Cibalo 39
Ibalisumpula aba Licesya
NAAMANA kwaamba bubotu bwa Johane Mubbapatizi, Jesu wagama babaya bantu baliyanda batakkalikide ibali munsi lyakwe. Ulaamba: “Bantu basunu . . . Balikozyene abana bakede mucisambalilo, baita beenzinyina babo, bati, Twakamusibila nyeele, nekubaboobo teemwakazyana. Twakaimba zyakulizya, nekubaboobo teemwakalila.”
Ino Jesu waamba nzi awa? Wapandulula ategwa: “Johane wakeza, katalyi, katanywi, nkabela baamba bati, Ulijisi daimona. Mwana a-Muntu weza, ulalya, ulanywa, nkabela baamba bati, Amulange, sindya, mukolwi mulongwe wabo basimutelo abasizibi.”
Tacikonzyeki pe kukkomanisya bantu. Kunyina cibakonda. Johane wakapona buumi bwabukata, bwakuliimya kali mu Naziri kweelana akwaambilizya kwamungelo kwakuti “takoozoonywa waini niiba mbote.” Pele bantu baamba kuti ulaa daimona. Kulubazu lumbi Jesu upona mbuli bantu bambi, kutali mubukata pele utamikizigwa kuciidizya.
Elo cilakatazya kaka kukkomanisya bantu! Bali mbuli bana bakaka kuzyana beenzinyina nobasiba nyeele naa bakaka kulila nobaimba zyakulizya. Nokuba boobo Jesu ulaamba: “Maanu alulamikwa kumilimo yao.” Inzya ibumboni—imilimo—ilacisalazya kuti ikutamikizigwa kwa boonse bobile Johane a Jesu nkwakubeja.
Lino Jesu wabandauka minzi yotatwe kuti aikalalile, Korazini, Betsaida alimwi a Kapernauma mwalo mwaakacitila milimo yakwe minji yanguzu. Jesu ulaamba, ikuti naakacitila milimo eyo muminzi yaku Foinike ya Turo a Sidoni, eyi minzi noyeempedwe kalekale akusama masaka atwe. Kasinganya Kapernauma walo wali mbuli kuti ncecisiko muciindi coonse camulimo wakwe, Jesu ulaamba: “Mubuzuba bwalubeta, mulandu wa-Sodoma uzooba muniini kwiinda nduwe.”
Mpoonya Jesu watembaula Usyi wakujulu caantangalala. Wacita boobu akaambo kakuti Leza wasisila zintu zyakumuuya basimaanu abacenjede pele wayubununa zintu ezi zibotu kubantu buyo, kubana.
Mpoonya kumamanino, Jesu watamba cakukombelezya ulaamba: “Amuboole kulindime nyoonse nomukatede nomulemenwa, ndime enti kamulemunune. Amulikulike ijokwe lyangu, mwiiye kwangu, nkaambo ndilibombede, ndi mutete moyo, lino mulakatulukwa mumyoyo yanu, nkaambo ijokwe lyangu lilibulungusene, awalo mukuli wangu muuba.”
Ino Jesu ukatulusya buti? Ulacita obo kwiinda mukupa lwaanguluko kuzwa kuzilengwa izikatazya zyalo nzyobakulika bantu basololi bazikombelo, mucikozyanyo, kubikkilizya ikuyuminina kubamba mulawo wa Sabata. Alimwi ulatondezya nzila mbobanga bakatalukwa abo balemenwa akaambo kakudyaamininwa abeendelezi bamapolitikisi alimwi abaabo balemenwa zibi zyabo kwiinda mukubaa manjeezyeezya aakatazidwe. Ulayubununa kuli baaba mbuli zibi zyabo mbozikonzya kulekelelwa alimwi ambobanga babaa cilongwe cibotu a Leza.
Ijokwe lyakwe libulungusene ndyapa Jesu nkulyaaba kwini-kwini kuli Leza, ikukonzya kubelekela Taateesu wakujulu siluzyalo alimwi silubomba. Alimwi mukuli muubauba Jesu ngwapa kuli baabo baboola kulinguwe nkutobela zyeelelo zya Leza mubuumi bwabo boonse zyalo zili mmilawo Yakwe iilembedwe mu Bbaibbele. Alimwi kwiitobela eyi taciminyi pe. Matayo 11:16-30; Luka 1:15; 7:31-35; 1 Johane 5:3.
▪ Muunzila nzi bantu baliyanda, ibatakkalikide bamuciindi ca Jesu mobali mbuli bana?
▪ Nkaambo nzi Jesu ncaatembaula Usyi wakujulu?
▪ Muunzila nzi bantu mubaminidwe alimwi nkukatalukwa nzi Jesu nkwapa?