Kaano ka Zambangulwe Kalazuminana Ancolyaamba Bbaibbele
ZAMBANGULWE lyakuciindi ca Nowa ncintu cakacitika ncobeni. Mumasena manji aasiyene-siyene imakani aya alaa mbwaaluulwa mutwaano twazyansiku. Mucisi ca Chad mu Afrika, mboobu imusyobo wa Moussaye mbuulipandulula Zambangulwe:
‘Mbukaaniinga, mubusena bumwi bwakulaale kwakali kupona umwi mukwasyi. Bumwi buzuba, banyina bakayanda kujikila mukwasyi wabo budodoodo. Aboobo bakabweza ncili yabo amunsi kutegwa batwe busu ibwanzembwe. Kwaciindi eco, ijulu lyakali afwaafwi kapati kwiinda mpolili sunu. Cakuti naa wanyamuna janza mujulu, kwakali kukonzeka kulijata. Bakatwa nzembwe anguzu zyabo zyoonse, elyo kumane buyo kaindi kasyoonto nzembwe zyakazukila, bwaba busu. Pele nibakali kutwa, bakaintu aba bakanyamunisya munsi cabuyamba cakuti bakalidonkola julu! Mpoona-mpoona, meenda manji kapati akatalika kupwatamukila anyika. Eeyi teeyakali mvula mangamanga pe. Yakawa imvula eyi kwamazuba aali musanu mwaabili masiku amasikati kusikila mane nyika yoonse yakavumbwa ameenda. Ciindi noyakali kuwa mvula, ijulu lyakali kuyaa buswena mane limwi kuyoosika waawo mpolili sunu—alaale kapati aatasikiki. Ma! Yabija ntenda eyi yakali kubantu. Kuzwa waawo, twakasowekelwa coolwe cakujata julu amaanza esu.’
Kujanika kuti twaano twansiku itwaamba zyazambangulwe lyanyika tulakonzya kujanwa koonse-koonse munyika. Imisyobo yabantu iyakajanika okuya ku Amerika kubikka ama Aborijini baku Australia boonse balitujisi itwaano twandilyo. Ikwaana inga kwaindana, pele itwaano tunji tujisi muzeezo wakuti nyika yakavumbwa ameenda akuti bantu basyoonto buyo mbibakafutuka mubwato bwakabambwa amuntu. Ikujanika nkokajanika kuli koonse kaambo aka nkuyungizya bumboni bwakuti Zambangulwe lyakacitika masimpe, kweelana ambolyaambwa mu Bbaibbele.—Matalikilo 7:11-20.