Nkaambo Nzi Bukkale Bwamazubaano Ncobuli Bubi Kapati Boobu?
NOMWAKKALA kubala pepa lyamakani nokuba kulangilila makani aambwa a TV nokuba kuteelela makani aasikapepele muwailesi, mulangila kuti amwi makani anooli mabi, sena tabuli boobo? Tamunyandwi buya akunyandwa pe kumvwa kuti inkondo njomwakamvwa kuti ilalwanwa icilwanwa, ikuti milandu yakujayana icivwulide, nokuba kumvwa kuti nzala icoongezya cisi cicisumpuka icinyina mbono zyeelede.
Kuti naa mukkala kule ankozicitika eezi, inga tamuzumanani kupenzegwa kapati amakani aali boobu. Kumane sena kuli unga wacikonzya kwaafwida luse makamu-makamu abaabo boonse bali mukupenga? Nokuba boobo, ncintu ciyumu kapati ikutaetezyegwa ciindi notulibonena tobeni ciimo cabantu bali mukupenga. Antela twaambe kuti, kuli kwiimpana akati kakubala zyankondo akuyeeya myeelwe yabasikufwa, alimwi akubala zya mwanike Adnan, musankwa muna Bosnia uulaa myaka yakuzyalwa iili fuka walo wakafwidwa banyina ciindi ibbomba nolyakanyonyoona ŋanda yabo. Bausyi Adnan bakajaigwa asintobolo myeezi misyoonto buyo yakatobela nobakali kuyaa bweenda antoomwe mumugwagwa. Kalangilila imucizyi wakwe wakazwa bulowa kusikila mane wafwa imvwiki zisyoonto buyo zyakatobela, walo wakali umwi wabaabo bakalicisa ciindi kabbomba nokakalokela mukati kalubuwa lwacikolo. Bamadokotela aabo bakamusilika Adnan kukutyompwa kwakwe bakajana kuti musankwa ooyu wakaliyuminide, kumaninwa mizeezo yoonse nikuba kulibilika. Ikuyoowa akuyeeya zyakacitika kwali kumupenzya masikati; maloto aayoosya akali kumupa cilabila masiku. Adnan tali buyo umwi akati kamweelwe. Mmwana uuli mukupenga; tatukonzyi kutamumvwida luse pe.
Ncimwi buyo amapenzi amwi aamunyika. Kuli kwiindana akati kakubala zyanzala; alimwi akubona cifwanikiso cakana kasimbi kalaa myaka yosanwe kakalaa kaumba kabula atuulu atwaanza tufwulukide, kalangilwa kufwa kufwumbwa ciindi kunzala. Kuli kwiindana akati kakubala myeelwe yazintu zibi zicitika; alimwi akumvwa zyakuumwa citaambiki kwamucembele mukamufu, kubbidwa, alimwi akusinikizigwa koonana. Kuli kwiindana akati kakubala zyakwaandaana kwamukwasyi; alimwi akumvwa kuti banyina acaali babaonyaa nzala akutabalela kabotu bana babo beni.
Cilacisya moyo kubala zintu zili boobu. Pele naa zipenzyo zyanyika yoonse zili boobu zyatugama buya kutucisa, ma! inga caindila buya. Ciindi nomwapenga boobu, bukkale bwamunyika bulibonya mumakani aanyika yoonse inga bwamuzinga. Cilayoosya ikubona mapenzi kuzwa kumilandu yabulwani, inkondo, inzala alimwi a malwazi nkoziyabuvwula amweelwe uutanacitikide mubukkale bwamuntu. Kukkala akati kamapenzi meni-meni aamumwaanda wamyaka uuno wa 20 inga caleta mapenzi mapati mumizeezo—kuzingwa, bukandu alimwi akutyompwa zilavwula.
Bantu muzikombelo zinji bayandaula kwiingula kumibuzyo ikatazya mbuli yakuti, Nkaambo nzi bukkale ncobuli bubi boobu? Sena musyobo wamuntu ugamayi?
Mukubula coolwe, zikombelo zyamazubaano tazipi kwiingula kuzwidilide. Ciindi cakusaanguna nomwakabona mubuzyo atala lyamagazini eeyi, ndiza mwakadooneka kwiingula kupegwa—eco calo citagambyi. Zikombelo zyamilawo-lawo kanjikanji zisola kukakatizya kuyiisya zintu zitamo mu Bbaibbele—ibuzuba aciindi calunyonyooko lwanyika ino. (Amulange Matayo 24:36.) Basikumwaya magazini eeyi cibabotela kuti Bbaibbele lini lilikke lilipandulule. Inga mwagambwa kuziba kuti kukanana kwa Bbaibbele kwazyamazubaa mamanino nkwakasimpe alimwi nkwamaanu. Alimwi Bbaibbele taligoleli buyo aakupandulula kaambo bukkale ncobuli bubi boobu. Lilatupa alimwi abulangizi bwakumbele, bwalo buumbulizya cini-cini. Twamutamba kuti mulange zibalo zitobela kuti mubone mbocikonzeka eeci.
[Nkotwakajana cifwanikiso icili apeeji 3]
Jobard/Sipa Press