HOSEA
1 Ndeeli jwi lya Jehova ilyakamusikila Hosea* mwana wa Beeri mumazuba aa Uziya,+ Jotamu,+ Ahazi+ alimwi a Hezekiya,+ bami ba Juda,+ alimwi amumazuba aa Jeroboamu+ mwana wa Joasi,+ mwami wa Israyeli. 2 Jehova naakatalika kwaambaula kwiinda muli Hosea, Jehova wakaambila Hosea kuti: “Koya, ukakwate mukaintu muvwuule akuba abana bamubuvwuule,* nkaambo kwiinda mubuvwuule cisi eeci calekela limwi kutobela Jehova.”+
3 Aboobo wakaunka akuyookwata Gomeri mwana musimbi wa Diblaimu, eelyo wakamita akumuzyalila mwana musankwa.
4 Kumane Jehova wakamwaambila kuti: “Komuulika zina lyakuti Jezreeli,* nkaambo mukaindi buyo kaniini ndilabapa mulandu bamuŋanda ya Jehu+ akaambo kabulowa bwakatilwa ku Jezreeli, alimwi ndilapa kuti bulelo bwaŋanda ya Israyeli bumane.+ 5 Mubuzuba oobo ndiyootyola buta bwa Israyeli mu Kkuti* lya Jezreeli.”
6 Mukaintu ooyu wakamita alimwi, eelyo wakazyala mwana musimbi. Mpoonya Leza wakaambila mwaalumi ooyu kuti: “Komuulika zina lyakuti Lo-ruhama,* nkaambo tandikabafwidi limbi luse+ bamuŋanda ya Israyeli, akaambo kakuti ncobeni ndiyoobatanda.+ 7 Nokuba boobo ndiyoobafwida luse bamuŋanda ya Juda,+ alimwi mebo nde Jehova Leza wabo ndiyoobafwutula;+ tandikabafwutuli kwiinda mukubelesya buta, ipanga, nkondo, mabbiza naa basimabbiza.”+
8 Naakamulesya kunyonka Lo-ruhama, wakamita alimwi akuzyala mwana musankwa. 9 Mpoonya Leza wakaamba kuti: “Komuulika zina lyakuti Lo-amai,* nkaambo nywebo tamuli bantu bangu pe alimwi andime tandikooba wanu pe.
10 “Nokuba boobo, mweelwe wabana Israyeli uyooba mbuli musenga wakulwizi uutakonzyi kupimwa naa kubalwa.+ Alimwi mubusena oobo mobakali kwaambilwa kuti, ‘Nywebo tamuli bantu bangu,’+ bayakwaambilwa kuti, ‘Nywebo muli bana ba Leza muumi.’+ 11 Eelyo bana Juda alimwi abana Israyeli bayoobunganizyigwa antoomwe mulukamantano+ alimwi bayoolisalila musololi omwe akuzwa mucisi, nkaambo buzuba bwa Jezreeli+ bunooli bupati.
2 “Amwaambile banabokwanu kuti, ‘Nobantu bangu!’*+
Alimwi abacizyi banu kuti, ‘Omukaintu wakafwidwa luse!’*+
2 Amubape mulandu banyoko; amubape mulandu,
Nkaambo tabali bakaintu bangu pe,+ alimwi mebo tandili mulumaabo.
Beelede kuleka buvwuule bwabo
Alimwi abumambe mbobacita akati kankolo zyabo,
3 Buyo-buyo ndilabasamununa akubasiya mantanda mbubonya mbuli buzuba mbobakazyalwa,
Akubapa kuba mbuli nkanda,
Alimwi akubapa kuba mbuli cimpayuma,
Mpoonya akubajaya anyota.
4 Abalo bana babo tandikabafwidi luse pe,
Nkaambo mbana bamusyokwe.
5 Nkaambo banyina babana aaba bakacita buvwuule.+
Nyina iwakabazyala wakacita zintu zyuusya nsoni,+ nkaambo wakaamba kuti,
‘Ndilabatobela aabo bandiyanda kapati,+
Aabo bandipa cakulya amaanzi,
Zisani zyaboya bwambelele azisani zyuuba-uba, mafwuta alimwi azyakunywa.’
6 Aboobo ndilasinka nzila yabo amamvwa;
Alimwi ndilabayakila bwaanda bwamabwe,
Kutegwa batazijani nzila zyabo.
Eelyo uyakwaamba kuti, ‘Ndilapilukila kumulumaangu wakusaanguna,+
Nkaambo ndakali kukkala kabotu ciindi eeciya kwiinda lino.’+
8 Pele tiibakazyiba kuti ndime ndakabapa maila,+ waini mupya alimwi amafwuta,
Akuti ndakabapa nsiliva inji kapati
Alimwi angolida, eezyo nzyobakali kubelesya kuli Baala.+
9 ‘Aboobo ndiyoopiluka akubweza maila aangu kuciindi cangawo
Alimwi awaini wangu mupya kuciindi canguwo,+
Kumane ndiyookwempa zisani zyangu zyaboya bwambelele alimwi azisani zyangu zyuuba-uba eezyo zyeelede kuvwumba mantanda aabo.
10 Ndiyoovwumbula cinswe cabo kabalangilila aabo babayanda cakufwa,
Alimwi kunyina muntu uuyoobavwuna kuzwa mujanza lyangu.+
11 Ndiyoopa kuti kukkomana kwabo koonse,
Mapobwe aabo,+ mapobwe aabo aaciindi noukkala mwezi, masabata aabo alimwi aziindi zyabo zyoonse zyakusekelela zimane.
12 Ndiyoonyonyoona misaansa yabo amikuyu yabo, eezyo nzyobaamba kuti:
“Eezyi nzipego zyangu, nzyobakandipa aabo bandiyanda cakufwa”;
Ndiyoozipa kuti zibe syokwe,
Eelyo banyama bamusyokwe bayoozimana kuzilya.
13 Ndiyoobapa mulandu akaambo kamazuba nobakali kutuula zipaizyo kuzikozyanyo zya Baala,+
Nobakali kulisakatizya anweenwe azilisakatizyo zyabo mpoonya akutandila baabo ibakali kubayanda cakufwa,
Pele mebo bakandiluba,’+ mbwaamba Jehova.
14 ‘Aboobo ndilabakombelezya,
Ndilabatola munkanda,
Eelyo ndiyoobaambila majwi mabotu aabanjila mumoyo.
15 Ndiyoobapa myuunda yabo yamisaansa kuzwa ciindi eeco kuya kumbele,+
Akkuti* lya Akori+ kalili manjililo aasololela kubulangizi;
Bayoondivwiila okuya mbubonya mbuli kumazuba aakubukubusi bwabo,
Mbuli mubuzuba nobakazwa mucisi ca Egepita.+
16 Lino mubuzuba oobo,’ mbwaamba Jehova,
‘Yebo uyoondiita kuti Mulumaangu, tokandiiti limbi kuti Osimalelaangu.’*
17 ‘Ndiyoogwisya mazina aazikozyanyo zya Baala kumulomo wabo,+
Eelyo mazina aanzizyo taakayeeyegwi limbi pe.+
18 Mubuzuba oobo bantu bangu ndiyoobapangila cizuminano abanyama bamusyokwe,+
Abayuni bauluka mujulu alimwi azintu zikalaba ansi;+
Buta, panga alimwi ankondo ndiyoozigwisya mucisi,+
19 Ndiyookusinkilila kuti ube mukaintu wangu lyoonse mane kukabe kutamani;
Ndiyookusinkilila mubululami, munzila iiluzi,
Muluyando lutamani alimwi amuluse.+
20 Ndiyookusinkilila cakusyomeka,
Eelyo ncobeni uyoozyiba kuti ndime Jehova.’+
21 ‘Mubuzuba oobo ndiyoovwiila,’ mbwaamba Jehova,
‘Ndiyakwaavwiila majulu,
Eelyo aalo ayakwiivwiila nyika;+
22 Ayalo nyika iyakuvwiila maila awaini mupya alimwi amafwuta;
23 Walo ndiyoomusyanga mbuli mbuto zyangu munyika,+
Alimwi ndiyoomufwida luse ooyo iwatakafwidwa luse;*
Ndiyakwaambila baabo ibatali bantu bangu* kuti: “Nywebo muli bantu bangu,”+
Mpoonya balo bayakwaamba kuti: “Yebo nduwe Leza wesu.”’”+
3 Mpoonya Jehova wakandaambila kuti: “Koya alimwi, ukayande mukaintu uuyandwa amusankwa umbi alimwi uucita bumambe,+ mbubonya Jehova mbwayanda bana Israyeli+ nokuba kuti batobela baleza+ bambi akuyandisya zibbuubbu zyamisaansa miyumu.”*
2 Aboobo ndakamuula kubelesya nsiliva zili 15 alimwi ahomeri* lyomwe acisela cahomeri lyabbaale. 3 Mpoonya ndakamwaambila kuti: “Yebo unooli wangu kwamazuba manji. Toyelede kucita buvwuule, alimwi toyelede koona amusankwa umbi pe, eelyo andime ndiyoocita mbubonya oobo kulinduwe.”*
4 Cinooli boobo akaambo kakuti kwaciindi cilamfwu* bana Israyeli banookkede kabatajisi mwami,+ silutwe, cipaizyo, musemu, kabaki kabupaizi+ alimwi amituni.*+ 5 Kuzwa waawo, bana Israyeli bayoopiluka akuyandaula Jehova Leza wabo,+ alimwi a Davida mwami wabo,+ bayooboola kabakankama kuli Jehova akububotu bwakwe kumamanino aamazuba.+
4 Amumvwe jwi lya Jehova nywebo nobana Israyeli,
Nkaambo Jehova ujisi kaambo kakubeteka bantu bakkala mucisi+ eeci,
Akaambo kakuti kunyina kasimpe noluba luyando lutamani naa luzyibo lwa Leza mucisi eeci.+
2 Kukonka cakubeja, lweeno,+ kujaya,+
Kubba alimwi abumambe+ zilimwaikide koonse-koonse,
Alimwi milimo yakutila bulowa yiile kutobelana amilimonyina yakutila bulowa.+
3 Nkakaambo kaako cisi eeci ciyoolila+
Alimwi boonse bakkala mulincico bayoofwa;
Banyama bamusyokwe alimwi abayuni bamujulu,
Noziba nswi zyamulwizi, zyoonse buyo ziyooloba.
4 “Nokuba boobo, kutabi muntu uukazya naa uusinsa,+
Nkaambo bantu bako bali mbuli baabo ibakazyanya amupaizi.+
5 Aboobo yebo uyakuwa syikati kakutuba buu,
Awalo musinsimi uyakuwa antoomwe anduwe mbuli kuti masiku.
Banyoko ndiyoobanyonyoona.
6 Masimpe bantu bangu bayoonyonyoonwa akaambo kakuti kunyina luzyibo.
Mbokunga yebo walukaka luzyibo,+
Nkokuti andime ndiyookukaka, kuti toli mupaizi wangu;
Alimwi mbokunga wauluba mulawo* wa Leza wako,+
Nkokuti andime ndiyoobaluba bana bako.
7 Nobakali kuyaabuvwula, bakaindila kundibisyila.+
Ndiyoocinca bulemu bwabo kuba masampu.*
8 Balya micelo yacibi cabantu bangu,
Alimwi bayandisya cinyonyoono cabo.
9 Eeco iciyoocitikila bapaizi nceciyoobacitikila abalo bantu;
Ndiyoobapa mulandu akaambo kanzila zyabo,
Alimwi ndiyoobasubula akaambo kamicito yabo.+
10 Bayoolya, pele tabakakkuti pe.+
Bayoocita buvwuule, pele tabakavwuli pe,+
Akaambo kakuti tabamulemeki Jehova.
12 Bantu bangu babuzya makani kumituni yazisamu,
Bacita ncoibaambila nkoli* yabo;
Nkaambo muuya wabuvwuule ubapa kuleya,
Alimwi akaambo kabuvwuule bwabo bakaka kulibombya kuli Leza wabo.
13 Balatuula zipaizyo atala aamalundu,+
Alimwi bauntumuna busi bwazipaizyo atala aatulundu,
Amunsi lyamikamba, lyamizimbwa alimwi alyazisamu zyoonse zipati,+
Akaambo kakuti zimvwiide zyanzizyo nzibotu.
Nkakaambo kaako bana banu basimbi bacita buvwuule
Abalo bamukabana banu bacita bumambe.
14 Tandikabasubuli bana banu basimbi akaambo kabuvwuule bwabo,
Abalo bamukabana banu tandikabasubuli akaambo kabumambe bwabo.
Nkaambo baalumi babweza bavwuule akuunka ambabo
Alimwi batuula zipaizyo antoomwe abavwuule bamutempele;
Bantu bali boobu batakwe maano+ bayoonyonyoonwa.
16 Nkaambo mbubonya mbuli ŋombe mpwizi iitamvwi, Israyeli waba sicinguni.+
Aboobo sena Jehova lino weelede kubeembela mbuli mwanaambelele weembelwa mumacelelo mapati?*
17 Efraimu walikumbatizya kumituni.+
Amumuleke acibone!
Abalo baleli* bakwe bayandisya masampu.+
19 Muwo uyoomubbubbula akumutola,*
Aboobo bayoofwa nsoni akaambo kazipaizyo zyabo.”
5 “Amuswiilile makani aaya nywebo nobapaizi,+
Amubikkile maano nywebo nobamuŋanda ya Israyeli,
Amuswiilile nywebo nobamuŋanda yamwami,
Nkaambo lubeta lujatikizya ndinywe;
Nkaambo ndendinywe kakole ku Mizipa
Alimwi alunsabwe luyalidwe atala lya Tabori.+
3 Mebo ndilimuzyi Efraimu,
Alimwi Israyeli tasisidwe pe kulindime.
Nkaambo lino yebo Efraimu wacita buvwuule;
Awalo Israyeli walisofwaazya mwini.+
4 Micito yabo tiibazumizyi kupilukila kuli Leza wabo,
Nkaambo kuli muuya wabuvwuule akati kabo;+
Alimwi tabamubikkili maano Jehova pe.
5 Kulisumpula kwa Israyeli kwapa bumboni bumupa mulandu walo mwini;+
Boonse bobilo, Israyeli a Efraimu bawa mucinyonyoono cabo,
Awalo Juda wawa antoomwe ambabo.+
6 Abutanga bwabo bwambelele abwaŋombe bakaunka kuyooyandaula Jehova,
Pele tiibakamujana pe.
Wakalibatantamukide akubasiya.+
7 Tiibasyomeka kuli Jehova,+
Nkaambo bazyala bana bamusyokwe.
Aboobo mwezi omwe buyo uyoobamana kubalya* azyaabilo zyabo.*
8 Amulizye mweembo+ mu Gibea, amulizye mweembo mu Rama!+
Amoongolole aloongololo lwankondo ku Beti-aveni,+ tutobela nduwe O Benjamini!
9 Yebo Efraimu uyooba cintu cigambya mubuzuba bwakusubulwa.+
Ndaambilizya cintu ciyoocitika ncobeni akati kamisyobo ya Israyeli.
10 Basilutwe ba Juda bali buyo mbuli baabo baswenzya munyinza.+
Ndiyoobatila bukali bwangu mbubonya mbuli maanzi aapoomoka.
11 Efraimu wapenzyegwa, wapwayaulwa alubeta,
Nkaambo wakalikanzide kutobela sinkondonyina.+
12 Aboobo, mebo ndakali mbuli nkoonkolekwa yamasiku kuli Efraimu
Ambuli kubola kuli bamuŋanda ya Juda.
13 Efraimu naakabona bulwazi bwakwe, awalo Juda naakabona cilonda cakwe,
Efraimu wakaunka ku Asuri,+ alimwi wakatuma mutumwa kumwami mupati.*
Pele ooyo mwami tanaakacikonzya kumuponya nywebo,
Alimwi kunyina naakacikonzya kusilika cilonda canu.
14 Mebo ndiyooba mbuli syuumbwa uucili mwana kuli Efraimu,
Ambuli syuumbwa singuzu* kuli bamuŋanda ya Juda.
15 Ndiyakuunka akupiluka kubusena bwangu kusikila mane bakasubuke akaambo kamilandu yabo,
Baakupenga, bayoondiyandaula.”+
Wakatuuma, pele uyakwaanga zilonda zyesu.
2 Uyootubukulusya kwainda mazuba obilo.
Mubuzuba bwatatu uyootubusya,
Eelyo tunoopona kumbele lyakwe.
3 Tuyoomuzyiba, tuyoosolekesya camoyo woonse kumuzyiba Jehova.
Kuboola kwakwe kulisinizyidwe mbubonya mbuli bucedo;
Uyooboola kulindiswe mbuli mvwula yamucobocobo,
Mbuli mvwula yamamanino eeyo iitesya nyika.”
4 “Ino ndilakucita buti yebo Efraimu?
Ino ndilakucita buti yebo Juda?
Nkaambo luyando lwanu luli mbuli makumbi aamafwumofwumo,
Ambuli mume ooyo uufwambaana kuzimaana.
Alimwi lubeta iluyoomusikila nywebo luyoomweka mbuli mumuni.+
6 Nkaambo nceyandisya nduyando lutamani* ikutali zipaizyo,
Akuzyiba Leza ikutali zituuzyo zyuumpwa buumbulu.+
7 Pele balo, mbubonya mbuli bantu buyo, bacijaya cizuminano cangu.+
Ooko tiibasyomeka kulindime.
8 Gileadi munzi wabasimucita zibi,+
Uzwide mikondo iijisi bulowa.+
9 Inkamu yabapaizi ili mbuli zigwebenga ziyubilila muntu.
Bajaya bantu munzila ku Sekemu,+
Nkaambo micito yabo ilasesemya.
10 Ndabona cintu cibi kapati muŋanda ya Israyeli.
11 Lino yebo Juda, wabikkilwa ciindi cakutebulwa,
Ciindi bantu bangu ndaakubapilusya kuzwa mubuzike.”+
7 “Ciindi nendiyanda kumuponya Israyeli,
Cinyonyoono ca Efraimu acalo cilalibonya,+
Antoomwe abubi bwa Samariya;+
2 Pele mumyoyo yabo tabaambi kuti mebo ndiyoobuyeeya bubi bwabo boonse.+
Lino micito yabo ilibazingulukide koonse-koonse;
Ilalibonya antangalala kumbele lyangu.
3 Bakkomanisya mwami abubi bwabo,
Akukkomanisya basilutwe abumpelenge bwabo.
4 Boonse buyo mbaasimamambe,
Balapya mbuli citofwu ncayasya sikupanga zinkwa,
Ooyo uuleka kucisosela ciindi nakanda fulaulu akuuleka kuti ufwufwumuke.
5 Mubuzuba bwapobwe lyamwami wesu, basilutwe baciswa
—Banyema akaambo kawaini.+
Walo watambika janza lyakwe kulibaabo bafwubaazya.
6 Nkaambo balaboola munsi-munsi amyoyo iipya mbuli citofwu.*
Busiku boonse sikupanga zinkwa uloona;
Mafwumofwumo citofwu cilapya mbuli mulilo uuvwilima.
7 Boonse buyo balapya mbuli citofwu,
Eelyo balya baleli* babo.
8 Efraimu uluujisi kusangana abantu bamasi.+
Efraimu uli mbuli cinkwa cibulungene catasandulwa.
9 Beenzu bazimana nguzu zyakwe zyoonse,+ pele walo tazyi.
Alimwi mutwe wakwe woonse waile kutuba buu akaambo kamvwi, pele walo kunyina ncabwene.
10 Kulisumpula kwa Israyeli kwapa bumboni bumupa mulandu walo mwini,+
Pele tiibapiluka kuli Jehova Leza wabo,+
Alimwi tiibamuyandaula nokuba kuti bacitikilwa zintu zyoonse eezyi.
11 Efraimu uli buyo mbuli nziba mfwubafwuba iitakwe maano.+
Baita Egepita;+ baunka kuli Asuri.+
12 Kufwumbwa nkobaunka, ndiyoobavwumba alunsabwe lwangu.
Ndiyoobajata akubaleta ansi mbuli bayuni bamujulu.
Ndiyoobasubula kweelana amajwi aakucenjezya ngondakaambila mbungano yabo.+
13 Maawe kulimbabo, nkaambo batija kuzwa kulindime!
Abanyonyoonwe, nkaambo bandibisyila!
Mebo ndalilibambilide kubanununa, pele balo baamba zyakubeja kujatikizya ndime.+
14 Tiibakandiita amoyo woonse kuti ndibagwasye,+
Nokuba kuti bakaluujisi kulila amalo aabo.
Bakali kulinengaula akaambo kamaila aabo alimwi awaini wabo mupya;
Baluujisi kundizangila.
15 Nokuba kuti ndakabalaya akuyumya maanza aabo,
Balo tabandiyandi, bakanza kucita cibi.
16 Bakacinca bukkale bwabo, pele ikutali kucintu cisumpukide;*
Tiibakasyomeka mbubonya mbuli buta butebede.+
Basilutwe babo bayoojaigwa apanga akaambo kamilaka yabo yaamba majwi aabuzangi.
Akaambo kaceeci bayoosampaulwa mucisi ca Egepita.”+
8 “Kobikka mweembo kumulomo wako uulizye!+
Sinkondo waboola mbuli sikwaze kuzoolwana ŋanda ya Jehova,+
Akaambo kakuti bajaya cizuminano cangu+ akutyola mulawo wangu.+
2 Baluujisi kundikwiilila kabati, ‘O Leza wesu, swebo tobana Israyeli tulikuzyi!’+
3 Israyeli wakaka cintu cibotu.+
Aboobo sinkondo aamutandaanye.
4 Balisalila bami, pele kutali kwiinda mulindime.
Balisalila basilutwe, pele mebo tandibazyi pe.
5 Moombe wako ndamukaka, O Samariya.+
Bukali bwangu bwabavwutukila.+
Ino balaalilwa kwaciindi cilamfwu buti kuba bantu banyina mulandu?*
6 Nkaambo ooyu wakazwa mu Israyeli.
Syaazibwene ngookaupanga, tali Leza pe;
Moombe wa Samariya uyoopwayaulwa.
Ikuti kwajanika fulaulu uuli woonse, bamuzwakule* bayakuumana kuulya.+
8 Israyeli uyoomenwa.+
Lino bayooba akati kamasi,+
Mbuli cibikkilo icitayandwi.
9 Nkaambo baunka ku Asuri,+ mbuli mbongolo yamusyokwe yalizandula.
Efraimu wabbadela bamavwuule.+
10 Nokuba kuti baluujisi kubabbadela akati kamasi,
Lino ndiyoobabunganya antoomwe;
Balatalika kupenga+ akaambo kamukuli uuminya uuzwa kumwami alimwi abasilutwe.
11 Nkaambo Efraimu wayungizya zipaililo kutegwa abisye.+
Zyakaba zipaililo zyakwe zyakucitila zibi.+
13 Batuula zipaizyo zyacipego kulindime, alimwi balya nyama yanzizyo,
Pele Jehova tabakkomanini pe.+
14 Israyeli wamuluba Mulengi wakwe+ akutalika kuyaka matempele,+
Awalo Juda wavwuzya minzi iikwabilidwe.+
Pele ndiyootuma mulilo muminzi yakwe,
Eelyo uyoozyuumpa ngazi zyaumwi aumwi.”+
9 “Utakondwi pe yebo, O Israyeli.+
Utasekeleli mbuli bantu bamumasi.
Nkaambo akaambo kabuvwuule waleya kuzwa kuli Leza wako.+
Wayandisya zipego zyabuvwuule nzyopegwa mumabuwa oonse aakuumina maila.+
2 Pele lubuwa lwakuumina maila alimwi acikandilo camisaansa tazikabasanini pe,
Awalo waini wakwe mupya uyoomumanina.+
3 Tabakazumanani kukkala munyika ya Jehova;+
Muciindi caboobo, Efraimu uyoopiluka ku Egepita,
Eelyo ku Asuri bayoolya zintu zisofweede.+
Zili mbuli cakulya cakuciindi cakulila;
Boonse ibacilya bayoolisofwaazya.
Nkaambo cakulya cabo ncicabo balo balikke;
Tacikanjili muŋanda ya Jehova pe.
5 Ino muyoocita buti mubuzuba bwamuswaangano,*
Mubuzuba bwapobwe lya Jehova?
6 Nkaambo amubone! Bayootija akaambo kalunyonyooko.+
Egepita uyoobabunganya antoomwe,+ eelyo Mofi uyoobazikka.+
Mpese ziyoovwumba zintu zyabo ziyandisi zyansiliva,
Aalo mamvwa ayoomena mumatente aabo.
Musinsimi wabo uyoofwubaala, awalo muntu weendelezyegwa amuuya uyoosondoka;
Akaambo kakuti cinyonyoono cako ncipati, ulisulidwe kapati.”
8 Mulindizi+ wa Efraimu wakali a Leza wangu.+
Pele lino nzila zyoonse zyabasinsimi bakwe+ zili mbuli tukole twasikuteya tuyuni;
Kuli lusulo muŋanda ya Leza wakwe.
9 Bamaninina muzintu zileta lunyonyooko, mbubonya mbuli kumazuba aa Gibea.+
Leza uyooyeeya cinyonyoono cabo akubasubula akaambo kazibi zyabo.+
10 “Israyeli ndakamujana mbuli misaansa yamunkanda.+
Bamauso ndakababona mbuli nkuyu zitaanzi akati kankuyu zyakusaanguna kumukuyu.
Pele balo bakaunka kuli Baala waku Peori;+
Bakalyaaba kucintu cuusya nsoni,*+
Eelyo bakali kusesemya mbubonya mbuli cintu eeco ncobakali kuyandisya.
11 Bulemu bwa Efraimu bulauluka mbuli kayuni;
Kunyina uutumbuka, kunyina uumitide alimwi kunyina uumita.+
12 Nokuba kuti bakomezye bana,
Ndiyoopa kuti bafwidwe bana kusikila limwi kukabule muntu naba omwe;+
Maawe kulimbabo ndaakubafwutatila!+
13 Efraimu, ooyo uusyangidwe mumacelelo, kulindime wakali mbuli Turo;+
Lino Efraimu weelede kuleta bana bakwe kukujaigwa.”
15 “Bubi bwabo boonse bakabucitila ku Giligala,+ nkaambo ooko ndakabasulaika.
Ndiyoobatanda muŋanda yangu akaambo kamicito yabo mibi.+
Tandikabayandi limbi pe;+
Basilutwe babo boonse mbaasicinguni.
16 Efraimu uyakuumwa.+
Imuyanda wabo uyooyuma, eelyo tabakazyali mucelo nouba omwe.
Nokuba kuti bakazyale bana, ndiyoobajaya bana babo mbobayandisya.”
10 “Israyeli musaansa mubi* uulizyalila micelo.+
Mboiyaabuvwula micelo yakwe, awalo uvwuzya zipaililo zyakwe;+
Nyika yakwe noizyala kabotu, ayalo misemu yakwe yamabwe yakukomba ilaindila kubota.+
Kuli muntu uutiipwayaule zipaililo zyabo akunyonyoona misemu yabo.
3 Lino balaamba kuti, ‘Tunyina mwami,+ nkaambo tiitwamuyoowa Jehova.
Aboobo ino mwami inga watucitila nzi?’
4 Baamba majwi aabuyo, bakonka zyakubeja,+ bapanga zizuminano;
Aboobo lubeta luboola luli mbuli nsaku zikola izili mumifwolo yamumuunda.+
5 Bantu bakkala mu Samariya bayooyoowa akaambo kamoombe, imutuni waku Beti-aveni.+
Bantu banguwo bayakuulila,
Mbobayoocita abalo bapaizi babaleza beenzu aabo ibakali kuukkomanina walo alimwi abulemu bwanguwo,
Nkaambo buyoobasiya akutolwa mubuzike.
6 Uyootolwa ku Asuri kauli cipego kumwami mupati.+
Efraimu uyakuusyigwa nsoni,
Alimwi Israyeli uyoogunwa akaambo kalulayo ndwaakali kutobela.+
7 Samariya amwami wakwe bayoonyonyoonwa,*+
Mbubonya mbuli katabi katyolwa ikaibauka atala aamaanzi manji.
8 Masena aakukombela aaku Beti-aveni,+ icibi ca Israyeli,+ ayoonyonyoonwa.+
Mamvwa azincenya ziyoomena aazipaililo zyabo.+
Bantu bayakwaambila zilundu kuti, ‘Amutuvwumbe!’
Alimwi atulundu kuti, ‘Amutulimbe!’+
9 Yebo walikubisya kuzwa kumazuba aa Gibea,+ O Israyeli.
Ooko bazumanana kubisya.
Inkondo tiiyakabamana* pe bana bakutalulama ku Gibea.
10 Ndiyoobasubula ndaakuyanda.
Alimwi bantu banji bayoobungana kuti babalwane,
Ciindi zinyonyoono zyabo zyobilo zyaakupopwa alimbabo.*
11 Efraimu wakali mpwizi iitanazyala iiyiisyidwe iiyandisya kuuma maila kulubuwa lwakuumina maila,
Aboobo mebo tiindakaiguma nsingo yakwe mbotu.
Pele lino ndilapa kuti muntu umwi atante atala lya* Efraimu akumucaila.+
Juda ulalima; Jakobo ulamuhalila.
12 Amulisyangile mbuto mubululami, mutebule luyando lutamani.
Amulilimine nyika iitanalimidwe mupange myuunda+
Nokucili ciindi cakuyandaula Jehova,+
Kusikila mane akaboole akumulailila mubululami.+
13 Pele nywebo mwalima bubi,
Aboobo mwatebula kutalulama,+
Alimwi mwalya micelo yalweeno;
Nkaambo mwasyoma nzila yanu,
Mwasyoma basikalumamba banu banji kapati.
14 Lupyopyongano luyoobuka kubantu banu,
Eelyo minzi yanu iikwabilidwe yoonse iyoonyonyoonwa,+
Mbubonya mbuli lunyonyooko lwakacitwa a Salimani wamuŋanda ya Aribeli,
Mubuzuba bwankondo ciindi bamatumbu nobakapwayaulwa antoomwe abana babo.
15 Oobu mbomuyoocitilwa, nywebo nobana Beteli,+ akaambo kabubi bwanu butaambiki.
Ncobeni kubucedo mwami wa Israyeli uyoojaigwa.”*+
3 Pele mebo ndendime ndakamuyiisya kweenda Efraimu,+ ndakali kubanyamuna mumaanza aangu;+
Pele balo tiibakazumina kuti ndime ndakabaponya.
4 Ndakaluujisi kubakwela antambo zyabantu,* azyaanzyo zyaluyando;+
Kulimbabo ndakali mbuli muntu uugwisya joko munsingo zyabo,
Alimwi kabotu-kabotu ndakaleta cakulya kuli umwi aumwi wabo.
5 Tabakajokeli kucisi ca Egepita, pele Asuri uyooba mwami wabo,+
Akaambo kakuti bakakaka kujokela kulindime.+
6 Ipanga liyakuvwukaulwa muminzi yakwe+
Akunyonyoona mpingizyo zyakwe alimwi akubajaya boonse akaambo kamakanze aabo.+
7 Bantu bangu balizyibide kutasyomeka kulindime.+
Nokuba kuti bakaitwa kujulu,* kunyina uunyamuka.
8 Ino inga ndakuleka buti, O Efraimu?+
Ino inga ndakwaaba buti, yebo O Israyeli?
Ino inga ndakucitila buti mbuli Adima?
Ino inga ndakupa buti kuba mbuli Zeboimu?+
Ndacinca mizeezo, moyo wangu wakaka;
Aciindi nciconya ndamvwa lweetelelo.+
9 Tandikatondezyi bukali bwangu.
Tandikamunyonyooni kabili Efraimu,+
Nkaambo mebo ndime Leza ikutali muntunsi,
Ndime Uusalala akati kanu;
Alimwi tandikakubooleli cabukali.
10 Bayoomutobela Jehova, alimwi walo uyoovwuluma mbuli syuumbwa;+
Aakuvwuluma, bana bakwe bayooboola kuzwa kumbo kabakankama.+
11 Bayookankama mbuli kayuni baakuboola kuzwa mu Egepita,
Ambuli nziba baakuboola kuzwa mucisi ca Asuri;+
Eelyo ndiyoobapa kuti bakkale mumaanda aabo,” mbwaamba Jehova.+
12 “Efraimu wandizinguluka abubeji,
Bamuŋanda ya Israyeli bandizinguluka alweeno.+
12 “Efraimu uli mukulya muwo.
Buzuba boonse uluujisi kutandaanya muwo wakujwe.
Uvwuzya bubeji alimwi ankondo.
Bapangana cizuminano acisi ca Asuri,+ alimwi batola mafwuta ku Egepita.+
2 Jehova ujisi kaambo a Juda;+
Uyoomusubula Jakobo kweelana anzila zyakwe,
Akumujolela kweelana amicito yakwe.+
4 Wakazumanana kulwana amungelo eelyo wakazunda.
Wakalila akulomba kulelekwa.”+
6 “Aboobo, kojokela kuli Leza wako,+
Kozumanana kutondezya luyando lutamani alimwi abululami,+
Alimwi kolangila Leza wako lyoonse.
Mumilimo yoonse njendicita, tabakajani cintu cili coonse citaluzi naa cibi.’
9 Pele mebo ndime Jehova Leza wako kuzwa kucisi ca Egepita.+
Ndiyookupa kukkala mumatente alimwi,
Mbubonya mbuli kumazuba aakuciindi cibikkidwe.*
10 Ndakaambaula abasinsimi,+
Ndakavwuzya zilengaano zyabo,
Alimwi ndakaamba zikozyanyo kwiinda mubasinsimi.
11 Ku Gileadi kwacitika zintu zyalweeno*+ alimwi zyakubeja.
Ku Giligala batuula bapoho,+
Alimwi zipaililo zyabo zili mbuli milwi yamabwe iili mumifwolo yamumuunda.+
12 Jakobo wakatijila mucisi* ca Aramu;*+
Israyeli+ wakabelekela nkuko kutegwa apegwe mukaintu,+
Wakeembela mbelele kutegwa apegwe mukaintu.+
13 Kwiinda mumusinsimi, Jehova wakagusya Israyeli mu Egepita,+
Alimwi wakamukwabilila kwiinda mumusinsimi.+
14 Efraimu wandinyemya kapati;+
Mulandu wakwe wabulowa ucili amutwe wakwe,
Simalelaakwe uyoomujolela masampu aakwe.”+
13 “Efraimu naakaambaula, bantu bakakankama;
Wakali kulemekwa kapati mu Israyeli.+
Pele wakaba amulandu akaambo ka Baala+ eelyo wakafwa.
2 Lino bayungizya cibi kucibi cabo
Alimwi balipangila zikozyanyo zifwulidwe kubelesya nsiliva yabo;+
Cabupampu bapanga mituni, yoonse buyo milimo yabasyaazibwene.
Kujatikizya njiyo baamba kuti, ‘Baalumi ibatuula zipaizyo abamyonte boombe.’+
3 Aboobo bayooba mbuli makumbi aamafwumofwumo,
Mbuli mume uufwambaana kuzimaana,
Mbuli buungu bupepululwa aguwo kuzwa kulubuwa lwakuumina maila,
Ambuli busi buzwa acipulo cili kuciluli.
4 Pele mebo ndime Jehova Leza wako kuzwa kucisi ca Egepita;+
Kunyina Leza uumbi ngowakazyi kunze lyandime,
Alimwi taakwe mufwutuli uumbi kunze lyandime.+
5 Mebo ndakalikuzyi yebo munkanda,+ munyika yaciyumayuma.
6 Bakakkuta macelelo aabo,+
Bakakkuta eelyo myoyo yabo yakalisumpula.
Aboobo bakandiluba.+
7 Ndiyooba mbuli syuumbwa uucili mwana kulimbabo,+
Mbuli siluwe uuyubilila munzila.
8 Ndiyoobavwaampila mbuli munyama uutegwa bbeya iwasweekelwa bana bakwe,
Alimwi ndiyoocikwamuna camba cabo.
Ndiyoobalya ooko mbubonya mbuli syuumbwa;
Imunyama wamusyokwe uyoobakwamauna.
9 Uyookunyonyoona, O Israyeli,
Nkaambo ndime ngowazangila, mebo ndemugwasyi wako.
10 Ino lino uli kuli mwami wako, kutegwa akufwutule muminzi yako yoonse,+
Abaleli* bako aabo mbowakali kwaamba kuti,
‘Kondipa mwami alimwi abasilutwe’?+
12 Cinyonyoono ca Efraimu cilivwungailidwe;*
Cibi cakwe ciliyobwedwe.
13 Kumyongwa kwamukaintu uutumbuka kuyoomusikila.
Pele mwana ooyu mufwubafwuba;
Tazwi mwida nokuba kuti casika ciindi cakuzyalwa.
Ino luli kuli lumoola lwako, O Lufwu?+
Ino luli kuli lunyonyooko lwako, O Cuumbwe?+
Lubomba luyoosiswa kumeso aangu.
15 Nokuba kuti akatunde akati kamatete,
Muwo wakujwe uyooboola, imuwo wa Jehova,
Ulaboola kuzwa munkanda, kuzooyuminizya mugoti wakwe akumana maanzi mukasensa kakwe.
Muntu ooyo uyoosaala ciyobwedo cazintu zyakwe zyoonse ziyandisi.+
16 Samariya uyoopegwa mulandu,+ nkaambo wazangila Leza wakwe.+
14 “Kojokela, O Israyeli, kuli Jehova Leza wako,+
Nkaambo cakuleba cinyonyoono cako.
2 Amujokele kuli Jehova amajwi aaya,
Amumwaambile kuti, ‘Twalomba kotulekelela cinyonyoono cesu,+ kotambula cintu cibotu,
Eelyo tuyookutembaula amilomo yesu+ mbubonya mbotukonzya kutuula bapoho bacili bana.*
3 Cisi ca Asuri tacikatufwutuli pe.+
Tatukatanti aamabbiza,+
Alimwi tatukaciinduluki kwaamba kuti, “O Leza wesu!” kumilimo yamaanza eesu,
Nkaambo yebo nduwe uupa kuti mucaala afwidwe luse.’+
4 Ndiyoobaponya kubulwazi bwabo bwakutasyomeka.+
5 Ndiyooba mbuli mume kuli Israyeli;
Uyoofwulula mbuli mpana
Akusimpa miyanda mbuli zisamu zyaku Lebano.
6 Tutabi twakwe tuyooyandalala,
Bweebesi bwakwe buyooba mbuli bwacisamu camaolifa,
Alimwi kununkilila kwakwe kuyooba mbuli kwaku Lebano.
7 Bayookkala alimwi mucimvwule cakwe.
Bayoolima maila alimwi bayoosonsa mbuli musaansa.+
Mpuwo yakwe iyooba* mbuli waini waku Lebano.
8 Efraimu uyakwaamba kuti, ‘Ino ndicijisi makani nzi amituni?’+
Mebo ndiyoovwiila akumulinda.+
Ndiyooba mbuli cisamu camulombe cifwefwema.
Kulindime nkoiyoojanwa micelo yako.”
9 Ino nguni musongo? Aazimvwisye zintu eezyi.
Ino nguni uucenjede? Aazizyibe zintu eezyi.
Nkaambo nzila zya Jehova zililuleme,+
Eelyo baluleme mbabayakweenda mulinzizyo;
Pele basikusotoka mulawo bayoolebwa mulinzizyo.
Ooku nkufwiinsyigwa kwazina lyakuti Hosaya lyalo ilyaamba kuti, “Kufwutulwa a Ja” naa “Ja Wafwutula.”
Naa “bamusyokwe.”
Nkokwaamba kuti “Leza Uyoosyanga Mbuto.”
Naa “Cibanda.”
Nkokwaamba kuti “Tanaakafwidwa Luse.”
Nkokwaamba kuti “Tabali Bantu Bangu.”
Amubone Bupanduluzi Buyungizyidwe buli kuli Ho 1:9.
Amubone Bupanduluzi Buyungizyidwe buli kuli Ho 1:6.
Naa “Acibanda.”
Naa “O Baala Wangu.”
Naa “kabapona.”
Nkokwaamba kuti “Leza Uyoosyanga Mbuto.”
Amubone Bupanduluzi Buyungizyidwe buli kuli Ho 1:6.
Amubone Bupanduluzi Buyungizyidwe buli kuli Ho 1:9.
Nkokuti, eezyo izyakali kubelesyegwa mubukombi bwakubeja.
Homeri lyakaleelene amalita aali 220. Amubone Makani Aayungizyidwe B14.
Naa “tandinakooni anduwe pe.”
Mu Chihebrayo, “kwamazuba manji.”
Naa “abaleza bamikwasyi.”
Naa “malailile.”
Naa ambweni, “Muciindi cakundilemeka bandisampaula.”
Mu Chihebrayo, “Nzyezitola moyo.”
Naa “nkoli yasikusonda.”
Mu Chihebrayo, “mubusena bukwakwabukide?”
Naa “bukoko bwawiiti.”
Naa “Balaciindizya kucita buvwuule.”
Mu Chihebrayo, “Azyalo ntobo.”
Naa “uyoomukukula.”
Naa “Bazangi.”
Naa “balinjilide kapati.”
Naa “ndilabasubula.”
Naa ambweni, “Aboobo bayoomana kuligwa mumwezi omwe buyo.”
Naa “amyuunda yabo.”
Naa “Mwami Jarebu.”
Naa “syuumbwa uucili mwana-mwana.”
Mu Chihebrayo, “bayooyandaula busyu bwangu.”
Naa “nduse.”
Naa ambweni, “Nkaambo myoyo yabo ili mbuli citofwu ciindi nobaboola amakanze aabo mabi.”
Mu Chihebrayo, “babetesi.”
Nkokuti, ikutali kubukombi busumpukide.
Naa “kuba bantu basalala?”
Naa “aaimvwi.”
Naa “beenzu.”
Naa “zyamumalailile aangu.”
Naa “bwapobwe lyako libikkidwe.”
Naa “kuli leza uujazya nsoni.”
Bamwi baamba kuti “da litulubanya.”
Naa “ankolo zinyanide.”
Naa ambweni, “uuyandalala.”
Naa “Myoyo yabo njabucenjezu; Myoyo yabo njabumpelenge.”
Mu Chihebrayo, “bayakuumuzyigwa.”
Naa “tiiyakabanyonyoona cakumaninina.”
Nkokuti, baakusubulwa mbuli kuti babikkwa joko.
Naa “ndilapa kuti muntu umwi amupope.”
Mu Chihebrayo, “uyakuumuzyigwa.”
Nkokuti, basinsimi alimwi abantu bambi ibakatumwa kuyiisya bana Israyeli.
Naa “antambo zyalubomba,” mbuli zyamuzyali.
Nkokuti, kubukombi busumpukide.
Naa “uceenda.”
Naa “ndezina ndyayeeyegwa andilyo.”
Naa “musambazi.”
Naa ambweni, “capobwe.”
Naa “zyamasalamuzi; zyamizimo.”
Mu Chihebrayo, “musyokwe.”
Naa “Siriya.”
Mu Chihebrayo, “Ababetesi.”
Naa “ciliyobwedwe.”
Naa “Cikkalilo Cabafwu.” Amubone Bupanduluzi Bwamabala.
Mu Chihebrayo, “Eelyo tuyookupa bapoho bacili bana bamilomo yesu.”
Mu Chihebrayo, “Ciibalusyo cakwe ciyooba.”