Lugwalo Luzwa Kukabunga Keendelezya
Nomuyandwa Bakwesu Abacizyi:
Mumagazini yakusaanguna ya January 1, 2008, magazini yakubuleya ya Ngazi Yamulindizi yakatalisya zibalo zikkomanisya kapati izijisi mutwe wakuti “Amwiiye Lusyomo Lwabo.” Kuzwa ciindi eeco, cibalo cipya cijisi mutwe ooyu cali kumwaigwa kwainda myezi yotatwe, calo icali kutukkomanisya kapati!
Ino basikubala balimvwa buti kujatikizya zibalo eezyi? Naakamana kubala cibalo cijatikizya Marta, sikubala umwi wakalemba kuti: “Ndakaseka nondakacibala nkaambo ndili mbubwenya mbulinguwe—lyoonse ndiyandisya kuba sikusamausya beenzu mubotu alimwi akujata bubi, pele zimwi ziindi ndilaluba mbokuyandika kupumuna kutegwa ndikkomane akuyanzana abalongwe.” Mukubusi umwi iwakakkomana kubala cibalo caamba Esita, wakaamba kuti: “Ndilaazumina makani aakuti zimwi ziindi tulakonzya kubikkila kapati maano kuzisani zyamazuba aano. Tweelede kusama kabotu; pele tatweelede kuciindizya.” Wakayungizya kwaamba kuti: “Jehova ubikkila kapati maano kubuntu bwesu bwamukati.” Alimwi cibalo icakali kwaamba mwaapostolo Petro cakapa mucizyi Munakristo umwi kwaamba kuti: “Ndakajatikizyigwa kapati acibalo eeci ciindi nondakacibala. Cakali mbuli kuti ndakaliko! Kutegwa ndizimvwisye zyaambwa ndakali kusola kweezeezya.”
Basikubala aaba—kubikkilizya abamwi banji ibakalemba magwalo kutondezya kulumba kwabo kujatikizya zibalo eezyi—basinizya kaambo mwaapostolo Paulo nkaakalemba naakati: “Zyintu zyoonse zyakalembwa kaindi zyakalembelwa kutuyiisya.” (Lom. 15:4) Masimpe, Jehova wakabona kuti makani ngobakaamba bantu aaba abikkilizyigwa mu Bbaibbele kutegwa twiiye twaambo tuyandika kapati. Toonse buyo, kufwumbwa naa twakkala myaka yongaye mukasimpe, tulakonzya kwiiya kuzwa kuzikozyanyo zyabo.
Tumukulwaizya kulibala bbuku eeli kakunyina kusowa ciindi. Amulibelesye mububambe bwanu bwa Kukomba Mumukwasyi—bana bayakulikkomanina! Ciindi mbungano yaakutalika kubelesya bbuku eeli mu Ciiyo ca Bbaibbele Cambungano, mutakaindwi ciiyo nociba comwe pe! Mutabindi; amulibale kabotu-kabotu. Amweezeezye zyintu izyakali kucitika ciindi nomubala. Amusole kulimvwa mbobakali kulimvwa bantu baambidwe mu Bbaibbele akubona zyintu nzyobakali kubona. Amweezyanisye mbobakacita nobakali mubukkale bumwi abumwi ambomwali kunga mwacita nomwakali ndinywe.
Tulikkomene kapati kuti andinywe mube acoolwe cakubala bbuku eeli. Tusyoma kuti bbuku eeli liyakumugwasya nywebo amukwasyi wanu. Tulamuyanda kapati alimwi kamupona kabotu,
Kabunga Keendelezya ka Bakamboni ba Jehova