NYIKA ALIMWI ABANTU
Kuswaya ku Cambodia
MAANDA AAIMPUKA, misika muli bantu banji alimwi ibajisi bubi, migwagwa muli mahonda manji aanyamuna mpasya, mbuli nkuku alimwi amafiliji. Eezyi nzimwi buyo zyazintu nzyomukonzya kubona kumasena amwi mu Cambodia.
Bantu baku Cambodia bazyibidwe kuti balasangalizya, balasamausya alimwi balikamantene. Ciindi nobaitana, babelesya mazina aabulemu aakuti mukwesu, mucizyi, bamaama basyoonto, baaisya, banene naa basyaanene nokuba kuti baswaangana kwaciindi cakusaanguna.
Bana Cambodia bamwi bakkala mumato aabambidwe mbuli maanda, mpoonya bamwi bakkala mumaanda aayakidwe mumaanzi. Mumaanzi mweenya oomo kuli azikolo, zibbadela, misyika alimwi amwakusambalila mungwimba
Mucelo uutegwa Dragon ulizyibidwe kapati mu Cambodia
Mupunga ncecilyo ciligwa kapati ku Cambodia. Kanji-kanji nobalya inga kuli misyobo yotatwe naa yone yazyakulya kubikkilizya amusinza. Inswi balaziyanda kapati. Ziindi zinji balabamba zyakulya zilweela, zipapa, alimwi azijisi munyo akuligwa aciindi comwe.
Myaka iili 2,000 yainda, basimakwebo bana India abasilweendo bamwi nobakali kuya ku China bakatalika kwiinda kunkomwe yaku Cambodia kuyaabucincanya milembo alimwi alubulo kumasipaisi aamucisi eeci, mapulanga, meja aabazovwu alimwi angolida. Mukuya kwaciindi, bantu baku Cambodia bakatalika kwiiya zilengwa zyaku India aku China, aboobo zikombelo zyaci Hindu alimwi aci Bbuda zyakavwula kapati. Mazuba aano, mweelwe wiinda ku 90 pesenti wabantu baku Cambodia mba Bbuda.
Mu Cambodia, Bakamboni ba Jehova balakambauka mulumbe wamu Bbaibbele uupa bulangizi. Bagwasya bantu banji kwiinda mukubelesya bbuku lyakuti, Ino Ncinzi Cini Bbaibbele Ncoliyiisya? Bbuku eeli lilajanika mumyaambo iitandila ku 250, kubikkilizya amwaambo waci Cambodia.
Bantu bainda ku 1,500 mu Cambodia balaiya Bbaibbele a Bakamboni ba Jehova alimwi akujana bwiinguzi kumibuzyo mbuli wakuti, “Ino bafwide bali kuli?” “Ino Leza ujisi makanze nzi kujatikizya nyika?”
Ibbuku lyakuti Ino Ncinzi Cini Bbaibbele Ncoliyiisya?, ilyakamwaigwa a Bakamboni ba Jehova lilajanika mumwaambo waci Cambodia (litondezyedwe aawa).