Majwi Kubazyali

Ino ncipego nzi cibotu kwiinda ncomukonzya kupa bana banu? Kuli zyintu zinji nzyobayandika, eezyi zilabikkilizya aluyando lwanu, kubasololela, alimwi akubakwabilila. Pele cipego cibotu ciinda zyoonse ncomukonzya kubapa nduzyibo lwa Jehova alimwi akasimpe kajanika mu Jwi lyakwe, Ibbaibbele. (Johane 17:3) Luzyibo oolu lulakonzya kubagwasya bana banu kumuyanda Jehova alimwi akumubelekela camoyo woonse kuzwa kubwana.—Matayo 21:16.

Bazyali banji bajana kuti bana bacili baniini bamvwa kabotu kwiiya ziiyo alimwi azyakucita zifwaafwi. Aboobo, tulikkomene kumubambila broshuwa eeyi yakuti, Nzyondiiya Kuzwa mu Bbaibbele. Ciiyo cimwi acimwi cibambidwe kuti kaciisya munzila ngubauba. Zifwanikiso alimwi amajwi aayendelana azifwanikiso zyakabambilwa bana, ikapati bajisi myaka yakuzyalwa yotatwe naa iitasiki aawo. Mizeezo iijatikizya zyakucita yabikkilizyigwa. Broshuwa eeyi ya Nzyondiiya Kuzwa mu Bbaibbele tacili cakusobanya cabana. Muciindi caboobo, yakabambilwa kuti kamubala antoomwe abana banu, calo ciyoopa kuti kamwaanguluka kubandika.

Tulisinizyide kuti broshuwa eeyi iyoomugwasya nomuyiisya bana banu kasimpe kamu Bbaibbele “kuzwa kubuvwanda.”—2 Timoteyo 3:14, 15.

Tobanyoko,

Kabunga Keendelezya ka Bakamboni ba Jehova