Cibalo 37

Jesu Wamana Buumba bwa Mukamufwu

UCIMANA buyo kuponya mubelesi wasilumamba, Jesu waunka ku Naini, imunzi uuli kumusanza aa Kapernauma ikulampa makkilomita aainda ku 32. Basikwiiya bakwe ankamu mpati bamusindikila. Nkuumangolezya nobalondelela kunjila munzi wa Naini. Awa bajana basimalila. Imubili wamwaalumi uliyumwidwe kuzwa mumunzi kutola kukuzika.

Iciimo cabanyina cilikatazide kapati nkaambo mbaamukamufwu alimwi oyu ngomwana alikke ngobajisi. Nobakafwa balumi babo, bakalikuumbulizigwa akaambo kakuti bakalijisi mwana. Ibulangizi bwabo alimwi amakanze zyoonse bakali kuzisyomya mulinguwe. Pele lino kunyina wakubaumbulizya. Bali mubuumba kapati basimunzi nobaya bubasindikila kuya kunamaumbwe.

Jesu naamubona mukaintu oyu, weetezyegwa kapati akaambo kabuumba bwakwe. Aboobo, caluzyalo pele kasinizide cakupa lusyomo, wamwaambila kuti: “Leka kulila.” Iciimo cakwe amucito zyapa kuti makamu aabantu babikkile maanu. Elyo naaswena afwaafwi akujata macila aanyamude mubili, ibatembede baima. Boonse bakankamana kuti naa ulacita nzi.

Masimpe kuti aabo mbali ambabo Jesu bakamubona kale kaponya bantu banji camaleele kuzilwazi. Pele tabana mubwene kabusya muntu uuli woonse kuzwa kubafwu. Sena ulakonzya kucita cintu cili boobu? Kaambila mubili, Jesu ulaamba: “Mulombe, ndakwaambila, Buka.” Mpoona mwaalumi wakkala! Watalika kwaambaula mpoonya Jesu wamupa kulibanyina.

Bantu nobabona kuti mwaalumi wapona ncobeni batalika kwaamba kuti: “Kwabuka musinsimi mupati akati kesu.” Bamwi balaamba: “Leza wayeeya bantu bakwe.” Kufwambaana-fwambaana makani aajatikizya cintu eci cikankamanisya amvwigwa moonse mu Judaya alimwi amuzisi zyoonse zizingulukide.

Johane mubbapatizi ucili muntolongo alimwi uyanda kumvwa makani manji aamilimo njakonzya kucita Jesu. Basikwiiya ba Johane bamwaambila makani aa maleele oonse aya. Ino wacita buti? Luka 7:11-18.

▪ Ncinzi cicitika ciindi Jesu naalondelela kusika mu Naini?

▪ Camujatikizya buti ncaabona Jesu alimwi ncinzi ncaacita?

▪ Ino bantu balimvwa buti amakani aa maleele aa Jesu?