke.+ Tiizyakali kunyona nizyakali kweenda. 13 Zilenge eezyo zyuumi zyakali kulibonya mbuli makala aamulilo aayaka, alimwi cimwi cintu icakali kulibonya mbuli minzenge yamulilo uutowa cakali kweendeenda kuya kumbele akujoka munsi akati kazilenge eezyo zyuumi, alimwi tulabo twakali kulaba kuzwa mumulilo ooyo.+ 14 Izilenge eezyo zyuumi nizyakali kuunka kumbele akujoka munsi, zyakali kweenda mbuli kulaba kwakalabo.

15 Lino nindakali kulangilila zilenge eezyo zyuumi, ndakabona vwili lyomwe anyika kumbali aacilenge cuumi cimwi acimwi eeco cijisi masyu one.+ 16 Mavwili aayo alimwi ambwaakapangidwe, akali kulibonya mbuli kumweka-mweka kwabbwe lyakulusolito, oonse one akalikozyenye. Mbwaakali kulibonya alimwi ambwaakapangidwe akali mbuli vwili lili muvwilinyina kaaingene. 17 Naakali kweenda, akali kukonzya kugama kumabazu aangawo oonse one kakunyina kunyona naakali kweenda. 18 Zingelengele zyangawo zyakali zilamfwu kapati cakuti zyakali kugambya, alimwi zingelengele zyangawo zyoonse zyone zyakazwide meso koonse-koonse.+ 19 Kufwumbwa ciindi zilenge zyuumi nozyakali kweenda, aalo mavwili akali kweendela antoomwe anzizyo, alimwi zilenge zyuumi nizyakali kunyamuka kuya mujulu kuzwa anyika, aalo mavwili akali kunyamuka kuya mujulu.+ 20 Zyakali kuunka ooko muuya nkuwakali kuyanda kuti zyuunke, inzya kufwumbwa ooko muuya nkuwakali kuunka. Mavwili akali kunyamuka kuya mujulu antoomwe anzizyo, nkaambo muuya iwakali kweendelezya zilenge zyuumi wakalimo amwalo mumavwili. 21 Nozyakali kweenda, aalo mavwili akali kweenda; nozyakali kwiima, aalo mavwili akali kwiima; alimwi zyanyamuka kuya mujulu kuzwa anyika, aalo akali kunyamuka kuya mujulu antoomwe anzizyo, nkaambo muuya iwakali kweendelezya zilenge zyuumi wakalimo amwalo mumavwili.

22 Atala aamitwe yazilenge zyuumi kwakali cintu cakali kulibonya mbuli cibumbili icakali kubalangala mbuli maanzi aangene, icakayalidwe atala aamitwe yanzizyo.+ 23 Kunsi aacibumbili eeco mababa aazyo akalitandabede, bbaba lyacilenge cimwi kaligumene abbaba lyaceenzinyina. Cimwi acimwi cakajisi mababa obilo aakuvwumbya kubbazu limwi alimwi amababa obilo aakuvwumbya kulubazu lumbi lwamibili yanzizyo. 24 Nindakamvwa kuvwuuma kwamababa aanzizyo, kwakali kulimvwisya mbuli kuvwuuma kwamaanzi manji aakunka canguzu, mbuli jwi lya Singuzuzyoonse.+ Nizyakali kweenda zyakali kulimvwisya mbuli kuyobeka kwampi yabasikalumamba. Ikuti zyaima, zyakali kuvwunga mababa aanzizyo.

25 Kwakamvwugwa jwi atala aacibumbili icakali atala aamitwe yanzizyo. (Ikuti zyaima, zyakali kuvwunga mababa aanzizyo.) 26 Atala aacibumbili icakali atala aamitwe yazyo kwakali cintu cimwi icakali kulibonya mbuli bbwe liyandisi lyasafilo,+ alimwi cakalikozyene acuuno cabwami.+ Mpoonya atala, acuuno eeco cabwami kwakakkede umwi iwakali kulibonya mbuli muntu.+ 27 Ndakabona cintu cimwi icakali kumweka mbuli ngolida iivweledwe ansiliva+ icakali mbuli mulilo uuvwutuka kuzwa moomo imwakali kulibonya mbuli kuti muucibuno cakwe kuya mujulu; alimwi kuzwa mucibuno cakwe kuyaansi, ndakabona icakali kulibonya mbuli mulilo.+ Koonse-koonse wakazingulukidwe mumuni uumweka 28 mbuli kumweka kwafulicoongo+ uulibonya mukkumbi ibuzuba noiwa mvwula. Oobu mbombubo mbowakali kulibonya mumuni uumweka iwakazingulukide. Eeci icakalibonya cakalikozyene abulemu bwa Jehova.+ Lino nindakacibona, ndakavwuntama ansi, mpoonya ndakamvwa jwi lyaumwi kaambaula.

2 Mpoonya wakandaambila kuti: “Omwanaamuntu,* koimikila kutegwa ndaambaule anduwe.”+ 2 Naakaambaula andime, muuya wakandinjila alimwi wakandipa kuti ndiimikile+ kutegwa ndimumvwe ooyo iwakali kwaambaula andime.

3 Eelyo wakandaambila kuti: “Omwanaamuntu, ndikutuma kubana Israyeli,+ kuzisi zyabazangi aabo bandizangila.+ Balo antoomwe abamausyi baluujisi kundibisyila kusikila sunu.+ 4 Ndikutuma kubana basicinguni alimwi batanyoneki,+ eelyo weelede kubaambila kuti, ‘Mboobu mbwaamba Mwami Singuzuzyoonse Jehova.’ 5 Lino balo kufwumbwa naa bakamvwe naa pe, mbokunga niŋanda yabazangi,+ ncobeni bayoozyiba kuti musinsimi wakaliko akati kabo.+

6 “Pele yebo omwanaamuntu, utabayoowi pe,+ alimwi utayoowi majwi aabo, nokuba kuti uzingulukidwe amitubetube amamvwa*+ alimwi ukkede akati katubanze. Utayoowi majwi aabo+ alimwi utakongwi amasyu aabo,+ nkaambo balo niŋanda yabazangi. 7 Weelede kubaambila majwi aangu, kunyina makani naa bayoomvwa naa pe, nkaambo mbazangi.+

8 “Pele yebo omwanaamuntu, komvwa ncondikwaambila. Utazangi mbuli ŋanda eeyi yabazangi. Asamuna mulomo wako ulye ncendikupa.”+

9 Lino nindakalanga, ndakabona janza lyakatandabede kulindime,+ kumane mulindilyo mwakali bbuku lyakuvwunga+ lilembedwe. 10 Naakalivwungulula kumbele lyangu, lyakalilembedwe mukati akunze.+ Lyakalembedwe majwi aabuumba,* aausisya alimwi aapa koomba kulila.+

3 Mpoonya wakandaambila kuti: “Omwanaamuntu, kocilya eeco cili kumbele lyako. Kolya bbuku eeli lyakuvwunga, wamana uunke, ukabaambile bamuŋanda ya Israyeli.”+

2 Aboobo ndakaasamuna mulomo wangu, mpoonya wakandilisya bbuku eelyo. 3 Kumane wakandaambila kuti: “Omwanaamuntu, kolya bbuku eeli ndendikupa uzuzye da lyako andilyo.” Aboobo ndakatalika kulilya, eelyo mukanwa lyangu+ lyakali kulweela mbuli buci.

4 Wakandaambila kuti: “Omwanaamuntu, koya akati kabamuŋanda ya Israyeli ukabaambile majwi aangu. 5 Nkaambo tonootumwa kubantu baambaula mwaambo uutalimvwisyi naa bajisi mulaka uutazyibidwe pe, pele watumwa kuli bamuŋanda ya Israyeli. 6 Tonootumwa kubantu banji kapati baambaula mwaambo uutalimvwisyi naa bajisi mulaka uutazyibidwe, ibaambaula majwi ngotakonzyi kumvwisya. Ikuti nindakutuma kulimbabo, ncobeni balo nebakuswiilila.+ 7 Pele bamuŋanda ya Israyeli, bayookaka kukuswiilila, nkaambo tabayandi kundiswiilila mebo.+ Boonse aabo bamuŋanda ya Israyeli mbaasicinguni alimwi tabanyoneki.+ 8 Bona! Ndayumya busyu bwako mbubonya mbuli masyu aabo alimwi ndayumya nkumo yako mbubonya mbuli nkumo zyabo.+ 9 Nkumo yako ndaiyumya mbubonya mbuli daimondi, akwiinda bbweluuma.+ Utabayoowi pe alimwi utakongwi amasyu aabo,+ nkaambo balo niŋanda yabazangi.”

10 Mpoonya wakandaambila kuti: “Omwanaamuntu, majwi oonse ngendikwaambila, koabikka mumoyo wako alimwi koaswiililisya. 11 Koya akati kabantu bako aaba bali mubuzike+ ukaambaule ambabo. Ukabaambile kuti, ‘Mboobu mbwaamba Mwami Singuzuzyoonse Jehova,’ kunyina makani naa bayoomvwa naa bayookaka kumvwa.”+

12 Mpoonya muuya wakanditola,+ eelyo ndakamvwa jwi kusyule lyangu mbuli muzuzumo mupati kaliti: “Abutembaulwe bulemu bwa Jehova kubusena bwakwe.” 13 Ndakamvwa kuvwuuma kwamababa aazilenge zyuumi aayo aakali kugumana,+ akuvwuuma kwamavwili aakabambene anzizyo,+ alimwi akuvwuuma kwamuzuzumo mupati. 14 Eelyo muuya wakandibweza akunditola, cakuti ndakaunka kandinyemede alimwi moyo kaucisa, alimwi janza lya Jehova lyakali alindime canguzu. 15 Aboobo ndakaunka kubantu aabo ibakali mubuzike ku Tele-abibu, aabo ibakali kukkala kumbali aamulonga wa Kebara,+ eelyo ndakakkala nkomunya ooko nkobakali kukkala; ndakakkala akati kabo imazuba aali ciloba, kandigambidwe kapati.+

16 Lino naakamana mazuba aayo aali ciloba, ijwi lya Jehova lyakandisikila kaliti:

17 “Omwanaamuntu, ndakubikka kuti ube mulindizi kuli bamuŋanda ya Israyeli;+ aboobo eelyo nomvwa jwi lizwa kumulomo wangu, weelede kundicenjezyela bantu aaba.+ 18 Nondaambila muntu mubi kuti, ‘Ncobeni uyoofwa,’ kwamana yebo tomucenjezyi, alimwi tomwaambili kutegwa umucenjezye ooyo mubi kuti aleke bukkale bwakwe bubi kutegwa azumanane kupona,+ walo uyoofwa akaambo kacinyonyoono cakwe nkaambo mubi,+ pele yebo ndiyookusesa bulowa bwakwe.+ 19 Pele ikuti naa wamucenjezya imubi eelyo walo tanaajokoloka kububi bwakwe akubukkale bwakwe bubi, walo mwini uyoofwa akaambo kacinyonyoono cakwe, pele yebo uyoofwutula buumi bwako.+ 20 Pele kuti mululami wabuleka bululami bwakwe akutalika kucita zintu zitaluleme, mebo ndiyoomubikkila cilebyo kumbele eelyo uyoofwa.+ Ikuti tonoomucenjezya, walo uyoofwa akaambo kacibi cakwe alimwi milimo yakwe iiluleme taikayeeyegwi limbi pe, pele yebo ndiyookusesa bulowa bwakwe.+ 21 Pele ikuti naa yebo wamucenjezya mululami kuti atabisyi, eelyo ncobeni tanaabisya, masimpe walo uyoozumanana kupona nkaambo wakacenjezyegwa,+ alimwi ayebo uyoofwutula buumi bwako.”

22 Ijanza lya Jehova lyakaba alindime ooko, eelyo wakandaambila kuti: “Konyamuka, koya kucibanda camukkuti, eelyo okuya ndiyakwaambaula anduwe.” 23 Aboobo ndakanyamuka akuunka kucibanda camukkuti, eelyo amubone! bulemu bwa Jehova bwakali nkukonya ooko,+ mbuli bulemu mbundakabona kumbali aamulonga wa Kebara,+ aboobo ndakavwuntama ansi. 24 Mpoonya muuya wakandinjila akundipa kuti ndiimikile,+ eelyo walo wakandaambila kuti:

“Koya, ukalijalile muŋanda yako. 25 Lino yebo omwanaamuntu, bayookuzambaila ntambo akukwaangilila anzizyo kutegwa uteendeendi akati kabo. 26 Alimwi ndiyoopa kuti mulaka wako ukanamatile kucilakula cako, aboobo yebo unakuumwine buyo wi, tokacikonzyi kubasinsa, nkaambo balo niŋanda yabazangi. 27 Pele mebo ndaambaula anduwe ndinakwaasamuna mulomo wako, mpoonya weelede kubaambila kuti,+ ‘Mboobu mbwaamba Mwami Singuzuzyoonse Jehova.’ Ooyo uuswiilila aaswiilile,+ awalo ooyo uutayandi kuswiilila ataswiilili, nkaambo balo niŋanda yabazangi.+

4 “Lino yebo omwanaamuntu, kobweza citina ucibikke kumbele lyako. Aalincico uzekaule munzi, nkokuti munzi wa Jerusalemu. 2 Kousinkila,+ kouyakila bwaanda bwakuusinkilila,+ kolundika citantaala cakuulwana,+ ubikke nkambi zyakuulwana alimwi kuuzinguluka kobikka zilwanyo zyakuupwayauzya.+ 3 Kobweza mpani yabutale, wiibikke mbuli bwaanda bwabutale akati kanduwe amunzi. Kumane ulanzye busyu bwako kulinguwo cabukali, eelyo walo ulasinkililwa; yebo weelede kuusinkilila. Eeci ncitondezyo kuli bamuŋanda ya Israyeli.+

4 “Mpoonya yebo weelede koonena kulubazu lwako lwakulumwensyi kutegwa woonene milandu yabamuŋanda ya Israyeli.+ Imazuba aayo ngonoolede kulubazu lwako uyoonyamuna milandu yabo. 5 Eelyo mebo ndilakubikkila mazuba aali 390, aayelene amyaka yamilandu yabo,+ aboobo uyoonyamuna milandu yabamuŋanda ya Israyeli. 6 Weelede kwaazuzikizya.

“Mpoonya ciindi cabili weelede koonena kubbazu lyako lyalulyo, aboobo uyoonyamuna milandu yabamuŋanda ya Juda+ imazuba aali 40. Buzuba bomwe bwiiminina mwaka omwe, buzuba bomwe bwiiminina mwaka omwe, ngamazuba ngondakupa. 7 Weelede kulanzya busyu bwako kumunzi wa Jerusalemu+ uusinkilidwe ijanza lyako kalitavwumbidwe alimwi weelede kusinsima makani mabi kulinguwo.

8 “Bona! Ndilakwaanga antambo kutegwa utasandamukili kulubazu lwako lumbi, kusikila mane waazuzikizye mazuba aako aakusinkilila munzi.

9 “Alimwi yebo kolibwezela wiiti, bbaale, mbwiila, nyabo, nzembwe amaila, uzibikke mucibikkilo comwe akulipangila cinkwa. Imazuba oonse ngonakoonena kubbazu lyako unoocilya,+ nkokuti imazuba aali 390. 10 Cakulya nconoolya cinoopimwa buya, imasyekeli* aali 20 abuzuba. Unoocilya aziindi zibikkidwe.

11 “Alimwi unoonywa maanzi aakupiminwa buya, cipaanzi comwe cazipaanzi zili cisambomwe zyansazi.* Unakwaanywa aziindi zibikkidwe.

12 “Unoocilya mbuli cinkwa cabbaale cibulungene; balo kabalangilila weelede kucipangila aamulilo watubi tuyumu twabantu.” 13 Jehova wakazumanana kundaambila kuti: “Oobu mbombubo bana Israyeli mbobanoolya cinkwa cabo cisofweede akati kamasi ooko nkondiyoobamwaila.”+

14 Mpoonya ndakaamba kuti: “Ikutali boobo akaka, O Mwami Singuzuzyoonse Jehova! Kuzwa kubwana bwangu kusikila sunu, mebo kunyina buzuba mbondakasofwaala kwiinda mukulya nyama yamunyama wakalifwida naa munyama wakalumwa buya,+ alimwi mukanwa lyangu tamunanjilide nyama iisofweede.”+

15 Aboobo wakandaambila kuti: “Mbubo, nkokuti inga wabelesya bufwumba bwaŋombe mubusena bwatubi twabantu, eelyo weelede kupanga cinkwa cako aalimbubo.” 16 Mpoonya wakandaambila kuti: “Omwanaamuntu, ndilanyonyoona zyakulya zyanu mu Jerusalemu,+ eelyo kabalibilikide kapati bantu banoolya cinkwa cakupiminwa+ buya alimwi kabayoowede banoonywa maanzi aakupiminwa buya.+ 17 Eeci ciyoocitika kutegwa, akaambo kakubula cakulya amaanzi, bakalangane kabagambidwe alimwi bakakoke akaambo kacinyonyoono cabo.

5 “Lino yebo, omwanaamuntu kobweza panga libosya ulibelesye mbuli mbeli yasikugela masusu. Kogela masusu aako alimwi acilezu cako, wamana ubweze cikkelo akwaapima, mpoonya waandaanye muzibeela zyotatwe. 2 Cibeela cakusaanguna weelede kucuumpa mumulilo mukati kamunzi aakumana mazuba aakuusinkilizya munzi.+ Mpoonya ukabweze cibeela cabili ukaciyasaule apanga kuzinguluka munzi,+ kumane cibeela catatu camamanino ukacimwaye mumuwo, eelyo mebo ndiyoosomona panga akucitandaanya.+

3 “Alimwi kucibeela camamanino weelede kubweza masusu masyoonto akwaavwungaila mumyoombe yacisani cako. 4 Ukabweze masusu aambi kuzwa kuli yaaya, ukaafwusile mumulilo akwaaumpa cakumaninina. Mulilo ooyo uyooyandilila mane kusikila kuŋanda ya Israyeli yoonse.+

5 “Mboobu mbwaamba Mwami Singuzuzyoonse Jehova: ‘Eeci caamba munzi wa Jerusalemu. Ndaubikka akati kamasi, kauzingulukidwe azisi koonse-koonse. 6 Pele walo wazangila mbeta zyangu amilawo yangu, wacita bubi kwiinda masi aambi alimwi akwiinda zisi zyoonse zyuuzingulukide.+ Nkaambo bantu aaba bazikaka mbeta zyangu alimwi tiibeenda mumilawo yangu.’

7 “Aboobo, mboobu mbwaamba Mwami Singuzuzyoonse Jehova: ‘Akaambo kakuti nywebo mwakatazya kapati kwiinda masi aambi aamuzingulukide, tiimweenda mumilawo yangu nokuba kucita caamba mbeta zyangu, pele mwacita kweelana ambeta zyamasi aayo aamuzingulukide,+ 8 nkokuti mboobu mbwaamba Mwami Singuzuzyoonse Jehova: “Mebo lwangu ndilakulwana yebo omunzi,+ ndilacita mbeta zyangu mukati kako mumeso aamasi aaya.+ 9 Akaambo kamicito yako yoonse iisesemya, mulinduwe ndilacita cintu ncenditanabuzuba ndacita alimwi cili boobo tandikaciciti limbi pe.+

10 “‘“Aboobo bamausyi ibali mukati kako bayoolya bana babo,+ abalo bana bayoolya bamausyi, ndiyookupa cisubulo alimwi boonse aabo basyeede mulinduwe ndiyoobamwaila kumabazu oonse.”’+

11 “‘Aboobo, masimpe mebo mbondili muumi,’ mbwaamba Mwami Singuzuzyoonse Jehova, ‘mbokunga yebo wakasofwaazya cikombelo cangu amituni yako yoonse iisesemya alimwi amicito yako yoonse iisesemya,+ nkokuti andime ndiyookukaka;* meso aangu taakakufwidi luse alimwi mebo tandikakufwidi lweetelelo+ pe. 12 Cibeela cakusaanguna cazibeela zyako zyotatwe, ciyoojaigwa acilwazi naa kuloba akaambo kanzala mukati kako. Cibeela cimbi cabili, ciyoojaigwa apanga+ kumabazu oonse aakuzingulukide. Mpoonya cibeela catatu camamanino, ndiyoocimwaila kumabazu oonse, alimwi ndiyoosomona panga akucitandaanya.+ 13 Aboobo bukali bwangu buyoomana, ndiyooleka kubanyemena alimwi moyo wangu uyookkala.+ Ndaakumana kutondezya bukali bwangu aalimbabo bayoozyiba kuti mebo nde Jehova, ndime ndaamba mukuti ndiyanda kuti kandikombwa buyo endikke.+

14 “‘Yebo ndiyookupa kuti ube matongo amasampu akati kamasi aakuzingulukide, alimwi amumeso aabantu boonse bainda.+ 15 Uyooba cintu cisampaulwa alimwi citukilwa,+ cikozyanyo cakucenjezya alimwi acintu ciyoosya kumasi aakuzingulukide, eelyo ndaakukubeteka akukusubula kandikalede, kandinyemede alimwi akukubwentela citaambiki. Mebo lwangu, nde Jehova, ndime ndaamba.

16 “‘Ndiyoobatumina mivwi mibi yanzala kuti ibajaye. Mivwi njendiyootuma iyoomana kumujaya.+ Ndiyoopa kuti nzala yiindile kukomena kulindinywe kwiinda mukunyonyoona zyakulya zyanu.+ 17 Ndiyoomutumina nzala abanyama+ babutambo ibakali, eelyo eezyi ziyoojaya bana banu. Cilwazi akutila bulowa ziyoomupenzya citaambiki, alimwi ndiyoomuletela panga.+ Mebo lwangu, nde Jehova, ndime ndaamba.’”

6 Ijwi lya Jehova lyakandisikila alimwi kaliti: 2 “Omwanaamuntu, kolanzya busyu bwako kumalundu aa Israyeli, usinsime makani mabi kulingawo. 3 Weelede kwaamba kuti, ‘Nywebo nomalundu aa Israyeli, amumvwe jwi lya Mwami Singuzuzyoonse Jehova: Mboobu Mwami Singuzuzyoonse Jehova mbwaambila malundu, tulundu, tulonga alimwi amakkuti: “Amubone! Ndiyoomuletela panga alimwi ndiyoonyonyoona masena aanu aakukombela. 4 Zipaililo zyanu ziyoonyonyoonwa, azyalo zibikkilo zyanu zyatununkilizyo ziyoopwayaulwa,+ alimwi bantu banu bajaidwe ndiyoobasowela ansi kumbele lyamituni yanu iisesemya.*+ 5 Ndiyoosowa mitunta yabantu bamu Israyeli kumbele lyamituni yabo iisesemya, alimwi ndiyoomwaya zifwuwa zyanu koonse-koonse kuzinguluka zipaililo zyanu.+ 6 Mumasena oonse momukkala, minzi iyooba matongo,+ aalo masena aakukombela ayoonyonyoonwa akuba matongo.+ Zipaililo zyanu ziyoonyonyoonwa akupwaigwa, mituni yanu iisesemya iyooloba, zibikkilo zyanu zyatununkilizyo ziyootyolaulwa, ayalo milimo yanu iyoolobesyegwa. 7 Alimwi aabo ibayoojaigwa bayoowa akati kanu,+ eelyo muyoozyiba kuti ndime Jehova.+

8 “‘“Pele ndiyoosiya bantu bamwi, nkaambo nobamwi muyoolitija panga akati kamasi ciindi mwaakumwaigwa moonse muzisi.+ 9 Eelyo aabo ibayoofwutuka akati kanu bayoondiyeeya akati kamasi ooko nkobayootolwa kabali baange.+ Bayoozyiba kuti bakandicisizya moyo akaambo kamyoyo yabo iitasyomeki* eeyo yakaleya kuzwa kulindime,+ alimwi akaambo kameso aabo aanyomenena* mituni yabo iisesemya.+ Bayoofwa nsoni akusesemwa akaambo kazintu zyoonse zibi alimwi zisesemya eezyo nzyobacita.+ 10 Bayoozyiba kuti ndime Jehova, alimwi akuti taali aabuyo majwi aakubacenjezya ngendakaamba kuti ndiyoobaletela mapenzi aaya.”’+

11 “Mboobu mbwaamba Mwami Singuzuzyoonse Jehova: ‘Kamba maanza aako alimwi lyatauka ansi, kolila akaambo kazintu zyoonse zibi alimwi zisesemya nzyobacita bamuŋanda ya Israyeli, nkaambo bayoojaigwa apanga, nzala alimwi acilwazi.+ 12 Ooyo uuli kulamfwu uyoofwa acilwazi, ooyo uuli afwaafwi uyoojaigwa apanga, alimwi kufwumbwa ooyo uuyoozitija zintu eezyi akucaala uyoofwa akaambo kanzala; aboobo ndiyootondezya bukali bwangu boonse kulimbabo.+ 13 Muyoozyiba kuti ndime Jehova,+ eelyo bajaidwe babo nobanoolede akati kamituni yabo iisesemya, koonse-koonse kuzinguluka zipaililo zyabo,+ atala aatulundu toonse tulamfwu, aatala aamalundu oonse, amunsi aacisamu cili coonse cifwefwema, alimwi amunsi aamitabi yamasamu mapati, ooko nkobakali kupa zituuzyo zinunkilila kutegwa bakkomanisye mituni yabo yoonse iisesemya.+ 14 Ndiyootandabika janza lyangu kuti ndibalwane akupa cisi kuba matongo, alimwi masena aabo oonse mobakkala ayooba matongo kwiinda nkanda iili afwaafwi a Dibila. Eelyo bayoozyiba kuti ndime Jehova.’”

7 Ijwi lya Jehova lyakandisikila alimwi kaliti: 2 “Lino yebo omwanaamuntu, mboobu mbwaamba Mwami Singuzuzyoonse Jehova kucisi ca Israyeli kuti: ‘Asika mamanino! Asika mamanino kumabazu oonse one aacisi. 3 Lino mamanino asika kulindinywe, aboobo ndilatondezya bukali bwangu kulindinywe, alimwi ndilamubeteka kweelana anzila zyanu akumupa cisubulo akaambo kamicito yanu yoonse iisesemya. 4 Meso aangu taakoomweetezya nywebo; alimwi mebo tandikoomufwida lubomba pe,+ nkaambo ndilamuletela mpindu yanzila zyanu, alimwi nywebo mulapenga akaambo kamicito yanu iisesemya.+ Eelyo muyoozyiba kuti ndime Jehova.’+

5 “Mboobu mbwaamba Mwami Singuzuzyoonse Jehova: ‘Amubone! Mapenzi, inzya mapenzi aatanabwenwe alaboola.+ 6 Mamanino alaboola; inzya mamanino alaboola; alamubukila. Amubone! Alaboola. 7 Ciindi canu casika, nywebo nomukkala mucisi eeci. Ciindi casika, buzuba bulaafwaafwi.+ Atala aamalundu kuli lupyopyongano, ikutali koongolola cakukondwa pe.

8 “‘Lino-lino aawa ndilamutila bukali bwangu,+ alimwi ndilatondezya kunyema kwangu koonse kulindinywe,+ ndilamubeteka kweelana anzila zyanu akumupa cisubulo akaambo kamicito yanu yoonse iisesemya. 9 Meso aangu taakoomweetezya nywebo; alimwi mebo tandikoomufwida lubomba pe.+ Ndilamuletela mpindu yanzila zyanu, alimwi nywebo mulapenga akaambo kamicito yanu iisesemya. Aboobo muyoozyiba kuti mebo, nde Jehova, ndime uumuuma nywebo.+

10 “‘Inzya, mboobu buzuba! Amubone, bulasika!+ Ciindi canu casika; musako wafwulula, akwalo kulisumpula kwasyuuka. 11 Nkondo yakomena akuba musako wabubi.+ Taakwe ciyoofwutuka, nobaba mbabo, nobuba buvwubi bwabo, naaba makamu aabo, noiba mpuwo yabo. 12 Ciindi ciyoosika, buzuba buyoosika. Sikuula atakondwi pe, awalo sikusambala atalili, nkaambo bukali bwazisikila nkamu zyabo zyoonse.+ 13 Nkaambo sikusambala takapiluki kucintu cakasambalwa, nokuba kuti ucili muumi, nkaambo cilengaano eeci cijatikizya kulwana nkamu yoonse. Kunyina naba omwe uutiikapiluke, alimwi akaambo kacinyonyoono cakwe,* kunyina naba omwe uutiikafwutule buumi bwakwe.

14 “‘Baulizya mweembo,+ alimwi boonse balilibambilide, pele kunyina naba omwe uunka kunkondo, nkaambo bukali bwangu bwaisikila nkamu yabo yoonse.+ 15 Ipanga lili anze,+ cilwazi anzala zili mukati. Kufwumbwa uuli musyokwe ulajaigwa apanga, abalo aabo bali mumunzi balajaigwa anzala acilwazi.+ 16 Bantu babo ibayoofwutuka akucikonzya kutija bayakuunka kumalundu, alimwi mbubonya mbuli nziba zyamumakkuti, umwi aumwi wabo uyoolila akaambo kacinyonyoono cakwe.+ 17 Maanza aabo oonse ayoobula nguzu, aalo magondo aabo oonse ayakweenda maanzi.*+ 18 Basama zisani zyamasaka, alimwi baliyoowede citaambiki.*+ Bantu boonse bayoofwa nsoni, alimwi mitwe yoonse iyooba alubala.*+

19 “‘Nsiliva yabo bayakwiisowela mumigwagwa, ayalo ngolida yabo iyooba cintu cisofweede. Insiliva yabo angolida yabo taikabafwutuli pe mubuzuba bwabukali bwa Jehova.+ Tabakakkuti pe, nokuba kuzuzya mada aabo, nkaambo zyababeda* cilebyo icibapa kubisya. 20 Bakali kulidunda akaambo kakweebeka kwazilisakatizyo zyabo, alimwi bakali kuzibelesya* kupanga zikozyanyo zyabo zisesemya, imituni yabo iisesemya.+ Nkakaambo kako ndiyoozipa kuba cintu cisesemya kulimbabo. 21 Ndiyooyaaba* mumaanza aabamuzwakule kuti baisaale alimwi amumaanza aabantu babi bamunyika kuti baitole, aboobo bayakwiisofwaazya.

22 “‘Busyu bwangu ndiyoobulanzya kumbi kuzwa kulimbabo,+ eelyo bayoosofwaazya busena bwangu busisikide,* alimwi babbi bayoonjila mumo akubusofwaazya.+

23 “‘Amupange nketani,+ nkaambo cisi cizwide lubeta+ lupa kutila bulowa awalo munzi uzwide nkondo.+ 24 Ndiyooleta masi+ mabi kapati, eelyo ayookona maanda aabo,+ alimwi kulisumpula kwabantu basinguzu ndiyookumana, azyalo zikombelo zyabo ziyoosofwaazyigwa.+ 25 Mapenzi aabo aakusika, bayooyandaula luumuno pele tabakalujani pe.+ 26 Kuyoosika mapenzi atala aamapenzi, ayalo milumbe iyootobelana, bantu bayooyandaula cilengaano kumusinsimi,+ pele mulawo* uyooloba kumupaizi alulayo kubapati.+ 27 Mwami uyoolila,+ awalo silutwe uyootyompwa kapati, alimwi maanza aabantu bamucisi ayoozuzuma akaambo kakuyoowa. Ndiyoobacitila kweelana anzila zyabo, akubabeteka kweelana ambobali kubeteka. Eelyo bayoozyiba kuti ndime Jehova.’”+

8 Lino mumwaka wacisambomwe, mumwezi wacisambomwe, mubuzuba bwasanu bwamwezi, nindakakkede muŋanda yangu abalo bapati bamu Juda nibakakkede kumbele lyangu, ijanza lya Mwami Singuzuzyoonse Jehova lyakandijata. 2 Nindakali kulangilila, ndakabona ciimo camuntu cilibonya mbuli mulilo; kuzwa waawo mpaakali kulibonya mbuli kuti ncibuno cakwe+ kuyaansi kwakali mulilo, mpoonya kuzwa mucibuno cakwe kuya mujulu wakali kumweka, mbuli kuŋaima kwangolida iivweledwe ansiliva.+ 3 Mpoonya wakatandabika ceeco cakali kulibonya mbuli kuti ndijanza akujata cikama camasusu aakumutwe wangu, kumane muuya wakandibweza kandileleenga akati kanyika ajulu akundisisya ku Jerusalemu kwiinda muzilengaano zizwa kuli Leza, wakanditola mane kumanjililo aamulyango wamukati+ uulangide kunyika, ooko kwakaimvwi cikozyanyo camutuni cabuzuba* eeco cipa kuba amunyono.+ 4 Lino amubone! Bulemu bwa Leza wa Israyeli bwakali nkomunya ooko,+ mbuli cilengaano ncondakabona mucibanda camukkuti.+

5 Mpoonya wakandaambila kuti: “Omwanaamuntu, kowaala meso aako kunyika.” Aboobo ndakawaala meso aangu kunyika, eelyo ooko kunyika kwamulyango wakucipaililo, kwakali cikozyanyo cabuzuba kumanjililo. 6 Kumane wakandaambila kuti: “Omwanaamuntu, sena wazibona zintu zibyaabi kapati, izisesemya nzyobacita bamuŋanda ya Israyeli,+ izintu zindipa kutantamukila kulamfwu kapati abusena bwangu busalala?+ Pele ulabona zintu azimbi zisesemya kapati kwiinda zyeezyi.”

7 Mpoonya wakandileta kumanjililo aalubuwa, eelyo nindakalanga, ndakabona cipulo mubwaanda. 8 Wakandaambila kuti: “Omwanaamuntu, kodonkola cipulo mubwaanda.” Aboobo ndakadonkola cipulo mubwaanda akubona manjililo. 9 Kumane wakandaambila kuti: “Konjila ubone zintu zibi, izisesemya nzyobacita okuno.” 10 Aboobo ndakanjila akulanga, eelyo ndakabona zikozyanyo zyamisyobo yoonse zyazilenge zikalaba ansi azyabanyama basesemya,+ alimwi amituni yoonse iisesemya* yabantu bamuŋanda ya Israyeli;+ eezyi zyakalizekaudwe abwaanda koonse-koonse. 11 Alimwi bapati bali 70 bamuŋanda ya Israyeli bakaliimvwi kumbele lyazyo, a Jazaniya mwana wa Safani+ kaimvwi akati kabo. Umwi aumwi wabo wakajisi cakuumpila tununkilizyo mujanza lyakwe, eelyo kkumbi lyabusi bununkilila bwatununkilizyo lyakali kuuntumuka kuya mujulu.+ 12 Mpoonya wakandaambila kuti: “Omwanaamuntu, sena ulibabwene bapati bamuŋanda ya Israyeli ncobacita mumudima, umwi aumwi mutwaanda twamukati oomo mituni yakwe moibikkidwe? Nkaambo baamba kuti, ‘Jehova tatubwene pe. Jehova wacisiya cisi.’”+

13 Eelyo wakandaambila kuti: “Ulabona zintu azimbi zisesemya kapati kwiinda zyeezyi nzyobacita.” 14 Aboobo wakanditola kumanjililo aamulyango wakunyika waŋanda ya Jehova, eelyo ooko ndakabona bamakaintu kabakkede akulila leza uutegwa Tamuzi.

15 Alimwi wakandaambila kuti: “Omwanaamuntu, sena wacibona eeci? Ulabona zintu azimbi zisesemya kapati kwiinda zyeezyi.”+ 16 Aboobo wakanditola kulubuwa lwamukati lwaŋanda ya Jehova.+ Ookuya kumanjililo aatempele lya Jehova, akati kakkoce acipaililo, kwakali baalumi basika ku 25 kabafwutatide tempele lya Jehova eelyo masyu aabo kaalangide kujwe; bakali kuvwuntamina zuba kujwe.+

17 Eelyo wakandaambila kuti: “Omwanaamuntu, sena wacibona eeci? Sena aaya makani masyoonto kuti bamuŋanda ya Juda kabacita zintu eezyi zisesemya, kuti kabazuzya cisi eeci ankondo+ akuzumanana kundinyemya? Lino batondeka mutabi* kumpemo yangu. 18 Aboobo ndilacita cabukali kapati. Meso aangu taakoobeetelela; alimwi tandikoobafwida lubomba pe.+ Nokuba kuti boongolole buti mumatwi aangu, tandikoobaswiilila pe.”+

9 Mpoonya wakoongolola ajwi lipati mumatwi aangu, kuti: “Kobaita aabo batiisubule munzi, umwi aumwi mujanza lyakwe kajisi cilwanyo cakwe cakubelesya kunyonyoona!”

2 Eelyo ndakabona baalumi bali cisambomwe kababoola kuzwa kulubazu lwamulyango waatala+ uulangide kunyika, umwi aumwi kajisi cilwanyo cakwe cakupwayauzya mujanza lyakwe; alimwi kwakali mwaalumi umwi akati kabo iwakasamide cisani cuuba-uba, kajisi nkomo yazilembyo yamulembi mucibuno, eelyo bakaboola akwiima kumbali aacipaililo camukuba.+

3 Mpoonya bulemu bwa Leza wa Israyeli+ bwakaya mujulu kuzwa waawo mpobwakabede atala aabakerubi akuya kumanjililo aaŋanda,+ kumane wakatalika kwiita mwaalumi wakasamide cisani cuuba-uba, ooyo wakajisi nkomo yazilembyo yamulembi mucibuno cakwe. 4 Kumane Jehova wakamwaambila kuti: “Koinda mumunzi, mu Jerusalemu, ubikke citondezyo ankumo zyabantu ibalila akutongela+ akaambo kazintu zyoonse zisesemya zicitika mumunzi.”+

5 Mpoonya wakaambila baaba bamwi kandimvwide amatwi aangu kuti: “Kamwiinda mumunzi mumutobele akujaya. Meso aanu ateetezyegwi pe, alimwi mutabafwidi lubomba naaceya.+ 6 Mudaala, mulombwana, nakalindu, mwana musyoonto amukaintu, boonse buyo mweelede kubajaya.+ Pele mutasiki afwaafwi amuntu uuli woonse uujisi citondezyo.+ Mweelede kutalikila kubusena bwangu busalala.”+ Aboobo bakatalikila kubapati aabo bakali kumbele lyaŋanda.+ 7 Mpoonya wakabaambila kuti: “Amwiisofwaazye ŋanda akuzuzya mabuwa abantu bajaidwe.+ Kamuya!” Aboobo bakaunka akujaya bantu mumunzi.

8 Lino nebakali kubajaya, ndakasyaala buyo endikke, mpoonya ndakavwuntama ansi akoongolola kuti: “Akaka, O Mwami Singuzuzyoonse Jehova! Sena ulabanyonyoona ba Israyeli basyeede boonse ciindi notila bukali bwako aali Jerusalemu?”+

9 Aboobo wakandaambila kuti: “Cinyonyoono cabamuŋanda ya Israyeli aya Juda ncipati kapati.+ Cisi cizwide micito yakutila bulowa,+ alimwi mumunzi muli bumpelenge bwalo-bwalo.+ Nkaambo baamba kuti, ‘Jehova wacisiya cisi, Jehova taboni pe.’+ 10 Pele mebo, meso aangu taakoobeetelela pe; alimwi tandikoobafwida lubomba.+ Ndilabapa bulumbu bwanzila yabo aamitwe yabo beni.”

11 Mpoonya ndakabona mwaalumi uulya wakasamide cisani cuuba-uba iwakajisi nkomo yazilembyo mucibuno cakwe, wakajokela akwaamba kuti: “Ndacita mbubonya mboondilailila.”

10 Nindakali kulangilila, atala aacibumbili cakali atala aamitwe yabakerubi ndakabona cintu cakali kulibonya mbuli bbwe lyasafilo atala aambabo, alimwi cintu eeci cakali kulibonya mbuli cuuno cabwami.+ 2 Mpoonya wakaambila mwaalumi uulya wakasamide cisani cuuba-uba+ kuti: “Konjila akati kamavwili aazinguluka,+ ansi aabakerubi, uzuzye maanza aako oonse obilo amakala aayaka mulilo+ aali akati kabakerubi, wamana waawaale amunzi.”+ Aboobo wakanjila kandilangilila.

3 Bakerubi bakaliimvwi kululyo lwaŋanda ciindi mwaalumi naakanjila, mpoonya kkumbi lyakazula mulubuwa loonse lwamukati. 4 Kumane bulemu bwa Jehova+ bwakanyamuka kuzwa atala lyabakerubi akuya kumanjililo aamulyango waŋanda, eelyo asyoonto-syoonto ŋanda yakazula kkumbi,+ alwalo lubuwa lwakazula kumweka kwabulemu bwa Jehova. 5 Lino kuvwuuma kwamababa aabakerubi kwakali kulimvwisya mulubuwa lwaanze, mbubonya mbolilimvwisya jwi lya Leza Singuzuzyoonse ciindi naambaula.+

6 Mpoonya wakalailila mwaalumi wakasamide cisani cuuba-uba kuti: “Kobweza mulilo uuli akati kamavwili aazinguluka, akati kabakerubi,” eelyo wakanjila akwiima kumbali aavwili. 7 Kumane umwi wabakerubi wakatandabika janza lyakwe kumulilo iwakali akati kabakerubi.+ Wakayokolola mulilo umwi akuubikka mumaanza oonse obilo aamwaalumi wakasamide cisani cuuba-uba,+ ooyo walo wakautambula akuzwida anze. 8 Bakerubi bakajisi icakali kulibonya mbuli maanza aamuntu kunsi aamababa aabo.+

9 Nindakali kulangilila, ndakabona mavwili one kumbali aabakerubi, ivwili lyomwe kumbali aakerubi umwi aumwi, alimwi mavwili aaya akali kulibonya mbuli kumweka-mweka kwabbwe lyakulusolito.+ 10 Kujatikizya mbwaakali kulibonya, oonse one akalikozyenye, akali mbuli vwili lili muvwilinyina kaaingene. 11 Naakali kweenda, akali kuunka mumbazu zyoonse zyone kakunyina kunyona, nkaambo akali kuunka kubusena koonse ooko kwakalangide mutwe kakunyina kunyona. 12 Mibili yabo yoonse, masyule aabo, maanza aabo, mababa aabo alimwi amavwili, inzya mavwili aabo oonse one, zyoonse buyo zyakazwide meso koonse-koonse.+ 13 Lino kujatikizya mavwili, ndakamvwa jwi ilyakoompolola kulingawo kuti, “Amweende nomavwili!”

14 Umwi aumwi* wakajisi masyu one. Busyu bwakusaanguna bwakali busyu bwakerubi, busyu bwabili bwakali busyu bwamuntu, busyu bwatatu bwakali busyu bwasyuumbwa, mpoonya busyu bwane bwakali busyu bwasikwaze.+

15 Alimwi bakerubi bakali kunyamuka kuya mujulu—eezyi nzyezilenge zyuumi nzyondakabona kumulonga wa Kebara+— 16 ciindi bakerubi nobakali kweenda, aalo mavwili akali kweenda kumbali lyabo; bakerubi nobakali kuvwungulula mababa aabo kuti ababame atala aanyika, mavwili tanaakali kunyona nokuba kuzwa kumbali lyabo.+ 17 Nobakali kwiima, aalo mavwili akali kwiima; alimwi aaba nobakali kunyamuka kuya mujulu, akali kunyamuka ambabo, nkaambo muuya iwakali kweendelezya zilenge zyuumi wakali mulingawo.

18 Mpoonya bulemu bwa Jehova+ bwakazwa atala aamanjililo aamulyango waŋanda akwiima atala aabakerubi.+ 19 Kumane bakerubi bakavwungulula mababa aabo akuuluka kuya mujulu kuzwa anyika kandilangilila. Aalo mavwili akali kumbali lyabo nobakali kuunka. Bakaima kumanjililo aamulyango wakujwe waŋanda ya Jehova, alimwi bulemu bwa Leza wa Israyeli bwakali atala lyabo.+

20 Eezyi nzyezilenge zyuumi nzyondakabona kunsi lya Leza wa Israyeli kumulonga wa Kebara,+ aboobo ndakazyiba kuti bakali bakerubi. 21 Boonse bone bakajisi masyu one, mababa one alimwi acintu icakali kulibonya mbuli maanza aamuntu kunsi aamababa aabo.+ 22 Alimwi masyu aabo akali kulibonya mbuli masyu ngondakabona kandili kumulonga wa Kebara.+ Umwi aumwi wabo wakali kugama buyo kumbele.+

11 Mpoonya muuya wakandinyamuna akunditola kumulyango wakujwe waŋanda ya Jehova, mulyango uulangide kujwe.+ Okuya kumanjililo aamulyango, ndakabona baalumi bali 25, eelyo akati kabo kwakali Jazaniya mwana wa Azuri, alimwi a Pelatiya mwana wa Benaya, basilutwe babantu.+ 2 Eelyo Leza wakandaambila kuti: “Omwanaamuntu, aaba mbabaalumi bayeeya makanze mabi akupa lulayo lubyaabi mumunzi ooyu. 3 Baamba kuti, ‘Sena eeci tacili nceciindi cakuyaka maanda?+ Imunzi* nimpoto,+ eelyo swebo ndendiswe nyama.’

4 “Aboobo kosinsima makani mabi kujatikizya mbabo. Kosinsima, omwanaamuntu.”+

5 Mpoonya muuya wa Jehova wakandiselukila,+ eelyo wakandaambila kuti: “Koamba kuti, ‘Mboobu mbwaamba Jehova: “Eeco ncomwaamba nywebo nobamuŋanda ya Israyeli cililuzi, alimwi mebo ndilicizyi ncomuyeeya. 6 Mwapa kuti bantu banji bafwe mumunzi ooyu alimwi mwazuzya migwagwa yanguwo amitunta yabantu.”’”+ 7 “Aboobo, mboobu mbwaamba Mwami Singuzuzyoonse Jehova: ‘Eeyo mitunta njimwasowaila mumunzi nenyama, eelyo munzi njempoto.+ Pele nywebo lwanu muyoogwisyigwa mulinguwo.’”

8 “‘Mwayoowa panga,+ pele ndiyoomuletela panga,’ mbwaamba Mwami Singuzuzyoonse Jehova. 9 ‘Ndiyoomugwisya mulinguwo akumwaaba mumaanza aabamuzwakule alimwi akumubeteka.+ 10 Muyoojaigwa apanga.+ Ndiyoomubeteka kumunyinza wa Israyeli,+ eelyo muyoozyiba kuti ndime Jehova.+ 11 Imunzi taukamubedi mpoto pe, alimwi nywebo tamukabi nyama mulinguwo; ndiyoomubetekela kumunyinza wa Israyeli, 12 eelyo muyoozyiba kuti ndime Jehova. Nkaambo tiimweenda mumilawo yangu alimwi tiimwacita mbeta zyangu pe,+ pele mwacita kweelana ambeta zyamasi aamuzingulukide.’”+

13 Mbundakasinsimina buyo, Pelatiya mwana wa Benaya wakafwa, aboobo ndakavwuntama ansi akulila ajwi pati kuti: “Akaka, O Mwami Singuzuzyoonse Jehova! Sena ulamana kubanyonyoona basyeede ba Israyeli?”+

14 Ijwi lya Jehova lyakandisikila alimwi kaliti: 15 “Omwanaamuntu, bantu bakkala mu Jerusalemu baambila banabokwanu, aabo banabokwanu bajisi ceelelo cakunununa, antoomwe aboonse bamuŋanda ya Israyeli kuti, ‘Amutantamukile kulamfwu a Jehova. Nyika eeyi njiyesu; twapegwa kuti ibe yesu.’ 16 Aboobo koamba kuti, ‘Mboobu mbwaamba Mwami Singuzuzyoonse Jehova: “Nokuba kuti ndabatola kulamfwu akati kabantu bamasi, alimwi ndabamwaila muzisi zimwi,+ kwakaindi kaniini buyo ndiyoobabeda cikombelo kuzisi eezyo nkobabede.’”+

17 “Aboobo koamba kuti, ‘Mboobu mbwaamba Mwami Singuzuzyoonse Jehova: “Kunze lyaboobo ndiyoomuyobolola kuzwa kubantu aabo akumubunganya kuzwa kuzisi eezyo nkomumwaikide, alimwi ndiyoomupa cisi ca Israyeli.+ 18 Eelyo bayoopilukila mumo akugwisya zintu zyoonse zisesemya alimwi amicito yoonse iisesemya mulincico.+ 19 Alimwi ndiyoobapa moyo omwe,+ akubikka muuya mupya mulimbabo;+ ndiyoogwisya moyo muyumu nta mbuli bbwe uuli mulimbabo+ akubapa moyo muteteete wanyama,*+ 20 kutegwa kabeenda mumilawo yangu akubamba mbeta zyangu alimwi akuzitobela. Eelyo bayooba bantu bangu ambebo ndiyooba Leza wabo.’”

21 “‘“Pele aabo bajisi myoyo iikanzide kuzumanana kutolaambele zintu zyabo zisesemya amicito yabo iisesemya, ndiyoobaletela mpindu yanzila yabo amitwe yabo,” mbwaamba Mwami Singuzuzyoonse Jehova.’”

22 Mpoonya bakerubi bakavwungulula mababa aabo, aalo mavwili akali kumbali lyabo,+ alimwi bulemu bwa Leza wa Israyeli bwakali atala lyabo.+ 23 Kumane bulemu bwa Jehova+ bwakanyamuka kuya mujulu kuzwa amunzi akuyakwiimina atala aacilundu cakali kujwe lyamunzi.+ 24 Mpoonya muuya wakandinyamuna—mucilengaano ncondakabona kwiinda mumuuya wa Leza—akunditola kubantu bakali mubuzike kucisi caba Kasidi. Kumane cilengaano ncondakabwene cakazimaana. 25 Mpoonya ndakatalika kwaambila bantu aabo bakali mubuzike izintu zyoonse nzyaakanditondezya Jehova.

12 Ijwi lya Jehova lyakandisikila alimwi kaliti: 2 “Omwanaamuntu, ukkede muŋanda yabazangi. Balijisi meso aakuti babone, pele tababoni pe, alimwi balijisi matwi aakuti bamvwe pele tabamvwi pe,+ nkaambo mbaŋanda yabazangi.+ 3 Lino yebo omwanaamuntu, kolibambila cibbudu cakutolelezya mubuzike. Mpoonya syikati kabalangilila, uunke mubuzike. Kozwa muŋanda yako uunke kubusena bumbi mubuzike balo kabalangilila. Ambweni balabikkila maano, nokuba kuti mbaŋanda yabazangi. 4 Masyikati kabalangilila ugwisye cibbudu cako cibambilidwe kutolelezya mubuzike, mpoonya mangolezya, balo kabalangilila, weelede kuunka mbuli muntu uutolwa mubuzike.+

5 “Kabalangilila, udonkole cipulo mubwaanda, akwiinzya zintu zyako mulincico.+ 6 Mpoonya kabalangilila, unyamune zintu zyako agwezyo akuunka anzizyo mumudima. Ulivwumbe kubusyu kutegwa utaaboni ansi, nkaambo ndakubikka kuba citondezyo kuŋanda ya Israyeli.”+

7 Aboobo ndakacita mbubonya mbondakalaililwa. Masyikati ndakagwisya cibbudu cangu mbuli cibbudu cakutola mubuzike, mpoonya mangolezya ndakadonkola cipulo mubwaanda ajanza lyangu. Kumane nokwakasiya ndakagwisya zintu zyangu kandizinyamwide agwezyo, balo kabalangilila.

8 Alimwi mafwumofwumo ijwi lya Jehova lyakandisikila kaliti: 9 “Omwanaamuntu, sena bamuŋanda ya Israyeli, ibamuŋanda yabazangi tiibakubuzya kuti, ‘Ino ucita nzi?’ 10 Kobaambila kuti, ‘Mboobu mbwaamba Mwami Singuzuzyoonse Jehova: “Makani aaya ajatikizya silutwe+ uuli mu Jerusalemu alimwi abamuŋanda ya Israyeli boonse ibali mumunzi.”’

11 “Koamba kuti, ‘Ndili citondezyo kulindinywe.+ Mbubonya oobu mbundacita, mbobayoocitwa abalo. Bayootolwa mubuzike, kabali baange.+ 12 Silutwe uuli akati kabo uyoonyamuna zintu zyakwe agwezyo akuunka kayaabweenda mumudima. Uyoodonkola cipulo mubwaanda akwiinzya zintu zyakwe mulincico.+ Uyoolivwumba kubusyu kutegwa ataboni ansi.’ 13 Ndiyoowaala lunsabwe lwangu alinguwe, aboobo uyoocegwa mulunsabwe lwangu lwakuvwimya.+ Mpoonya ndiyoomutola ku Babuloni, kucisi caba Kasidi, pele takaciboni cisi eeco pe alimwi nkukonya ooko nkwayoofwida.+ 14 Boonse aabo bamuzingulukide, basikumugwasyilizya abasikalumamba bakwe, ndiyoobamwaila kumabazu oonse;+ alimwi ndiyoosomona panga akubatandaanya.+ 15 Eelyo bayoozyiba kuti ndime Jehova ciindi ndaakubamwaya akati kabantu bamasi alimwi akubapalanganya muzisi. 16 Pele, ndiyoosiya bamwi kuti batajaigwi apanga, anzala, alimwi acilwazi, kutegwa bakaluule micito yoonse iisesemya akati kabantu bamasi ooko nkobayakuunka; aboobo bayoozyiba kuti ndime Jehova.”

17 Ijwi lya Jehova lyakandisikila alimwi kaliti: 18 “Omwanaamuntu kolya cakulya cako kumwi kokankama, akunywa maanzi aako koyoowede alimwi kolibilikide.+ 19 Kobaambila bantu bamucisi eeci kuti, ‘Mboobu Mwami Singuzuzyoonse Jehova mbwaambila bantu bakkala mu Jerusalemu mucisi ca Israyeli: “Bayoolya cakulya cabo kabalibilikide, akunywa maanzi aabo kabayoowede kapati, nkaambo cisi cabo ciyoonyonyoonwa cakumaninina+ akaambo kankondo yabantu boonse ibakkala mumo.+ 20 Minzi iikkedwe bantu iyoonyonyoonwa, alimwi cisi eeci ciyooba matongo;+ aboobo nywebo muyoozyiba kuti ndime Jehova.”’”+

21 Alimwi ijwi lya Jehova lyakandisikila kaliti: 22 “Omwanaamuntu, ino nkaambyo nzi aaka nkomujisi mucisi ca Israyeli, ikaamba kuti, ‘Mazuba avwula, pele zilengaano zyoonse kunyina nozyazuzikizyigwa’?+ 23 Aboobo kobaambila kuti, ‘Mboobu mbwaamba Mwami Singuzuzyoonse Jehova: “Ndiyoopa kuti kaambyo aaka kamane, alimwi tabakakabelesyi limbi mucisi ca Israyeli.”’ Pele kobaambila kuti, ‘Mazuba alaafwaafwi,+ alimwi zilengaano zyoonse ziyoozuzikizyigwa.’ 24 Nkaambo takukabi limbi cilengaano cili coonse cakubeja nobuba busondi bwakuupaika muŋanda ya Israyeli.+ 25 ‘“Nkaambo mebo nde Jehova, ndiyakwaamba. Kufwumbwa jwi ndendiyakwaamba, liyoocitika cakutamuka pe.+ Mumazuba aanu+ nywebo nobaŋanda yabazangi, ndiyakwaamba jwi akulizuzikizya,” mbwaamba Mwami Singuzuzyoonse Jehova.’”

26 Ijwi lya Jehova lyakandisikila alimwi kaliti: 27 “Omwanaamuntu, mboobu mbobaamba bantu bamu Israyeli, ‘Cilengaano ncaabona cicili kulamfwu kuzuzikizyigwa alimwi usinsima zintu ziyoocitika kumazuba aakumbele ooko.’+ 28 Aboobo kobaambila kuti, ‘Mboobu mbwaamba Mwami Singuzuzyoonse Jehova: “‘Kunyina jwi noliba lyomwe akati kamajwi aangu iliyoomuka; kufwumbwa ncendaamba ciyoocitika,’ mbwaamba Mwami Singuzuzyoonse Jehova.”’”

13 Alimwi ijwi lya Jehova lyakandisikila kaliti: 2 “Omwanaamuntu, kosinsima makani mabi kujatikizya basinsimi bamu Israyeli,+ kobaambila aabo basinsima zyamumyoyo yabo beni kuti,+ ‘Amumvwe jwi lya Jehova. 3 Mboobu mbwaamba Mwami Singuzuzyoonse Jehova: “Maawe kubasinsimi bafwubafwuba, aabo batobela muuya wabo, kakuli kunyina ncobabona!+ 4 Nywebo nobana Israyeli, basinsimi banu baba mbuli bamwaaba bali mumatongo. 5 Nywebo tamukaunki pe kuzibeela zipwaikide zyamalambo aamabwe kuti mukaayakulude bamuŋanda ya Israyeli, kutegwa Israyeli+ akazumanane kwiima nji munkondo mubuzuba bwa Jehova.”+ 6 “Babona zilengaano zyakubeja akusinsima bubeji, aabo baamba kuti, ‘Mboobu mbwaamba Jehova,’ kakuli Jehova kunyina naabatuma pe, alimwi balindila kuti jwi lyabo beni lizuzikizyigwe.+ 7 Sena tiimwabona cilengaano cakubeja akusinsima bubeji ciindi nomwaamba kuti, ‘Mboobu mbwaamba Jehova,’ kakuli mebo tiindaamba cintu cili coonse?”’

8 “‘Aboobo, mboobu mbwaamba Mwami Singuzuzyoonse Jehova: “‘Akaambo kakuti mwaamba zyakubeja azyalo zilengaano zyanu nzyakubeja, tandimuyandi pe,’ mbwaamba Mwami Singuzuzyoonse Jehova.”+ 9 Ijanza lyangu lilwana basinsimi aabo baamba zilengaano zyakubeja akusinsima zyakubeja.+ Tabakabi akati kabantu aabo mbondaambila maseseke; alimwi tabakalembwi pe mubbuku lyabaŋanda ya Israyeli; nokuba kupiluka kucisi ca Israyeli; eelyo muyoozyiba kuti mebo ndendime Mwami Singuzuzyoonse Jehova.+ 10 Zyoonse eezyi ziyoocitika akaambo kakuti basowa bantu bangu kwiinda mukwaamba kuti, “Kuli luumuno!” kakuli kunyina luumuno pe.+ Ciindi nobuyakwa bwaanda bwakucimbuzya mukati kaŋanda butali buyumu, babuzilulula mulambo* uutuba.’+

11 “Kobaambila aabo baziluluzya mulambo uutuba kuti bwaanda buyoowa. Imvwula mpati iyooboola, civwulamabwe ciyooloka alimwi maguwo aanguzu kapati ayoobuwisya.+ 12 Eelyo bwaanda bwaakuwa, muyoobuzyigwa kuti, ‘Ino uli kuli mulambo ngumwakazilulula?’+

13 “Aboobo mboobu mbwaamba Mwami Singuzuzyoonse Jehova: ‘Ndiyoopa kuti maguwo aalaanguzu kapati aunge mubukali bwangu, alimwi ndiyoolosya mvwula mpati kandinyemede, acivwulamabwe mubukali bunyonyoona. 14 Ndiyoopwaya bwaanda mbumwakazilulula mulambo uutuba akubuwisizya ansi, eelyo ntalisyo yambubo iyoosyaala antangalala. Munzi waakuwa, nywebo muyooloba mulinguwo; eelyo muyoozyiba kuti ndime Jehova.’

15 “‘Ndaakutila bukali bwangu boonse abwaanda alimwi aali baabo ibakali kubuzilulula mulambo uutuba, nywebo ndiyoomwaambila kuti: “Bwaanda tabuciko, abalo bantu bakali kubuzilulula tabaciko.+ 16 Basinsimi ba Israyeli baloba, aabo ibali kusinsimina Jerusalemu akubona zilengaano zyaluumuno kakuli kunyina luumuno,”’+ mbwaamba Mwami Singuzuzyoonse Jehova.

17 “Pele yebo, omwanaamuntu, kogamika busyu bwako kubana basimbi babantu bako ibasinsima zyamumyoyo yabo beni, alimwi kobasinsimina makani mabi. 18 Kobaambila kuti, ‘Mboobu mbwaamba Mwami Singuzuzyoonse Jehova: “Maawe kuli bamakaintu aabo ibasuma mincinda yakusamika maanza oonse aabantu* akupanga milembo yakuvwumba mitwe yabantu baziimo zyoonse kutegwa bateye maumi aabantu! Sena muteya maumi aabantu bangu mukusola kufwutula maumi aanu nobeni? 19 Sena mulandisampaula akati kabantu bangu kutegwa mujane bbaale uukkwana buyo mujanza lyomwe alimwi abufwefwelenga bwacinkwa?+ Mujaya bantu bateelede kufwa, akufwutula baabo bateelede kupona, mucita boobo kwiinda mububeji mbomwaambila bantu bangu ibaswiilila bubeji bwanu.”’+

20 “Aboobo mboobu mbwaamba Mwami Singuzuzyoonse Jehova: ‘Tandiiyandi pe mincinda yanu, nywebo nobamakaintu, eeyo njomubelesya kuteya bantu mbuli kuti ntuyuni, aboobo ndilaidunsaula kumaanza aanu akwaangununa baabo mbomuteya mbuli kuti ntuyuni. 21 Ndilazapula milembo njomulivwumba akuvwuna bantu bangu mumaanza aanu, aboobo kulindinywe tabacinooli cintu ncomuteya akujata; eelyo muyoozyiba kuti ndime Jehova.+ 22 Nkaambo mwatyompya moyo wamululami akaambo kabubeji bwanu,+ ooyo ngondatali kupenzya, alimwi mwayumya maanza aamuntu mubi,+ kutegwa ataleki nzila yakwe mbyaabi akuzumanana kupona.+ 23 Aboobo, nywebo nobamakaintu tamukaboni limbi zilengaano zyakubeja akusonda;+ ndiyoovwuna bantu bangu kumaanza aanu, eelyo muyoozyiba kuti ndime Jehova.’”

14 Lino bapati bamwi bamu Israyeli bakaboola akukkala kumbele lyangu.+ 2 Mpoonya ijwi lya Jehova lyakandisikila kaliti: 3 “Omwanaamuntu, baalumi aaba bakanzide kutobela mituni yabo iisesemya,* alimwi babikka cilebyo cipa bantu kubisya. Sena ndibazumizye kubuzya makani kulindime?+ 4 Lino kobandika ambabo akubaambila kuti, ‘Mboobu mbwaamba Mwami Singuzuzyoonse Jehova: “Ikuti muna Israyeli ukanzide kutobela mituni yakwe iisesemya alimwi wabikka cilebyo cipa bantu kubisya, kumane waboola kuzoobuzya makani kumusinsimi, mebo lwangu nde Jehova, ndiyoomuvwiila kweelana akuvwula kwamituni yakwe iisesemya. 5 Nkaambo ndiyoopa kuti myoyo yabamuŋanda ya Israyeli iyoowe kapati, akaambo kakuti boonse buyo bazwa kulindime akutalika kutobela mituni yabo iisesemya.”’+

6 “Aboobo kobaambila bamuŋanda ya Israyeli kuti, ‘Mboobu mbwaamba Mwami Singuzuzyoonse Jehova: “Amupiluke, amuzwe kumituni yanu iisesemya akufwutatila micito yanu yoonse iisesemya.+ 7 Nkaambo ikuti muna Israyeli uuli woonse naa muzwakule uukkala mu Israyeli walizandula kulindime alimwi wakanza kutobela mituni yakwe iisesemya akubikka cilebyo cipa bantu kubisya, kumane waboola kuzoobuzya makani kumusinsimi,+ mebo lwangu nde Jehova, ndime ndiyoomuvwiila. 8 Ndiyoomulanga cabukali muntu ooyo akumupa kuba citondezyo cakucenjezya alimwi akasimpi kamasendekela, alimwi ndiyoomunyonyoona akati kabantu bangu;+ eelyo nywebo muyoozyiba kuti ndime Jehova.”’

9 “‘Pele ikuti musinsimi wafwubaala akupa bwiinguzi, nkokuti mebo nde Jehova ndime ndamupa kuti afwubaale musinsimi ooyo.+ Eelyo ndiyootandabika janza lyangu kulinguwe akumunyonyoona akati kabantu bangu bana Israyeli. 10 Mulandu wabo uyooba amitwe yabo; mulandu wayooyo uubuzya unooli buyo mbuli mulandu wamusinsimi, 11 kutegwa ibamuŋanda ya Israyeli bakaleke kuleya kuzwa kulindime alimwi bakacileke kulisofwaazya azinyonyoono zyabo zyoonse. Eelyo bayooba bantu bangu ambebo ndiyooba Leza wabo,’+ mbwaamba Mwami Singuzuzyoonse Jehova.”

12 Ijwi lya Jehova lyakandisikila alimwi kaliti: 13 “Omwanaamuntu, ikuti cisi candibisyila kwiinda mukutasyomeka, ndiyootandabika janza lyangu kulincico akunyonyoona zyakulya zyancico,+ ndiyoocitumina nzala akunyonyoona bantu+ alimwi abanyama bali mumo.”+ 14 “‘Nokuba kuti baalumi aaba botatwe baliko mulincico, nkokuti Nowa,+ Daniele+ a Jobu,+ nobalifwutula buyo lwabo beni akaambo kabululami bwabo,’+ mbwaamba Mwami Singuzuzyoonse Jehova.”

15 “‘Alimwi ikuti ndainzya banyama bakali bamusyokwe mucisi eeci, eelyo baluma bantu bakkala mumo akubamana mpoonya cisi caba matongo aataindwi muntu naba omwe akaambo kabanyama bamusyokwe,+ 16 masimpe, mebo mbondili muumi,’ mbwaamba Mwami Singuzuzyoonse Jehova, ‘nokuba kuti baalumi aaba botatwe baliko mulincico, nobatakonzya kubafwutula nobaba bana babo basankwa naa basimbi; nobalifwutula buyo lwabo beni, eelyo cisi eeci nocaba matongo.’”

17 “‘Alimwi ikuti ndaleta panga kucisi+ eeci akwaamba kuti: “Ipanga aliinde mucisi eeci,” akujaya bantu abanyama,+ 18 nokuba kuti baalumi aaba botatwe baliko mulincico, masimpe, mebo mbondili muumi,’ mbwaamba Mwami Singuzuzyoonse Jehova, ‘nobatakonzya kubafwutula nobaba bana babo basankwa naa basimbi; nobalifwutula buyo lwabo beni.’”

19 “‘Alimwi ikuti cisi eeci+ ndacitumina cilwazi akucitila bukali bwangu akutila bulowa mulincico kuti ndinyonyoone bantu abanyama bali mumo, 20 nokuba kuti Nowa,+ Daniele+ a Jobu+ baliko mulincico, masimpe, mebo mbondili muumi,’ mbwaamba Mwami Singuzuzyoonse Jehova, ‘nobatakonzya kubafwutula nobaba bana babo basankwa naa basimbi; nobalifwutula buyo lwabo beni akaambo kabululami bwabo.’”+

21 “Aboobo mboobu mbwaamba Mwami Singuzuzyoonse Jehova: ‘Oobu mbociyooba ndaakutumina Jerusalemu zisubulo* zyone eezyi:+ panga, nzala, banyama bakali bamusyokwe alimwi acilwazi,+ kuti zinyonyoone bantu alimwi abanyama bali mumo.+ 22 Nokuba boobo, bantu bamwi ibayoosyaala mumo bayootija akugusyigwa anze aamunzi,+ ibana basankwa abasimbi. Bayooboola kulindinywe, eelyo nywebo mwaakubona nzila zyabo amicito yabo, masimpe muyakuumbulizyigwa kumapenzi ngondakaletela Jerusalemu azintu zyoonse nzyondakacita kulinguwo.’”

23 “‘Bayoomuumbulizya mwaakubona nzila zyabo amicito yabo, eelyo muyoozyiba kuti eeco ncondakacita kulinguwo tiindakacicita buyo kakunyina kaambo,’+ mbwaamba Mwami Singuzuzyoonse Jehova.”

15 Alimwi ijwi lya Jehova lyakandisikila kaliti: 2 “Omwanaamuntu, ino cikuni icizwa kucisamu camusaansa ciindene buti azyeezyo zizwa kuzisamu zimbi naa amitabi yazisamu zyamusyokwe? 3 Sena cikuni cizwa kulincico cilakonzya kubelesyegwa mulimo uuli woonse? Sena bantu balakonzya kucibelesya kupanga ngobyo yakwaanzikila zibelesyo? 4 Bona! Tee kayi cilafwuswa mumulilo kuti uyake, mpoonya mulilo ulacuumpa cakumaninina kumpela akusyule, eelyo mpocili akati ucuumpa buyo asyoonto. Sena lino cicilaamulimo uuli woonse? 5 Noliba leelyo nocakkwene, tiicali kukonzya kubelesyegwa mulimo uuli woonse. Eelo kaka camanina limwi mulimo eelyo mulilo nowacuumpa cakumaninina aleelyo nowacuumpa buyo asyoonto!”

6 “Aboobo, mboobu mbwaamba Mwami Singuzuzyoonse Jehova: ‘Mbubonya mbuli cikuni cizwa kucisamu camusaansa akati kazisamu zyamusyokwe, eeco ncondapa kuti cibe nkuni yakukunkizya mulilo, mbombubo mbondiyoocitila bantu bakkala mu Jerusalemu.+ 7 Ndilibalangide cabukali. Bautija mulilo, pele mulilo uyoobaumpa cakumaninina. Aboobo nywebo muyoozyiba kuti ndime Jehova, ciindi ndaakubalanga cabukali.’”+

8 “‘Ndiyoopa kuti cisi eeci cibe matongo+ akaambo kakuti tiibasyomeka pe,’+ mbwaamba Mwami Singuzuzyoonse Jehova.”

16 Ijwi lya Jehova lyakandisikila alimwi kaliti: 2 “Omwanaamuntu, komuzyibya Jerusalemu micito yakwe iisesemya.+ 3 Umwaambile kuti, ‘Mboobu mbwaamba Mwami Singuzuzyoonse Jehova kuli Jerusalemu: “Wakazwa kucisi cabana Kanana alimwi ooko nkookazyalilwa. Bauso bakali bana Amori,+ alimwi banyoko bakali bana Hiti.+ 4 Lino kujatikizya kuzyalwa kwako, mubuzuba mbookazyalwa lukombokombo lwako tiilwakakosolwa pe, tonookasanzyigwa amaanzi kuti usalale, kunyina nookacumbwa amunyo, alimwi tonookavwungailwa mumilembo. 5 Kunyina naba omwe wakakufwida luzyalo kuti akucitile zintu eezyi. Kunyina naba omwe wakakufwida lubomba. Muciindi caboobo, wakasowelwa buyo atuba musyokwe akaambo kakuti tonookali kuyandwa pe mubuzuba oobo mbookazyalwa.

6 “‘“Nindakali kwiinda, ndakakubona koile kupazaya mubulowa bwako, eelyo ciindi nookalede mubulowa bwako, ndakati: ‘Kozumanana kupona!’ Inzya, ndakakwaambila kolede okuya mubulowa bwako kuti: ‘Kozumanana kupona!’ 7 Ndakakupa kuba nkamu mpati kapati, mbuli zintu zimena musyokwe, wakakomena akusumpuka alimwi wakasama zilisakatizyo ziinda kubota. Inkolo zyako zyakasongola alimwi masusu aako akalampa; pele wakacili mantanda, tonookasamide pe.”’

8 “‘Nindakainda alimwi, ndakakubona, ndakabona kuti wakomena, wasika aciimo cakukwatwa. Aboobo ndakakuvwumba cisani cangu+ akuvwumba mantanda aako akukonka alimwi akupanga cizuminano anduwe,’ mbwaamba Mwami Singuzuzyoonse Jehova, ‘eelyo yebo wakaba wangu. 9 Kuyungizya waawo, ndakakusanzya amaanzi akukusukuluzya bulowa bwako alimwi akukunanika mafwuta.+ 10 Mpoonya ndakakusamika cisani cisumidwe kabotu akukupa mpato zyacikutu zibotu* akukuzambaila mulembo mubotu muuba-uba alimwi akukusamika zisani zidula kapati. 11 Ndakakubotezya azilisakatizyo akukusamika nkaya kumaanza alimwi abulungu munsingo. 12 Kuyungizya waawo, ndakakubikka ninga kumpemo, akukusamika masikkiyo kumatwi, alimwi amusini mubotu kumutwe. 13 Wakazumanana kulisakatizya ngolida ansiliva, alimwi wakali kusama zisani zibotu zyuuba-uba, milembo iidula, alimwi azisani zisumidwe kabotu. Wakali kulya zyakulya zipangidwe afulaulu mubotu kapati, buci amafwuta, eelyo wakakomena akubota kapati,+ alimwi wakasika mpoelela kuba namalelo.’”

14 “‘Mpuwo* yako yakatalika kumwaika akati kamasi+ akaambo kabweebesi bwako, nkaambo bwakali bubotu kapati akaambo kakuti ndakabikka bweebesi bwangu alinduwe,’+ mbwaamba Mwami Singuzuzyoonse Jehova.”

15 “‘Pele wakatalika kusyoma bweebesi bwako+ alimwi wakaba muvwuule akaambo kampuwo yako.+ Kakunyina akulisenda wakali kucita buvwuule amwaalumi uuli woonse iwakali kwiinda,+ eelyo bweebesi bwako bwakaba bwakwe. 16 Wakabweza zisani zyako zimwi akupanga twaanda twakukombela twamabala-mabala oomo mookali kucitila buvwuule+—izintu zili boobu tazyeelede kubako nokuba kucitika naaceya. 17 Alimwi wakabweza zilisakatizyo zibotu kapati eezyo nzyondakakupede izyakapangwa angolida alimwi ansiliva akulipangila zikozyanyo zyabasankwa* akucita buvwuule anzizyo.+ 18 Wakabweza zisani zyako zisumidwe kabotu akuzivwumba,* alimwi wakazipa mafwuta aangu alimwi atununkilizyo twangu.+ 19 Alimwi cinkwa ncondakakupede—icakapangidwe afulaulu mubotu kapati, mafwuta alimwi abuci kuti kolya—acalo wakacituula kulinzizyo kacili bweema bubotu alimwi bununkilila.+ Ncobeni eeci ncecakacitika,’ mbwaamba Mwami Singuzuzyoonse Jehova.”

20 “‘Wakabweza bana bako basankwa abasimbi mbookandizyalila+ akubapaizya kumituni kuti ibalye+—aboobo, sena micito yako yabuvwuule tiiyaindila kuvwula na? 21 Wakajaya bana bangu, akubatuula kabali zipaizyo kwiinda mukubaumpa* mumulilo.+ 22 Nookali kucita zintu zyoonse zisesemya alimwi amicito yabuvwuule, tonookaayeeya pe mazuba aako aakubwana ciindi nookali mantanda, kotasamide, kopazaya mubulowa bwako. 23 Maawe! Maawe kulinduwe!+ Akaambo kabubi bwako boonse oobu,’ mbwaamba Mwami Singuzuzyoonse Jehova. 24 ‘Wakaliyakila cibumbili cabulongo akulipangila twaanda twakukombela mumabuwa oonse aabuleya. 25 Kumasena oonse aadumide aamumigwagwa yoonse wakaliyakila twaanda twakukombela, alimwi wakasandula bweebesi bwako kuba cintu cisesemya kwiinda mukulipa omwini* kumwaalumi uuli woonse wakali kwiinda+ eelyo wakavwuzya micito yako yabuvwuule.+ 26 Wakacita buvwuule abana basankwa babana Egepita,+ basimukobonyoko bajisi luunyaunya lutaambiki,* eelyo wakandinyemya amicito yako yabuvwuule iitakonzyi kubalwa. 27 Aboobo lino ndilatandabika janza lyangu kuti ndikuume akucesya caabilo cako cazyakulya+ alimwi akukwaaba mumaanza aabamakaintu batakuyandi kuti bakucite kufwumbwa ncobayanda,+ inzya mumaanza aabana basimbi baba Filisiti aabo bakasesemwa akaambo kamicito yako iitondwa.+

28 “‘Akaambo kakuti tonookakkuta, alimwi wakacita buvwuule abana basankwa babana Asuri,+ pele noliba leelyo nookamana kuvwuula ambabo tonookakkuta pe. 29 Aboobo wakavwuzya buvwuule bwako kucisi cabasimakwebo* alimwi akubana Kasidi,+ pele noliba leelyo tonookakkuta pe. 30 Eelo kaka moyo wako wakalicisidwe,’* mbwaamba Mwami Singuzuzyoonse Jehova, ‘eelyo nookali kucita zintu eezyi zyoonse, kocita mbuli muvwuule uutalisendi!+ 31 Pele nookali kuyaka cibumbili kubusena budumide bwamumigwagwa yoonse alimwi akupanga twaanda twako twakukombela mumabuwa oonse aabuleya, yebo tonookali mbuli muvwuule pe, nkaambo wakali kukaka kubbadelwa. 32 Uli mukaintu simamambe uubweza beenzu muciindi cakubweza mulumaakwe uutamuumyi musako!+ 33 Bantu mbabapa bavwuule boonse zipego,+ pele yebo nduwe oopa bantu boonse bakunyomenena zipego,+ alimwi ulabapa cisinkamulomo kutegwa baboole kulinduwe kuzwa kumasena oonse aakuzingulukide kuti bazoocite buvwuule.+ 34 Yebo uliindene abamakaintu bambi ibacita buvwuule. Kunyina naba omwe uucita buvwuule munzila njobucita yebo! Yebo nduwe uubbadela basankwa pele balo tabakubbadeli pe. Nzila njobelesya iliindene.’

35 “Aboobo, yebo omuvwuule+ komvwa jwi lya Jehova. 36 Mboobu mbwaamba Mwami Singuzuzyoonse Jehova: ‘Akaambo kakuti luunyaunya lwako lwatilwa alimwi mantanda aako alibonya ciindi nooli kuvwuula abasyamwali bako alimwi azintu zyoonse zisesemya, mituni iisesemya,*+ eeyo njooli kutuulila nobuba bulowa bwabana bako,+ 37 nkokuti ndilababunganya basyamwali bako boonse aabo mbooli kukondelezya, boonse aabo mbooli kuyanda antoomwe abaabo mbootali kuyanda. Ndilababunganya kuti bakulwane kumabazu oonse alimwi ndilakusamununa kutegwa bakubonene, eelyo balakubona koli mantanda mbubonya mbookazyalwa.+

38 “‘Alimwi ndilakusubula alubeta lweelede ndobapegwa bamakaintu basimamambe+ alimwi abamakaintu batila bulowa,+ alimwi bulowa bwako bulatilwa cabukali alimwi cabuzuba.+ 39 Ndilakwaaba mumaanza aabo, eelyo balamwaya zibumbili zyako akumwaya twaanda twako twakukombela;+ balakusamununa zisani zyako+ akubweza zilisakatizyo zyako+ zibotu akukusiya mantanda, kotasamide. 40 Balakuletela nkamu yabantu+ kuti bakulwane eelyo balakupwaya mabwe+ akukujaya amapanga aabo.+ 41 Balaaumpa maanda aako amulilo+ akukupa cisubulo kabalangilila bamakaintu banji; aboobo ndilabumana buvwuule bwako+ alimwi yebo ulaleka kubbadela. 42 Bukali bwangu bulamanina aalinduwe,+ alimwi ndilaleka kunyema akaambo kanduwe;+ ndilatontozya moyo wangu alimwi ndilaleka kubijilwa.’

43 “‘Akaambo kakuti tonookaayeeya mazuba aako aakubwana+ alimwi wandinyemya kwiinda mukucita zintu eezyi zyoonse, nkokuti lino ndilabikka mpindu yanzila zyako amutwe wako,’ mbwaamba Mwami Singuzuzyoonse Jehova, ‘aboobo tokoocita limbi micito yako iitondwa alimwi amicito yako yoonse iisesemya.

44 “‘Bona! Kufwumbwa muntu uubelesya twaambyo ulabelesya kaambyo aaka kulinduwe kakuti: “Cinyina-nyina amwana wakacitoleela!”+ 45 Yebo uli mwana musimbi wabanyoko aabo bakasampaula mulumi wabo alimwi abana babo. Alimwi uli buyo mbuli banabokwanu basimbi aabo bakasampaula balumi babo abana babo. Banyoko bakali bana Hiti, mpoonya bauso bakali bana Amori.’”+

46 “‘Mupati wako musimbi ngu Samariya,+ ooyo uukkala abana bakwe basimbi*+ kunyika,* eelyo musyoonto wako musimbi, ooyo uukkala kumusanza,* ngu Sodoma+ antoomwe abana bakwe basimbi.+ 47 Yebo tonookeenda buyo munzila zyabo alimwi akutobela micito yabo iisesemya, pele alimwi muciindi cisyoonto buyo wakabisya kapati kwiinda mbabo mumicito yako yoonse.+ 48 Masimpe, mebo mbondili muumi,’ mbwaamba Mwami Singuzuzyoonse Jehova, ‘Mwanookwanu Sodoma antoomwe abana bakwe basimbi tiibacita ncoocita yebo abana bako basimbi. 49 Bona! Nceeci cibi ncaakacita Sodoma mwanookwanu: Walo abana bakwe basimbi+ bakali kulidunda,+ bakalijisi zyakulya zinji,+ alimwi bakaliliibide;+ nokuba boobo tiibakali kugwasya bantu bapengede abacete.+ 50 Bakazumanana kulisumpula+ akucita zintu zisesemya mumeso aangu,+ cakuti ndakabona kuti beelede kutandwa.+

51 “‘Alimwi Samariya+ tanaakacita nociba cisela cazibi nzyookacita. Yebo wakazumanana kuvwuzya micito yako iisesemya kwiinda mbabo, cakuti banabokwanu basimbi bakalibonya kuti baliluleme kapati kwiinda nduwe akaambo kamicito yako yoonse iisesemya.+ 52 Aboobo, lino weelede kunyamuna masampu aako akaambo kakuti walulamika micito yabanabokwanu basimbi. Akaambo kacibi cako ncoocita kwiinda mukucita zintu zisesemya kapati kwiinda mbabo, nkokuti balo baliluleme kapati kwiinda nduwe. Aboobo lino, kofwa nsoni akunyamuna masampu aapa kuti banabokwanu baboneke kululama kukwiinda.’

53 “‘Alimwi ndiyoobunganya bantu babo baangidwe, bantu baangidwe ba Sodoma abana bakwe basimbi, abantu baangidwe ba Samariya abana bakwe basimbi; kuyungizya waawo ndiyoobunganya bantu bako baangidwe antoomwe ambabo,+ 54 kutegwa ukanyamune masampu aako; aboobo yebo uyoofwa nsoni akaambo kancoocita kwiinda mukubaumbulizya. 55 Banabokwanu basimbi, nkokuti Sodoma abana bakwe basimbi bayoopiluka mubukkale bwabo bwakaindi, awalo Samariya abana bakwe basimbi bayoopiluka mubukkale bwabo bwakaindi, eelyo yebo abana bako basimbi muyoopiluka mubukkale bwanu bwakaindi.+ 56 Mwanookwanu Sodoma tanaakali kweelela kuti yebo komwaamba ibuzuba nookali kulidunda, 57 ibubi bwako kabutanayubununwa.+ Lino bana basimbi ba Siriya abasimukobonyina balakusampaula, abalo bana basimbi ba Filisiti,+ aabo boonse bakuzingulukide, balakufwubaazya. 58 Yebo uyootambula mpindu yamicito yako iitondwa alimwi amicito yako iisesemya,’ mbwaamba Jehova.”

59 “Aboobo mboobu mbwaamba Mwami Singuzuzyoonse Jehova: ‘Lino ndilakucitila kweelana amboocita,+ nkaambo wasampaula cikonke kwiinda mukujaya cizuminano cangu.+ 60 Nokuba boobo mebo lwangu ndilaciyeeya cizuminano ncindakapangana anduwe mumazuba aako aakubwana, eelyo ndilapangana anduwe cizuminano citamani.+ 61 Waakubatambula banabokwanu basimbi aabo bapati abaniini,+ uyooyeeya mbowakali kulilemeka eelyo uyoofwa nsoni, alimwi mebo ndiyookupa mbabo kuti babe bana bako basimbi, pele ikutali akaambo kacizuminano cako.’

62 “‘Alimwi mebo lwangu ndiyoopangana cizuminano anduwe; eelyo uyoozyiba kuti ndime Jehova. 63 Mpoonya uyooyeeya akufwa nsoni kapati cakuti ciyookwaalila akujalula mulomo wako akaambo kamasampu aanookujisi,+ ciindi nondiyoomanya milandu yako, kunyina makani azintu zyoonse nzyoocita,’+ mbwaamba Mwami Singuzuzyoonse Jehova.”

17 Alimwi ijwi lya Jehova lyakandisikila kaliti: 2 “Omwanaamuntu, kolabika kalabi akwaamba kaambyo kujatikizya ŋanda ya Israyeli.+ 3 Waambe kuti, ‘Mboobu mbwaamba Mwami Singuzuzyoonse Jehova: “Sikwaze imupati,+ uujisi mababa mapati, minimba milamfwu, amapepe manji aamabala-mabala, wakaboola ku Lebano+ akutyola kampeleengwe kacisamu cakkedari.+ 4 Wakatyola kasyuukila kali atala kwiinda tusyuukila toonse akukaleta kucisi cabasimakwebo,* kumane wakakasimpa mumunzi wabasimakwebo.+ 5 Mpoonya wakabweza mbuto imwi yamucisi+ akwiisyanga mumuunda uujisi bulongo bubotu. Wakaisyanga kuti ikomene mbuli cisamu camukumbuzu cili kumbali amaanzi manji. 6 Aboobo yakamena akuba musaansa mufwaafwi, uuyandalala,+ uujisi matuvwu aalangide mukati, alimwi miyanda yanguwo yakali kukomena kunsi. Eelyo mbuto yakaba musaansa akuba azisyuukila ayalo mitabi yakalampa.+

7 “‘“Eelyo kwakaboola sikwaze uumbi mupati+ iwakajisi mababa mapati aminimba mipati.+ Mpoonya cakuyandisisya musaansa ooyu wakayandalazya miyanda yanguwo kuli sikwaze ooyu, kuzwa mumibundu yamuunda oomo mowakasyangidwe, alimwi wakatandabika matuvwu aanguwo kulinguwe ikutegwa kautilaila.+ 8 Wakalisyangidwe kale mumuunda mubotu munsi-munsi amaanzi manji, ikutegwa ube amitabi, uzyale micelo alimwi akuba musaansa mupati.”’+

9 “Waambe kuti, ‘Mboobu mbwaamba Mwami Singuzuzyoonse Jehova: “Sena ulakomena kabotu? Sena kunyina muntu uutiizyule miyanda yanguwo,+ kupa kuti micelo yanguwo ibole, akupa kuti zisyuukila zyanguwo zinete?+ Ulayuma cakuti takukayandiki janza lyanguzu naa bantu banji kuti bauzyule amiyanda yanguwo. 10 Nokuba kuti wasimpulwa akusimpwa kumbi, sena ulakomena kabotu? Sena taukoyumina limwi muwo wakujwe waunga alinguwo? Ulayuma mumubundu wamuunda mumonya mowakamenena.”’”

11 Alimwi ijwi lya Jehova lyakandisikila kaliti: 12 “Ndalomba kobaambila bamuŋanda yabazangi kuti, ‘Sena mulizyi zintu eezyi ncozyaamba?’ Waambe kuti, ‘Amubone! Mwami wa Babuloni wakaboola kumunzi wa Jerusalemu akubweza mwami abasilutwe banguwo akubatolelezya ku Babuloni.+ 13 Kunze lyaboobo, wakabweza mwana umwi wamwami+ akupanga cizuminano anguwe akumupa kuti akonke.+ Mpoonya wakatolelezya abaalumi bakajisi mpuwo mucisi,+ 14 kutegwa bwami buzundwe, butacikonzyi kubuka alimwi, akuti buzumanane kubako lilikke buyo kwiinda mukubamba cizuminano cakwe.+ 15 Pele mwami wakamuzangila+ kwiinda mukutuma batumwa bakwe ku Egepita kuti bakabweze mabbiza+ ampi yabasikalumamba mpati.+ Sena ulazwidilila? Sena ooyo uucita zintu eezyi uyoocitija cisubulo? Sena inga watyola cizuminano alimwi akucikonzya kutija?’+

16 “‘“Masimpe mebo mbondili muumi,” mbwaamba Mwami Singuzuzyoonse Jehova, “uyoofwida ku Babuloni, mubusena oomo imukkala mwami* ooyo iwakamubikka* kuba mwami, ooyo uuli acikonke ncaakasampaula acizuminano ncaakatyola.+ 17 Aboobo impi yabasikalumamba mpati alimwi abasikalumamba ba Farao ibanji kapati tabakamugwasyi pe munkondo,+ ciindi kwaakulundikwa zisinkilizyo alimwi kwaakuyakwa malambo aakusinkilizya kutegwa banyonyoone bantu banji. 18 Wacisampaula cikonke akutyola cizuminano. Nokuba kuti wakasyomezya, wazicita zintu eezyi zyoonse, aboobo takatiji pe.”’

19 “‘Aboobo mboobu mbwaamba Mwami Singuzuzyoonse Jehova: “Masimpe mebo mbondili muumi, ndiyoomuletela mpindu yakusampaula cikonke cangu akutyola cizuminano cangu+ amutwe wakwe. 20 Ndiyoomuvwumba lunsabwe lwangu, eelyo uyoojatwa mulunsabwe lwangu lwakuvwimya.+ Ndiyoomutola ku Babuloni akutolana anguwe kulubeta okuya akaambo kakutasyomeka kwakwe kulindime.+ 21 Basikwiingaila boonse akati kabasikalumamba bakwe bayoojaigwa apanga, eelyo aabo bayoosyaala bayoomwaigwa kumabazu oonse.+ Mpoonya muyoozyiba kuti mebo lwangu, nde Jehova, ndime ndakaamba.”’+

22 “‘Mboobu mbwaamba Mwami Singuzuzyoonse Jehova: “Ndiyoobweza kasyuukila kuzwa atala aacisamu cilamfwu cakkedari+ akukasimpa, ndiyootyola kasyuukila kateteete kuzwa kumpela aatutabi twancico,+ eelyo mebo lwangu ndiyookasimpa atala aacilundu cilamfwu alimwi cipati.+ 23 Ndiyookasimpa acilundu cilamfwu ca Israyeli; mitabi yankako iyookomena, eelyo kayoozyala micelo akuba cisamu cakkedari cipati kapati. Mpoonya bayuni bamisyobo yoonse bayookkala munsi lyancico, alimwi banookkala mucimvwule camatuvwu aancico. 24 Eelyo zisamu zyoonse zyamusyokwe ziyoozyiba kuti mebo lwangu, nde Jehova, ndime ndaciwisya cisamu cilamfwu alimwi akusumpula cisamu cifwaafwi;+ ndime ndapa kuti cisamu citete ciyume akupa kuti cisamu ciyumu cisyuuke.+ Mebo lwangu, nde Jehova, ndime ndaamba alimwi ndacicita.”’”

18 Alimwi ijwi lya Jehova lyakandisikila kaliti: 2 “Ino kaamba nzi kaambyo aaka nkomubelesya mucisi ca Israyeli kakuti, ‘Bamatata mbabalya misaansa iisakamuka, pele meno aabana babo ngaaba abunyeele’?*+

3 “‘Masimpe mebo mbondili muumi,’ mbwaamba Mwami Singuzuzyoonse Jehova, ‘tamukoozumanana kukabelesya kaambyo aaka mu Israyeli. 4 Amubone! Maumi oonse ngaangu. Buumi bwausyi abuumi bwamwana, boonse buyo mbubwangu. Muntu ooyo uubisya ngonguwe uuyoofwa.

5 “‘Atwaambe kuti kuli muntu uululeme, uucita cintu ciluleme alimwi ciluzi. 6 Talyi zipaizyo zituulilwa mituni kumalundu;+ tasyomi mituni iisesemya* yamuŋanda ya Israyeli; tasofwaazyi mukamuntu+ naa koonana amukaintu uuli kumwezi;+ 7 tapenzyi muntu uuli woonse,+ pele ulapilusya cintu sikukweleta ncaakamupa kacili cisyomezyo;+ tabbidi muntu uuli woonse,+ pele ulabweza cakulya cakwe akupa muntu uufwide nzala+ alimwi akumusamika cisani+ muntu uuli mantanda; 8 tabbadelesyi cinyonamucila naa kucita kaloba,+ pele ulalikasya kukucita zintu zitaluleme;+ ulabeteka kabotu kaambo kamuntu umwi amweenzinyina;+ 9 alimwi ulazumanana kweenda mumilawo yangu akutobela mbeta zyangu kutegwa kasyomeka. Muntu uuli boobu mululami, alimwi masimpe uyoozumanana kupona,’+ mbwaamba Mwami Singuzuzyoonse Jehova.

10 “‘Pele ikuti wazyala mwana mubbi,+ mujayi,*+ naa uucita cintu cimwi akati kazintu eezyi 11 (nokuba kuti bausyi tabaciti cintu cili coonse akati kazintu eezyi)—ulalya zipaizyo zituulilwa mituni kumalundu, ulasofwaazya mukamuntu, 12 ulapenzya bantu bapengede alimwi abacete,+ ulabba, tapilusyi cintu ncaakapegwa kacili cisyomezyo cakubbadela cikwelete, usyoma mituni iisesemya,+ ucita zintu zisesemya,+ 13 ulacita kaloba alimwi akubbadelesya cinyonamucila,+ nkokuti mwana ooyo takoozumanana kupona pe. Ncobeni uyoojaigwa akaambo kazintu eezyi zyoonse zisesemya nzyaacita. Bulowa bwakwe buli amutwe wakwe mwini.

14 “‘Lino atwaambe kuti kuli muntu uujisi mwana ooyo uubona zibi zyoonse nzyobacita bausyi, pesi walo nokuba kuti ulazibona, taziciti zintu eezyi. 15 Talyi zipaizyo zituulilwa mituni kumalundu; tasyomi mituni iisesemya yamuŋanda ya Israyeli; tasofwaazyi mukamuntu; 16 tapenzyi muntu uuli woonse; tabwezi cintu ncapegwa kacili cisyomezyo cakubbadela cikwelete; tabbi cintu cili coonse; ulabweza cakulya cakwe akupa muntu uufwide nzala alimwi akumusamika cisani muntu uuli mantanda; 17 ulalikasya kupenzya bacete; taciti kaloba naa kubbadelesya cinyonamucila; alimwi ulacita mbeta zyangu akweenda mumilawo yangu. Muntu uuli boobu takafwi pe akaambo kazinyonyoono zyabausyi. Ncobeni uyoozumanana kupona. 18 Pele akaambo kakuti bausyi bakali kuunina bamwi, bakabbida mwanookwabo alimwi bakali kucita zintu zibi akati kabanabokwabo, bayoofwa akaambo kazinyonyoono zyabo.

19 “‘Pele nywebo muyoobuzya kuti: “Ino nkaambo nzi mwana ncaatapegwa mulandu akaambo kazinyonyoono zyabausyi?” Mbokunga mwana wacita cintu ciluzi alimwi ciluleme, wazumanana kutobela milawo yangu yoonse alimwi akwiibamba, nkokuti ncobeni uyoozumanana kupona.+ 20 Muntu ooyo uubisya ngonguwe uuyoofwa.+ Mwana takapegwi mulandu akaambo kazinyonyoono zyabausyi pe, abalo bausyi tabakapegwi mulandu akaambo kazinyonyoono zyamwanaabo. Bululami bwamululami buyoobalilwa kulinguwe alikke, abwalo bubi bwamubi buyoobalilwa kulinguwe alikke.+

21 “‘Lino ikuti muntu mubi wazileka zibi zyoonse nzyaalikucita akutobela milawo yangu alimwi akucita cintu ciluzi alimwi ciluleme, nkokuti ncobeni walo ulazumanana kupona. Takafwi pe.+ 22 Kunyina cibi nociba comwe ncaacita ncatiipedwe mulandu.*+ Ulazumanana kupona akaambo kakuti ucita cintu ciluleme.’+

23 “‘Sena mebo ndilalukkomanina naaceya lufwu lwamuntu mubi?’+ mbwaamba Mwami Singuzuzyoonse Jehova. ‘Sena ncendiyanda tacili cakuti aleke nzila zyakwe akuzumanana kupona?’+

24 “‘Pele kuti mululami wabuleka bululami bwakwe akutalika kucita zintu zitaluleme, kacita zintu zyoonse zisesemya nzyobacita bantu babi, sena uyoopona? Kunyina mulimo nouba omwe uuyooyeeyegwa+ akati kamilimo iiluleme njaakacita. Uyoofwa akaambo kakutasyomeka kwakwe alimwi acibi ncaacita.+

25 “‘Pele nywebo muyakwaamba kuti: “Nzila ya Jehova tiiluleme pe.”+ Akaka amuswiilile nywebo nobamuŋanda ya Israyeli! Sena nzila yangu njiitaluleme?+ Sena tazili nzila zyanu zitaluleme?+

26 “‘Ikuti mululami wabuleka bululami bwakwe akutalika kucita zintu zitaluleme mpoonya wafwa akaambo kakucita boobo, ulafwa akaambo kabubi mbwaacita walo mwini.

27 “‘Awalo muntu mubi kuti wabuleka bubi bwakwe mbwaacita akutalika kucita cintu ciluleme alimwi ciluzi, ulafwutula buumi bwakwe mwini.+ 28 Kuti waliyeeya akuzileka zinyonyoono zyoonse nzyaacita, ncobeni uyoozumanana kupona. Takafwi pe.

29 “‘Pele bamuŋanda ya Israyeli bayakwaamba kuti: “Nzila ya Jehova tiiluleme pe.” Sena mubwini ninzila zyangu zitaluleme, nywebo nobamuŋanda ya Israyeli?+ Sena tazili nzila zyanu zitaluleme?’

30 “‘Aboobo nywebo nobamuŋanda ya Israyeli, umwi aumwi wanu ndilamubeteka kweelana anzila zyakwe,’+ mbwaamba Mwami Singuzuzyoonse Jehova. ‘Amuzwe, inzya amumaninine kuzwa kuzinyonyoono zyanu zyoonse, kutegwa zitamubedi cilebyo cimuletela mulandu. 31 Amusowe zinyonyoono zyoonse nzyomwacita,+ alimwi amulijanine moyo mupya amuuya mupya,+ nkaambo nzi ncomuyanda kufwida,+ nywebo nobamuŋanda ya Israyeli?’

32 “‘Mebo tandilukkomanini naaceya lufwu lwamuntu uuli woonse,’+ mbwaamba Mwami Singuzuzyoonse Jehova. ‘Aboobo amupiluke, muzumanane kupona.’”+

Bakali koona akati kabasyuumbwa bacili bana-bana ibajisi nguzu alimwi bakali kukomezya bana babo.

 3 Bakakomezya mwana omwe akati kabana babo, eelyo wakaba syuumbwa uujisi nguzu.+

 5 Banyina bakalindila, eelyo bakabona kuti kunyina bulangizi bwakuti ulajoka.

Aboobo bakabweza mwanaabo umbi akumutuma kuti aunke kali syuumbwa uucili mwana uujisi nguzu.

 6 Awalo wakali kweendeenda akati kabasyuumbwa alimwi wakaba syuumbwa uucili mwana uujisi nguzu.

Wakaiya kuzazaula munyama ngwaaluma, alimwi wakali kulya bantu.+

 9 Bakamukwelela mucisekwe andobyo, akumutola kumwami wa Babuloni.

Ookuya bakamujalila, kutegwa ijwi lyakwe litalimvwisyi limbi amalundu aa Israyeli.

10 Banyoko bakali mbuli cisamu camusaansa+ mubulowa bwako,* icisimpidwe kumbali aamaanzi.

Cakazyala micelo alimwi cakajisi mitabi minji kapati akaambo kamaanzi manji.

11 Cakaba amitabi miyumu, iyeelela kuba nkoli zyabaleli.

Mitabi yancico miyumu yakatyokooka akuyuma,+ eelyo mulilo wakayuumpa.+

“‘Oolu ndolwiimbo lwabuumba, alimwi lunooli lwiimbo lwabuumba.’”

20 Lino mumwaka waciloba, mumwezi wasanu, mubuzuba bwa 10 bwamwezi ooyu, bapati bamwi bamu Israyeli bakaboola akukkala kumbele lyangu kuti babuzye makani kuli Jehova. 2 Mpoonya ijwi lya Jehova lyakandisikila kaliti: 3 “Omwanaamuntu, kobandika abapati bamu Israyeli, ubaambile kuti, ‘Mboobu mbwaamba Mwami Singuzuzyoonse Jehova: “Sena mwaboola kuzoondibuzya? ‘Masimpe mebo mbondili muumi, tandikokuuvwiila mubuzyo wanu pe,’+ mbwaamba Mwami Singuzuzyoonse Jehova.”’

4 “Sena yebo ulilibambilide kubabeteka? Sena yebo omwanaamuntu ulilibambilide kubabeteka? Kobazyibya zintu zisesemya nzyobakacita bamausyi.+ 5 Kobaambila kuti, ‘Mboobu mbwaamba Mwami Singuzuzyoonse Jehova: “Ibuzuba nondakamusala Israyeli,+ ndakakonka* akubana bamuŋanda ya Jakobo, alimwi ndakalizyibya kulimbabo mucisi ca Egepita.+ Inzya, ndakakonka kulimbabo akwaamba kuti, ‘Ndime Jehova Leza wanu.’ 6 Mubuzuba oobo ndakakonka kuti ndiyoobagwisya mucisi ca Egepita akubatola kucisi ncondakabayandawida,* cisi cikunka buci amukupa.+ Eeci cakali cisi cibotu kapati kwiinda zisi zimbi zyoonse. 7 Kumane ndakabaambila kuti, ‘Umwi aumwi wanu weelede kuzisowa zintu zisesemya eezyo zili kumbele aameso aanu; mutalisofwaazyi amituni iisesemya* yamu Egepita.+ Ndime Jehova Leza wanu.’+

8 “‘“Pele bakandizangila, alimwi tiibakayanda kundiswiilila pe. Tiibakazisowa zintu zisesemya eezyo zyakali kumbele lyabo, alimwi tiibakaileka mituni iisesemya yamu Egepita.+ Aboobo ndakaamba kuti ndiyoobatila bukali bwangu, akubanyemena kapati mucisi ca Egepita. 9 Pele ndakabweza ntaamu akaambo kazina lyangu, kutegwa litasampaulwi kumasi aayo ngobakakkede limwi.+ Nkaambo mebo lwangu ndakalizyibya kulimbabo* kumbele lyamasi aaya nindakabagwisya* mucisi ca Egepita.+ 10 Aboobo ndakabagwisya mucisi ca Egepita akubatola munkanda.+

11 “‘“Mpoonya ndakabapa milawo yangu akubazyibya mbeta zyangu,+ kutegwa muntu uuzitobela abe abuumi kwiinda mulinzizyo.+ 12 Kuyungizya waawo ndakabapa masabata aangu+ kuti cibe citondezyo akati kandime ambabo,+ kutegwa bazyibe kuti mebo, nde Jehova, ndime ndibasalazya.

13 “‘“Pele bamuŋanda ya Israyeli bakandizangila munkanda.+ Tiibakeenda mumilawo yangu, alimwi bakakaka mbeta zyangu, eezyo zinga, ikuti muntu wazitobela ulaba abuumi kwiinda mulinzizyo. Bakaciindizya kusampaula masabata aangu. Aboobo ndakaamba kuti ndiyoobatila bukali bwangu munkanda kutegwa ndibamane kubanyonyoona.+ 14 Ndakabweza ntaamu akaambo kazina lyangu, kutegwa litasampaulwi kumasi aayo aakali kulangilila ciindi nindakabagusya.*+ 15 Alimwi ndakakonka kulimbabo munkanda kuti tandikabaleti mucisi ncindakabapede,+ cisi cikunka buci amukupa,+ cisi cibotu kapati kwiinda zisinyina zyoonse, 16 akaambo kakuti bakakaka mbeta zyangu, tiibakeenda mumilawo yangu, bakasampaula masabata aangu, nkaambo myoyo yabo yakali kutobela mituni yabo iisesemya.+

17 “‘“Pele bakandeetezya, aboobo tiindakabanyonyoona pe; tiindakabamana kubanyonyoona munkanda. 18 Ndakaambila bana babo munkanda+ kuti, ‘Tamweelede kweenda mumilawo yabamauso,+ nokuba kutobela mbeta zyabo naa kulisofwaazya amituni yabo iisesemya. 19 Ndime Jehova Leza wanu. Amweende mumilawo yangu, amutobele mbeta zyangu akuzicita.+ 20 Alimwi amusalazye masabata aangu,+ eelyo alaba citondezyo akati kandime andinywe, kutegwa muzyibe kuti ndime Jehova Leza wanu.’+

21 “‘“Pele bana aabo bakatalika kundizangila.+ Tiibakeenda mumilawo yangu alimwi tiibakatobela akucita mbeta zyangu, eezyo zinga, ikuti muntu wazitobela, ulaba abuumi kwiinda mulinzizyo. Bakasampaula masabata aangu. Aboobo ndakaamba kuti ndiyoobatila bukali bwangu, akubanyemena kapati munkanda.+ 22 Nokuba boobo ndakalijata+ akubweza ntaamu akaambo kazina lyangu,+ kutegwa litasampaulwi kumasi, aayo aakali kulangilila ciindi nindakabagusya.* 23 Alimwi ndakakonka kulimbabo munkanda kuti ndiyoobamwaya akati kamasi akubapalanganya muzisi,+ 24 akaambo kakuti tiibakacita mbeta zyangu, bakaikaka milawo yangu,+ bakasofwaazya masabata aangu, alimwi bakatobela* mituni iisesemya yabamausyi.+ 25 Aboobo andime ndakabaleka kuti batobele milawo iitali kabotu alimwi ambeta zyatakali kukonzya kubapa buumi.+ 26 Ndakabalekela kuti basofwaazyigwe azipaizyo zyabo, ciindi nobakabaumpa* mumulilo+ bana babo boonse bataanzi kuzyalwa, kutegwa banyonyoonwe, akuti bazyibe kuti ndime Jehova.”’

27 “Aboobo, yebo omwanaamuntu kobandika abamuŋanda ya Israyeli, ubaambile kuti, ‘Mboobu mbwaamba Mwami Singuzuzyoonse Jehova: “Munzila njimunya eeyi abalo bamauso bakandisampaula kwiinda mukutasyomeka kulindime. 28 Ndakabaleta mucisi ncondakakonka kuti ndiyoobapa.+ Nobakabona tulundu toonse tulamfwu azisamu zyoonse zifwefwema,+ bakatalika kutuula zipaizyo zyabo azituuzyo zyabo zinyemya. Bakatuula bweema bununkilila bwazipaizyo zyabo akutila zituuzyo zyabo zinyugwa nkomunya ooko. 29 Aboobo ndakababuzya kuti, ‘Ino busena oobu bwakukombela nkomuunka bwaamba nzi? (Asunu buciitwa kuti Busena Bwakukombela.*)’”’+

30 “Lino kobaambila bamuŋanda ya Israyeli kuti, ‘Mboobu mbwaamba Mwami Singuzuzyoonse Jehova: “Sena andinywe mulalisofwaazya mbubonya bwakacita bamauso kwiinda mukutobela mituni yabo iisesemya kuti mucite buvwuule bwakumuuya anjiyo?+ 31 Sena asunu mucilisofwaazya kwiinda mukutuula zipaizyo kumituni yanu yoonse iisesemya, nomuumpa* bana banu mumulilo?+ Aciindi nciconya eeci, sena mebo ndeelede kumuvwiila nywebo nobamuŋanda ya Israyeli?”’+

“‘Masimpe, mebo mbondili muumi,’ mbwaamba Mwami Singuzuzyoonse Jehova, ‘tandikoomuvwiila pe.+ 32 Alimwi eeco ncomuyeeya tacikacitiki pe, nomwaamba kuti, “Atube mbubonya mbuli masi aambi, mbuli misyobo yamuzisi zimbi, eeyo iikomba zisamu amabwe.”’”+

33 “‘Masimpe, mebo mbondili muumi,’ mbwaamba Mwami Singuzuzyoonse Jehova, ‘Ndilaba mwami wanu akumweendelezya ajanza lyanguzu, akuboko kutandabede, alimwi abukali bupati.+ 34 Ndilamugwisya akati kabantu akumubunganya kuzwa kuzisi ooko nkomwakamwailidwe, ajanza lyanguzu, akuboko kutandabikidwe alimwi abukali bupati.+ 35 Ndilamuleta munkanda yabantu bambi akumubeteka ooko cakaanzambwene.+

36 “‘Mbubonya mbondakababeteka bamauso munkanda yacisi ca Egepita, andinywe mbondiyoomubeteka,’ mbwaamba Mwami Singuzuzyoonse Jehova. 37 ‘Ndiyoomupa kwiinda kunsi aamusako wamweembezi+ akumupa kwaangwa acizuminano. 38 Nokuba boobo, akati kanu ndiyoogwisya bazangi alimwi abaabo bandibisyila.+ Nkaambo ndiyoobagwisya mucisi mobakkede kabali bamuzwakule, pele tabakanjili mucisi ca Israyeli;+ aboobo muyoozyiba kuti ndime Jehova.’

39 “Lino nywebo nobamuŋanda ya Israyeli, mboobu mbwaamba Mwami Singuzuzyoonse Jehova: ‘Umwi aumwi wanu kaya akabelekele mituni yakwe iisesemya.+ Pele kuzwa waawo, ikuti naa mutandiswiilili, tamukacikonzyi limbi kulisampaula zina lyangu lisalala kwiinda muzipaizyo zyanu alimwi amituni yanu iisesemya.’+

40 “‘Nkaambo kucilundu cangu cisalala, atala aacilundu cilamfwu ca Israyeli,’+ mbwaamba Mwami Singuzuzyoonse Jehova, ‘nkonkuko bamuŋanda ya Israyeli, boonse buyo, nkobayoondibelekela mucisi.+ Ookuya ndiyoobakkomanina alimwi ndiyoozitambula zyakusanga zyanu alimwi amicelo mitaanzi yazituuzyo zyanu, nkokuti zintu zyanu zyoonse zisalala.+ 41 Akaambo kabweema bununkilila, ndiyoomukkomanina ciindi nondiyoomugusya akati kabantu bambi akumubunganya kuzwa kuzisi zimbi ooko nkomwakamwailidwe;+ eelyo ndiyoolibonya kuti ndilasalala akati kanu mumeso aabantu bamasi.’+

42 “‘Eelyo muyoozyiba kuti ndime Jehova,+ ndaakumuleta mucisi ca Israyeli,+ inzya mucisi eeco ncondakakonka kuti ndiyoocipa bamauso. 43 Alimwi oomo muyoobuyeeya bukkale bwanu alimwi amicito yanu yoonse eeyo njomwakacita yakulisofwaazya,+ eelyo muyoolisesemwa nobeni akaambo kazintu zyoonse zibi nzyomwakacita.+ 44 Mpoonya muyoozyiba kuti ndime Jehova, eelyo ndaakumucitila boobo akaambo kazina lyangu,+ ikutali kweelana abukkale bwanu bubi naa kweelana amicito yanu yabumpelenge, nywebo nobamuŋanda ya Israyeli,’ mbwaamba Mwami Singuzuzyoonse Jehova.”

45 Alimwi ijwi lya Jehova lyakandisikila kaliti: 46 “Omwanaamuntu, kolanzya busyu bwako kucooko cakumusanza waambilizye majwi kumusanza, alimwi akusinsimina cisaka camusyokwe cakumusanza. 47 Ambila cisaka cakumusanza kuti, ‘Komvwa jwi lya Jehova. Mboobu mbwaamba Mwami Singuzuzyoonse Jehova: “Bona ndilakuyasyila mulilo uuvwilima,+ eelyo ulaumpa zisamu zyoonse zitete azisamu zyoonse ziyumu mulinduwe. Mulilo ooyo uuvwilima taukazimwi pe, alimwi masyu oonse alaumpwa anguwo,+ kuzwa kumusanza kusikila kunyika. 48 Eelyo bantu boonse bayoobona kuti mebo lwangu nde Jehova ndime ndacidoneka cisaka, cakuti mulilo taukazimwi pe.”’”+

49 Mpoonya ndakaamba kuti: “Akaka, O Mwami Singuzuzyoonse Jehova! Bandaamba kuti, ‘Sena ooyu taambauli buyo mutulabi?’”

21 Alimwi ijwi lya Jehova lyakandisikila kaliti: 2 “Omwanaamuntu, kolanzya busyu bwako ku Jerusalemu, waambilizye makani mabi kumasena aasalala, alimwi usinsime makani mabi kucisi ca Israyeli. 3 Ambila cisi ca Israyeli kuti, ‘Mboobu mbwaamba Jehova: “Bona ndilakulwana, ndilasomona panga kuzwa mucikanda calyo+ eelyo mulinduwe ndilanyonyoona mululami amubi. 4 Akaambo kakuti mulinduwe ndilabanyonyoona balulami ababi, ipanga lyangu lilasomonwa mucikanda calyo kuti liyase bantu boonse, kuzwa kumusanza kusikila kunyika. 5 Bantu boonse bayoozyiba kuti mebo, nde Jehova, ndime ndalisomona panga kuzwa mucikanda calyo. Talikoopilusyigwa mulincico alimwi.”’+

6 “Lino yebo omwanaamuntu kotongela kumwi kokankama, inzya kotongela kapati kumbele lyabo.+ 7 Aboobo ikuti bakakubuzye kuti, ‘Ino nkaambo nzi ncotongela?’ Ukabaambile kuti, ‘Nkaambo kamulumbe.’ Nkaambo ncobeni uyooboola, eelyo myoyo yoonse iyooyaaya akaambo kakuyoowa, alimwi maanza oonse ayootontola, myuuya yoonse iyoobula nguzu, alimwi maanzi ayakweenda mumagondo oonse.*+ ‘Amubone! Uyooboola ncobeni—ciyoocitika,’ mbwaamba Mwami Singuzuzyoonse Jehova.”

8 Alimwi ijwi lya Jehova lyakandisikila kaliti: 9 “Omwanaamuntu, kosinsima, waambe kuti, ‘Mboobu mbwaamba Jehova: “Koamba kuti, ‘Ipanga! Ipanga+ lyakwengwa, alimwi lyacumbwa. 10 Lyakwengwa kuti lijaye kapati; lyacumbwa kuti limweke mbuli kalabo.’”’”

“Sena tatweelede kukkomana?”

“‘Sena lilaikaka* nkoli yamwanaangu wakulizyalila,+ mbubonya mbolikaka cisamu cili coonse?

11 “‘Lyapegwa kuti licumbwe akuvwukaulwa ajanza. Ipanga eeli lilikwengedwe alimwi lilicumbidwe kuti libikkwe mujanza lyasikujaya.+

12 “‘Omwanaamuntu, kolila akoomoka,+ nkaambo lyaboolela bantu bangu; lyasikila basilutwe boonse bamu Israyeli.+ Aaba antoomwe abantu bangu mbabatiijaigwe apanga eeli. Aboobo yebo kolyuuma-uma acibelo cako kouside. 13 Nkaambo lyalangwa-langwa,+ aboobo ino ncinzi ciyoocitika ikuti panga likaikake nkoli? Nkoli taikabi limbi pe,’+ mbwaamba Mwami Singuzuzyoonse Jehova.

14 “Alimwi yebo omwanaamuntu, kosinsima, alimwi kokamba-kamba maanza aako akwaamba ziindi zyotatwe kuti ‘Ipanga!’ Ndipanga lyakujazya bantu, ndipanga lyakujazya bantu banji, eelyo libazinguluka.+ 15 Myoyo yabo iyooyaaya akaambo kakuyoowa+ alimwi bantu banji bayakuwa kumilyango yamunzi wabo; ndiyoobajaya apanga. Inzya, lilamweka mbuli kalabo alimwi lyakacumbilwa kujaya! 16 Kotendesya kululyo! Kosandukila kulumwensyi! Kounka kufwumbwa mabemba aako nkwaagamikwa! 17 Andime ndilakamba-kamba maanza aangu akumana bukali bwangu.+ Mebo lwangu, nde Jehova, ndime ndaamba.”

18 Alimwi ijwi lya Jehova lyakandisikila kaliti: 19 “Lino yebo omwanaamuntu, kopanga nzila zyobilo nkolitiitozye panga lyamwami wa Babuloni. Zyoonse zyobilo zizwe kucisi comwe, alimwi cikwankwani ceelede kubikkwa aawo mugwagwa mpowaandaanina kuya kuminzi yobilo. 20 Kopanga nzila aatiikanjilile panga liyoolwana Raba+ wabana ba Amoni, anzila imwi aatiikanjilile panga liyoolwana Jerusalemu imunzi uuyakilidwe+ uuli mu Juda. 21 Nkaambo mwami wa Babuloni waima kuti asonde aawo aandaanina mugwagwa, aawo migwagwa yobilo mpoyaandaanina. Ucuka-cuka mivwi. Ubuzya mituni yakwe; akulanga-langa muni. 22 Zyakusondya izili mujanza lyakwe lyalulyo zitondekede ku Jerusalemu, kuti akabikke zilwanyo zyakupwayauzya, akape malailile aakujaya, akoongolole loongololo lwankondo, akabikke zilwanyo zyakupwayauzya milyango yamunzi, akalundike citantilo cabulongo, akuti akayake bwaanda bwakusinkilizya munzi.+ 23 Pele eeci ciyoolibonya mbuli kuti nkusonda kwakubeja mumeso aabaabo* ibakakonka zikonke kulimbabo.+ Nokuba boobo walo uluuyeeyede mulandu wabo, aboobo uyoobaanga.+

24 “Aboobo mboobu mbwaamba Mwami Singuzuzyoonse Jehova: ‘Yebo wapa kuti mulandu wako uyeeyegwe kwiinda mukutondezya zinyonyoono azibi zyako mumicito yako yoonse. Lino mbokunga wayeeyegwa, uyootolwa cakusinikizyigwa buya.’

25 “Pele buzuba bwako bwasika, yebo ooyasidwe calufwu, osilutwe mubi wa Israyeli,+ inzya casika ciindi cakuti upegwe cisubulo camamanino. 26 Mboobu mbwaamba Mwami Singuzuzyoonse Jehova: ‘Kosamununa citambala,+ kogusya musini. Zintu tazicinooli boobu lyoonse pe.+ Komusumpula ooyo uulaansi,+ komufwiinsya ooyo uuli atala.+ 27 Musini ooyu ndilaupa kuti unyonyooke, unyonyooke, unyonyooke. Taukooba wamuntu uuli woonse kusikila mane akasike ooyo uuzumizyidwe amulawo,+ eelyo walo ngondiyoopa.’+

28 “Lino yebo omwanaamuntu, kosinsima kuti, ‘Mboobu mbwaamba Mwami Singuzuzyoonse Jehova kujatikizya bana Amoni alimwi amatusi aabo.’ Koamba kuti, ‘Ipanga! Ipanga lyasomonwa kuti lijaye; lyacumbwa kuti lijaye bantu banji akuti limweke mbuli kalabo. 29 Nokuba kuti mwabona zilengaano zyakubeja akusonda kwakubeja, muyoolundikwa atala aabaabo bakajaigwa, bantu babi ibasikilwa buzuba bwabo, inzya ibasikilwa ciindi cakupegwa cisubulo camamanino. 30 Kolijola mucikanda candilyo. Yebo ndiyookubetekela mubusena mookalengelwa, mucisi mookazwa. 31 Ndiyootila bukali bwangu alinduwe. Ndiyookufwulida mulilo wakunyema kwangu, alimwi ndiyookwaaba mumaanza aabantu basilunya, basyaazibwene mukujaya.+ 32 Uyooba nkuni zyakuvwilimya mulilo;+ bulowa bwako buyootilwa mucisi, alimwi yebo tokayeeyegwi limbi pe, nkaambo mebo lwangu, nde Jehova, ndime ndaamba.’”

22 Alimwi ijwi lya Jehova lyakandisikila kaliti: 2 “Sena yebo omwanaamuntu ulilibambilide kubeteka* munzi uujisi mulandu wabulowa,+ akuupa kuti uzyibe zintu zyanguwo zyoonse zisesemya?+ 3 Yebo waambe kuti, ‘Mboobu mbwaamba Mwami Singuzuzyoonse Jehova: “Yebo omunzi uutila bulowa+ mukati kako, yebo oolaaciindi cili afwaafwi kuboola,+ yebo oopanga mituni iisesemya* kuti ulisofwaazye,+ 4 ulaamulandu akaambo kakutila bulowa,+ ayalo mituni yako iisesemya yakupa kusofwaala.+ Yebo wapa kuti mamanino aamazuba aako afwambaane kusika, eelyo mamanino aamyaka yako asika. Nkakaambo kaako ndiyookupa kuti ube cintu cisampaulwa kumasi alimwi acintu cifwubaazyigwa kuzisi zyoonse.+ 5 Zisi zili afwaafwi alimwi azyeezyo izili kulamfwu anduwe ziyookufwubaazya,+ yebo oojisi mpuwo mbyaabi alimwi oozwide manyongwe. 6 Bona! Silutwe wamu Israyeli umwi aumwi uuli mulinduwe ubelesya nguzu zyakwe kutila bulowa.+ 7 Bantu bali mulinduwe tabalemeki bausyi abanyina.+ Baunina muzwakule, alimwi bapenzya mucaala amukamufwu.”’”+

8 “‘Yebo usampaula masena aangu aasalala, aalo masabata aangu waasofwaazya.+ 9 Mulinduwe muli basikubejelezya ibakanzide kutila bulowa.+ Mulinduwe balalya zipaizyo atala aamalundu akucita micito iisesemya.+ 10 Mulinduwe basofwaazya bulo bwabausyi,*+ alimwi baloona amukaintu uusofweede kuciindi cakwe cakumwezi.+ 11 Mulinduwe mwaalumi umwi ucita cintu cisesemya amukamweenzinyina,+ umwi usofwaazya mukamwanaakwe kwiinda mumicito iitondwa,+ alimwi umbi ulajata akoona mucizyi wakwe, imwana musimbi ngobazyalwa limwi kuli bausyi bomwe.+ 12 Mulinduwe bantu balatambula cisinkamulomo kutegwa batile bulowa.+ Ulakweletesya kuti ujane cinyonamucila,+ ucita kaloba alimwi ubbida beenzinyoko mali cabumpelenge.+ Inzya, yebo wandilubila limwi,’ mbwaamba Mwami Singuzuzyoonse Jehova.

13 “‘Bona! Ndakamba maanza aangu akaambo kakusesemwa mpindu njoojana cabumpelenge, alimwi akaambo kamicito yakutila bulowa iicitwa mulinduwe. 14 Sena uyoozumanana kuba sicamba alimwi akuyumya maanza aako ciindi ndaakubweza ntaamu yakukulwana?+ Mebo lwangu nde Jehova, ndaamba alimwi ndiyoobweza ntaamu. 15 Ndiyookumwaya akati kamasi akukupalanganya akati kazisi,+ alimwi ndiyoobumana busofwaazi bwako.+ 16 Uyoosampaulwa kumbele lyamasi, eelyo uyoozyiba kuti ndime Jehova.’”+

17 Alimwi ijwi lya Jehova lyakandisikila kaliti: 18 “Omwanaamuntu, bamuŋanda ya Israyeli baba mbuli tombe kulindime. Boonse buyo mukuba, mundalila, mbutale alimwi nguloto* mubbibi lyamulilo. Baba tombe lizwa kunsiliva.+

19 “Aboobo mboobu mbwaamba Mwami Singuzuzyoonse Jehova: ‘Akaambo kakuti nyoonse mwaba mbuli tombe,+ ndilamubikka antoomwe mu Jerusalemu. 20 Eelyo mbubonya nsiliva, mukuba, butale, loto alimwi amundalila mbozibikkwa mubbibi lyamulilo kutegwa zifwulidilwe mulilo akunyengululwa, mbombubo mbondiyoomubikka antoomwe anywebo mubukali bwangu alimwi kandinyemede, eelyo ndiyoomufwulida akumunyengulula.+ 21 Ndiyoomubikka antoomwe akumufwulida mulilo wabukali bwangu,+ eelyo muyoonyengululwa mulinguwe.+ 22 Mbubonya nsiliva mboinyengululwa mubbibi lyamulilo, andinywe mbomuyoonyengululwa mulinguwe; eelyo muyoozyiba kuti mebo lwangu nde Jehova, ndime ndamutila bukali bwangu.’”

23 Alimwi ijwi lya Jehova lyakandisikila kaliti: 24 “Omwanaamuntu, komwaambila kuti, ‘Yebo uli cisi citakasalazyigwi nokuba kuugwa mvwula mubuzuba bwabukali. 25 Basinsimi bakwe ibali mulinguwe bapangana,+ mbubonya mbuli syuumbwa uuvwuluma uuzazaula munyama ngwaaluma.+ Baluujisi kuzazaula bantu. Babweza lubono alimwi azintu ziyandisi. Bapa kuti kube bamukabafwu banji mulinguwe. 26 Bapaizi bakwe batyola mulawo wangu,+ alimwi baluujisi kusofwaazya masena aangu aasalala.+ Tabaandaanyi akati kacintu cisalala acintu-cintu buyo,+ alimwi balaalilwa kuzyibya bantu cintu cisofweede aceeco cisalala,+ balakaka kubamba masabata aangu, alimwi mebo ndilisampukide akati kabo. 27 Basilutwe bakwe ibali mulinguwe bali mbuli baumpe bazazaula munyama ngobaluma; batila bulowa akujaya bantu kutegwa bajane mpindu munzila yabumpelenge.+ 28 Pele basinsimi bakwe bazilulula micito yabo amulambo* uutuba. Babona zilengaano zyakubeja akusonda zyakubeja,+ kwamana baamba kuti: “Mboobu mbwaamba Mwami Singuzuzyoonse Jehova,” kakuli Jehova lwakwe kunyina ncaamba. 29 Bantu bamucisi balacenga, balabba,+ bapenzya bantu bapengede alimwi abacete, alimwi bacenga muzwakule akumukakila kumubetekela kaambo kakwe cabululami.’

30 “‘Ndalikuyandaula muntu akati kabo uukonzya kubambulula bwaanda bwamabwe naa ooyo uukonzya kwiima mumweenya kwiiminina cisi, kutegwa citanyonyoonwi,+ pele kunyina ngondajana. 31 Aboobo ndilabatila bukali bwangu akubanyonyoona amulilo wakunyema kwangu. Ndilabaletela mpindu yanzila yabo amitwe yabo,’ mbwaamba Mwami Singuzuzyoonse Jehova.”

23 Alimwi ijwi lya Jehova lyakandisikila kaliti: 2 “Omwanaamuntu, kwakali bamakaintu bobilo ibakazyedwe kumukaintu omwe.+ 3 Bamakaintu aaba bakaba bavwuule mu Egepita;+ bakali kucita buvwuule kuzwa kubukubusi bwabo. Nkomunya ooko nkozyakatyankilwa nkolo zyabo, alimwi nkozyakasyobelwa nkolo zyabo zyabunakalindu. 4 Imazina aabo ngaaya, imupati wakali Ohola,* mpoonya musyoonto wakwe wakali Oholiba.* Bakazooba bangu akuzyala bana basankwa abasimbi. Lino kujatikizya mazina aabo, Ohola ngu Samariya,+ mpoonya Oholiba ngu Jerusalemu.

5 “Ohola wakatalika kucita buvwuule+ kacili wangu. Wakali kubanyomenena aabo ibakali kumufwida luunyaunya,+ basimukobonyina, nkokuti bana Asuri.+ 6 Bakali beendelezi ibakasamide zisani zyacikambwe antoomwe abaleli babili—boonse buyo bakali balombwana beebeka, ibakatantide amabbiza aabo. 7 Wakazumanana kuvwuula ankumekume zyabana Asuri zyoonse, eelyo wakalisofwaazya+ amituni iisesemya* yabaabo mbaakali kunyomenena. 8 Tanaakaleka buvwuule mbwaakali kucita mu Egepita, nkaambo naakali mukubusi bakoona anguwe, bakazisyoba nkolo zyabunakalindu bwakwe, alimwi bakamufwida luunyaunya lutaambiki akoona anguwe.+ 9 Aboobo ndakamwaaba mumaanza aabaabo ibakali kumufwida luunyaunya, ibana Asuri,+ aabo mbaakali kunyomenena. 10 Bakamuvwumbula mantanda aakwe,+ bakabweza bana bakwe basankwa abasimbi,+ alimwi bakamujaya apanga. Wakaba mukaintu uuli ampuwo mbyaabi akati kabamakaintunyina, eelyo bakamusubula.

11 “Mwanookwabo Oholiba naakabona cakacitika, luunyaunya lwakwe lwakaindila kubija, abwalo buvwuule bwakwe bwakali bubi kapati kwiinda bwamwanookwabo.+ 12 Wakanyomenena basimukobonyina, bana Asuri,+ beendelezi alimwi abaleli babili ibakasamide zisani zyeebeka, kabatantide amabbiza—boonse buyo bakali balombwana babotu kapati. 13 Naakalisofwaazya, ndakabona kuti boonse bobilo bakali kutobela nzila yomwe.+ 14 Pele walo wakazumanana kuyungizya micito yakwe yabuvwuule. Wakabona zifwanikiso zyabaalumi zyakazekaudwe abwaanda, izikozyanyo zyaba Kasidi zyakazekaudwe amusila uusalala, 15 zyabaalumi bakalyaangide ntambo muzibuno, ibakasamide zitambala zilamfwu zilileka-leka kumitwe, ibakali kulibonya mbuli basikalumamba, zyoonse buyo kaziiminina bana Babuloni, ibakazyalilwa mucisi caba Kasidi. 16 Mbwaakazibonena buyo, wakatalika kubafwida luunyaunya, amane wakabatumina batumwa kucisi caba Kasidi.+ 17 Aboobo bana Babuloni bakaluujisi kuboola kuzikoona anguwe abulo bwakwe, eelyo bakamusofwaazya aluunyaunya lwabo.* Amane kusofwaazyigwa ambabo, wakazwa kulimbabo kacimidwe.

18 “Naakazumanana kucita buvwuule cakutalisenda akuvwumbula mantanda aakwe,+ ndakazwa kulinguwe kandicimidwe, mbubonya mbondakazwa kumwanookwabo kandicimidwe.+ 19 Eelyo wakazumanana kuyungizya micito yakwe yabuvwuule,+ kayeeya mazuba aabukubusi bwakwe, naakali kucita buvwuule mucisi ca Egepita.+ 20 Wakabanyomenena mbubonya bamakaintu baambali mbobanyomenena baalumi bajisi cizo cabwaalumi cili mbuli cambongolo alimwi bajisi cinswe cili mbuli cabbiza. 21 Yebo wakalombozya bukkale busesemya bwakubukubusi bwako mu Egepita,+ nobakali kusyoba nkolo zyako, inkolo zyakubukubusi bwako.+

22 “Aboobo swiilila yebo Oholiba, mboobu mbwaamba Mwami Singuzuzyoonse Jehova: ‘Bona ndilabusya baabo bakuyanda+ mbookasiya kocimidwe, eelyo ndilabaleta kuti bakulwane kuzwa kumabazu oonse,+ 23 bana Babuloni+ abana Kasidi boonse,+ baalumi baku Pekodi,+ ku Sowa alimwi aku Kowa, antoomwe abana Asuri boonse. Boonse buyo mbalombwana babotu, beendelezi alimwi abaleli babili, basikalumamba alimwi abaabo ibakasalwa, boonse kabatantide mabbiza. 24 Bayookulwana ankalaki zyankondo alimwi amavwili aavwuuma, ampi mpati yabasikalumamba, antobo mpati, ntobo nsyoonto alimwi acimpoompo. Bayakwiima mumasena aabo kabakuzingulukide koonse-koonse, alimwi ndiyoobapa nguzu zyakukubeteka, eelyo bayookubeteka kweelana acintu ciluzi mumeso aabo.+ 25 Ndiyookunyemena, eelyo balo bayookucitila cabukali. Bayookosola mpemo yako amatwi aako, eelyo aabo bayoosyaala mulinduwe bayoojaigwa apanga. Bana bako basankwa abasimbi bayoobatola, alimwi aabo bayoosyaala mulinduwe bayakuumpwa cakumaninina amulilo.+ 26 Bayookusamununa zisani+ akukunyanga zilisakatizyo zyako zibotu.+ 27 Ndiyoobumana bukkale bwako busesemya abuvwuule bwako+ mbookatalikila mucisi ca Egepita.+ Uyooleka kubalanga alimwi tokaciyeeyi limbi cisi ca Egepita.’

28 “Mboobu mbwaamba Mwami Singuzuzyoonse Jehova: ‘Bona ndili afwaafwi kukwaaba mumaanza aabaabo mbotayandi, aabo mbookasiya kocimidwe.+ 29 Bayookucitila calunya, bayoozitola zintu zyoonse nzyookabelekela canguzu,+ akukusiya mbomunya oobo koli mantanda, kotasamide. Mantanda aako aajazya nsoni akutalilemeka kwako, bukkale bwako busesemya, alimwi abuvwuule bwako, zyoonse buyo ziyoosiigwa antangalala.+ 30 Uyoocitilwa zintu eezyi akaambo kakuti wakali kutandila masi mbuli muvwuule,+ akulisofwaazya amituni yangawo iisesemya.+ 31 Yebo watobela nzila yamwanookwanu,+ aboobo ndilabikka nkapu yakwe mujanza lyako.’+

32 “Mboobu mbwaamba Mwami Singuzuzyoonse Jehova:

“Nkaambo mebo lwangu ndime ndaamba,” mbwaamba Mwami Singuzuzyoonse Jehova.’

35 “Aboobo mboobu mbwaamba Mwami Singuzuzyoonse Jehova: ‘Akaambo kakuti wandiluba alimwi tonoondibikkila maano abuniini,*+ uyoosubulwa akaambo kabukkale bwako busesemya abuvwuule bwako.’”

36 Mpoonya Jehova wakandaambila kuti: “Omwanaamuntu, sena ulilibambilide kubabeteka ba Ohola a Oholiba+ akubaambila cakutainda mumbali micito yabo iisesemya? 37 Bacita bumambe*+ alimwi mumaanza aabo muli bulowa. Tiibacita buyo bumambe amituni yabo iisesemya, pele alimwi bana babo mbobakandizyalila babaumpa* mumulilo kuti babe cakulya camituni yabo.+ 38 Kuyungizya waawo, mboobu mbobandicitila: Bakasofwaazya cikombelo cangu mubuzuba oobo, alimwi bakasampaula masabata aangu. 39 Nobakamana kujaya bana babo basankwa kabali zipaizyo kumituni yabo iisesemya,+ bakanjila mucikombelo cangu kuti bacisofwaazye+ mubuzuba mbubonya oobo. Ncencico eeco ncobakacita mukati kaŋanda yangu. 40 Alimwi bakatuma amutumwa kuti akaite baalumi kuzwa kulamfwu.+ Nibakali kuboola, yebo wakasamba, wakapenta meso aako alimwi wakalibotezya azilisakatizyo.+ 41 Kumane wakakkala acuuno cipati cabulemu,+ kumbele lyaco kakuli tebulu libambidwe kabotu+ aawo mpookabikka tununkilizyo twangu+ amafwuta aangu.+ 42 Nkomunya ooko kwakali ciyoyooyo cankamu yabaalumi baliibide, akati kabo kwakali bacakolwa bakaletwa kuzwa munkanda. Aaba bakabikka nkaya kumaanza aabamakaintu akubasamika misini yeebeka kumutwe.

43 “Mpoonya ndakaamba kujatikizya mukaintu ooyo wakamanide akaambo kabumambe kuti: ‘Lino ooyu ulazumanana kucita buvwuule.’ 44 Aboobo bakazumanana kunjila nkwaakabede, mbubonya muntu mbwaunka kumuvwuule. Oobo mbobakali kunjila kuli Ohola a Oholiba, bamakaintu ibajisi bukkale busesemya. 45 Pele baalumi baluleme bayoomubeteka bweelede akaambo kabumambe+ akutila bulowa;+ nkaambo bamakaintu aaba mbaasimamambe, alimwi bajisi bulowa mumaanza aabo.+

46 “Nkaambo mboobu mbwaamba Mwami Singuzuzyoonse Jehova: ‘Bayooletelwa mpi yabasikalumamba kuti ibacite kuba cintu ciyoosya alimwi iceelede kusaalwa.+ 47 Impi yabasikalumamba eeyo iyoobapwaya mabwe+ akubakosaula amapanga aabo. Bayoojaya bana babo basankwa abasimbi+ akuumpa maanda aabo amulilo.+ 48 Ndiyoobumanizya bukkale busesemya mucisi eeci, eelyo bamakaintu boonse bayakwiiya ciiyo, aboobo tabakabutobeli bukkale bwanu busesemya pe.+ 49 Bayoomusubula akaambo kabukkale bwanu busesemya alimwi akaambo kazibi nzyomwakacita amituni yanu iisesemya; aboobo muyoozyiba kuti mebo ndendime Mwami Singuzuzyoonse Jehova.’”+

24 Alimwi ijwi lya Jehova lyakandisikila mumwaka wafwuka, mumwezi wa 10, mubuzuba bwa 10 bwamwezi ooyo kaliti: 2 “Omwanaamuntu, kobulemba buzuba oobu, nkokuti buzuba obuno mbubonya. Mwami wa Babuloni watalika kulwana Jerusalemu ibuzuba obuno mbubonya.+ 3 Alimwi koamba kasimpi kujatikizya ŋanda eeyi yabazangi, ubaambile kuti:

“‘Mboobu mbwaamba Mwami Singuzuzyoonse Jehova:

“Sibika mpoto; inzya sibika mpoto amulilo utile amaanzi mulinjiyo.+

 5 Kobweza mbelele mbotu kapati mubutanga,+ usikke nkuni zinji koonse-koonse kunsi aampoto.

Kozijika zituli eezyo alimwi amafwuwa aali mulinjiyo.”’

6 “Aboobo mboobu mbwaamba Mwami Singuzuzyoonse Jehova:

‘Maawe kumunzi uutila bulowa,+ kumpoto iijisi nkalaya, iitanagusyigwa nkalaya!

Kogusya zituli zili mulinjiyo zyoonse cimwi acimwi;+ utazyuumini cisolo pe.

 7 Nkaambo bulowa bwamunzi buli mulinguwo;+ munzi ooyu wakabutila atala aandomba iinyina cintu.

Tiiwakabutila ansi kuti ubuvwikkile abulongo pe.+

9 “Aboobo mboobu mbwaamba Mwami Singuzuzyoonse Jehova:

‘Maawe kumunzi uutila bulowa!+

Ndiyakuukomezya mulwi wankuni.

Busofwaazi bwayo ibuli mukati kanjiyo bulanyenguluka+ alimwi nkalaya yanjiyo ilaligwa.

Mpoto eeyo amwiisowele buyo mumulilo ankalaya yanjiyo!’

13 “‘Yebo wakasofwaala akaambo kabukkale bwako busesemya.+ Ndakasola kukusalazya, pele tonookasalala pe kubusofwaazi bwako. Tokasalazyigwi limbi kusikila mane bukamane ibukali bwangu mbondijisi kulinduwe.+ 14 Mebo nde Jehova ndime ndaamba. Ciyoocitika ncobeni. Ndiyoobweza ntaamu kakunyina kuwayawaya, tandikakweengeleli pe alimwi tandikacinci maano.+ Bayookubeteka kweelana anzila zyako alimwi amicito yako,’ mbwaamba Mwami Singuzuzyoonse Jehova.”

15 Alimwi ijwi lya Jehova lyakandisikila kaliti: 16 “Omwanaamuntu, anguma yomwe buyo ndilakunyanga muyandwa wako ngoyandisya.+ Toyelede koomoka; nokuba kulila naa kweenda misozi. 17 Utongele buyo cakaumuumu, alimwi utaciti zilengwa zyaadilwe zicitilwa bafwide.+ Kolyaanga citambala cako kumutwe,+ akusama mpato zyako kumaulu.+ Utalivwumbi acilezu camulomo waatala pe,+ alimwi utalyi cakulya ncobatiikuletele bamwi.”+

18 Lino mafwumofwumo ndakaambila bantu makani aaya, mpoonya imangolezya mukaintu wangu wakafwa. Aboobo nibwakaca ndakacita mbubonya mbundakalaililwa. 19 Bantu bakali kundibuzya kuti: “Sena kunyina notiitwaambile mbozitujatikizya swebo zintu eezyi nzyocita?” 20 Mpoonya ndakabavwiila kuti: “Ijwi lya Jehova lyandisikila kaliti: 21 “Kobaambila bamuŋanda ya Israyeli kuti: “Mboobu mbwaamba Mwami Singuzuzyoonse Jehova, ‘Ndili afwaafwi kucisofwaazya cikombelo cangu,+ eeco icimupa kulidunda kapati, ncomuyandisya alimwi ncomulombozya kapati mumyoyo yanu. Ibana banu basankwa abasimbi, aabo mbomwakasiya musyule, bayoojaigwa apanga.+ 22 Mpoonya muyoocita mbubonya mebo mbondacita. Kunyina nomuyoolivwumba acilezu camulomo wanu waatala nokuba kulya cakulya ncobayoomuletela bamwi.+ 23 Muyoolyaanga zitambala zyanu kumitwe yanu, alimwi kumaulu muyoosama mpato zyanu. Kunyina nomuyakoomoka nokuba kulila. Muciindi caboobo, muyoobola muzinyonyoono zyanu,+ alimwi muyootongela umwi aumwi kumweenzinyina. 24 Ezekieli waba citondezyo kulindinywe.+ Mbubonya mbwaacita walo, anywebo mbomuyoocita. Aboobo caakucitika eeci, muyoozyiba kuti mebo ndendime Mwami Singuzuzyoonse Jehova.’”’”

25 “Lino yebo omwanaamuntu, ibuzuba oobo nondiyoobanyanga mayubilo aabo—icintu cibotu ncobakkomanina, icintu eeco ncobayandisya, inzya cintu eeco myoyo yabo ncoilombozya kapati—antoomwe abana babo basankwa abasimbi,+ 26 imuntu uuyoofwutuka uyookuletela mulumbe.+ 27 Ibuzuba oobo yebo uyoojalula mulomo wako akwaambaula amuntu ooyo uuyoofwutuka, eelyo tokaumuni buyo limbi pe.+ Uyooba citondezyo kulimbabo, eelyo bayoozyiba kuti mebo ndime Jehova.”

25 Alimwi ijwi lya Jehova lyakandisikila kaliti: 2 “Omwanaamuntu, kolanzya busyu bwako kubana Amoni+ akubasinsimina makani mabyaabi.+ 3 Kujatikizya bana Amoni, waambe kuti, ‘Amuswiilile jwi lya Mwami Singuzuzyoonse Jehova. Mboobu mbwaamba Mwami Singuzuzyoonse Jehova: “Akaambo kakuti mwakaamba kuti ‘Ehee!’ ikujatikizya cikombelo cangu nicakasofwaazyigwa, akujatikizya nyika ya Israyeli noyakanyonyoonwa, alimwi akujatikizya bamuŋanda ya Juda nibakatolwa kucisi cimbi, 4 nkokuti ndilamwaaba mumaanza aabantu ba Kujwe kamuli lukono lwabo. Bayooyaka nkambi zyabo akati kanu akusimpa matente aabo akati kanu. Bayoolya micelo yanu, alimwi bayoonywa mukupa wanu. 5 Ndiyoopa kuti Raba+ abe macelelo aankamela, acalo cisi cabana Amoni ndiyoocipa kuba busena bwakulyookezyela matanga; eelyo muyoozyiba kuti ndime Jehova.”’”

6 “Nkaambo mboobu mbwaamba Mwami Singuzuzyoonse Jehova: ‘Akaambo kakuti mwakakamba amaanza aanu+ akujintauka alimwi mwakasekelela cakufwubaazya+ kapati akaambo kazintu zyakacitikila cisi ca Israyeli, 7 nkokuti ndiyootandabika janza lyangu kulindinywe kuti ndimwaabe kumasi kamuli cintu cakusaala. Ndiyoomukosola akati kabantu akumunyonyoona muzisi zyoonse.+ Ndiyoomulobya, eelyo muyoozyiba kuti ndime Jehova.’

8 “Mboobu mbwaamba Mwami Singuzuzyoonse Jehova: ‘Akaambo kakuti Moabu+ a Seiri+ baamba kuti, “Amubone! Ŋanda ya Juda ili buyo mbuli masi aamwi oonse,” 9 imungenyu wa Moabu, ikuli minzi yakwe yakuminyinza ndilausiya buyo antangalala, ibusena bwacisi cakwe bweebeka, nkokuti minzi ya Beti-jesimoti, Baala-meoni mane kusikila ku Kiriyataimu.+ 10 Ndiyakwaaba busena oobu antoomwe abana Amoni kubantu ba Kujwe+ kuti lube lukono lwabo, kutegwa bana Amoni batakaibalukwi limbi akati kamasi.+ 11 Alimwi ndiyoobeteka bana Moabu,+ eelyo bayoozyiba kuti ndime Jehova.’

12 “Mboobu mbwaamba Mwami Singuzuzyoonse Jehova: ‘Edomu wacita zintu calunya kuti asubule bamuŋanda ya Juda alimwi walijanina mulandu mupati akaambo kakubajolela bubi;+ 13 aboobo mboobu mbwaamba Mwami Singuzuzyoonse Jehova: “Andime ndiyootandabika janza lyangu kulwana Edomu akunyonyoona bantu alimwi abanyama bavwubwa mulinguwe, eelyo ndiyoomupa kuba matongo buyo.+ Bayoojaigwa apanga kuzwa ku Temani mane kusikila ku Dedani.+ 14 ‘Ndiyoomusubula Edomu kujanza lyabantu bangu ba Israyeli.+ Bayooleta bukali bwangu alimwi akunyema kwangu mu Edomu, kutegwa bapegwe cisubulo cangu,’+ mbwaamba Mwami Singuzuzyoonse Jehova.”’

15 “Mboobu mbwaamba Mwami Singuzuzyoonse Jehova: ‘Akaambo kabulwani bwabo mbobataleki, ba Filisiti calunya bayanda kuleta cisubulo alunyonyooko.+ 16 Aboobo mboobu mbwaamba Mwami Singuzuzyoonse Jehova: “Amubone nditandabika janza lyangu kuti ndilwane ba Filisiti,+ eelyo ndiyoobalobya bana Kereti+ akunyonyoona basyeede boonse akati kabaabo bakkala kunkomwe yalwizi.+ 17 Ndiyoobacitila milimo mipati yakubajolela cibi akubapa zisubulo ziyoosya, eelyo bayoozyiba kuti ndime Jehova, ciindi eeco ndaakubasubula.”’”

26 Mumwaka wa 11, mubuzuba bwakusaanguna bwamwezi, ijwi lya Jehova lyakandisikila kaliti: 2 “Omwanaamuntu mbokunga Turo waamba majwi mabi kuli Jerusalemu kati,+ ‘Ehee! Milyango yabantu yapwaigwa!+ Zintu zyoonse zilaboola kulindime, aboobo ndilavwuba, mbokunga lino walo wanyonyoonwa’; 3 nkokuti mboobu mbwaamba Mwami Singuzuzyoonse Jehova: ‘Bona ndilakulwana, yebo Turo, ndilakuletela masi manji kuti akulwane mbubonya mbuli lwizi mboluleta mayuwe aandulo. 4 Bayoonyonyoona malambo aa Turo akumwaya ngazi zyakwe,+ alimwi mebo ndiyoopala bulongo bwakwe akumupa kuba ndomba iimweka, iinyina cintu. 5 Uyooba lubuwa lwakuyanikila tunsabwe mukati kalwizi.’+

“‘Nkaambo mebo lwangu ndime ndaamba,’ mbwaamba Mwami Singuzuzyoonse Jehova, ‘aboobo uyooba cintu cisaalwa amasi. 6 Abalo bantu bakkala mutunzi tuli musyokwe bayoojaigwa apanga, eelyo bantu bayoozyiba kuti ndime Jehova.’

7 “Nkaambo mboobu mbwaamba Mwami Singuzuzyoonse Jehova: ‘Amubone ndilaleta Mwami Nebukadinezara* waku Babuloni kuzoolwana Turo kuzwa kunyika;+ ooyu ngomwami wabami,+ uujisi mabbiza,+ nkalaki zyankondo,+ basikalumamba batantide amabbiza alimwi ampi yabasikalumamba banji.* 8 Uyoobajaya apanga bantu bakkala mutunzi tuli musyokwe, alimwi uyooyaka bwaanda bwakukusinkilizya akulundika zitantaala zyakukusinkilizya, alimwi uyoonyamuna ntobo mpati kuti akulwane. 9 Uyoopwayaula malambo aako acilwanyo cakupwayauzya,* alimwi uyoogonka ngazi zyako atweembe.* 10 Mabbiza aakwe anooli manji kapati cakuti ayookuvwumba alusuko, akwalo kuyobeka kwabasikalumamba batantide amabbiza, amuzuzumo wamavwili alimwi ankalaki zyankondo ziyoopa kuti malambo aako azungaane eelyo walo aakunjila mumilyango yako mbubonya mbuli baalumi bavwuumukila munzi uujisi malambo apwaikide. 11 Insumba zyamabbiza aakwe ziyoolyatauka mumigwagwa yako yoonse;+ uyoobajaya bantu bako apanga, alimwi misemu yako miyumu iyoowida ansi. 12 Bayoobba lubono lwako, bayoonyonyoona makwebo aako,+ bayookolomona malambo aako akumwaya maanda aako mabotu; mpoonya mabwe aako, zintu zyako izyakapangwa amapulanga alimwi abulongo bwako, zyoonse buyo bayoozisowela mumaanzi.’

13 “‘Ndiyoopa kuti kusabila kwanyimbo zyako kumane, atwalo tuntimbwa twako tatukamvwugwi limbi pe.+ 14 Ndiyookupa kuba ndomba iimweka, iinyina cintu alimwi uyooba lubuwa lwakuyanikila tunsabwe.+ Tokayakululwi limbi pe, nkaambo mebo lwangu, nde Jehova, ndime ndaamba,’ mbwaamba Mwami Singuzuzyoonse Jehova.

15 “Mboobu mbwaamba Mwami Singuzuzyoonse Jehova kuli Turo: ‘Kuwa kwako kwaakulimvwisya, eelyo bantu bayasidwe banootongela, kujaya kwaakucitika mulinduwe, sena nsumbu tazikabimbi?+ 16 Basilutwe boonse bakulwizi bayooseluka azyuuno zyabo zyabwami akusamununa majansi aabo alimwi azisani zyabo zisumidwe kabotu, alimwi bayakuyoowa kapati. Bayookkala ansi eeni, banookankama ciindi coonse akukulanga kabagambidwe.+ 17 Bayakwiimba lwiimbo lwabuumba*+ lwakukulila akukwaambila kuti:

19 “Nkaambo mboobu mbwaamba Mwami Singuzuzyoonse Jehova: ‘Ndaakukunyonyoona kuti ube mbuli minzi iitakkedwe bantu, ndaakukupenzya amaanzi manji aapaya, alimwi maanzi aanguzu aakukuvwumba,+ 20 yebo abaabo mbomuselemuka limwi mucilindi* ndiyoomuleta kubantu bakaindi; ndiyookupa kukkala mubusena buli kunsi kapati, mbubonya mbuli masena aakaindi aakanyonyoonwa, antoomwe abaabo baselemukila mucilindi,+ kutegwa yebo utakakkalwi limbi abantu. Mpoonya ndiyoocipa kuti cilemekwe* cisi cabaumi.

21 “‘Cakutayeeyelwa ndiyookuletela zintu zikuyoosya, eelyo uyooloba.+ Bayookuyandaula, pele tabakakujani limbi pe,’ mbwaamba Mwami Singuzuzyoonse Jehova.”

 8 Bantu bakkala ku Sidoni aku Arivadi+ mbabakali kukukwasula.

Baalumi bako basyaazibwene, O Turo, mbabakali kukweenzya.+

 9 Baalumi bauzyi kapati mulimo* alimwi basyaazibwene baku Gebali+ mbabakasinka maswaanganino aamapulanga aako.+

Mato oonse aamulwizi alimwi abasikwaaenzya bakali kuboola kulinduwe kuzoocita makwebo.

10 Baalumi baku Persia, Ludi, aku Puti+ bakali mumpi yako, bakali basikalumamba bako.

Bakaanzika ntobo zyabo azimpoompo zyabo kulinduwe, alimwi bakakupa kuti weebeke.

12 “‘“Bana Tarisi+ bakacita makwebo anduwe akaambo kakuvwula kwalubono lwako.+ Nsiliva, butale, mundalila, alimwi aloto* bakazicincanisya azintu zyako.+ 13 Bana Javani, Tubali+ alimwi abana Meseki+ bakacita makwebo anduwe, ibazike+ alimwi azintu zyakapangwa amukuba bakazicincanisya azintu nzyowakali kusambala. 14 Bamuŋanda ya Togarima+ bakabweza mabbiza, mahacci alimwi amamyuulu* akuzicincanisya azintu zyako. 15 Bantu baku Dedani+ bakacita makwebo anduwe; yebo wakabanjizya milimo basambazi bamunsumbu zinji; bakali kukupa meja aabazovwu+ azisamu zijisi moyo uusimide kazili mutelo. 16 Bana Edomu bakacita makwebo anduwe akaambo kakuvwula kwazintu zyako nzyowakali kupanga. Bakapa mabwe mayandisi aanofeki, aboya bwambelele bwamubala wacisombo, azisani zyamabala-mabala zisumidwe kabotu, amilembo mibotu, amabwe mayandisi aamulwizi alimwi amabwe aasubila-subila kucincanisya azintu zyako.

17 “‘“Juda alimwi acisi ca Israyeli bakacita makwebo anduwe, bakakupa wiiti waku Miniti,+ zyakulya zibotu, buci,+ mafwuta alimwi amabbona+ kucincanisya azintu zyako.+

18 “‘“Bana Damasiko+ bakacita makwebo anduwe akaambo kakuvwula kwazintu zyako nzyowakali kupanga alimwi alubono lwako loonse lunji, kabasambala waini waku Heliboni alimwi aboya bwambelele bwa Zahari.* 19 Bana Vedani abana Javani ibazwa ku Uzali bakapa butale bufwulidwe, azisamu zyakkasiya,* alimwi aminsale* kucincanisya azintu zyako. 20 Bana Dedani+ bakasambalana anduwe zisani zyakukkalila amabbiza. 21 Wakabanjizya milimo bana Arabiya abasilutwe boonse baku Kedara,+ aabo ibakali basambazi babana bambelele, babagutu abampongo.+ 22 Basambazi baku Sheba abaku Raama+ bakacita makwebo anduwe; bakapa misyobo yoonse yatununkilizyo tubotu kapati, mabwe mayandisi alimwi angolida kucincanisya azintu zyako.+ 23 Bana Harani,+ bana Kane, bana Edeni,+ abasambazi baku Sheba,+ baku Asuri+ abaku Kilimadi bakacita makwebo anduwe. 24 Mumisika yako bakali kusambala zisani zibotu, zibaki zilileka-leka zyakapangwa amulembo wamubala wacikambwe akutungwa tulembo tubotu twamabala-mabala, antoomwe amakkapeti aamabala-mabala, zyoonse buyo kazipombedwe akwaangwa antambo.

28 Basikukweenzya baakoomoka, zilawo zyakunkomwe yalwizi ziyookankama.

31 Bayooligela minkulu akusama zisani zyamasaka;

Bayookulila ceetezya, akoongolola kapati.

32 Baakukulila bayakwiimba lwiimbo lwabuumba akweema kabati:

‘Ino nguni uuli mbuli Turo, ooyo lino waumunina mukati kalwizi?+

33 Zintu zyako nizyakali kusika kuzwa mulwizi, yebo wakali kukkutya bantu.+

Lubono lwako lunji amakwebo aako manji zyakavwubya bami bamunyika.+

36 Basambazi bazwa akati kamasi bayoosiba milosi akaambo kaceeco cakucitikila.

28 Alimwi ijwi lya Jehova lyakandisikila kaliti: 2 “Omwanaamuntu, komwaambila musololi wa Turo kuti, ‘Mboobu mbwaamba Mwami Singuzuzyoonse Jehova:

“Akaambo kakuti moyo wako walisumpula,+ uluujisi kwaamba kuti, ‘Ndili leza.

Nokuba kuti mumoyo wako ulimvwa kuti uli leza.

 3 Bona! Yebo uli musongo kwiinda Daniele.+

Kunyina maseseke aasisidwe kulinduwe.

6 “‘Aboobo, mboobu mbwaamba Mwami Singuzuzyoonse Jehova:

 9 Sena yebo uyoociinduluka kwaamba kuti, ‘ndili leza,’ kuliyooyo uukujaya?

Yebo unooli muntu buyo, ikutali leza pe, mujanza lyabaabo bakusofwaazya.”’

11 Alimwi ijwi lya Jehova lyakandisikila kaliti: 12 “Omwanaamuntu, koimba lwiimbo lwabuumba* lwakulila mwami wa Turo, umwaambile kuti, ‘Mboobu mbwaamba Mwami Singuzuzyoonse Jehova:

13 Yebo wakali mu Edeni, muunda wa Leza.

Akabambwa buzuba mbowakalengwa.

14 Ndakakubikka kuti ube kerubi munanike uuvwumbilila.

Yebo wakali acilundu cisalala ca Leza,+ eelyo wakali kweendeenda akati kamabwe aamulilo.

17 Moyo wako wakatalika kulisumpula akaambo kabweebesi bwako.+

Wakanyonganya busongo bwako akaambo kabweebesi bwako bupati.+

Ndiyookusowela ansi, anyika.+

Ndiyookupa kuba cintu ceebelwa abami.

18 Akaambo kamulandu wako mupati alimwi amakwebo aako ngocita cabumpelenge, yebo wasofwaazya zikombelo zyako.

Ndiyoopa kuti mulilo uvwutuke mulinduwe, eelyo uyookuumpa cakumaninina.+

Ndiyookupa kuba mulota buyo anyika kumbele lyabaabo boonse bakulangide.

19 Aabo boonse bakakuzyi akati kabantu bayookulangilila kabagambidwe.+

23 Ndiyoomutumina cilwazi, alimwi bulowa buyookunka mumigwagwa yakwe.

24 “‘“Mpoonya bamuŋanda ya Israyeli tabakazingulukwi limbi amamvwa aabayasa alimwi aacisa,+ nkokuti aabo babasampaula; eelyo bantu bayoozyiba kuti mebo ndendime Mwami Singuzuzyoonse Jehova.”’

25 “‘Mboobu mbwaamba Mwami Singuzuzyoonse Jehova: “Ndaakubayobolola alimwi bamuŋanda ya Israyeli kuzwa akati kabantu ooko nkobakamwailidwe,+ ndiyoosalazyigwa akati kabo mumeso aabantu bamasi.+ Bayookkala munyika yabo+ njindakapede mubelesi wangu Jakobo.+ 26 Bayookkala mulinjiyo cakuliiba,+ bayooyaka maanda akusyanga myuunda yamisaansa,+ alimwi bayookkala cakuliiba ndaakubasubula boonse aabo babazingulukide ibabasampaula;+ eelyo bayoozyiba kuti ndime Jehova Leza wabo.”’”

29 Mumwaka wa 10, mumwezi wa 10, mubuzuba bwa 12 bwamwezi, ijwi lya Jehova lyakandisikila kaliti: 2 “Omwanaamuntu, kolanzya busyu bwako kuli Farao mwami wa Egepita, umusinsimine makani mabi walo alimwi acisi coonse ca Egepita.+ 3 Waambe majwi aaya: ‘Mboobu mbwaamba Mwami Singuzuzyoonse Jehova:

Ndakalipangila buya mulonga ooyu mebo ndemwini.’+

 4 Pele ndiyoobikka tulobyo mumyeebo yako akupa kuti inswi zili mumulonga wako wa Nile zinamatile kumaamba aako.

Ndiyookugwisya mumulonga wako wa Nile antoomwe answi zyoonse zyamu Nile izinamatilide kumaamba aako.

 5 Ndiyookusowela mucimpayuma, yebo alimwi answi zyoonse zyamumulonga wako wa Nile.

Uyoowida musyokwe, eelyo tokabungikwi nokuba kuyobololwa.+

Ndiyookupa kuba cakulya cabanyama bamusyokwe baanyika alimwi acabayuni bamujulu.+

8 “‘Aboobo mboobu mbwaamba Mwami Singuzuzyoonse Jehova: “Bona ndilakuletela panga,+ eelyo ndiyoojaya bantu alimwi abanyama bali mulinduwe. 9 Cisi ca Egepita ciyoonyonyooka akuba matongo;+ eelyo bayoozyiba kuti ndime Jehova, nkaambo yebo waamba kuti, ‘Mulonga wa Nile nguwangu buya, uutanduumyi amusako; ndime ndakaupanga.’+ 10 Aboobo ndilakulwana yebo alimwi amulonga wako wa Nile, alimwi ndilapa kuti cisi ca Egepita cinyonyooke alimwi cibe cimpayuma, inzya kuti cibe matongo buyo,+ kuzwa ku Migidoli+ kusikila ku Sevene+ mane do kumunyinza wa Etiopiya. 11 Kunyina muntu naba munyama uuvwubwa uuyakwiinda mulincico amaulu,+ alimwi tacikakkalwi bantu pe kwamyaka iili 40. 12 Ndiyoopa kuti cisi ca Egepita cibe cisi cinyonyookede kapati kwiinda zisi zimbi, ayalo minzi yancico inoonyonyookede kapati kwiinda minzi iimbi kwamyaka iili 40 ;+ alimwi bana Egepita ndiyoobamwaya akati kabantu bamasi akubapalanganya muzisi zimbi.”+

13 “‘Nkaambo mboobu mbwaamba Mwami Singuzuzyoonse Jehova: “Yaakwiinda myaka iili 40 ndiyoobayobolola bana Egepita kuzwa kubantu nkobakamwailidwe;+ 14 bana Egepita baange ndiyoobapilusya kucisi ca Patirosi,+ kucisi cokwabo, eelyo ooko nkobayooba buyo bwami buniini. 15 Cisi ca Egepita ciyooba cisi caansi kapati kumami aambi alimwi tacikaadyaaminini limbi masinyina,+ alimwi ndiyoobapa kuceya kapati cakuti tabakacikonzyi kuzunda masi aambi.+ 16 Tacikabi limbi cisi cisyomwa abamuŋanda ya Israyeli,+ pele cinoobayeezya buyo cinyonyoono cabo ncobakacita nobakaunka kubana Egepita kuti bakagwasyigwe. Eelyo bayoozyiba kuti mebo ndendime Mwami Singuzuzyoonse Jehova.”’”

17 Lino mumwaka wa 27, mumwezi wakusaanguna, mubuzuba bwakusaanguna bwamwezi, ijwi lya Jehova lyakandisikila kaliti: 18 “Omwanaamuntu, Mwami Nebukadinezara*+ wa Babuloni wakapa kuti impi yakwe ibeleke canguzu kulwana Turo.+ Mitwe yoonse yakaba alubala, alimwi magwezyo oonse akayubbuluka. Pele walo alimwi ampi yakwe tiibakavwozyegwa pe kumulimo ngobakabeleka canguzu ikulwana Turo.

19 “Aboobo mboobu mbwaamba Mwami Singuzuzyoonse Jehova, ‘Bona cisi ca Egepita ndilacipa Mwami Nebukadinezara* wa Babuloni,+ eelyo uyootola lubono lwancico, uyoocisaala akucinyanga zintu zinji; mpoonya eezyi nzyeziyooba zyakuvwola zyampi yakwe.’

20 “‘Ndilamupa cisi ca Egepita kuti cibe bulumbu bwamulimo ngwaakacita naakalwana Turo, nkaambo bakandibelekela,’+ mbwaamba Mwami Singuzuzyoonse Jehova.

21 “Mubuzuba oobo ndiyoopa kuti lwija lumene kuli bamuŋanda ya Israyeli,*+ mpoonya yebo ndiyookupa coolwe cakwaambaula akati kabo; eelyo bayoozyiba kuti ndime Jehova.”

30 Alimwi ijwi lya Jehova lyakandisikila kaliti: 2 “Omwanaamuntu, kosinsima waambe kuti, ‘Mboobu mbwaamba Mwami Singuzuzyoonse Jehova:

“Amulile kuti, ‘Maawe, buzuba bwasika!’

 3 Nkaambo buzuba bulaafwaafwi, inzya, buzuba bwa Jehova bulaafwaafwi.+

Bunooli buzuba bwamakumbi,+ ciindi cibikkidwe cakubeteka masi.+

 6 Mboobu mbwaamba Jehova:

“‘Bayoojaigwa apanga mucisi kuzwa ku Migidoli+ kusikila ku Sevene,’+ mbwaamba Mwami Singuzuzyoonse Jehova. 7 ‘Cisi cabo ciyoonyonyoonwa kapati kwiinda zisi zimbi; ayalo minzi yancico iyoonyonyoonwa kapati kwiinda minzi imbi.+ 8 Eelyo bayoozyiba kuti ndime Jehova ndaakuvwutusya mulilo mu Egepita alimwi baakupwayaulwa boonse aabo bamvwana ancico. 9 Mubuzuba oobo, ndiyootuma batumwa kutegwa bakape kuti Etiopiya uulisyoma akakankame; bayoozyingwa kapati mubuzuba oobo ibuyoosikila Egepita, nkaambo ncobeni buyoosika.’

10 “Mboobu mbwaamba Mwami Singuzuzyoonse Jehova: ‘Ndiyakwaamana makamu aa Egepita kwiinda mukubelesya janza lya Mwami Nebukadinezara* wa Babuloni.+ 11 Walo abasikalumamba bakwe, basilunya kapati kwiinda masi aambi,+ bayooletwa kuzoonyonyoona cisi. Bayoosomona mapanga aabo ikulwana Egepita akuzuzya cisi amitunta yabantu.+ 12 Ndiyoosandula tugelo twa Nile+ kuba nyika njumu alimwi cisi ndiyoocisambala mumaanza aabantu babi. Ndiyoocinyonyoona cisi azintu zyoonse zili mumo kwiinda mukubelesya janza lyabamuzwakule.+ Mebo lwangu, nde Jehova, ndime ndaamba.’

13 “Mboobu mbwaamba Mwami Singuzuzyoonse Jehova: ‘Alimwi ndiyoonyonyoona mituni iisesemya* akulobya baleza babuyo baku Nofi.*+ Takukabi limbi silutwe wamucisi ca Egepita, alimwi ndiyoopa kuti kube buyoofwu mucisi ca Egepita.+ 14 Ndiyoonyonyoona Patirosi,+ ndiyoovwutusya mulilo mu Zoani, alimwi akusubula munzi wa No.*+ 15 Ndiyootila bukali bwangu aali Sini, munzi muyumu wa Egepita, alimwi ndiyoonyonyoona bantu boonse bakkala mu No. 16 Ndiyoovwutusya mulilo mu Egepita; Sini uyooyoowa kapati, No uyoopwaigwa, mpoonya Nofi* uyoolwanwa masyikati! 17 Balombwana baku Oni* aku Pibeseti bayoojaigwa apanga, abalo bantu bamuminzi bayootolwa mubuzike. 18 Mumunzi wa Tahapanesi ibuzuba buyoosiya ciindi majoko aa Egepita ndaakwaatyola ooko.+ Nguzu zyanguwo izipa kuti kaulisumpula ziyoomana,+ makumbi ayakuuvwumba, abalo bantu bamutunzi twanguwo bayootolwa mubuzike.+ 19 Ndiyoomusubula Egepita, eelyo bayoozyiba kuti ndime Jehova.’”

20 Lino mumwaka wa 11, mumwezi wakusaanguna, mubuzuba bwaciloba bwamwezi, ijwi lya Jehova lyakandisikila kaliti: 21 “Omwanaamuntu, ndalityola janza lya Farao mwami wa Egepita; talikaangwi kutegwa lipone naa kuzambailwa tusani kutegwa liyume akucikonzya kunyamuna panga.”

22 “Aboobo, mboobu mbwaamba Mwami Singuzuzyoonse Jehova: ‘Amubone ndilamulwana Farao mwami wa Egepita,+ ndilatyola maanza aakwe, ijanza lyakwe liyumu aleelyo lityokede,+ alimwi ndilapa kuti panga lili mujanza lyakwe liloke.+ 23 Mpoonya ndiyoomwaya bana Egepita akati kamasi akubapalanganya muzisi zimbi.+ 24 Ndiyooyumya maanza aamwami wa Babuloni+ akubikka panga lyangu mujanza lyakwe,+ ndiyootyola maanza aa Farao, eelyo walo uyootongela kumbele lyakwe* mbuli muntu uufwumba bulamfwu. 25 Ndiyooyumya maanza aamwami wa Babuloni, pele maanza aa Farao ayoogonkelwa; eelyo bayoozyiba kuti ndime Jehova ndaakubikka panga lyangu mujanza lyamwami wa Babuloni alimwi walo aakulibelesya kulwana cisi ca Egepita.+ 26 Ndiyoobamwaya bana Egepita akati kabantu bamasi akubapalanganya muzisi zimbi,+ eelyo bayoozyiba kuti ndime Jehova.’”

 4 Maanzi akacipa kuti cikomene kapati, tusensa twamaanzi manji twakapa kuti cilampe.

 5 Eeci ncicakapa kuti cilampe kwiinda zisamunyina zyamusyokwe.

 8 Kunyina zisamu zimbi zyakkedari zyakali kukonzya kweelanisyigwa ancico mumuunda wa Leza.+

Kunyina cisamu cimbi mumuunda wa Leza cakali kukonzya kweelanisyigwa ancico kubota.

10 “Aboobo mboobu mbwaamba Mwami Singuzuzyoonse Jehova: ‘Akaambo kakuti cakalampa* kapati, akuba akampeleengwe kasika kumakumbi, alimwi akuti moyo wancico wakatalika kulisumpula akaambo kakulampa kwancico, 11 ndiyoocaaba mumaanza aamweendelezi wamasi singuzu.+ Uyoocilwana, andime ndiyoocikaka akaambo kabubi bwancico. 12 Mpoonya bamuzwakule, ibainda kuba aalunya akati kabantu bamasi, bayoocigonka akucisiya atala aamalundu, eelyo matewo aancico ayoolokela mumakkuti oonse, alimwi mitabi yancico iyoocaala kaityokede mutulonga toonse twamucisi.+ Bantu boonse bamunyika bayoozwa mucimvwiide cancico akucisiya. 13 Bayuni boonse bamujulu bayookkala acisiko cancico ciwide, abalo banyama bamusyokwe boonse bayookkala amitabi yancico.+ 14 Eeci cinooli boobu kutegwa kutakabi cisamu nociba comwe icili afwaafwi aamaanzi iciyoolampa nokuba kuba akampeleengwe kasika kumakumbi, akuti kutakabi cisamu citilailidwe kabotu iciyoolampa kusika kulingawo. Nkaambo zyoonse buyo ziyakwaabwa kulufwu, kunyika iili kunsi, antoomwe abana babantu ibaselemukila mucilindi.’*

15 “Mboobu mbwaamba Mwami Singuzuzyoonse Jehova: ‘Mubuzuba oobo mbociyooselemukila ku Cuumbwe* ndiyoopa kuti kube kulila. Aboobo, ndiyoovwumba maanzi manji akulesya tulonga twangawo kutegwa maanzi asinkilwe. Ndiyoopa kuti Lebano asiye mbi akaambo kancico, alimwi zisamu zyamusyokwe zyoonse ziyooneta. 16 Muzumo wakuwa kwancico waakulimvwisya ndiyoopa kuti masi akankame eelyo ndaakucileta ku Cuumbwe* antoomwe abaabo baselemukila mucilindi,* alimwi zisamu zyoonse zyamu Edeni,+ izisamu zibotu kapati zya Lebano, inzya zyoonse zitilailidwe kabotu, ziyakuumbulizyigwa munyika iili kunsi. 17 Baunka anguwe ku Cuumbwe,* kuli baabo bakajaigwa apanga,+ inzya antoomwe abaabo bakali kumugwasya ibakali kukkala mucimvwiide cakwe akati kamasi.’+

18 “‘Ino ncisamu nzi akati kazisamu zili mu Edeni icijisi bulemu anguzu mbuli nduwe?+ Nokuba boobo uyoowisyilwa ansi antoomwe azisamu zyamu Edeni kunyika iili kunsi. Yebo uyakoona ansi akati kabaabo batapalwidwe, aabo bakajaigwa apanga. Eeci nceciyoomucitikila Farao antoomwe amakamu aakwe,’ mbwaamba Mwami Singuzuzyoonse Jehova.”

 3 Mboobu mbwaamba Mwami Singuzuzyoonse Jehova:

 7 ‘Lino yebo waakuzimwa ndiyoovwumba majulu akupa kuti nyenyeezi zili mumo zisiye.

11 Nkaambo mboobu mbwaamba Mwami Singuzuzyoonse Jehova:

‘Ipanga lyamwami wa Babuloni liyookusikila.+

17 Mpoonya mumwaka wa 12, mubuzuba bwa 15 bwamwezi, ijwi lya Jehova lyakandisikila kaliti: 18 “Omwanaamuntu, kolila makamu aacisi ca Egepita akuciselusyila ansi munyika iili kunsi, calo alimwi abana basimbi bamasi aajisi nguzu, antoomwe abaabo baselemukila mucilindi.*

19 “‘Ino nguni ngoinda kubota? Koya ansi, ukoone antoomwe abaabo batapalwidwe!’

20 “‘Bayoowida akati kabaabo bajaigwa apanga.+ Caabwa kupanga; kocikwelaanya antoomwe amakamu aancico oonse.

21 “‘Kuzwa kunsi kwini kwa Cuumbwe,* basikalumamba bainda kunguzu bayoomwaambila walo abaabo bamugwasya. Bayooselemukila ansi akoona mbuli bantu batapalwidwe, aabo ibajaigwa apanga. 22 Ooko nkwabede Asuri ankamu yakwe yoonse. Zyuumbwe zyabo zilimuzingulukide koonse-koonse, boonse bakajaigwa apanga.+ 23 Zyuumbwe zyakwe zili kunsi kwini kwacilindi,* alimwi nkamu yakwe izingulukide cuumbwe cakwe koonse-koonse, boonse bakajaigwa apanga, akaambo kakuti bakali kuyoosya munyika yabaumi.

24 “‘Ooko nkwabede Elamu+ amakamu aakwe oonse kaazingulukide cuumbwe cakwe, boonse bakajaigwa apanga. Bakaselemukila ansi munyika iili kunsi kabatapalwidwe, aabo ibakali kuyoosya munyika yabaumi. Lino bayakuunka ansoni zyabo antoomwe abaabo baselemukila mucilindi.* 25 Bamupangila bulo akati kabaabo bakajaigwa antoomwe amakamu aakwe oonse kaazingulukide zyuumbwe zyakwe. Boonse buyo tabapalwidwe, bakajaigwa apanga, akaambo kakuti bakali kuyoosya munyika yabaumi; aboobo bayakuunka ansoni zyabo antoomwe abaabo baselemukila mucilindi.* Walo wabikkwa akati kabaabo bakajaigwa.

26 “‘Ooko nkwabede Meseki a Tubali+ alimwi amakamu aabo oonse. Zyuumbwe zyakwe zilimuzingulukide. Boonse tabapalwidwe, bakayaswa apanga, akaambo kakuti bakali kuyoosya munyika yabaumi. 27 Sena tabakooni ansi antoomwe abasikalumamba basinguzu aabo batapalwidwe ibakafwa, ibakaselemukila ku Cuumbwe* antoomwe azilwanyo zyabo? Aboobo bayoobikka mapanga aabo kunsi aamitwe yabo,* azibi zyabo atala aazifwuwa zyabo, akaambo kakuti basikalumamba aaba basinguzu bakali kuyoosya munyika yabaumi. 28 Pele yebo uyoopwaigwa akati kabaabo batapalwidwe alimwi uyakoona antoomwe abaabo bakajaigwa apanga.

29 “‘Ooko nkwabede Edomu,+ bami bakwe abasilutwe bakwe boonse, aabo bakalazikwa akati kabaabo bakajaigwa apanga nokuba kuti bakali basinguzu; abalo bayakoona ansi antoomwe abaabo batapalwidwe+ alimwi abaabo baselemukila mucilindi.*

30 “‘Ooko nkobabede basilutwe* bakunyika boonse, antoomwe abana Sidoni boonse,+ aabo camasampu ibaselemukila ansi antoomwe abaabo bakajaigwa, nokuba kuti nguzu zyabo zyakali kuyoosya. Bayakoona ansi kabatapalwidwe antoomwe abaabo bakajaigwa apanga alimwi bayakuunka ansoni zyabo antoomwe abaabo baselemukila mucilindi.*

31 “‘Eezyi zyoonse Farao uyoozibona, eelyo uyakuumbulizyigwa akaambo kazintu zyoonse zyakacitikila makamu aakwe;+ Farao ankamu yakwe yoonse bayoojaigwa apanga,’ mbwaamba Mwami Singuzuzyoonse Jehova.

32 “‘Akaambo kakuti wakali kuyoosya munyika yabaumi, Farao amakamu aakwe oonse bayoolazikwa kuti boone antoomwe abantu batapalwidwe, aabo ibajaigwa apanga,’ mbwaamba Mwami Singuzuzyoonse Jehova.”

6 “‘Pele ikuti mulindizi walibona panga kaliboola pesi talizyi mweembo+ eelyo bantu tabacenjezyegwi, mpoonya panga lyaboola akunyonyoona buumi bwamuntu umwi akati kabo, ncobeni muntu ooyo ulafwa akaambo kacinyonyoono cakwe mwini, pele mulindizi ndiyoomusesa bulowa bwamuntu ooyo.’+

7 “Lino yebo omwanaamuntu, ndakubikka kuti ube mulindizi kuli bamuŋanda ya Israyeli; aboobo eelyo nomvwa jwi lizwa kumulomo wangu, weelede kundicenjezyela bantu aaba.+ 8 Nondaambila muntu mubi kuti, ‘Yebo omubi, ncobeni uyoofwa!’+ pesi yebo toambi jwi kutegwa umucenjezye ooyo mubi kuti aleke bukkale bwakwe, ncobeni walo uyoofwa kali mubi akaambo kacinyonyoono cakwe mwini,+ pele yebo ndiyookusesa bulowa bwakwe. 9 Pele ikuti wamucenjezya imubi kuti aleke nzila yakwe kwamana walo wakaka kucinca bukkale bwakwe, ncobeni walo uyoofwa akaambo kacinyonyoono cakwe,+ pele yebo uyoofwutula buumi bwako.+

10 “Lino yebo omwanaamuntu, kobaambila bamuŋanda ya Israyeli kuti, ‘Nywebo mwaamba kuti: “Nsotoko zyesu azibi zyesu zyatulemena, zyatukosya;+ aboobo ino mbuti mbotukonzya kuzumanana kupona?”’+ 11 Kobaambila kuti, ‘“Masimpe, mebo mbondili muumi,” mbwaamba Mwami Singuzuzyoonse Jehova, “tandilukkomanini pe lufwu lwamuntu mubi,+ pele ndiyanda kuti muntu mubi aleke nzila yakwe+ akuzumanana kupona.+ Amupiluke, amupiluke kuzwa kunzila zyanu zibyaabi,+ ino muyanda kufwida nzi nywebo nobamuŋanda ya Israyeli?”’+

12 “Lino yebo omwanaamuntu, kobaambila bana babantu bako kuti, ‘Bululami bwamuntu uululeme tabukamufwutuli pe ciindi aakuzanga;+ abwalo bubi bwamuntu mubi tabukamupi kuwa pe ciindi aakuleka bubi bwakwe;+ awalo muntu uululeme takazumanani kupona pe akaambo kabululami bwakwe mubuzuba oobo mbwayoocita cibi.+ 13 Ciindi nendaambila mululami kuti: “Ncobeni yebo ulazumanana kupona,” kumane walo wasyoma bululami bwakwe mwini akucita cintu citaluzi,+ kunyina mulimo nouba omwe akati kamilimo yakwe iiluleme uuyooyeeyegwa, pele uyoofwa akaambo kacintu eeco citaluzi ncaacita.+

14 “‘Alimwi ciindi nendaambila muntu mubi kuti: “Ncobeni yebo ulafwa,” kumane walo waleka cibi cakwe akucita cintu ciluzi alimwi ciluleme,+ 15 alimwi muntu ooyo mubi wapilusya cintu ncaakabweza kacili cisyomezyo+ cakubbadela cikwelete, wapilusya cintu ncaakabba,+ alimwi weenda mumilawo iipa buumi kwiinda mukutacita cintu citaluzi, ncobeni uyoozumanana kupona.+ Takafwi pe. 16 Kunyina cibi nociba comwe akati kazibi nzyaakacita ciyooyeeyegwa kutegwa apegwe mulandu.+ Ncobeni, akaambo kakucita cintu ciluzi alimwi ciluleme, uyoozumanana kupona.’+

17 “Pele bantu bako baamba kuti, ‘Nzila ya Jehova tiiluleme pe,’ kakuli mubwini ninzila yabo iitaluleme.

18 “Ikuti mululami wabuleka bululami bwakwe akutalika kucita zintu zitaluleme, ncobeni weelede kufwa akaambo kacibi eeco.+ 19 Pele kuti muntu mubi wabuleka bubi bwakwe akucita cintu ciluzi alimwi ciluleme, ncobeni uyoozumanana kupona akaambo kakucita boobo.+

20 “Pele nywebo mwaamba kuti, ‘Nzila ya Jehova tiiluleme+ pe.’ Mebo ndilamubeteka umwi aumwi wanu kweelana anzila zyakwe, nywebo nobamuŋanda ya Israyeli.”

21 Mukuya kwaciindi, mumwaka wa 12, mumwezi wa 10, mubuzuba bwasanu bwamwezi katuli mubuzike, muntu umwi iwakatija kuzwa ku Jerusalemu wakaboola kulindime+ akwaamba kuti: “Munzi wanyonyoonwa!”+

22 Lino kumangolezya katanasika muntu ooyo wakatijide, ijanza lya Jehova lyakaboola alindime alimwi wakajalula mulomo wangu imuntu ooyo katanaboola kulindime mafwumofwumo. Aboobo mulomo wangu wakajaluka, eelyo ndakatalika kwaambaula alimwi.+

23 Mpoonya ijwi lya Jehova lyakandisikila kaliti: 24 “Omwanaamuntu, bantu ibakkala mumatongo aaya+ baamba cisi ca Israyeli kuti, ‘Abrahamu wakali buyo muntu omwe, nokuba boobo wakacibweza cisi eeci.+ Pele swebo tuli banji; masimpe twapegwa cisi eeci kutegwa cibe cesu.’

25 “Aboobo kobaambila kuti, ‘Mboobu mbwaamba Mwami Singuzuzyoonse Jehova: “Mulya cakulya cijisi bulowa,+ mulanzya meso aanu kumituni iisesemya* alimwi muluujisi kutila bulowa.+ Aboobo ino nkaambo nzi ncomweelede kucibweza cisi? 26 Mwasyoma mapanga aanu,+ mucita zintu zisesemya alimwi umwi aumwi wanu wasofwaazya mukaintu wamweenzinyina.+ Aboobo ino nkaambo nzi ncomweelede kucibweza cisi?”’+

27 “Mboobu mboyelede kubaambila, ‘Mboobu mbwaamba Mwami Singuzuzyoonse Jehova: “Masimpe, mebo mbondili muumi, aabo bakkala mumatongo bayoojaigwa apanga; aabo bali musyokwe ndiyoobapa kuti babe cakulya cabanyama bamusyokwe; abalo aabo bali muminzi iikwabilidwe amumampangala bayoojaigwa acilwazi.+ 28 Cisi eeci ndiyoocipa kuba matongo aanyonyookede kapati,+ azyalo nguzu zyancico eezyo zicipa kulisumpula ndiyoozimana, aalo malundu aa Israyeli ayoonyonyoonwa,+ takukabi muntu wiinda mulingawo. 29 Mpoonya bayoozyiba kuti ndime Jehova ciindi ndaakupa kuti cisi cibe matongo aanyonyookede kapati,+ akaambo kazintu zyoonse zisesemya nzyobacita.”’+

30 “Lino yebo omwanaamuntu, bantu bako baluujisi kukwaamba kumbali aamalambo alimwi amumilyango yamaanda.+ Balaambilana umwi aumwi, muntu amwanookwabo kuti, ‘Kozya, tumvwe jwi lizwa kuli Jehova.’ 31 Bayookuvwoomanina mbuli kuti mbantu bangu; bayoomvwa majwi aako pele tabakaaciti pe.+ Nkaambo amilomo yabo bayookwaambila majwi aakuupaika, anukuti myoyo yabo iyandisya kujana mpindu cabumpelenge. 32 Bona! Yebo uli mbuli muntu wiimba nyimbo zibotu zyaluyando, iwiimba ajwi libotu alimwi uucibwene kulizya kantimbwa. Bayoomvwa majwi aako, pele kunyina naba omwe uuyakwaacita. 33 Lino caakucitika—alimwi buya ciyoocitika—bayoozyiba kuti musinsimi wakaliko akati kabo.”+

34 Alimwi ijwi lya Jehova lyakandisikila kaliti: 2 “Omwanaamuntu, kosinsima makani mabi kubeembezi ba Israyeli. Kosinsima, waambile beembezi kuti, ‘Mboobu mbwaamba Mwami Singuzuzyoonse Jehova: “Maawe kubeembezi ba Israyeli,+ aabo ibali kulisanina beni! Sena beembezi tabeelede kusanina butanga?+ 3 Mulalya mafwuta, mulasama zisani zyaboya bwambelele, mulajaya banyama baneneede kapati,+ pele bwalo butanga tamubusanini pe.+ 4 Kunyina nomwaziyumya eezyo zinyina nguzu naa kuponya zyeezyo ziciswa naa kwaanga zyeezyo ziliciside naa kujola zyeezyo ziingaila nokuba kuyandaula zyeezyo zisweekede;+ muciindi caboobo, mwazyeendelezya calunya alimwi mwazidyaaminina.+ 5 Aboobo zyakamwaika akaambo kakuti kwakanyina mweembezi;+ zyakamwaika eelyo zyakaba cakulya cabanyama boonse bamusyokwe. 6 Mbelele zyangu zyakali kwiingaila mumalundu oonse amutulundu tulamfwu toonse; mbelele zyangu zyakamwaika munyika yoonse, kakutakwe muntu uuziyandaula naa uuzilangaula kuti azijane.

7 “‘“Aboobo, nywebo nobeembezi, amumvwe jwi lya Jehova: 8 ‘“Masimpe, mebo mbondili muumi,” mbwaamba Mwami Singuzuzyoonse Jehova, “akaambo kakuti mbelele zyangu zyaba zyakwiile kuluma, zyaba cakulya cabanyama boonse bamusyokwe, mbokunga kwanyina mweembezi, alimwi beembezi bangu tiibaziyandaula mbelele zyangu; pele baluujisi kulisanina beni, tiibazisanina mbelele zyangu,”’ 9 nkokuti, nywebo nobeembezi amumvwe jwi lya Jehova. 10 Mboobu mbwaamba Mwami Singuzuzyoonse Jehova: ‘Amubone ndaba sikulwana beembezi, aboobo ndiyoobabuzya kuti balyaambilile beni kujatikizya mbelele zyangu, ndiyoobalesya kusanina* mbelele zyangu,+ eelyo beembezi tabacinoolisanini beni pe. Ndiyoofwutula mbelele zyangu kumilomo yabo, eelyo tazicinooli cakulya cabo.’”

11 “‘Aboobo, mboobu mbwaamba Mwami Singuzuzyoonse Jehova: “Amubone, mebo lwangu ndiyooziyandaula mbelele zyangu akuzilanganya.+ 12 Ndiyoolanganya mbelele zyangu mbomunya mbwacita mweembezi wajana mbelele zyakwe zimwaikide alimwi uuzisanina.+ Ndiyoozifwutula kuzwa kumasena oonse nkozyakamwaikilide mubuzuba bwamakumbi alimwi amudima uusiya mbi.+ 13 Ndiyoozigwisya akati kabantu bambi akuzibunganya antoomwe kuzwa kuzisi zimbi mpoonya ndiyoozileta mucisi canzizyo akuzisanina mumalundu aa Israyeli,+ kumbali aatulonga amumasena oonse aakukkala mucisi. 14 Ndiyoozisanina mumacelelo mabotu, ayalo nyika mozinoocelela inooli atala aamalundu malamfwu aa Israyeli.+ Ziyakoona* mumacelelo mabotu,+ alimwi ziyoolya bwizu bubotu kapati mumalundu aa Israyeli.”

15 “‘“Mebo lwangu ndiyoozisanina mbelele zyangu,+ alimwi mebo lwangu ndiyoopa kuti zyoone,”+ mbwaamba Mwami Singuzuzyoonse Jehova. 16 “Eeyo iisweekede ndiyakwiiyandaula,+ eeyo yiingaila ndiyakwiijola, eeyo iiliciside ndiyooyaanga, alimwi eeyo iitajisi nguzu ndiyakwiiyumya; pele eeyo iineneede ayeeyo iijisi nguzu ndiyakwiijaya. Ndiyakwiisanina lubeta.”

17 “‘Nywebo nombelele zyangu, mboobu mbwaamba Mwami Singuzuzyoonse Jehova: “Ndili afwaafwi kubeteka makani aambelele imwi ambelelenyina, makani aabagutu abajembwe.+ 18 Sena tamunakkuta kucelela mumacelelo mabotu kapati? Sena alimwi mweelede kwaalyatauka amaulu macelelo aanu ambi? Alimwi mwamana kunywa maanzi mabotu aabalangala, sena mweelede kwaabisya maanzi aayo kwiinda mukwaavwundaula amaulu aanu? 19 Sena lino mbelele zyangu zyeelede kucelela mumacelelo aakalyataukwa amaulu aanu akunywa maanzi aakabisyigwa kwiinda mukuvwundaulwa amaulu aanu?”

20 “‘Aboobo mboobu Mwami Singuzuzyoonse Jehova mbwabaambila: “Amubone, mebo lwangu ndiyoobeteka makani aambelele iineneede ambelele iikokede, 21 nkaambo mwaluujisi kuzitonka atusolo twanu alimwi amagwezyo aanu, alimwi ameja aanu mwaluujisi kuzitonkaika eezyo zicisidwe zyoonse kusikila mane mwazimwaila kuzisi zimbi. 22 Aboobo ndiyoozifwutula mbelele zyangu, eelyo tazikalumwi limbi pe;+ ndiyoobeteka makani aambelele imwi ambelelenyina. 23 Ndiyoozibusyila mweembezi omwe,+ mubelesi wangu Davida,+ eelyo uyoozisanina. Walo mwini nguuyoozisanina akuba mweembezi wanzizyo.+ 24 Alimwi mebo, nde Jehova ndiyooba Leza wanzizyo,+ eelyo mubelesi wangu Davida uyooba silutwe akati kanzizyo.+ Mebo lwangu, nde Jehova, ndime ndaamba.

25 “‘“Ndiyoobamba cizuminano caluumuno anzizyo,+ alimwi ndiyoogwisya banyama babutambo mucisi,+ kutegwa zikakkale cakuliiba munkanda akoona muzyoonde.+ 26 Zyalo alimwi abusena buzingulukide kalundu kangu ndiyoozipa kuba cileleko,+ alimwi ndiyoowisya mvwula aciindi ceelede. Zileleko ziyooloka mbubonya mbuli mvwula.+ 27 Zisamu zyamusyokwe ziyoozyala micelo yazyo, ayalo nyika iyoozyala micelo yayo,+ aboobo ziyookkala cakuliiba mucisi. Eelyo ziyoozyiba kuti ndime Jehova ndaakutyola majoko aanzizyo+ akuzifwutula kuli baabo bakazinjizya mubuzike. 28 Tazikaligwi limbi abantu bamasi, abalo banyama bamusyokwe baanyika tabakazilumi pe, aboobo ziyookkala cakuliiba, kakunyina muntu naba omwe uuziyoosya.+

29 “‘“Ndiyoozisyangila muunda uuli ampuwo, eelyo tazikafwi limbi akaambo kanzala mpati mucisi+ alimwi kunyina limbi noziyoosampaulwa amasi.+ 30 ‘Eelyo ziyoozyiba kuti mebo, nde Jehova Leza wazyo, ndili anzizyo alimwi zyalo, nkokuti bamuŋanda ya Israyeli, mbantu bangu,’+ mbwaamba Mwami Singuzuzyoonse Jehova.”’

31 “‘Lino nywebo, nombelele zyangu,+ nombelele nzyondilanganya, muli bantu buyo, mebo ndime Leza wanu,’ mbwaamba Mwami Singuzuzyoonse Jehova.”

35 Alimwi ijwi lya Jehova lyakandisikila kaliti: 2 “Omwanaamuntu, kolanzya busyu bwako kunyika yamalundu ya Seiri+ wiisinsimine makani mabi.+ 3 Uyaambile kuti, ‘Mboobu mbwaamba Mwami Singuzuzyoonse Jehova: “Bona ndilakulwana yebo onyika yamalundu ya Seiri, aboobo ndiyootandabika janza lyangu kulinduwe akukupa kuba matongo.+ 4 Minzi yako ndiyakwiisandula kuba matongo, alimwi yebo uyooba matongo;+ eelyo uyoozyiba kuti ndime Jehova. 5 Nkaambo tonookaleka pe kutondezya lusulo+ alimwi wakaaba bana Israyeli kupanga kuciindi camapenzi aabo, iciindi nobakasubulwa lwamamanino.”’+

6 “‘Aboobo, mbubonya mebo mbondili muumi,’ mbwaamba Mwami Singuzuzyoonse Jehova, ‘ndiyookwaaba kutegwa bulowa bwako butike, eelyo kutila bulowa kuyookutobela.+ Mbokunga wakasulaika bulowa,* kutila bulowa kuyookutobela.+ 7 Ndiyoopa kuti nyika yamalundu ya Seiri ibe matongo,+ alimwi ndiyoojaya muntu woonse wiinda mulinjiyo amuntu woonse uujokela mumo. 8 Malundu aanjiyo ndiyakwaazuzya bantu bajaidwe; alimwi aabo bajaigwa apanga bayoowida atulundu twako, mumakkuti aako alimwi amutulonga twako toonse. 9 Ndiyookupa kuba matongo lyoonse alyoonse, alimwi minzi yako taikakkalwi limbi abantu pe;+ eelyo uyoozyiba kuti ndime Jehova.’

10 “Mbokunga yebo wakaamba kuti, ‘Masi aaya obilo azisi eezyi zyobilo zilaba zyangu, alimwi zyoonse zyobilo tulazibweza zibe zyesu,’+ nokuba kuti Jehova lwakwe wakaliko, 11 ‘nkokuti mbubonya mebo mbondili muumi,’ mbwaamba Mwami Singuzuzyoonse Jehova, ‘ndiyookucitila kweelana abukali alimwi amunyono ngookatondezya yebo nowakali kubasulaika;+ aboobo ndiyoopa kuti bandizyibe ciindi ndaakukubeteka. 12 Mpoonya uyoozyiba kuti mebo, nde Jehova, ndaamvwa matusi oonse ngookaamba kujatikizya malundu aa Israyeli nowakaamba kuti, “Anyonyoonwa akwaabwa kulindiswe kuti twaamene.”* 13 Yebo wakaambaula cakulisumpula kulindime alimwi wakavwuzya majwi aako aakundisampaula.+ Oonse buyo ndakaamvwa.’

14 “Mboobu mbwaamba Mwami Singuzuzyoonse Jehova: ‘Nyika yoonse iyookondwa yebo ndaakukupa kuba matongo. 15 Mbubonya yebo mbookakondwa eelyo lukono lwabamuŋanda ya Israyeli nolwakanyonyoonwa akuba matongo, mbondiyookucitila anduwe.+ Uyooba matongo, yebo onyika yamalundu ya Seiri, inzya, yebo ocisi ca Edomu coonse;+ eelyo bayoozyiba kuti ndime Jehova.’”

36 “Lino yebo omwanaamuntu, kosinsima kujatikizya malundu aa Israyeli, waambe kuti, ‘Nomalundu aa Israyeli, amumvwe jwi lya Jehova. 2 Mboobu mbwaamba Mwami Singuzuzyoonse Jehova: “Sinkondonyoko wamwaambila kuti, ‘Ehee! Naaba malundu aansiku lino aba eesu!’”’+

3 “Aboobo, kosinsima waambe kuti, ‘Mboobu mbwaamba Mwami Singuzuzyoonse Jehova: “Akaambo kakuti nywebo bamusaala akumulwana kumabazu oonse kutegwa mube mumaanza aabaabo bafwutuka* kuzwa akati kabantu bamasi, alimwi akaambo kakuti bantu baluujisi kumwaamba akumujaila zina,+ 4 nkokuti, nywebo nomalundu aa Israyeli, amumvwe jwi lya Mwami Singuzuzyoonse Jehova! Mboobu Mwami Singuzuzyoonse Jehova mbwaambila malundu atulundu-lundu, tulonga amakkuti, matongo aatakwe cintu cili coonse,+ alimwi aminzi yakasiigwa eeyo yakasaalwa akusampaulwa abantu bakafwutuka bamumasi aabazingulukide;+ 5 inzya mboobu Mwami Singuzuzyoonse Jehova mbwaambila zintu eezyi: ‘Mubusungu bwangu buvwilima+ ndiyakwaamba majwi aabukali kubantu bamumasi ibafwutuka alimwi akucisi coonse ca Edomu, aabo ibali kusekelela kapati alimwi akufwubaazya kapati+ ciindi nibali kulipa cisi cangu, kuti babweze macelelo aancico akucisaala.’”’+

6 “Aboobo, kosinsima kujatikizya cisi ca Israyeli, waambile malundu atulundu-lundu, tulonga amakkuti kuti, ‘Mboobu mbwaamba Mwami Singuzuzyoonse Jehova: “Amubone! Ndilaamba mubusungu bwangu amubukali bwangu, akaambo kamasampu aayo ngomunyamwide aazwa kumasi.”’+

7 “Aboobo mboobu mbwaamba Mwami Singuzuzyoonse Jehova: ‘Mebo lwangu ndatambika janza mujulu akukonka kuti masi aazingulukide ayoolinyamuda masampu aangawo.+ 8 Pele nywebo, nomalundu aa Israyeli muyooba amitabi akubazyalila micelo bantu bangu ba Israyeli,+ nkaambo balapiluka ino-ino. 9 Nkaambo mebo ndilaandinywe, ndiyoomucebuka, eelyo muyoolimwa akusyangwa mbuto. 10 Ndiyoobavwuzya bantu banu—bamuŋanda ya Israyeli yoonse, boonse buyo—eelyo minzi iyookkalwa bantu+ aalo matongo ayooyakululwa.+ 11 Inzya, ndiyoovwuzya bantu banu alimwi abanyama banu bavwubwa;+ bayoovwula akuzyalisya. Ndiyoopa kuti nywebo mukkalwe abantu mbubonya mbuli kaindi,+ alimwi ndiyoomuvwubya kwiinda mazuba aakaindi;+ eelyo muyoozyiba kuti ndime Jehova.+ 12 Ndiyoopa kuti bantu—nkokuti bantu bangu ba Israyeli—beendeende mulindinywe akumubweza kuti mube babo.+ Muyooba lukono lwabo, eelyo kunyina limbi nomuyoobapa kubula bana.’”+

13 “Mboobu mbwaamba Mwami Singuzuzyoonse Jehova: ‘Akaambo kakuti bamwaambila kuti, “Nywebo muli nyika iilya bantu akujaya bana bamasi aanu,”’ 14 ‘nkokuti kunyina nomuyoobalya limbi bantu naa kupa kuti masi aanu abule bana,’ mbwaamba Mwami Singuzuzyoonse Jehova. 15 ‘Tandikamupi limbi kutukilwa amasi naa kumupa kunyamuna masampu ngobaamba bantu,+ alimwi kunyina limbi nomuyoowisya masi aanu,’ mbwaamba Mwami Singuzuzyoonse Jehova.”

16 Alimwi ijwi lya Jehova lyakandisikila kaliti: 17 “Omwanaamuntu, ciindi bamuŋanda ya Israyeli nobakali kukkala mucisi cabo, bakacisofwaazya anzila zyabo alimwi amicito yabo.+ Mumeso aangu inzila zyabo zyakali mbuli busofwaazi bwamukaintu uuli kumwezi.+ 18 Aboobo ndakabatila bukali bwangu akaambo kabulowa mbobakatila mucisi,+ alimwi akaambo kakuti bakasofwaazya cisi amituni yabo iisesemya.*+ 19 Aboobo ndakabamwaya akati kamasi akubapalanganya muzisi zimbi.+ Ndakababeteka kweelana anzila yabo alimwi akweelana amicito yabo. 20 Pele nobakasika kumasi aayo, bantu bakasampaula zina lyangu lisalala+ kwiinda mukubaamba kuti, ‘Aaba mbantu ba Jehova, nokuba boobo bakatandwa mucisi cakwe.’ 21 Aboobo, ndiyoolibikkila maano zina lyangu lisalala, eelyo ndyobasampaula bamuŋanda ya Israyeli akati kamasi ooko nkobaunka.”+

22 “Aboobo kobaambila bamuŋanda ya Israyeli kuti, ‘Mboobu mbwaamba Mwami Singuzuzyoonse Jehova: “Tandikoobweza ntaamu akaambo kandinywe, nywebo nobamuŋanda ya Israyeli, pele ndilacita oobo akaambo kazina lyangu lisalala, eelyo ndimwasampaula akati kamasi ooko nkomwaunka.”’+ 23 ‘Masimpe, ndiyoolisalazya zina lyangu lipati,+ eelyo lyakasampaulwa akati kamasi, inzya eelyo ndimwakasampaula mulingawo; aboobo masi ayoozyiba kuti ndime Jehova,’+ mbwaamba Mwami Singuzuzyoonse Jehova, ‘ciindi ndaakusalazyigwa akati kanu balo kabalangilila. 24 Ndiyoomugwisya akati kamasi akumuyobolola kuzwa muzisi zyoonse akumuleta mucisi canu.+ 25 Ndiyoomusansaila maanzi aanyina tombe, eelyo muyoosalala;+ ndiyoomusalazya kubusofwaazi bwanu boonse+ alimwi akumituni yanu iisesemya yoonse.+ 26 Ndiyoomupa moyo mupya+ akubikka muuya mupya mulindinywe.+ Ndiyoogwisya moyo muyumu nta mbuli bbwe+ mumubili wanu akumupa moyo muteteete wanyama.* 27 Ndiyoobikka muuya wangu mulindinywe, alimwi ndiyoomupa kweenda mumilawo yangu,+ eelyo muyootobela akucita mbeta zyangu. 28 Aboobo muyookkala mucisi ncondakapa bamauso, alimwi muyooba bantu bangu andime ndiyooba Leza wanu.’+

29 “‘Ndiyoomufwutula kubusofwaazi bwanu boonse alimwi ndiyakwiita maila akwaavwuzya kapati, alimwi tandikamuleteli nzala pe.+ 30 Ndiyoopa kuti micelo yazisamu abutebuzi bwamumyuunda zivwule, kutegwa mutakasampuki limbi akaambo kanzala akati kamasi.+ 31 Aboobo muyooziyeeya nzila zyanu zibyaabi amicito yanu eeyo yatakali mibotu, eelyo muyoolisesemwa nobeni akaambo kamulandu wanu amicito yanu iisesemya.+ 32 Pele amuzyibe kuti: Tandili mukucita boobu akaambo kandinywe pe,’+ mbwaamba Mwami Singuzuzyoonse Jehova. ‘Muciindi caboobo, amulisende akufwa nsoni akaambo kanzila zyanu, nywebo nobamuŋanda ya Israyeli.’

33 “Mboobu mbwaamba Mwami Singuzuzyoonse Jehova: ‘Mubuzuba mbondiyoomusalazya kumilandu yanu yoonse, ndiyoopa kuti minzi ikkalwe abantu+ akuti matongo ayakululwe.+ 34 Inyika iinyonyookede, eeyo iyali matongo njobali kubona bantu boonse bainda, iyoolimwa. 35 Eelyo bantu bayakwaamba kuti: “Inyika yakanyonyookede yaba mbuli muunda wa Edeni,+ ayalo minzi eeyo iyakali matongo alimwi iyakanyonyoonwa akukolomonwa lino yaba minzi iikwabilidwe alimwi iikkalwa abantu.”+ 36 Aboobo masi aasyeede aayo aamuzingulukide ayoozyiba kuti mebo lwangu, nde Jehova, ndime ndayakulula ceeco cakakolomonwa, akusyangulula ceeco cakanyonyoonwa. Mebo lwangu, nde Jehova, ndime ndaamba alimwi ndime ndacicita.’+

37 “Mboobu mbwaamba Mwami Singuzuzyoonse Jehova: ‘Kuyungizya waawo, bamuŋanda ya Israyeli ndiyoobaleka kuti bandilombe kubacitila cintu eeci: Ndiyoovwuzya bantu babo mbuli butanga bwambelele. 38 Mbubonya mbuli butanga bwabasalali, mbuli butanga bwamunzi wa Jerusalemu* kuciindi camapobwe aanguwo,+ iminzi eeyo iyakali matongo iyoozula makamu aabantu;+ eelyo bayoozyiba kuti ndime Jehova.’”

37 Ijanza lya Jehova lyakali alindime, eelyo kwiinda mumuuya wakwe Jehova wakandibweza akuyoondiimika akati kacibanda camukkuti+ icakazwide mafwuwa. 2 Wakandipa kweendeenda koonse-koonse cakwaazinguluka, eelyo ndakabona kuti kwakali mafwuwa manji kapati aakaalabene mucibanda camukkuti, alimwi akali mayumu kapati.+ 3 Mpoonya wakandibuzya kuti: “Omwanaamuntu, sena mafwuwa aaya alakonzya kupona alimwi?” Ndakaingula kuti: “O Mwami Singuzuzyoonse Jehova, yebo nduwe oozyi.”+ 4 Aboobo wakandaambila kuti: “Koasinsimina mafwuwa aaya, akwaambila kuti, ‘Nywebo nomafwuwa mayumu, amumvwe jwi lya Jehova:

5 “‘Mboobu Mwami Singuzuzyoonse Jehova mbwaambila mafwuwa aaya: “Ndilapa kuti muya umunjile, eelyo mulatalika kupona.+ 6 Ndilamubikka milambi anyama, ndilamuvwumba lukanda akunjizya muya mulindinywe, mpoonya mulatalika kupona; eelyo mulazyiba kuti ndime Jehova.”’”

7 Mpoonya ndakasinsima mbubonya mbondakalaililwa. Lino mbondakasinsimina buyo, kwakamvwugwa kusabila, kusokonya, eelyo mafwuwa akatalika kunungana, cifwuwa cimwi kucifwuwanyina. 8 Mpoonya ndakabona milambi anyama kazimena alingawo, kumane lukanda lwakaavwumba mafwuwa. Pele tanaakaningaba amuya.

9 Mpoonya wakandaambila kuti: “Kosinsimina muwo. Kosinsima, omwanaamuntu, waambile muwo kuti, ‘Mboobu mbwaamba Mwami Singuzuzyoonse Jehova: “Boola kuzwa kumyuwo yone, yebo omuwo, wuunge abantu aaba bakajaigwa, ikutegwa batalike kupona alimwi.”’”

10 Aboobo ndakasinsima mbubonya mbwaakandilailila, eelyo muya* wakabanjila, mpoonya bakatalika kupona alimwi bakaimikila,+ yakali impi mpati kapati.

11 Eelyo wakandaambila kuti: “Omwanaamuntu, imafwuwa aaya mbantu bamuŋanda ya Israyeli yoonse.+ Baamba kuti, ‘Mafwuwa eesu mayumu, alimwi bulangizi bwesu bwaloba.+ Twazandulwa cakumaninina.’ 12 Aboobo kosinsima, ubaambile kuti, ‘Mboobu mbwaamba Mwami Singuzuzyoonse Jehova: “Ndiyoozijalula zyuumbwe zyanu+ akumubusya kuzwa mulinzizyo, nobantu bangu, akumuleta mucisi ca Israyeli.+ 13 Eelyo muyoozyiba kuti ndime Jehova ndaakujalula zyuumbwe zyanu akumubusya kuzwa mulinzizyo, nywebo nobantu bangu.”’+ 14 ‘Ndiyoobikka muuya wangu mulindinywe, muyootalika kupona,+ alimwi ndiyoomukkazika mucisi canu; eelyo muyoozyiba kuti mebo lwangu, nde Jehova, ndime ndaamba alimwi ndime ndacicita,’ mbwaamba Jehova.”

15 Alimwi ijwi lya Jehova lyakandisikila kaliti: 16 “Lino yebo, omwanaamuntu, kobweza kasamu, ulembe alinkako kuti, ‘Nkika Juda abantu ba Israyeli aabo balaanguwe.’*+ Mpoonya ubweze kasamu kambi, ulembe aali nkako kuti, ‘Nkika Josefa, nkasamu ka Efraimu, abamuŋanda ya Israyeli boonse ibalaanguwe.’*+ 17 Mpoonya kotuswaanganya kutegwa tube kasamu komwe buyo mujanza lyako.+ 18 Lino kuti bantu bako bakubuzye kuti, ‘Sena tokootwaambila ncozyaamba zintu eezyi?’ 19 ubaambile kuti, ‘Mboobu mbwaamba Mwami Singuzuzyoonse Jehova: “Ndiyoobweza kasamu ka Josefa, aako kali mujanza lya Efraimu, amisyobo ya Israyeli eeyo iilaanguwe, eelyo ndiyoobaswaanganya kukasamu ka Juda; alimwi ndiyootupa kuti tube kasamu komwe buyo,+ tuyooba kasamu komwe mujanza lyangu.”’ 20 Tusamu ntolembede tweelede kuba mujanza lyako kutegwa batubone.

21 “Mpoonya ubaambile kuti, ‘Mboobu mbwaamba Mwami Singuzuzyoonse Jehova: “Ndiyoogwisya bana Israyeli akati kamasi ooko nkobaunka, ndiyoobayobolola antoomwe kuzwa kumabazu oonse akubaleta mucisi cabo.+ 22 Eelyo ndiyoopa kuti babe cisi comwe munyika,+ mumalundu aa Israyeli, bayakweendelezyegwa amwami omwe,+ tabacinooli zisi zyobilo; nokuba kwaandaanizyigwa limbi mumami obilo.+ 23 Tabakalisofwaazyi limbi amituni yabo iisesemya,* amicito yabo iisesemya, alimwi azinyonyoono zyabo zyoonse.+ Ndiyoobafwutula kukutasyomeka kwabo koonse ooko kwakabapa kubisya, alimwi ndiyoobasalazya. Bayooba bantu bangu, eelyo andime ndiyooba Leza wabo.+

24 “‘“Mubelesi wangu Davida uyooba mwami wabo,+ eelyo boonse bayooba amweembezi omwe buyo.+ Bayakweenda kabatobela mbeta zyangu alimwi akwiibamba cakulomya milawo yangu.+ 25 Bayookkala mucisi ncondakapa mubelesi wangu Jakobo, oomo imwakali kukkala bamauso,+ eelyo bayookkala mulincico mane kukabe kutamani,+ balo abana babo alimwi abana babana babo;+ alimwi Davida mubelesi wangu uyooba silutwe wabo mane kukabe kutamani.+

26 “‘“Ndiyoopanga cizuminano caluumuno ambabo;+ cinooli cizuminano citamani ambabo. Ndiyoobakkazikizya akubavwuzya+ alimwi akubikka cikombelo cangu akati kabo mane kukabe kutamani. 27 Tente* lyangu linooli ambabo, ndiyooba Leza wabo, abalo bayooba bantu bangu.+ 28 Eelyo masi ayoozyiba kuti mebo, nde Jehova, ndime ndibasalazya bana Israyeli ciindi cikombelo cangu nocili akati kabo lyoonse mane kukabe kutamani.”’”+

38 Alimwi ijwi lya Jehova lyakandisikila kaliti: 2 “Omwanaamuntu, kolanzya busyu bwako kuli Gogo wakucisi ca Magogo,+ silutwe mupati wa Meseki a Tubali,+ umusinsimine makani mabi.+ 3 Waambe kuti, ‘Mboobu mbwaamba Mwami Singuzuzyoonse Jehova: “Bona ndilakulwana, yebo O Gogo, silutwe mupati wa Meseki a Tubali. 4 Ndiyookunyona akukubikka tulobyo mumyeebo yako+ eelyo ndiyookuleta yebo alimwi ampi yako yoonse yabasikalumamba,+ mabbiza abasimabbiza, boonse buyo kabasamide zisani zibotu kapati, nkamu mpati, kabajisi ntobo zipati aziniini, boonse kabajisi mapanga; 5 bana Persia, bana Etiopiya alimwi abana Puti+ bali ambabo, boonse buyo bajisi ntobo ziniini-niini azimpoompo; 6 Cisi ca Gomeri abasikalumamba bancico boonse, bamuŋanda ya Togarima+ kuzwa kumasena aakulamfwu ooko kunyika, antoomwe abasikalumamba babo boonse, nkokuti bantu banji kapati mbomuli limwi.+

7 “‘“Amulibambile, inzya amulibambile, yebo ampi zyako zyoonse eezyo zibungene anduwe, eelyo yebo unooli mweendelezi* wanzizyo.

8 “‘“Yebo uyoolangwa-langwa* kwaakwiinda mazuba manji. Kumamanino aamyaka uyoolwana cisi cabantu ibakavwunwa kukunyonyoonwa apanga, aabo bakayobololwa antoomwe kuzwa akati kabantu banji bamisyobo iimbi akuletwa kumalundu aa Israyeli, aayo aakanyonyookede kwaciindi cilamfwu. Bantu ibakkala mucisi eeci bakapilusyigwa kuzwa akati kabantu bamisyobo iimbi, alimwi boonse buyo bakkede muluumuno.+ 9 Yebo uyooboola kubalwana mbuli guwo, uyoovwumba cisi mbuli makumbi, inzya yebo abasikalumamba bako boonse alimwi abantu banji bamisyobo iimbi mbomuli limwi.”’

10 “Mboobu mbwaamba Mwami Singuzuzyoonse Jehova: ‘Mubuzuba oobo, mizeezo iyooboola mumoyo wako, eelyo uyooyeeya kucita cintu cibi. 11 Yebo uyakwaamba kuti: “Ndilalwana cisi cijisi minzi iitakwabilidwe.+ Ndilaunka kuyoolwana baabo bakkede muluumuno, kakunyina kunyonganizyigwa, aabo boonse ibakkala muminzi iitakwabilidwe abwaanda, iitajisi mpingizyo naa zijazyo zyamilyango.” 12 Unoojisi makanze aakusaala akubweza zintu zinji, makanze aakulwana masena aakanyonyookede aayo lino aakkedwe bantu+ akulwana bantu ibakayobololwa kuzwa kuzisi zimbi,+ aabo ibaliyungizyila lubono abuvwubi,+ inzya aabo ibakkala akati eeni aanyika.

13 “‘Bana Sheba,+ bana Dedani,+ basimakwebo baku Tarisi+ abasikalumamba bankuko boonse bayookubuzya kuti: “Sena yebo ulwanina kuti usaale akubweza zintu zinji? Sena wabunganya impi zyako zyabasikalumamba kuti ubweze nsiliva angolida, kuti ubweze lubono abuvwubi, akuti usaale zintu zinji kapati?”’

14 “Aboobo kosinsima, yebo omwanaamuntu, waambile Gogo kuti, ‘Mboobu mbwaamba Mwami Singuzuzyoonse Jehova: “Ibuzuba oobo bantu bangu bana Israyeli nobayookkala muluumuno, sena yebo tokazyibi?+ 15 Yebo uyooboola kuzwa kubusena bwako, kuzwa kumasena aakulamfwu ooko kunyika,+ yebo alimwi abantu banji ibalaanduwe, boonse buyo kabatantide mabbiza, inkamu mpati, inzya impi mpati yabasikalumamba.+ 16 Mbuli makumbi aavwumba cisi, yebo uyooboola kuzoolwana bantu bangu ba Israyeli. Kumamanino aamazuba ndiyookuleta kuti ulwane cisi cangu+ kutegwa zisi zikandizyibe ciindi mebo ndaakulisalazya kazilangilila kwiinda mulinduwe, yebo O Gogo.”’+

17 “Mboobu mbwaamba Mwami Singuzuzyoonse Jehova: ‘Sena yebo toli nduwe ngomunya uulya ngondakaamba kumazuba aainda kwiinda mubabelesi bangu, ibasinsimi ba Israyeli, aabo ibakali kusinsima kwamyaka minji kuti yebo uyooletwa kuti uzoobalwane?’

18 “‘Mubuzuba oobo, ibuzuba Gogo aakulwana cisi ca Israyeli,’ mbwaamba Mwami Singuzuzyoonse Jehova, ‘bukali bwangu bupati buyoovwutuka.+ 19 Ndiyakwaambaula mubusungu bwangu, inzya mumulilo wakunyema kwangu; eelyo mubuzuba oobo kuyooba muzuzumo wanyika mupati mucisi ca Israyeli. 20 Akaambo kandime, inswi zyamulwizi, bayuni bauluka mujulu, banyama bamusyokwe, abanyama boonse bakalaba ansi, alimwi abantu boonse bali anyika bayoozuzuma, aalo malundu ayoomwaigwa,+ majeleele ayookolomonwa, amalambo oonse ayoowida ansi.’

21 “‘Ndiyoopa kuti panga limulwane atala aazilundu zyangu zyoonse,’ mbwaamba Mwami Singuzuzyoonse Jehova. ‘Panga lyamuntu umwi aumwi liyoolwana mwanookwabo.+ 22 Ndiyoomubeteka azilwazi+ alimwi abulowa; ndiyoolosya mvwula yamucobocobo, civwulamabwe,+ mulilo,+ alimwi asulufa+ aalinguwe alimwi aali basikalumamba bakwe, aabantu banji mbanooli limwi.+ 23 Ncobeni ndiyoopa kuti bulemu bwangu bubonwe alimwi mebo ndiyoolisalazya akupa kuti ndizyibwe mumeso aazisi zinji; eelyo bayoozyiba kuti ndime Jehova.’

39 “Lino yebo, omwanaamuntu, kosinsima makani mabi kuli Gogo,+ umwaambile kuti, ‘Mboobu mbwaamba Mwami Singuzuzyoonse Jehova: “Ndilakulwana yebo, O Gogo, silutwe mupati wa Meseki a Tubali.+ 2 Ndiyookunyona, ndiyookukwelaanya alimwi ndiyookugwisya kumasena aakulamfwu ooko kunyika+ akukuleta kumalundu aa Israyeli. 3 Ndiyoobuuma akubulosya buta buli mujanza lyako lyalumwensyi, alimwi ndiyakwiilosya mivwi iili mujanza lyako lyalulyo. 4 Uyoowida aamalundu+ aa Israyeli, yebo abasikalumamba bako boonse alimwi abantu aabo banooli anduwe. Ndiyookupa kuba cakulya camisyobo yoonse yabayuni balya nyama alimwi acabanyama bamusyokwe.”’+

5 “‘Yebo uyoowida musyokwe,+ nkaambo mebo lwangu ndime ndaamba,’ mbwaamba Mwami Singuzuzyoonse Jehova.

6 “‘Ndiyootuma mulilo kucisi ca Magogo akuli baabo bakkede cakuliiba+ munsumbu, eelyo bayoozyiba kuti ndime Jehova. 7 Ndiyoopa kuti zina lyangu lisalala lizyibwe akati kabantu bangu ba Israyeli, alimwi tandikazumizyi limbi kuti zina lyangu lisalala lisampaulwe; eelyo masi ayoozyiba kuti ndime Jehova,+ Uusalala mu Israyeli.’+

8 “‘Masimpe, eeci cilaboola alimwi ciyoocitika,’ mbwaamba Mwami Singuzuzyoonse Jehova. ‘Oobu mbobuzuba mbondali kwaamba. 9 Bantu bakkala muminzi ya Israyeli bayakuunka kuyookunka mulilo kubelesya zilwanyo, nkokuti ntobo ziniini-niini azipati, mata amivwi, nkoli amasumo. Bayoozibelesya kukunka mulilo+ kwamyaka iili ciloba. 10 Tabakayandiki kuunka musyokwe kuyoobwezelela tukuni naa kutebba nkuni muzisaka, nkaambo bayoobelesya zilwanyo kukunka mulilo.’

“‘Bayoobweza zintu nzyobakasaala aabo ibakabasaala, akubweza zintu nzyobakabba aabo ibakali kubabbida,’ mbwaamba Mwami Singuzuzyoonse Jehova.

11 “‘Mubuzuba oobo Gogo+ ndiyoomupa busena bwakuzikkilwa mucisi ca Israyeli, mukkuti lyabaabo beenda kuya kujwe kwalwizi, eelyo liyoosinka nzila yabaabo bainda mulindilyo. Oomo momumo mobayoomuzikkila Gogo amakamu aakwe oonse, alimwi bayooliita kuti Kkuti lya Hamoni-Gogo.*+ 12 Bamuŋanda ya Israyeli bayootola myezi iili ciloba kubazikka kutegwa basalazye cisi.+ 13 Bantu boonse bamucisi banoojisi mulimo wakubazikka, eelyo eeci ciyoobaletela mpuwo mubuzuba mbondiyoopa kuti ndilemekwe,’+ mbwaamba Mwami Singuzuzyoonse Jehova.

14 “‘Baalumi bayootumwa kuti kabayabweendeenda mucisi coonse akuzikka mitunta iinakwaalabene atala aanyika, kutegwa baisalazye. Banakuujisi kuyandaula kwamyezi iili ciloba. 15 Kufwumbwa ciindi aabo beendeenda mucisi baakubona cifwuwa camuntu, bayoobikka citondezyo kumbali lyancico. Mpoonya aabo bapedwe mulimo wakuzikka bayoocizikka mu Kkuti lya Hamoni-Gogo.+ 16 Kuyungizya waawo, ooko kuyooba munzi uutegwa Hamona.* Aboobo oobu mbobayoocisalazya cisi.’+

17 “Lino yebo, omwanaamuntu, mboobu mbwaamba Mwami Singuzuzyoonse Jehova: ‘Ambila misyobo yoonse yabayuni alimwi abanyama boonse bamusyokwe kuti, “Amulibunge-bunge antoomwe, muboole. Amubungane ikuzinguluka cipaizyo cangu, eeco ncondimubambila, icipaizyo cipati atala aamalundu aa Israyeli.+ Nywebo muyoolya nyama akunywa bulowa.+ 18 Muyoolya nyama yabasinguzu, akunywa bulowa bwabasilutwe bamunyika, nkokuti bagutu, bana bambelele, mpongo alimwi abapoho, inzya banyama boonse baneneede baku Basani. 19 Muyakwaalya citaambiki mafwuta alimwi akunywa bulowa kusikila mane mukakolwe cipaizyo ncondimubambila.”’

20 “‘Kutebulu lyangu muyookkuta nyama yamabbiza alimwi ayabasikweenzya nkalaki, yabasinguzu alimwi anyama yabasikalumamba bamisyobo yoonse,’+ mbwaamba Mwami Singuzuzyoonse Jehova.

21 “‘Ndiyoopa kuti bulemu bwangu bulibonye akati kamasi, eelyo masi oonse ayoobona cisubulo ncondapa alimwi anguzu nzyondatondezya mulingawo.+ 22 Kuzwa mubuzuba oobo kuya kumbele, bamuŋanda ya Israyeli bayoozyiba kuti mebo ndime Jehova Leza wabo. 23 Eelyo masi ayoozyiba kuti icakapa kuti bamuŋanda ya Israyeli batolwe mubuzike ncinyonyoono cabo beni, nkaambo tiibakasyomeka kulindime.+ Aboobo ndakabasisa busyu bwangu+ akubaaba mumaanza aabasinkondonyina,+ eelyo boonse buyo bakajaigwa apanga. 24 Ndakabacitila kweelana abusofwaazi bwabo alimwi amilandu yabo, alimwi ndakabasisa busyu bwangu.’

25 “Aboobo mboobu mbwaamba Mwami Singuzuzyoonse Jehova: ‘Ndiyoobapilusya bantu baangidwe ba Jakobo+ akubafwida luse bamuŋanda ya Israyeli boonse;+ alimwi cabusungu ndiyakwiiminina zina lyangu lisalala.+ 26 Baakumana kusampaulwa akaambo kamicito yabo yoonse yakutasyomeka kulindime,+ bayookkala mucisi cabo, kakunyina uubayoosya.+ 27 Ndaakubapilusya kuzwa akati kabantu bambi akubayobolola antoomwe kuzwa muzisi zyabasinkondonyina,+ ambebo ndiyoolisalazya akati kabo mumeso aamasi manji.’+

28 “‘Bayoozyiba kuti mebo ndime Jehova Leza wabo ciindi ndaakubapa kutolwa mubuzike akati kamasi mpoonya akubayobolola kuti bajokele kucisi cabo, kakunyina muntu naba omwe akati kabo uuyoosiigwa.+ 29 Tandikabasisi kabili busyu bwangu,+ nkaambo ndiyootila muuya wangu aali bamuŋanda ya Israyeli,’+ mbwaamba Mwami Singuzuzyoonse Jehova.”

40 Mumwaka wa 25 katuli mubuzike,+ kumatalikilo aamwaka, mubuzuba bwa 10 bwamwezi, mumwaka wa 14 kuzwa ciindi munzi nowakazundwa,+ mubuzuba oobo mbubonya ijanza lya Jehova lyakali alindime eelyo wakanditola kumunzi.+ 2 Kwiinda muzilengaano zizwa kuli Leza, wakanditola kucisi ca Israyeli akundiimika acilundu cilamfwu kapati,+ eelyo kulubazu lwakumusanza kwakali kulibonya mayake aakali mbuli munzi.

3 Naakandisisya ooko, ndakabona muntu iwakali kulibonya mbuli mukuba.+ Mujanza lyakwe wakajisi ntambo+ yantali zyabutonje alimwi atete* lyakupimya, alimwi wakaimvwi amulyango wakumanjililo. 4 Muntu ooyo wakandaambila kuti: “Omwanaamuntu, kolangisisya, uswiililisye akubikkila maano kuzintu zyoonse nzyonditiikutondezye, nkaambo ncooletelwa okuno. Ubaambile bamuŋanda ya Israyeli zintu zyoonse nzyotiibone.”+

5 Ndakabona bwaanda bwaanze bwakazingulukide tempele. Mujanza lyamuntu ooyo kwakali tete lyakupimya lilampa tukokola tuli cisambomwe (kukakokola kamwi akamwi, kwakayungizyidwe bulamfwu bwabwamba bwajanza).* Wakatalika kupima bwaanda, eelyo bwamba bwambubo bwakali kulampa tete lyomwe abwalo bulamfwu bwambubo bwakuya mujulu bwakali kulampa tete lyomwe.

6 Mpoonya wakaboola kumulyango iwakalangide kujwe,+ akutanta amatantilo aanguwo. Naakapima cikunguzyo camulyango, bwamba bwancico bwakali kulampa tete lyomwe, alimwi bwamba bwacikunguzyo camulyango cimbi abwalo bwakali kulampa tete lyomwe. 7 Bulamfwu bwakaanda kamwi akamwi katwaanda twabalindizi bwakali kulampa tete lyomwe, abwalo bwamba bwakali kulampa tete lyomwe, alimwi kwakali tukokola tosanwe akati katwaanda twabalindizi.+ Icikunguzyo camulyango wakalangene akkoce lyamulyango iwakalangide mukati cakali kulampa tete lyomwe.

8 Wakapima kkoce lyamulyango uulangide mukati, eelyo lyakali kulampa tete lyomwe. 9 Mpoonya wakapima kkoce lyamulyango ilyakali kulampa tukokola tuli lusele; wakapima amisemu yanguwo yakali mumabali, iyakali kulampa tukokola tobilo; lino kkoce lyamulyango lyakali kulubazu lulangide mukati.

10 Kwakali twaanda twabalindizi totatwe kulubazu lumwi alumwi lwamulyango wakujwe. Toonse totatwe twakaleelene kukomena, ayalo misemu yamumabali kulubazu lumwi alumwi yakaleelene.

11 Mpoonya wakapima bwamba bwamanjililo aamulyango ibwakali tukokola tuli 10 ; abwalo bulamfwu bwamulyango bwakali tukokola tuli 13.

12 Ibusena bwakasitilidwe abwaanda kumbele aatwaanda twabalindizi bwakali kakokola komwe mumabazu oonse obilo aambubo. Twaanda twabalindizi mumabazu oonse obilo twakali tukokola tuli cisambomwe kamwi akamwi.

13 Mpoonya wakapima mulyango kuzwa kuciluli cakaanda kabalindizi* kamwi kusikila kuciluli cakaanda kabalindizi kambi, eelyo bwamba bwanguwo bwakali tukokola tuli 25 ; manjililo aamwi akalilangene amanjililo aambi.+ 14 Kumane wakapima misemu yakali mumabali, iyakali kulampa tukokola tuli 60 kuya mujulu, alimwi wakapima amisemu yamumabali iyakali mumilyango yakazingulukide lubuwa loonse. 15 Kuzwa kumbele aamanjililo aamulyango kusikila kumbele aakkoce lyamulyango ooyu nkoulangide mukati kwakali tukokola tuli 50.

16 Mutwaanda twabalindizi alimwi amumisemu yantuto yamumabali eeyo yakali mukati kamulyango kulubazu lumwi alumwi kwakali mawindo mumweenya+ wakali kuyaabuceya kuyaanze. Mukati kamakkoce amwalo mwakali mawindo kulubazu lumwi alumwi, alimwi kwakali zifwanikiso zyatukunka zyakazekawidwe+ amisemu yamumabali.

17 Mpoonya wakandinjizya mulubuwa lwaanze, eelyo ndakabona maanda aakulida+ alimwi anzila yamabwe aayalidwe ikuzinguluka lubuwa oolo. Kwakali maanda aakulida aali 30 kumbali aanzila eeyo. 18 Inzila yamabwe eeyo nkoili kumbali aamilyango yakaleelene abulamfwu bwamilyango, eeyi njiyakali nzila yaansi yamabwe aayalidwe.

19 Mpoonya wakapima bwamba bwabusena buli akati kamulyango waansi nkouli kumbele kusikila kumunyinza walubuwa lwamukati. Bwakali kulampa tukokola tuli 100 kujwe alimwi akunyika.

20 Lubuwa lwaanze lwakajisi mulyango wakalangide kunyika, eelyo wakapima bulamfwu abwamba bwanguwo. 21 Kulubazu lumwi alumwi kwakali twaanda twabalindizi totatwe. Imisemu yanguwo yamumabali alimwi akkoce zyakaleelene azyeezyo zyamulyango wakusaanguna. Wakali tukokola tuli 50 mubulamfwu alimwi atukokola tuli 25 mubwamba. 22 Mawindo aanguwo, ikkoce, zifwanikiso zyanguwo zyatukunka+ zyakaleelene kukomena azyakumulyango wakujwe. Bantu bakali kukonzya kusika kulinguwo kwiinda mukutanta matantilo aali ciloba, alimwi kkoce lyanguwo lyakali kumbele lyanzizyo.

23 Mulubuwa lwamukati kwakali mulyango wakalangene amulyango wakunyika mpoonya uumbi wakalangene amulyango wakujwe. Wakapima busena bwakali akati kamilyango eeyo iyakalangene, kuzwa kumulyango umwi kusikila kumulyango uumbi, eelyo bwakali tukokola tuli 100.

24 Mpoonya wakanditola kumusanza, eelyo ndakabona mulyango kulubazu lwakumusanza.+ Wakapima misemu yanguwo yamumabali aakkoce lyanguwo, eelyo azyalo zyakaleelene azyeezyo zimbi. 25 Kulubazu lumwi alumwi lwanguwo amukkoce kwakali mawindo, aakali mbuli mawindo aayo ambi. Mubulamfwu wakali tukokola tuli 50 mpoonya mubwamba wakali tukokola tuli 25. 26 Kwakali matantilo aali ciloba aakutantila kuya kulinguwo,+ alimwi kkoce lyanguwo lyakali kumbele aangawo. Kumane lyakajisi zifwanikiso zyatukunka zyakazekawidwe amisemu yanguwo yamumabali, musemu omwe kulubazu lumwi alumwi.

27 Lubuwa lwamukati lwakajisi mulyango uulangide kumusanza; eelyo wakapima busena kutozya kumusanza kuzwa kumulyango ooyu kuya kumulyango uumbi, busena oobu bwakali tukokola tuli 100. 28 Kumane wakandinjizya mulubuwa lwamukati kwiinda mumulyango wakumusanza; eelyo naakaupima mulyango wakumusanza, mulyango ooyu wakaleelene amilyango eeyo iimbi. 29 Twaanda twanguwo twabalindizi, amisemu yanguwo yamumabali alimwi akkoce lyanguwo zyakaleelene azyeezyo zyamilyango eeyo iimbi. Kulubazu lumwi alumwi lwanguwo alimwi amukkoce kwakali mawindo. Mubulamfwu wakali tukokola tuli 50 mpoonya mubwamba wakali tukokola tuli 25.+ 30 Kwakali makkoce koonse-koonse; mubulamfwu akali tukokola tuli 25 mpoonya mubwamba akali tukokola tuli 5. 31 Kkoce lyanguwo lyakalangide kulubuwa lwaanze, eelyo misemu yanguwo yamumabali+ yakajisi zifwanikiso zyatukunka zyakazekawidwe, alimwi kwakali amatantilo aali lusele aakutantila kuya kulinguwo.+

32 Naakandinjizya mulubuwa lwamukati kuzwa kujwe, wakapima mulyango, awalo wakaleelene amilyango eeyo iimbi. 33 Twaanda twanguwo twabalindizi, amisemu yanguwo yamumabali alimwi akkoce lyanguwo zyakaleelene azyeezyo zyamilyango eeyo iimbi, alimwi kulubazu lumwi alumwi lwanguwo amukkoce kwakali mawindo. Mubulamfwu wakali tukokola tuli 50 mpoonya mubwamba wakali tukokola tuli 25. 34 Kkoce lyanguwo lyakalangide kulubuwa lwaanze, eelyo misemu yanguwo yoonse yobilo yamumabali yakajisi zifwanikiso zyatukunka zyakazekawidwe, alimwi kwakali amatantilo aali lusele aakutantila kuya kulinguwo.

35 Mpoonya wakandinjizya mumulyango wakunyika+ akuupima; wakaleelene amilyango eeyo iimbi. 36 Twaanda twanguwo twabalindizi, amisemu yanguwo yamumabali alimwi akkoce lyanguwo zyakali buyo mbuli zyeezyo zyamilyango eeyo iimbi. Kulubazu lumwi alumwi lwanguwo kwakali mawindo. Mubulamfwu wakali tukokola tuli 50 mpoonya mubwamba wakali tukokola tuli 25. 37 Misemu yanguwo yakalangide kulubuwa lwaanze, eelyo misemu yanguwo yoonse yobilo yamumabali yakajisi zifwanikiso zyatukunka zyakazekawidwe alinjiyo, alimwi kwakali amatantilo aali lusele aakutantila kuya kulinguwo.

38 Ŋanda yakulida amanjililo aanjiyo yakali afwaafwi amisemu yamulyango, ooko nkobakali kusanzyila zituuzyo zyuumpwa buumbulu.+

39 Kwakali matebulu obilo kumabazu oonse obilo aakkoce lyamulyango aawo mpobakali kujaila zituuzyo zyuumpwa buumbulu,+ zituuzyo zyacibi,+ alimwi azituuzyo zyamilandu.+ 40 Anze, kumanjililo aakali kumatantilo aakuya kumulyango wakunyika, kwakali matebulu obilo. Amwalo mukati, mukkoce lyamulyango mwakali matebulu obilo. 41 Kulubazu lumwi alumwi lwamulyango kwakali matebulu one, nkokuti antoomwe matebulu aali lusele, aawo mpobakali kujaila zipaizyo. 42 Matebulu aayo one aazituuzyo zyuumpwa buumbulu akapangidwe amabwe aacezudwe. Mubulamfwu akali kakokola komwe acisela, mubwamba akali kakokola komwe acisela, mpoonya mubulamfwu bwakuya mujulu akali kakokola komwe. Amatebulu aayo mpampawo mpobakali kuyobola zibelesyo zyakujaisya zituuzyo zyakuumpa, alimwi azipaizyo. 43 Zyaanzikilo zipapalete, zisika kubwamba bwajanza mubufwaafwi, zyakaligagailidwe koonse-koonse kuzinguluka bwaanda bwamukati; alimwi nyama yazipego zituulwa bakali kwiibikka amatebulu.

44 Anze aamulyango wamukati kwakali maanda aakulida aabaimbi;+ akali mukati kalubuwa lwamukati munsi-munsi amulyango wakunyika, akalangide kumusanza. Ŋanda imbi yakulida yakali munsi-munsi amulyango wakujwe, yakalangide kunyika.

45 Wakandaambila kuti: “Eeyi ŋanda yakulida, iilangide kumusanza, njabapaizi ibalanganya milimo yamutempele.+ 46 Iŋanda yakulida iilangide kunyika njabapaizi ibalanganya mulimo wakucipaililo.+ Mbana ba Zadoki,+ ibazwa akati kaba Levi aabo ibapedwe mulimo wakusikila Jehova kuti bamukutaukile.”+

47 Mpoonya wakapima lubuwa lwamukati. Mubulamfwu lwakali tukokola tuli 100, mpoonya mubwamba lwakali tukokola tuli 100, mabazu oonse one akaleelene. Icipaililo cakali kumbele lyatempele.

48 Mpoonya wakandinjizya mukkoce lyatempele,+ kumane wakapima musemu wakkoce iwakali kumbali, lino wakali tukokola tosanwe kulubazu lomwe atukokola tosanwe kulubazu lumbi. Ibwamba bwamulyango bwakali tukokola totatwe kulubazu lumwi atukokola totatwe kulubazu lumbi.

49 Mubulamfwu ikkoce lyakali tukokola tuli 20 mpoonya mubwamba lyakali tukokola tuli 11.* Bantu bakali kusika kulindilyo kwiinda mukutanta matantilo. Kwakali misemu munsi-munsi aminsende yamumabali, omwe kulubazu oolu aumbi kulubazu luya.+

41 Mpoonya wakandinjizya mubusena busalala bwaanze,* eelyo wakapima misemu yamumabali; mubwamba yakali kulampa tukokola* tuli cisambomwe kubbazu eeli alimwi atukokola tuli cisambomwe kubbazu liya limbi. 2 Manjililo aambubo akali tukokola tuli kkumi mubwamba, mpoonya bwaanda ibwakali kumabazu obilo aamanjililo bwakali kulampa tukokola tosanwe kubbazu eeli alimwi atukokola tosanwe kubbazu liya limbi. Wakapima bulamfwu bwabusena busalala, bwakali tukokola tuli 40, mpoonya bwamba bwambubo bwakali tukokola tuli 20.

3 Kumane wakanjila mukati* akupima musemu wamumabali aamanjililo, bupati bwanguwo bwakali kulampa tukokola tobilo, mpoonya manjililo akali tukokola tuli cisambomwe kukomena. Bwaanda bumwi abumwi ibwakali kumabazu oonse obilo aamanjililo bwakali* tukokola tuli ciloba. 4 Kuzwa waawo, wakapima kaanda kamukati mwini ikalangene abusena busalala bwaanze, eelyo mubulamfwu kakali kulampa tukokola tuli 20 amwalo mubwamba kakali tukokola tuli 20.+ Kumane wakandaambila kuti: “Oobu mbo Busena Busalalisya.”+

5 Mpoonya wakapima bwaanda bwatempele, ibwakali kulampa tukokola tuli cisambomwe kukomena. Twaanda itwakali mumabali kuzinguluka tempele twakali tukokola tone mubwamba.+ 6 Twaanda ooto twamumabali twakali midadaada yotatwe kuya mujulu, kaanda kamwi akamwi kakajisi kaanda atala, eelyo mudadaada umwi aumwi wakajisi twaanda tuli 30. Kwakali zitabilizyo kuzinguluka bwaanda bwatempele eezyo zyakali kutabilila twaanda ooto twamumabali, cakuti zitabilizyo eezyi tiizyakali kunjila mubwaanda bwatempele mwini.+ 7 Kumabazu oonse obilo aatempele kwakali matantilo aayaabuzinguluka, aayo aakali kuyaabukomena mbwaayabuya mujulu kutwaanda twamujulu.+ Bwamba bwangawo bwakali kuyaabukomena kuzwa kumudadaada umwi kuya kuluumbi eelyo muntu natanta kuzwa kumudadaada waansi kuya kumudadaada uuli atala ikwiinda mumudadaada waakati.

8 Ndakabona kuti kwakali cibumbili cilamfwu ikuzinguluka tempele, alimwi ntalisyo zyatwaanda twamumabali zyakali zilamfwu mbuli tete likkwene lilampa tukokola tuli cisambomwe kuyoosika kukkona. 9 Bwamba bwabwaanda bwaanze bwatwaanda twamukati bwakali tukokola tosanwe. Kwakali mwaako* kumbali aamayake aatwaanda twamumabali aayo aakali cibeela catempele.

10 Akati katempele amaanda aakulida+ kwakali busena ibwakali tukokola tuli 20 mubwamba kumabazu oonse obilo aandilyo. 11 Kwakali mulyango akati kakaanda kakali kumbali alimwi amwaako kulubazu lwakunyika, alimwi kwakali mulyango aumbi kulubazu lwakumusanza. Bwamba bwamwaako koonse-koonse bwakali tukokola tosanwe.

12 Iŋanda eeyo iyakali kumbo iilangene abusena bunyina cintu yakali tukokola tuli 70 mubwamba mpoonya mubulamfwu yakali tukokola tuli 90 ; bupati bwabulambo bwaŋanda eeyo bwakali tukokola tosanwe koonse-koonse.

13 Wakapima tempele, eelyo mubulamfwu lyakali tukokola tuli 100. Bulamfwu bwabusena bunyina cintu antoomwe aŋanda* alimwi amalambo aanjiyo abwalo bwakali tukokola tuli 100. 14 Bwamba bwabusena buli kumbele kwatempele nkolilanzyide kujwe antoomwe abusena bunyina cintu bwakali tukokola tuli 100.

15 Wakapima bulamfwu bwaŋanda eeyo yakalangide kubusena bunyina cintu buli kusyule, antoomwe abusena bwakwiinda bujisi ciluli ibwakali mumabali aambubo oonse obilo, eelyo yakali tukokola tuli 100.

Kuyungizya waawo, wakapima busena busalala bwaanze, abusena busalala bwamukati+ alimwi amakkoce aalubuwa, 16 kubikkilizya azikunguzyo zyamilyango, amawindo aakali mumyeenya+ iyakali kuyaabuceya kuyaanze, alimwi amasena aakwiinda aajisi ciluli aakali mumasena aayo otatwe. Munsi-munsi azikunguzyo zyamilyango kwakali tupulanga tupapalete+ twakabikkidwe kuzwa ansi kusikila kumawindo; imawindo akalivwumbidwe. 17 Wakapima cibeela cili atala aamulyango, mukati katempele alimwi aanze, alimwi wakapima abwaanda boonse buzingulukide. 18 Abwaanda kwakali bakerubi+ bazekaudwe alimwi azikozyanyo zyatukunka,+ kakunka kamwi akamwi kakali akati kabakerubi bobilo, mpoonya kerubi umwi aumwi wakajisi masyu obilo. 19 Busyu bwamuntu bwakalangide kukakunka kubbazu eeli, mpoonya busyu bwasyuumbwa* bwakalangide kukakunka kakali kubbazu limbi.+ Oobu mbubakazekaudwe koonse-koonse mutempele. 20 Kuzwa ansi mane kuyoosika atala aamulyango kwakazekaudwe bakerubi alimwi azikozyanyo zyatukunka abwaanda bwatempele.

21 Minsende* yatempele yakali amabazu one aayelene.+ Kumbele lyabusena busalala* kwakali cintu cakali kulibonya mbuli 22 cipaililo camapulanga,+ eeco cakali kulampa tukokola totatwe kuya mujulu alimwi atukokola tobilo mubulamfwu. Cakajisi tuntu tuli mbuli twija mumakkona, mpoonya ansi alimwi amumabali aancico cakapangidwe amapulanga. Kumane wakandaambila kuti: “Eeli ndetebulu lili kumbele lya Jehova.”+

23 Busena busalala bwaanze abusena busalalisya boonse bobilo bwakajisi zijazyo zyobilo-zyobilo.+ 24 Zijazyo eezyo zyakajisi zibeela zyobilo zilivwunga zyajaluka, zibeela zyobilo kucijazyo cimwi acimwi. 25 Azijazyo zyatempele kwakazekaudwe bakerubi azikozyanyo zyatukunka, mbuli zyeezyo zili abwaanda.+ Alimwi kwakali ciluli camapulanga kumbele lyakkoce ilyakali anze. 26 Kunze lyaboobo, kwakali mawindo aakali mumyeenya+ iyakali kuyaabuceya kuyaanze alimwi azikozyanyo zyatukunka mumabali oonse obilo aakkoce, alimwi amumabali aatwaanda twamumabali twatempele alimwi aziluli.

42 Mpoonya wakanditola kulubuwa lwaanze luli kunyika.+ Wakanditola kuŋanda mpati iyakajisi maanda aakulida eeyo yakabambene abusena bwakanyina cintu,+ kulubazu lwakunyika kwaŋanda yakabambene aanjiyo.+ 2 Ibulamfwu bwanjiyo kulubazu ooko ikwakali mulyango wakunyika bwakali tukokola* tuli 100, mpoonya ibwamba bwanjiyo bwakali tukokola tuli 50. 3 Yakali akati kalubuwa lwamukati, oolo lwakali tukokola tuli 20 mubwamba,+ alimwi anzila yalubuwa lwaanze yamabwe aayalidwe. Imakkoce aanjiyo mwakwiinda akalilangene alimwi akali midadaada yotatwe kuzwa ansi kuya mujulu. 4 Kumbele aamaanda aakulida kwakali busena bwamukati bwakwiinda+ ibwakali tukokola tuli 10 mubwamba atukokola tuli 100 mubulamfwu,* eelyo milyango yangawo yakali kulubazu lwakunyika. 5 Imaanda aakulida aakali atala eeni aaŋanda eeyi yamidadaada akali masyoonto kwiinda yaayo aakali akati alimwi aansi eeni, nkaambo makkoce akalya busena bwangawo bupati. 6 Nkaambo akali midadaada yotatwe kuya mujulu, pele akanyina misemu mbuli misemu yamumabuwa. Nkakaambo kaako busena bupati bwamaanda aakali atala eeni bwakaligwa kwiinda bwayaayo aakali akati alimwi aansi eeni.

7 Ibwaanda bwamabwe bwaanze ibwakali afwaafwi amaanda aakulida aayo aakali kulubazu lwalubuwa lwaanze alimwi ibwakalangene amaanda aambi aakulida bwakali tukokola tuli 50 mubulamfwu. 8 Nkaambo bulamfwu bwamaanda aakulida aakali kulubazu lwalubuwa lwaanze bwakali tukokola tuli 50, pele bulamfwu bwayaayo aakalangene atempele bwakali tukokola tuli 100. 9 Maanda aakulida akajisi manjililo kulubazu lwakujwe, aakunjilila kuzwa kulubuwa lwaanze.

10 Kwakali maanda aakulida aambi mukati kabwaanda bwamabwe bwalubuwa lwakali kulubazu lwakujwe, munsi-munsi abusena bwakanyina cintu alimwi aŋanda iilya.+ 11 Kumbele aangawo kwakali busena bwakwiinda ibwakali mbuli boobo buli kumaanda+ aakulida aakunyika. Akaleelene mubulamfwu amubwamba, akajisi milyango yakuzwida iikozyenye alimwi akayakidwe munzila iikozyenye. Imilyango yangawo yakunjilila 12 yakali mbuli milyango yamaanda aakulida aakali kulubazu lwakumusanza. Kwakali manjililo kumatalikilo aabusena bwakwiinda, kamutanasika kubwaanda bwiingide ibuli kulubazu lwakujwe, ooko muntu nkwanga wanjilila.+

13 Mpoonya wakandaambila kuti: “Imaanda aakulida aakunyika amaanda aakulida aakumusanza aalya aabambene abusena bunyina cintu+ ngemaanda aakulida aasalala oomo bapaizi ibasikila Jehova mobalida zituuzyo zisalalisya.+ Oomo momumo mobabikka zituuzyo zisalalisya, nkokuti cituuzyo camaila, cituuzyo cacibi alimwi acituuzyo camilandu, nkaambo busena oobu bulasalala.+ 14 Ikuti bapaizi banjila, tabeelede kuzwa mubusena busalala kuya kulubuwa lwaanze kakunyina kusaanguna kusamununa zisani nzyobasama nobakutauka,+ nkaambo eezyi zilasalala. Beelede kusama zisani zimbi kutegwa basike kumasena aazumizyidwe kusika bantu buyo.”

15 Naakamana kupima busena bwatempele bwamukati,* wakanditola anze kwiinda kumulyango uulangide kujwe,+ mpoonya wakabupima busena bwamayake boonse mbobubede.

16 Wakapima lubazu lwakujwe atete* lyakupimya. Kweelana atete eeli lyakupimya, lwakali kulampa matete aakupimya aali 500 kuzwa kulubazu lumwi kuya kulubazu lumbi.

17 Wakapima lubazu lwakunyika, mpoonya kweelana atete eeli lyakupimya, lwakali kulampa matete aakupimya aali 500.

18 Wakapima lubazu lwakumusanza, mpoonya kweelana atete eeli lyakupimya, lwakali kulampa matete aakupimya aali 500.

19 Wakazingulukila kulubazu lwakumbo. Wakalupima atete lyakupimya, eelyo lwakali kulampa matete aakupimya aali 500.

20 Wakapima busena mumbazu zyoonse zyone. Bwakajisi bwaanda bwakabuzingulukide+ ibwakali kulampa matete aakupimya aali 500 mubulamfwu amatete aali 500 mubwamba,+ ikwaandaanya busena busalala abusena bwabantu buyo boonse.+

43 Mpoonya wakanditola kumulyango uulangide kujwe.+ 2 Ooko ndakabona bulemu bwa Leza wa Israyeli kabuboola kuzwa kujwe,+ alimwi ijwi lyakwe lyakali mbuli kuvwuuma kwamaanzi aakunka canguzu;+ eelyo nyika yakamweka akaambo kabulemu bwakwe.+ 3 Ncondakabona cakali mbuli cilengaano ncondakabwene ciindi nondakasika kuzoonyonyoona munzi, alimwi cakali kulibonya mbuli ceeco ncondakabwene ciindi nondakali afwaafwi amulonga wa Kebara;+ eelyo ndakavwuntama ansi.

4 Kumane bulemu bwa Jehova bwakanjila mutempele* kwiinda mumulyango uulangide kujwe.+ 5 Mpoonya muuya wakandibusya akundinjizya mulubuwa lwamukati, eelyo ndakabona kuti itempele lyakazwide bulemu bwa Jehova.+ 6 Kuzwa waawo ndakamvwa muntu umwi kaambaula andime kuzwa mutempele, eelyo muntu uulya uumbi wakaboola akwiima kumbali lyangu.+ 7 Leza wakandaambila kuti:

“Omwanaamuntu, oobu mbobusena bwacuuno cangu cabwami+ alimwi mbobusena bulyata maulu aangu,+ mondinookkala akati kabantu ba Israyeli mane kukabe kutamani.+ Bamuŋanda ya Israyeli tabakalisofwaazyi limbi zina lyangu lisalala,+ balo abami babo, kwiinda mubuvwuule bwabo bwakumuuya alimwi akwiinda mumitunta yabami babo ciindi nobafwa. 8 Nobakabikka cikunguzyo cabo munsi-munsi acikunguzyo cangu alimwi amunsende wamulyango wabo kumbali aamunsende wamulyango wangu, kakuli buyo bwaanda akati kabo andime,+ bakasofwaazya zina lyangu lisalala kwiinda muzintu zisesemya nzyobakacita, aboobo ndakabanyonyoona mubukali bwangu.+ 9 Lino ababutantamwide kulamfwu andime buvwuule bwabo bwakumuuya amitunta yabami babo, eelyo ndinookkala akati kabo mane kukabe kutamani.+

10 “Lino yebo omwanaamuntu, kobapandulwida mbolibede tempele bamuŋanda ya Israyeli,+ kutegwa bafwe nsoni akaambo kazinyonyoono zyabo,+ alimwi beelede kulanga-langa mbolibambidwe.* 11 Ikuti naa bafwe nsoni akaambo kazintu zyoonse nzyobacita, nkokuti ubazyibye mboliyakidwe tempele, bubambe bwandilyo, imilyango yandilyo yakuzwida alimwi ayakunjilila.+ Ubatondezye mboliyakidwe lyoonse buyo alimwi amalailile aandilyo, mboliyakidwe alimwi amilawo yandilyo, azyalo eezyi uzilembe kabalangilila, kutegwa batobele bubambe bwamboliyakidwe lyoonse alimwi akucita kweelana amalailile aandilyo.+ 12 Ooyu ngomulawo watempele. Cilawo coonse cizingulukide atala lyacilundu cilasalalisya.+ Bona! Ooyu ngomulawo watempele.

13 “Mboobu mbocipimidwe cipaililo mutukokola+ (kukakokola komwe kuyungizyidwe bwamba bwajanza).* Itako lyancico lilampa kakokola komwe kuya mujulu, mpoonya mubwamba kakokola komwe. Cilijisi katekelezyo ikuzinguluka moombe wancico ikasika kucisela* cakakokola mubwamba. Oobu mbolibede tako lyacipaililo. 14 Kuzwa kutako aansi, kusikila kumoombe waansi uuzingulukide kuli tukokola tobilo, mpoonya mubwamba cilampa kakokola komwe. Kuzwa kumoombe muniini uuzingulukide kusikila kumoombe mupati uuzingulukide kuli tukokola tone, mpoonya mubwamba cilampa kakokola komwe. 15 Cikko cacipaililo cilampa tukokola tone kuya mujulu, alimwi kucikko cacipaililo kuli meja one aaimvwi.+ 16 Cikko cacipaililo cijisi mabazu one aayelene, mubulamfwu cilampa tukokola tuli 12 mpoonya amwalo mubwamba+ tukokola tuli 12. 17 Mabazu one aamoombe uuzingulukide alampa tukokola tuli 14 mubulamfwu mpoonya amwalo mubwamba alampa tukokola tuli 14 ; moombe uuzingulukide ulampa cisela cakakokola, mpoonya tako lyacipaililo lilampa kakokola komwe kumabazu oonse.

“Matantilo aancico alangide kujwe.”

18 Mpoonya wakandaambila kuti, “Omwanaamuntu, mboobu mbwaamba Mwami Singuzuzyoonse Jehova: ‘Aaya ngamalailile aayelede kutobelwa necipangwa cipaililo, kutegwa zituuzyo zyuumpwa buumbulu zikonzye kutuulwa akuti bulowa bukonzye kusansailwa aalincico.’+

19 “‘Bapaizi bana Levi balunyungu lwa Zadoki+ aabo ibandisikila kuzoondikutaukila weelede kubapa mupoho uucili mwana uuzwa mubutanga kuti abe cituuzyo cazibi,’+ mbwaamba Mwami Singuzuzyoonse Jehova. 20 ‘Weelede kubweza bulowa bwakwe bumwi akububikka kumeja one aacipaililo, akumakkona one aamoombe uuzingulukide, alimwi akukatekelezyo kazingulukide, kutegwa ucisalazye kucibi akumanya milandu yancico.+ 21 Mpoonya weelede kubweza mupoho ooyo uucili mwana, wacituuzyo cazibi, kutegwa aumpwe mubusena busalidwe bwatempele, kunze lyabusena busalala.+ 22 Kumane mubuzuba bwabili weelede kutuula mujembwe uutakwe kampenda kuti abe cituuzyo cazibi; mpoonya bayoosalazya cipaililo kucibi mbubonya mbobakacisalazya kucibi kwiinda mukubelesya mupoho uucili mwana.’

23 “‘Wamana kucisalazya kucibi, weelede kutuula mupoho uucili mwana uutakwe kampenda uuzwa mubutanga bwaŋombe alimwi amugutu uutakwe kampenda uuzwa mubutanga bwambelele. 24 Weelede kuzileta kuli Jehova, eelyo bapaizi beelede kuzilunga munyo+ akuzituula kazili zituuzyo zyuumpwa buumbulu kuli Jehova. 25 Kwamazuba aali ciloba weelede kutuula mujembwe kali cituuzyo cazibi+ cabuzuba abuzuba, amupoho uucili mwana uuzwa mubutanga bwaŋombe alimwi amugutu uuzwa mubutanga bwambelele; weelede kutuula banyama batakwe kampenda. 26 Kwamazuba aali ciloba weelede kumanya milandu yacipaililo, alimwi balo beelede kucisalazya akucibamba kuti kacibelesyegwa. 27 Imazuba aayo aakumana, mubuzuba bwalusele+ akuya kumbele bapaizi banoozituula acipaililo eeco zituuzyo zyanu zyuumpwa buumbulu alimwi azipaizyo zyanu zyalumvwano; eelyo mebo ndinoomukkomanina nywebo,’+ mbwaamba Mwami Singuzuzyoonse Jehova.”

44 Wakandipilusya kwiinda munzila iinjila kumulyango waanze wabusena busalala uulangide kujwe,+ pele wakalijalidwe.+ 2 Mpoonya Jehova wakandaambila kuti: “Mulyango ooyu unoojalidwe mbomunya oobu lyoonse. Taukajalulwi pe, alimwi kunyina muntu uuyoonjila kwiinda mulinguwo; nkaambo Jehova, Leza wa Israyeli, wanjila kwiinda mulinguwo,+ aboobo unoojalidwe lyoonse. 3 Nokuba boobo, silutwe walo unookkala mulinguwo kuti kalya cinkwa kumbele lya Jehova,+ nkaambo ngusilutwe. Nanjila unakwiinda mukkoce lyamulyango, alimwi nazwa unakwiinda mumonya oomo.”+

4 Mpoonya wakanditola kumbele aatempele kwiinda mumulyango wakunyika. Nindakalanga, ndakabona kuti bulemu bwa Jehova bwakazula mutempele lya Jehova.+ Aboobo ndakavwuntama ansi.+ 5 Mpoonya Jehova wakandaambila kuti: “Omwanaamuntu, kobikkila maano, kolangisisya, alimwi koswiililisya zintu zyoonse nzyetiikwaambile kujatikizya malailile amilawo yatempele lya Jehova. Kobikkila maano kapati kumanjililo aatempele alimwi amilyango yoonse yakuzwida yabusena busalala.+ 6 Bamuŋanda ya Israyeli bazangi ubaambile kuti, ‘Mboobu mbwaamba Mwami Singuzuzyoonse Jehova: “Lino kaka cabonwa, amuleke micito yanu iisesemya, nywebo nobamuŋanda ya Israyeli. 7 Nomunjizya bamuzwakule batapalwidwe mumoyo alimwi aamubili mubusena bwangu busalala, basofwaazya tempele lyangu. Mulandiletela cinkwa, mafwuta alimwi abulowa, pele cizuminano cangu cilatyolwa akaambo kamicito yanu yoonse iisesemya. 8 Kunyina nomuzilanganya zintu zyangu zisalala.+ Muciindi caboobo, mupa bambi mulimo wakulanganya milimo yamubusena bwangu busalala.”’

9 “‘Mboobu mbwaamba Mwami Singuzuzyoonse Jehova: “Kunyina muzwamasi uukkala mu Israyeli uutapalwidwe mumoyo alimwi aamubili weelede kunjila mubusena bwangu busalala.”’

10 “‘Pele ba Levi aabo ibakaleyela kulamfwu andime+ ciindi bana Israyeli nobakaleya kuzwa kulindime kuti batobele mituni iisesemya* bayoosubulwa akaambo kamulandu wabo. 11 Bayooba babelesi mubusena bwangu busalala kuti kabalanganya milyango yatempele+ alimwi akubeleka mutempele. Banoojaya zituuzyo zyuumpwa buumbulu azipaizyo zyabantu, alimwi banakwiima kumbele lyabantu kababakutaukila. 12 Akaambo kakuti bakali kubakutaukila kumbele lyamituni yabo iisesemya alimwi bakaba cilebyo eeco cakapa kuti bamuŋanda ya Israyeli babisye,+ nkakaambo kaako ndakonka kwiinda mukunyamuna janza lyangu kuti ndibalwane,’ mbwaamba Mwami Singuzuzyoonse Jehova, ‘aboobo bayoosubulwa akaambo kamulandu wabo. 13 Tabakandisiki munsi pe kuti babeleke kabali bapaizi bangu naa kuswena munsi aazintu zyangu zili zyoonse zisalala naa eezyo zisalalisya, eelyo bayoonyamuna masampu aabo akaambo kazintu zisesemya nzyobakacita. 14 Pele ndiyoobapa kuba basikulanganya mikuli yamutempele, kuti balanganye milimo yamumo alimwi azintu zyoonse zyeelede kucitwa mulindilyo.’+

15 “‘Lino kujatikizya bapaizi bana Levi, ibana ba Zadoki,+ aabo ibakali kulanganya mikuli yamubusena bwangu busalala ciindi bana Israyeli nobakaleya kulindime,+ bayoondisikila kuti bandikutaukile, eelyo bayakwiima kumbele lyangu kuti bandituulile mafwuta+ alimwi abulowa,’+ mbwaamba Mwami Singuzuzyoonse Jehova. 16 ‘Mbambabo ibayoonjila mubusena bwangu busalala, eelyo bayoosika kutebulu lyangu kuti bandikutaukile,+ alimwi bayoolanganya mikuli njobajisi kulindime.+

17 “‘Nobanjila mumilyango yalubuwa lwamukati, beelede kusama zisani zyuuba-uba.+ Tabeelede kusama zisani zyaboya bwambelele zili zyoonse nobakutauka mumilyango yalubuwa lwamukati naa mumasena aamukati. 18 Beelede kusama zitambala zyamulembo muuba-uba kumitwe yabo, alimwi beelede kusama tubbudula twamilembo myuuba-uba kuti tuvwumbe tusolo twabo.+ Tabeelede kusama cintu cili coonse cikonzya kubapa kuzwa nkasaalo. 19 Kabatanazwa kuya mulubuwa lwaanze, nkokuti mulubuwa lwaanze ikuli bantu, beelede kusamununa zisani nzyobasama nobakutauka+ akuzibikka mumaanda aakulida aasalala.+ Mpoonya beelede kusama zisani zimbi ikutegwa batatoli busalali kubantu azisani zyabo. 20 Tabeelede kugela minkulu+ nokuba kulekela kuti masusu aabo alampe. Masusu aabo beelede kunakwaagela cansaizi. 21 Bapaizi tabeelede kunywa waini nobanjila mulubuwa lwamukati.+ 22 Tabeelede kukwata mukamufwu naa mukaintu wakalekwa;+ pele balakonzya kukwata nakalindu waluzubo lwa Israyeli naa mukamufwu wakakwetwe kumupaizi.’+

23 “‘Beelede kulailila bantu bangu kujatikizya kwiimpana kuliko akati kazintu zisalala azintu zimbi buyo; akubayiisya kwiimpana kuliko akati kazintu zitasalali azintu zisalala.+ 24 Beelede kuba babetesi ibakosola kaambo;+ beelede kukabeteka kweelana ambeta zyangu. Beelede kutobela milawo yangu amalailile aangu+ kujatikizya mapobwe aangu+ oonse alimwi akusalazya masabata aangu. 25 Tabeelede kuswena afwaafwi amuntu uufwide nkaambo inga basofwaala. Nokuba boobo, balakonzya kulisofwaazya amutunta wabausyi, wabanyina, wamwanaabo musankwa, wamwanaabo musimbi, wamwanookwabo musankwa naa wamucizyi wabo uutakwetwe.+ 26 Amana kulisalazya mupaizi, beelede kumubalila mazuba aali ciloba. 27 Ibuzuba nanjila mubusena busalala, mulubuwa lwamukati, kuti akutauke mubusena busalala, weelede kuleta cituuzyo cakwe cazibi,’+ mbwaamba Mwami Singuzuzyoonse Jehova.

28 “‘Lino eeci nceciyooba lukono lwabo: Mebo ndendime lukono lwabo.+ Tamweelede kubapa caabilo cili coonse mu Israyeli, nkaambo mebo ndendime caabilo cabo. 29 Mbabanoolya cituuzyo camaila,+ cituuzyo cazibi, acituuzyo camilandu,+ alimwi cintu coonse caabidwe mu Israyeli ciyooba cabo.+ 30 Imicelo mibotu kapati akati kamicelo yakusaanguna iibizidwe yoonse alimwi azintu zyamisyobo yoonse nzyomusanga ziyooba zyabapaizi.+ Azyalo zyakulya zyanu zyakusaanguna zyabusu butasetede mweelede kupa mupaizi.+ Eeci ciyoopa kuti mikwasyi yanu izumanane kuba acileleko.+ 31 Mupaizi teelede kulya muyuni naa munyama wakalifwida naa wakalumwa akuzazaulwa.’+

45 “‘Nomwaapaula nyika kuti ibe lukono,+ mweelede kupa caabilo kuli Jehova kacili cilawo cisalala canyika eeyo.+ Mubulamfwu ceelede kuba tukokola* tuli 25,000, mpoonya mubwamba, tukokola tuli 10,000.+ Busena oobu boonse bunooli cilawo cisalala. 2 Mukati kaco munooli cilawo camabazu one aayelene cabusena busalala icilampa tukokola tuli 500 mubulamfwu alimwi atuli 500 mubwamba,+ alimwi cinooli amacelelo kumabazu aancico oonse aalampa tukokola tuli 50 mubwamba.+ 3 Mubusena oobu mweelede kupima nyika iilampa tukokola tuli 25,000 alimwi atukokola tuli 10,000 mubwamba, eelyo mukati kanjiyo momuyooba tempele, nkokuti busena busalalisya. 4 Bunooli cilawo cisalala canyika yabapaizi,+ ibabelesi bamutempele, aabo basikila Jehova+ kuti bamukutaukile. Bunooli busena bwamaanda aabo alimwi abusena busetekene bwatempele.

5 “‘Iba Levi, babelesi bamutempele, banoojisi cilawo cilampa tukokola tuli 25,000 mubulamfwu atukokola tuli 10,000 mubwamba,+ alimwi banoojisi maanda aakulida+ aali 20 kaali caabilo cabo.

6 “‘Imunzi mweelede kuupa caabilo, nkokuti ibusena bulampa tukokola tuli 25,000 mubulamfwu (ibweelene acaabilo cisalala) alimwi atukokola tuli 5,000 mubwamba.+ Oobu busena bunooli bwabamuŋanda ya Israyeli boonse.

7 “‘Mpoonya silutwe unoojisi nyika kumabazu oonse obilo aacaabilo cisalala alimwi aabusena bwaabilidwe munzi. Nyika eeyo inoobambene acaabilo cisalala alimwi acaabilo camunzi. Inooli kulubazu lwakumbo alimwi alwakujwe. Bulamfwu bwayo kuzwa kumunyinza wakumbo kusikila kumunyinza wakujwe, bunakweelene acaabilo cipegwa musyobo umwi.+ 8 Nyika eeyi iyooba yakwe kaili caabilo cakwe mu Israyeli. Aboobo basilutwe bangu tabakabapenzyi kabili bantu bangu,+ alimwi bayakwaabanya nyika akwiipa bamuŋanda ya Israyeli kweelana amisyobo yabo.’+

9 “Mboobu mbwaamba Mwami Singuzuzyoonse Jehova: ‘Lino akaka cabonwa, mwaciindizya nywebo nobasilutwe ba Israyeli!’

“‘Amuleke nkondo akudyaaminina, eelyo amucite cintu ciluzi alimwi ciluleme.+ Amuleke kubanyanga lubono bantu bangu,’+ mbwaamba Mwami Singuzuzyoonse Jehova. 10 ‘Mweelede kubelesya zikkelo ziluzi, cipimyo caefa* ciluzi alimwi anongo* yakweelekela iiluzi.+ 11 Kweelede kuba buyo ceelekelo comwe cacipimyo caefa acanongo yakweelekela. Inongo yomwe yeelede kukkwana cibeela comwe cazibeela zili 10 zyahomeri,* acalo cipimyo caefa ceelede kukkwana cibeela comwe cazibeela zili 10 zyahomeri. Homeri ndeliyooba ceelekelo cakupimina. 12 Syekeli*+ lyomwe lyeelede kuba magera* aali 20. Masyekeli aali 20 kwaasanganya amasyekeli aali 25 alimwi amasyekeli aambi aali 15 ngaayoomubeda maina* yomwe.’

13 “‘Nzyeezyi zyakusanga nzyomweelede kupa: cibeela comwe cazibeela zili cisambomwe zyaefa kuzwa muhomeri lyomwe lyawiiti, acibeela comwe cazibeela zili cisambomwe zyaefa kuzwa muhomeri lyomwe lyabbaale. 14 Caabilo camafwuta ceelede kupimwa kweelana anongo yakweelekela. Inongo yomwe ileelene acibeela comwe cazibeela zili 10 zyakore,* eelyo nongo zili 10 ndi homeri lyomwe, mbwaanga nongo zili 10 zileelene ahomeri lyomwe. 15 Kunze lyaboobo, kuzwa mubutanga bwazivwubwa zyabana Israyeli, imbelele yomwe akati kambelele zili 200 yeelede kwaabwa. Eezyi zinooli zyacituuzyo camaila,+ cituuzyo cuumpwa+ buumbulu alimwi azipaizyo zyalumvwano,+ kutegwa zimanye milandu yabantu,’+ mbwaamba Mwami Singuzuzyoonse Jehova.

16 “‘Bantu boonse bamucisi banoosanga+ zintu eezyi kuli silutwe wamu Israyeli. 17 Nokuba boobo silutwe nguunoojisi mukuli uujatikizya zituuzyo zyuumpwa buumbulu,+ cituuzyo camaila,+ alimwi azituuzyo zinyugwa kuciindi camapobwe,+ ciindi noukkala mwezi, ciindi cama Sabata,+ alimwi akuciindi camapobwe oonse aabikkidwe aabamuŋanda ya Israyeli.+ Walo ngonguwe unoopa cituuzyo cazibi, cituuzyo camaila, cituuzyo cuumpwa buumbulu, alimwi azipaizyo zyalumvwano, kutegwa zimanye milandu yabamuŋanda ya Israyeli.’

18 “Mboobu mbwaamba Mwami Singuzuzyoonse Jehova: ‘Mumwezi wakusaanguna, mubuzuba bwakusaanguna bwamwezi, mweelede kubweza mupoho uucili mwana uutakwe kampenda kuzwa mubutanga bwaŋombe, eelyo mweelede kusalazya tempele kucibi.+ 19 Mupaizi weelede kubweza bulowa bumwi bwacituuzyo cazibi akububikka kuminsende yamulyango watempele,+ kumakkona one aamoombe uuzingulukide cipaililo, alimwi akuminsende yamulyango walubuwa lwamukati. 20 Oobo mbomweelede kucita mubuzuba bwaciloba bwamwezi akaambo kamuntu uuli woonse uubisya kutali caali naa cakutazyiba;+ eelyo mweelede kumanya milandu yatempele.+

21 “‘Mumwezi wakusaanguna, mubuzuba bwa 14 bwamwezi, mweelede kucita Pobwe Lyakwiindilila.+ Kwamazuba aali ciloba, kweelede kuligwa cinkwa citajisi bumena.+ 22 Mubuzuba oobo, silutwe unoopa mupoho uucili mwana kuti abe cituuzyo cazibi, cakwe mwini alimwi acabantu boonse bamucisi.+ 23 Kwamazuba aali ciloba aapobwe, unoopa bapoho bacili bana-bana batakwe kampenda ibali ciloba alimwi abagutu batakwe kampenda bali ciloba kabali cituuzyo cuumpwa buumbulu kuli Jehova ibuzuba bumwi abumwi bwamazuba aayo aali ciloba,+ alimwi unoopa mujembwe omwe buzuba abuzuba kali cituuzyo cazibi. 24 Kuyungizya waawo, weelede kupa efa lyomwe lyacituuzyo camaila camupoho uucili mwana umwi aumwi alimwi aefa lyomwe lyamugutu umwi aumwi, alimwi ansazi* yamafwuta yaefa imwi aimwi.

25 “‘Mumwezi waciloba, mubuzuba bwa 15 bwamwezi, kwamazuba aali ciloba aapobwe+ weelede kupa cituuzyo cazibi ncimunya, cituuzyo cuumpwa buumbulu ncimunya, acituuzyo camaila ncimunya, alimwi amafwuta ngamunya.’”

46 “Mboobu mbwaamba Mwami Singuzuzyoonse Jehova: ‘Imulyango walubuwa lwamukati uulangide kujwe+ weelede kuti kaujalidwe+ mazuba aali cisambomwe aakubeleka,+ pele mubuzuba bwa Sabata alimwi amubuzuba noukkala mwezi weelede kujalulwa. 2 Silutwe unoonjila kuzwa anze kwiinda mukkoce lyamulyango,+ alimwi unakwiima kumunsende wamulyango. Bapaizi banootuula cituuzyo cakwe cuumpwa buumbulu azipaizyo zyakwe zyalumvwano, eelyo walo unoovwuntama ansi kucikunguzyo camulyango, mpoonya akuzwida anze. Pele mulyango taweelede kujalwa pe kusikila kumangolezya. 3 Bantu bamucisi abalo banoovwuntama ansi kumbele lya Jehova kumanjililo aamulyango ooyo lyama Sabata alimwi alyamyezi mipya.+

4 “‘Cituuzyo cuumpwa buumbulu ncanooleta silutwe kuli Jehova mubuzuba bwa Sabata, ceelede kuti kacili cabana bambelele beenze ibali cisambomwe batakwe kampenda amugutu omwe uutakwe kampenda.+ 5 Cituuzyo camaila cipegwa antoomwe amugutu ceelede kuba efa* lyomwe, alimwi bana bambelele beenze beelede kutuulwa antoomwe acintu cili coonse ncakonzya kupa, alimwi ansazi* yamafwuta kuefa+ lyomwe-lyomwe. 6 Mubuzuba ciindi noukkala mwezi, cituuzyo ceelede kuba camupoho uucili mwana wamubutanga, bana bambelele beenze bali cisambomwe, alimwi amugutu; zyoonse zyeelede kuti kazitakwe kampenda.+ 7 Weelede kupa cituuzyo camaila cikkwana efa lyomwe natuula mupoho uucili mwana, efa lyomwe natuula mugutu, alimwi acintu cili coonse ncakonzya kupa natuula bana bambelele beenze. Kunze lyaboobo, weelede kutuula nsazi yamafwuta yomwe kuefa lyomwe-lyomwe.

8 “‘Ciindi silutwe nanjila, weelede kwiinda nzila iinjila mukkoce lyamulyango, alimwi weelede kuzwida munzila njimunya eeyo.+ 9 Bantu bamucisi nobaboola kumbele lya Jehova ciindi camapobwe,+ aabo banjila kuzookomba kwiinda mumulyango+ wakunyika beelede kuzwida kumulyango wakumusanza,+ abalo aabo banjila kwiinda mumulyango wakumusanza beelede kuzwida kumulyango wakunyika. Kunyina weelede kupiluka munzila iitozya kumulyango nkwaanjilila, nkaambo beelede kuzwida kumulyango ngocilangene limwi. 10 Lino silutwe uuli akati kabo, weelede kunjila nibanjila, alimwi weelede kuzwa nibazwa. 11 Lyamapobwe alimwi aziindi zyaalubazu zyakusekelela, cituuzyo camaila ceelede kuba efa lyomwe nokutuulwa mupoho uucili mwana, efa lyomwe nokutuulwa mugutu, alimwi weelede kupa cintu cili coonse ncakonzya natuula bana bambelele beenze, antoomwe ansazi yamafwuta yaefa+ limwi alimwi.

12 “‘Ikuti silutwe wapa cituuzyo cuumpwa buumbulu+ naa zipaizyo zyalumvwano kazili cituuzyo cakuliyandila kuli Jehova, weelede kujalwidwa mulyango uulangide kujwe, eelyo uyoopa cituuzyo cakwe cuumpwa buumbulu azipaizyo zyakwe zyalumvwano mbubonya mbwacita mubuzuba bwa Sabata.+ Azwa, mulyango weelede kujalwa musyule lyakwe.+

13 “‘Buzuba abuzuba yebo weelede kupa mwanaambelele mweenze uutakwe kampenda uuli amwaka omwe kali cituuzyo cuumpwa buumbulu kuli Jehova.+ Weelede kucita oobu lyoonse mafwumofwumo. 14 Antoomwe ancico, lyoonse mafwumofwumo weelede kupa cibeela comwe cazibeela zili cisambomwe zyaefa kacili cituuzyo camaila antoomwe acibeela comwe cazibeela zyotatwe zyansazi yamafwuta aakusansaila aafulaulu uusetede kabotu kacili cituuzyo camaila cicitwa lyoonse kuli Jehova. Ooyu mulawo uutamani. 15 Beelede kupa mwanaambelele mweenze, cituuzyo camaila, alimwi amafwuta lyoonse mafwumofwumo kacili cituuzyo cuumpwa buumbulu cicitwa lyoonse.’

16 “Mboobu mbwaamba Mwami Singuzuzyoonse Jehova: ‘Ikuti silutwe wapa mwanaakwe umwi aumwi cipego kacili lukono, ciyooba lubono lwabana bakwe. Ndubono lwabo kwiinda mukukona. 17 Pele ikuti wapa mubelesi wakwe umwi cipego kuzwa kulukono lwakwe, cinooli camubelesi ooyo kusikila kumwaka walwaanguluko;+ mpoonya ciyoopilusyigwa kuli silutwe. Lulikke lukono lwabana bakwe ndolunooli lwabo lyoonse. 18 Silutwe teelede kubweza lukono luli loonse lwabantu kwiinda mukubatanda munyika yabo. Weelede kupa bana bakwe lukono kuzwa kunyika yakwe mwini, kutegwa kutabi naba omwe akati kabantu bangu uutandwa munyika yakwe.’”

19 Mpoonya wakandinjizya kumanjililo+ aabambene amulyango uutozya kumaanda aakulida aasalala aabapaizi aayo aalangide kunyika,+ eelyo ooko ndakabona busena bumwi kusyule kulubazu lwakumbo. 20 Kumane wakandaambila kuti: “Oobu mbobusena ooko bapaizi nkobanoojikila cituuzyo camilandu acituuzyo cazibi, alimwi nkobanookanga cituuzyo camaila,+ kutegwa batatoli cintu cili coonse kulubuwa lwaanze akupa kuti busalali buye kubantu.”+

21 Wakandigusya anze akunditola kulubuwa lwaanze, mpoonya wakandiinzya kumakkona one aalubuwa, eelyo ndakabona kabuwa kukkona limwi alimwi lyalubuwa lwaanze. 22 Kumakkona one aalubuwa kwakali tubuwa tusyoonto, itwakali tukokola* tuli 40 mubulamfwu atukokola tuli 30 mubwamba. Toonse tone twakaleelene kukomena. 23 Kwakali mindando yamabwe iituzingulukide toonse tone, alimwi kunsi aamindando bakapangide zikko zyakujikila zituuzyo. 24 Mpoonya wakandaambila kuti: “Aaya ngamaanda oomo babelesi bamutempele mobajikila zipaizyo nzibaleta bantu.”+

47 Mpoonya wakandipilusya kumanjililo aatempele,+ eelyo ooko ndakabona maanzi kaakunka kuya kujwe kuzwa kunsi lyacikunguzyo catempele, nkaambo kujwe nkokwakali kumbele kwatempele.+ Maanzi aayo akali kukunka kaaselemuka kuzwa kunsi kwatempele kulubazu lwakululyo, kumusanza kwacipaililo.

2 Kumane wakandigusya kubelesya nzila yakumulyango+ wakunyika akunditola anze, wakandizingulusya mane wandisisya kumulyango waanze uulangide kujwe,+ eelyo ndakabona maanzi aayenda aniini-niini kuzwa kulubazu lwakululyo.

3 Muntu ooyo naakaunka kulubazu lwakujwe kajisi ntambo yakupimya mujanza,+ wakapima busena bulampa tukokola* tuli 1,000 akundiinzya mumaanzi aayo; maanzi aayo akali kusika mungo.*

4 Mpoonya wakapima busena abumwi bulampa tukokola tuli 1,000 akundiinzya mumaanzi aayo, maanzi aayo akali kusika mumagondo.

Wakapima busena abumbi bulampa tukokola tuli 1,000 akundiinzya mumo, eelyo maanzi aayo akali kusika mutusolo.

5 Naakapima busena abumwi bulampa tukokola tuli 1,000, akali maanzi manji aakunka canguzu cakuti cakandaalila kwaazabuka, nkaambo maanzi aayo akali manji kapati cakuti muntu weelede kusaya buya, inzya akali maanzi manji aakunka canguzu aatakonzyi kuzabukwa amaulu.

6 Mpoonya wakandibuzya kuti: “Omwanaamuntu, sena wacibona eeci?”

Kumane wakandeenzya akundipilusya kunkomwe yakalonga. 7 Nindakapiluka, ndakabona kuti kunkomwe yakalonga kwakali zisamu zinji kapati kumabazu oonse obilo.+ 8 Mpoonya wakandaambila kuti: “Maanzi aaya akunkila kucooko cakujwe, alazumanana kukunka kwiinda mu Araba,*+ akuyoonjila mulwizi. Aakunjila mulwizi,+ maanzi aali nkuko ayooba mabotu. 9 Zilenge zyuumi zinji kapati ziyoocikonzya kupona kufwumbwa ooko nkwaakunkila maanzi aaya.* Kunooli nswi zinji akaambo kakuti maanzi aaya ayookunkila nkuko. Maanzi aamulwizi ayooba mabotu, alimwi zintu zyoonse ziyoopona kufwumbwa ooko nkokaunka kalonga aaka.

10 “Bazubi banswi banakwiima mumabali aandulo kuzwa ku Eni-gedi+ mane kusikila ku Eni-egilaimu, ooko ikunooli busena bwakuyanikila tunsabwe. Kunooli misyobo minji kapati yanswi, mbuli nswi zyamu Lwizi Lupati.*+

11 “Lunoojisi matinti alimwi amatoolo,* alimwi eezyi tazikabi kabotu pe. Zinoojisi buyo munyo.+

12 “Misyobo yoonse yazisamu zizyala micelo iiligwa iyoomena kunkomwe zyoonse zyobilo zyakalonga aaka. Matuvwu aanzizyo taakaneti pe; ayalo micelo yanzizyo taikamani. Mwezi amwezi zinoozyala micelo mipya, nkaambo maanzi aanzizyo azwa kubusena busalala.+ Micelo yanzizyo inooli yakulya, mpoonya matuvwu aanzizyo anooli aakusilisya.”+

13 Mboobu mbwaamba Mwami Singuzuzyoonse Jehova: “Eeci ncecilawo ncimuyakwaapaula akupa misyobo ya Israyeli iili 12 kacili lukono, eelyo Josefa uyooba azyaabilo zyobilo.+ 14 Muyoocikona akupegwa zyaabilo zyeelene. Ndakakonka kuti nyika eeyi ndiyakwiipa bamauso,+ aboobo lino nywebo ndendinywe mwapegwa nyika eeyi kaili lukono.

15 “Ooyu ngomunyinza wacisi kulubazu lwakunyika: Utalikila ku Lwizi Lupati akutobela nzila iitozya ku Hetiloni+ mane ngooyo kuya ku Zedadi,+ 16 ku Hamati,+ ku Berota+ aku Sibraimu, imunzi uuli akati kacilawo ca Damasiko acilawo ca Hamati, kusikila ku Hazere-hatikoni, imunzi uuli kumbali aamunyinza wa Haurani.+ 17 Aboobo munyinza uyootalikila kulwizi kusikila ku Hazari-enoni,+ kumunyinza wa Damasiko kunyika, alimwi akumunyinza wa Hamati.+ Ooyu ngomunyinza wakunyika.

18 “Munyinza wakujwe wiinda akati ka Haurani a Damasiko, kutobelezya mulonga wa Jordano akati ka Gileadi+ acisi ca Israyeli. Mweelede kupima bulamfwu kuzwa kumunyinza kusikila kulwizi lwakujwe.* Ooyu ngomunyinza wakujwe.

19 “Munyinza wakumusanza uyootalikila ku Tamara kuyoosika kumaanzi aaku Meribati-kadesi,+ mpoonya kuya ku Kalonga,* mane kuyoosikila ku Lwizi Lupati.+ Ooyu ngomunyinza wakumusanza.

20 “Kulubazu lwakumbo kuli Lwizi Lupati, kuzwa kumunyinza wakumusanza kuyoosikila kubusena bulangene a Lebo-hamati.*+ Ooyu ngomunyinza wakumbo.”

21 “Mweelede kwaabana nyika eeyi akati kanu, akati kamisyobo ya Israyeli iili 12. 22 Mweelede kuyaapaula akwiipa kuti ibe lukono lwanu alimwi alwabamuzwakule mbomukkala limwi aabo bakazyala bana kabakkede akati kanu; eelyo banooli mbuli ba Israyeli bazyalwe kulindinywe. Bayoopegwa lukono akati kamisyobo ya Israyeli antoomwe andinywe. 23 Muzwakule mweelede kumupa lukono mucilawo camusyobo ooyo mwakkede,” mbwaamba Mwami Singuzuzyoonse Jehova.

48 “Ngaaya mazina aamisyobo, kutalikila kumagolelo aakunyika: Caabilo ca Dani+ citobelezya nzila iitozya ku Hetiloni kusikila ku Lebo-hamati*+ mane ku Hazari-enani, kutobelezya munyinza wa Damasiko kunyika, kumbali aa Hamati;+ aboobo cizwa kumunyinza wakujwe kusikila kumunyinza wakumbo. 2 Caabilo ca Aseri+ cijisi munyinza omwe aca Dani, kuzwa kumunyinza wakujwe kusikila kumunyinza wakumbo. 3 Caabilo ca Nafutali+ cijisi munyinza omwe aca Aseri, kuzwa kumunyinza wakujwe kusikila kumunyinza wakumbo. 4 Caabilo ca Manase+ cijisi munyinza omwe aca Nafutali, kuzwa kumunyinza wakujwe kusikila kumunyinza wakumbo. 5 Caabilo ca Efraimu cijisi munyinza omwe aca Manase,+ kuzwa kumunyinza wakujwe kusikila kumunyinza wakumbo. 6 Caabilo ca Rubeni cijisi munyinza omwe aca Efraimu,+ kuzwa kumunyinza wakujwe kusikila kumunyinza wakumbo. 7 Caabilo ca Juda cijisi munyinza omwe aca Rubeni,+ kuzwa kumunyinza wakujwe kusikila kumunyinza wakumbo. 8 Kutalikila kumunyinza wa Juda, kuzwa kumunyinza wakujwe kusikila kumunyinza wakumbo, caabilo caalubazu ncomweelede kwaaba ceelede kuba tukokola* tuli 25,000 mubwamba,+ alimwi ceelede kweelana kulampa azyaabilo zimbi zyamisyobo kuzwa kumunyinza wakujwe kuyoosika kumunyinza wakumbo. Busena busalala bunooli mukati kancico.

9 “Caabilo caalubazu ncomweelede kwaaba kuli Jehova cinooli tukokola tuli 25,000 mubulamfwu atukokola tuli 10,000 mubwamba. 10 Eeci cinooli caabilo cisalala cabapaizi.+ Cinooli tukokola tuli 25,000 kulubazu lwakunyika, tukokola tuli 10,000 kulubazu lwakumbo, tukokola tuli 10,000 kulubazu lwakujwe, alimwi atukokola tuli 25,000 kulubazu lwakumusanza. Busena busalala bwa Jehova bunooli mukati kancico. 11 Cinooli cabapaizi basalazyidwe, ibana ba Zadoki,+ aabo ibakali kulanganya mikuli njibakajisi kulindime alimwi ibatakaleya ciindi bana Israyeli alimwi aba Levi nibakaleya.+ 12 Bayoopegwa caabilo kuzwa mucaabilo caalubazu canyika eeco cakaabwa kacili cintu cisalalisya, cijisi munyinza omwe acaabilo caba Levi.

13 “Mbocagolela buyo cilawo cabapaizi, ba Levi bayoopegwa caabilo cili atukokola tuli 25,000 mubulamfwu atukokola tuli 10,000 mubwamba. (Bulamfwu boonse bunooli tukokola tuli 25,000 mubulamfwu atukokola tuli 10,000 mubwamba.) 14 Tabeelede kusambala, kucincanya naa kupa bamwi cibeela eeci cibotu kapati canyika, nkaambo cilasalala kuli Jehova.

15 “Busena busyeede ibulampa tukokola tuli 5,000 mubwamba ibubambene amunyinza uulampa tukokola tuli 25,000 bunoobelesyegwa kucitila milimo iimbi yamumunzi,+ bunooli bwakuyakila maanda alimwi abwamacelelo. Munzi unooli mukati kambubo.+ 16 Mboobu bulamfwu bwamabazu aamunzi: Munyinza wakunyika ulampa tukokola tuli 4,500, wakumusanza tuli 4,500, wakujwe tuli 4,500 awalo wakumbo tukokola tuli 4,500. 17 Macelelo aamunzi anooli tukokola tuli 250 kulubazu lwakunyika, tuli 250 kumusanza, tuli 250 kujwe, akwalo kumbo tukokola tuli 250.

18 “Bulamfwu bwabusena busyeede bunakweelene acaabilo cisalala,+ nkokuti tukokola tuli 10,000 kujwe, atukokola tuli 10,000 kumbo. Bunakweelene acaabilo cisalala, eelyo micelo iizwa mumo iyooba cakulya cababelesi bamumunzi. 19 Babelesi bamumunzi bamumisyobo yoonse ya Israyeli mbabanoolima mulimbubo.+

20 “Caabilo coonse cijisi mabazu one aayelene aalampa tukokola tuli 25,000. Mweelede kucaaba kacili caabilo cisalala antoomwe alukono lwamunzi.

21 “Busena busyeede kumabazu oonse obilo aacaabilo cisalala aalukono lwamunzi buyooba bwasilutwe.+ Bunoobambene aminyinza iilampa tukokola tuli 25,000 eeyo iili kujwe akumbo kwacaabilo eeco. Bunakweelene azyaabilo zibambene ambubo, eelyo bunooli bwasilutwe. Caabilo cisalala alimwi abusena busalala bwatempele zinooli mukati kambubo.

22 “Lukono lwaba Levi alukono lwamunzi lunooli akati-kati kalukono lwasilutwe. Cilawo casilutwe cinooli akati-kati kamunyinza wa Juda+ amunyinza wa Benjamini.

23 “Lino kujatikizya misyobo iimbi iisyeede, caabilo ca Benjamini cizwa kumunyinza wakujwe kusikila kumunyinza wakumbo.+ 24 Caabilo ca Simeoni cijisi munyinza omwe aca Benjamini,+ kuzwa kumunyinza wakujwe kusikila kumunyinza wakumbo. 25 Caabilo ca Isakara+ cijisi munyinza omwe aca Simeoni, kuzwa kumunyinza wakujwe kusikila kumunyinza wakumbo. 26 Caabilo ca Zebuloni cijisi munyinza omwe aca Isakara,+ kuzwa kumunyinza wakujwe kusikila kumunyinza wakumbo.+ 27 Caabilo ca Gadi cijisi munyinza omwe aca Zebuloni,+ kuzwa kumunyinza wakujwe kusikila kumunyinza wakumbo. 28 Munyinza wakumusanza uuli kumunyinza wa Gadi unoozwa ku Tamara+ kusikila kumaanzi aaku Meribati-kadesi,+ mane ku Kkuti*+ lyakalonga kakunka mainza, alimwi aku Lwizi Lupati.*

29 “Eeyi njenyika njomweelede kwaapaula akwiipa misyobo ya Israyeli+ kaili lukono, alimwi eezyi nzyeziyooba zyaabilo zyabo,”+ mbwaamba Mwami Singuzuzyoonse Jehova.

30 “Njeeyi milyango yakuzwida yamunzi: Lubazu lwakunyika, lunooli tukokola tuli 4,500.+

31 “Milyango yamunzi iyakuulikwa kweelana amisyobo ya Israyeli. Akati kamilyango yotatwe iili kulubazu lwakunyika kuli mulyango wa Rubeni omwe, mulyango wa Juda omwe, alimwi amulyango wa Levi omwe.

32 “Lubazu lwakujwe lunooli tukokola tuli 4,500 kulampa, alimwi kuli milyango yotatwe: mulyango wa Josefa omwe, mulyango wa Benjamini omwe, alimwi amulyango wa Dani omwe.

33 “Lubazu lwakumusanza lunooli tukokola tuli 4,500 kulampa, kalujisi milyango yotatwe: mulyango wa Simeoni omwe, mulyango wa Isakara omwe, alimwi amulyango wa Zebuloni omwe.

34 “Lubazu lwakumbo lunooli tukokola tuli 4,500 kulampa, kalujisi milyango yotatwe: mulyango wa Gadi omwe, mulyango wa Aseri omwe, alimwi amulyango wa Nafutali omwe.

35 “Bulamfwu bwakuzinguluka munzi woonse bunooli tukokola tuli 18,000. Eelyo kuzwa buzuba oobo kuya kumbele imunzi ooyo unakwiitwa kuti Jehova Mwabede Oomo.”+