NAHUMU
1 Ngaaya makani mapati aajatikizya Nineve:+ Ibbuku lyacilengaano ca Nahumu* muna Elikosi:
2 Jehova ngu Leza uuyanda kuti kakombwa buyo alikke+ alimwi uupa cisubulo;
Jehova ulasubula alimwi ulilibambilide kutondezya bukali bwakwe.+
Jehova ulabasubula balwani bakwe,
Alimwi ulabayobweda bukali basinkondonyina.
3 Jehova ulamuka kunyema+ alimwi ulaanguzu zinji kapati,+
Pele ziyume zitete Jehova takaleki kupa cisubulo ceelede.+
Nzila yakwe ili mumuwo uunyonyoona amuguwo pati,
Aalo makumbi nkasuko kalunda kumaulu aakwe.+
Basani a Karimeli zilaneta,+
Aalo maluba-luba aaku Lebano alaneta.
5 Malundu alazungaana akaambo kanguwe,
Atwalo tulundu tulanyenguluka.+
Inyika iyoozungaana akaambo kabusyu bwakwe,
Antoomwe acisi alimwi abaabo boonse bakkala mulincico.+
6 Ino nguni uukonzya kwiima kumbele lyakwe ciindi nanyemede?+
Ino nguni uukonzya kuliyumya ciindi nakalede kapati?+
Bukali bwakwe buyootilwa mbubonya mbuli mulilo,
Aalo mandomba ayoopwayauka akaambo kanguwe.
7 Jehova mubotu,+ matijilo mubuzuba bwamapenzi.+
Ulababikkila maano* aabo bayuba mulinguwe.+
8 Kwiinda muzambangulwe likukulula uyakuunyonyoona cakumaninina munzi ooyu,*
Alimwi mudima uyoobatobela basinkondonyina.
9 Ino ncibi nzi ncomutiikanze kumucitila Jehova?
Walo ulanyonyoona cakumaninina.
Mapenzi taakabooli kabili pe.+
10 Nkaambo balinjilene mbuli mamvwa,
Alimwi bali mbuli bantu bakoledwe bukoko;*
Pele bayoopya mbubonya mbuli makuba mayumu.
11 Mulinduwe muyoozwa muntu uuyeeya kucita cibi kuli Jehova,
Uupa lulayo lutagwasyi.
12 Mboobu mbwaamba Jehova:
“Nokuba kuti bakajisi nguzu zinji alimwi bakali banji,
Bayoogonkwa akuloba.
Ndakakuuma yebo,* pele tandikakuumi kabili pe.
13 Lino ndilatyolaula joko lyakwe eelyo lili alinduwe,+
Azyalo zyaanzyo nzyoangidwe ndilazikosola muzibeela zyobilo.
14 Kujatikizya nduwe* Jehova walailila kuti,
‘Tokabi limbi asimulyazina.
Muŋanda* yabaleza bako ndiyoonyonyoona zikozyanyo zibezedwe alimwi azikozyanyo zifwulidwe.
Ndiyookupangila cuumbwe, nkaambo ulasesemya.’
15 Amubone! Ngaalya atala aamalundu imaulu aamuntu uuleta makani mabotu,
Imuntu waambilizya luumuno.+
O Juda kosekelela mapobwe aako,+ uzuzikizye zikonke zyako,
Nkaambo muntu wabuyo kunyina limbi nayakwiinda mulinduwe pe.
Muntu ooyo uyoonyonyoonwa cakumaninina.”
2 Ooyo uumwaya bantu waboola kuzookulwana.*+
Amugatele masena aayakilidwe lubaya.
Amulinde nzila.
Amulibambile akubelesya nguzu zyanu zyoonse.
2 Nkaambo Jehova uyoojola bulemu bwa Jakobo,
Antoomwe abulemu bwa Israyeli,
Mbokunga basikunyonyoona babanyonyoona;+
Ayalo mitabi yabo bainyonyoona.
3 Intobo zyabaalumi bakwe basinguzu zilasubila,
Basikalumamba bakwe basamide zisani zisalala pyu.
Butale ibubikkidwe kunkalaki zyankondo bulamweka mbuli mulilo
Mubuzuba mbwalibambila nkondo,
Aalo masumo aakwikkidwe kuzisamu zyamulombe alavwukaulwa.
4 Nkalaki zyankondo zilabalika mumigwagwa calubilo kapati.
Zilazuza kaziyaabutanta akuselemuka mumabuwa aabuleya.
Zilamweka mbuli minzenge iivwilima akulaba mbuli kalabo.
5 Mwami uyakwiita basikalumamba bakwe bapati-pati.
Banakweenda kabayaabuliwida.
Bayoofwambaanina kubwaanda bwamunzi;
Bayoopanga cilikwabilizyo.
7 Bubambe bwabikkwa kale: Munzi wavwumbulwa,
Watolwa, eelyo bazike banguwo basimbi balalila;
Balila mbuli nziba nobalyuuma-uma azyamba zyabo.*
8 Mumazuba aanguwo oonse, munzi wa Nineve+ wali mbuli cizyiba cijisi maanzi manji,
Pele lino maanzi ayaabumana.
“Amwiime! Amwiime!”
Pele kunyina naba omwe uujokela.+
9 Amusaale nsiliva, amusaale ngolida!
Lubono lwanguwo talumani pe.
Uzwide zintu ziyandisi zyamisyobo yoonse.
10 Munzi taujisi cintu cili coonse, waba matongo alimwi wanyonyoonwa!+
Myoyo yabantu yazwa, mumagondo mwabo mwatontola, tusolo twabo tulakankama;
Masyu aabo oonse alibonya kuti baliyoowede kapati.
11 Ino uli kuli mulindi wabasyuumbwa,+ oomo mulida basyuumbwa bacili bana-bana,
Oomo syuumbwa mwazwa kasolweda kana kakwe,
Kakunyina muntu naba omwe uubayoosya?
12 Syuumbwa ooyo wakali kuzazawida bana bakwe nyama nji
Alimwi basyuumbwa bakwe bazyazi wakali kubasinina banyama.
Wakaluujisi kuzuzya malyango aakwe abanyama mbaluma,
Aalo malindi aakwe aakuyubila wakali kwaazuzya banyama mbaakazazaula.
13 “Bona! Ndilakulwana,” mbwaamba Jehova wamakamu,+
“Ndiyakuumpa nkalaki zyako zyankondo kakuunta busi,+
Alimwi panga liyoojaya basyuumbwa bako ibacili bana-bana.
Banyama mboluma ndiyoobanyonyoona munyika,
Eelyo taakamvwugwi limbi majwi aabatumwa bako.”+
3 Maawe kumunzi uutila bulowa!
Uzwide buyo bumpelenge abugwebenga.
Taakwe noubula banyama bakuluma!
2 Kwamvwugwa kulila kwacimboko akusabila kwamavwili,
Mabbiza aabalika alimwi ankalaki zisotauka.
3 Kuli bantu batantide mabbiza, mapanga aamweka-mweka, masumo aaŋaima-ŋaima,
Bantu banji bajaidwe, amilwi yamitunta
—Mitunta minji taikonzyi kubalwa pe.
Baile kulebwa amitunta.
4 Caba boobo akaambo kakuvwula kwamicito yabuvwuule bwamuvwuule ooyo,
Ooyo weebeka alimwi mubotu kapati, mulozi wabalozi,
Ooyo uuca masi abuvwuule bwakwe alimwi uuca misyobo yabantu abulozi bwakwe.
5 “Bona! Ndilakulwana,”* mbwaamba Jehova wamakamu,+
“Ndiyookuvwumbula musinsi wako akukuvwumbya nguwo kumeso;
Ndiyoopa kuti masi abone mantanda aako,
Akuti mami abone masampu aako.
6 Ndiyookufwusa zintu zisesemya
Akukupa kuba cintu cisesemya;
Alimwi ndiyoopa kuti ube cintu cigambya.+
Ino nguni uutiimweetezye?’
Nkuli nkonditiijane bantu batiikuumbulizye?
8 Sena yebo uli mubotu kwiinda No-amoni,*+ ooyo wakakkede kumbali aatugelo twamulonga wa Nile?+
Wakazingulukidwe maanzi koonse-koonse;
Lwizi ndolwakali lubono lwakwe alimwi abwaanda bwakwe.
9 Cisi ca Etiopiya aca Egepita nzyezyakali kasensa kanguzu zyakwe zinji kapati.
Bana Puti+ abana Libya mbabakali kumugwasya.+
10 Nokuba boobo, awalo wakaba muzike;
Wakatolwa mubuzike.+
Bana bakwe abalo bakapwayaulwa kumakkona aamigwagwa yoonse.
Baalumi bakwe balemekwa bakabaumina cisolo,
Abalupati-pati bakwe boonse bakaangwa nketani.
11 Lino anduwe uyookolwa;+
Uyootija akuyuba.
Uyooyandaula mayubilo kuli sinkondo.
12 Maanda aako oonse aayakilidwe lubaya ali mbuli mikuyu iijisi micelo mitaanzi kupya;
Ikuti yayuunyizyigwa, iwida mukanwa lyabasikulya.
13 Bona! Basikalumamba bako ibali mulinduwe bali mbuli bamakaintu.
Milyango yacisi cako iyooba bukwazi kuti basinkondonyoko banjile.
Mulilo uyoozyuumpa mpingizyo zyamilyango yako.
14 Kolitekela maanzi aakubelesya munzi waakusinkilwa!+
Koyumya maanda aako aayakilidwe lubaya.
Konjila mumankanda, ukande bulongo amaulu aako;
Kojata cikombole.
15 Nokuba kooko mulilo uyookuumpa cakumaninina.
Ipanga liyookukosola.+
Liyookunyonyoona mbuli mbocinyonyoona cisozi citanakomena.+
Kolivwuzya kapati mbuli cisozi citanakomena!
Inzya, kolivwuzya kapati mbuli cikwikwi!
16 Yebo wavwuzya basimakwebo bako kwiinda nyenyeezi zyakujulu.
Cikwikwi citanakomena cilaliyupulula, mpoonya cilauluka.
17 Balindizi bako bali mbuli cikwikwi,
Abalo balupati-pati bako bali mbuli cikwikwi cinji.
Cilavwoomana muzyaanda zyamabwe ibuzuba nokuli mpeyo.
Pele zuba lyabala, cilauluka;
Eelyo kunyina uuzyiba nkocibede.
18 Beembezi bako balaumfwula, omwami wa Asuri;
Nkumekume zyako zilikkede mumaanda aazyo.
Bantu bako bamwaigwa atala aamalundu,
Alimwi kunyina uubabunganya antoomwe.+
19 Tokoolemununwa kumapenzi aakujisi.
Cilonda cako tacisilikiki pe.
Boonse aabo bamvwa makani aajatikizya nduwe bayookamba maanza aabo;+
Nkaambo ino nguni watakapenga akaambo kalunya lwako lutamani?”+
Nkokwaamba kuti “Sikuumbulizya.”
Naa “Ulabalanganya.” Mu Chihebrayo, “Ulibazyi.”
Nkokuti, munzi wa Nineve.
Naa “bukoko bwawiiti.”
Nkokuti, Juda.
Nkokuti, Asuri.
Naa “Mutempele.”
Nkokuti, Nineve.
Naa “iyookolomoka.”
Mu Chihebrayo, “amyoyo yabo.”
Nkokuti, Nineve.
Nkokuti, Tebesi.