Mbaani Bayooba Bakambausi?

KUMUSWAANGANO waba World Council of Churches myaka iili 40 yainda, basimuswaangano bakalaililwa kuti “babe amuuya wabukambausi” akuti bayiisye mbelele zyabo “kukambauka.” Nokwakainda myaka iili 5, imupaizi wa Katolika John A. O’Brien wakalemba kujatikizya mbokwakali kuyandika kuleta basiciiya bapya “kwiinda mukubaunkila” ikutali “kwiinda mukukkala buyo mumaanda eesu.” Mpoonya mu January 1994 Paapa John Paul II wakaamba kuti “tacili ciindi cakuti Makani Mabotu kaajazya nsoni, nciindi cakukambaukila atala aziluli.”

Pele kuboneka kuti oku kwiita bakambausi kwamuziindi-ziindi kwali kwiide kucitilwa muuzyamvwide. Icibalo cakali mupepa lyaku Australia litegwa Illawarra Mercury lyakati: Iba Katolika balaa mpuwo baku South Coast tabayandide pe kwiiya nzila ya Bakamboni ba Jehova mulusyomo lwabo.” Umwi mwaalumi wakaamba kuti bukambausi “tabuli akati kamizeezo ya Katolika.” Aumwi wakati: “Ncibotu kuti Cikombelo casoleka kusumpuka, pele kutali kwiinda mukukonkomona milyango. Ambweni kubelesya zikolo naa magwalo cilainda kubota.” Naba mupati wacikombelo cinyenzi taakali masimpe mbwaakali kunga ulaapandulula makani aa paapa. Wakati: “Inga twakulwaizya bantu kucita Makani Mabotu ngobazi kwiinda mubuumi bwabo beni. Naa eco caamba kuyaa bukonkomona mumilyango, ngaabo ayo.” Imutwe wamakani wacibalo eeco wakakakosaula kabotu kaambo ategwa: “Iba Katolika kunyina nobayootobela kulomba kwa Paapa kwakuti bakambauke.”

Nokuba kuti baalilwa kukambauka ba Kristendomu, Bakamboni ba Jehova ibainda kumamiliyoni osanwe batobela malailile aa Jesu ‘aakuyaa bubayiisya bantu bamisyobo yoonse.’ (Matayo 28:19, 20; amweezyanisye Incito 5:42.) Ibukambausi bwabo bwamulyango amulyango lino bulacitwa mumasi aainda ku 230. Imulumbe ngobajisi ulikabotu, waamba zisyomezyo zibotu zya Bbaibbele izili kumbele. Ino mbuti kwaambaula ambabo ciindi ciboola baakumuswaya?