Luyando Luyumu Kwiinda Lwamutumbu

MUZITISYINI zyakunsi aanyika, muzimbuzi zyabuleya naa mumigwagwa iindwa-indwa, bamatumbu bali mukusowa bana babo bavwanda. Zimwi ziindi, basikubweza matombe nomuba muzingungulu balatujana ituvwanda itunga twakaile kubomba kulilila bamanyina. Kweelana apepa lyamakani litegwa O Estado de S. Paulo, ategwa “ikusowegwa kwabana bavwanda mumigwagwa kuyaabuvwula kapati.” Aino, mutumbu uucili mwanike ulakonzya waakupenzyegwa amizeezo kumbele akaambo kakusala kwakwe oku. Pele nokuba boobo ulamusowa mwana nokuba kuti inga kazyi kuti ambweni ulafwa.

Mulakonzya kutelaika kuti, ‘Mbuti mutumbu mbwanga wasika aciimo cakuyeeya kwiile kumusowa buyo mwanaakwe katazyi ciyoomucitikila kumbele?’ Ibbaibbele lilacibelesya ciimo cuusisya eci mumaambila mbali ikutegwa litondezye kwiimpana kupati kwambwalimvwa Mulengi wesu kujatikizya bantu bakwe noliti: “Ma! Sa mwanakazi ulaluba mwanaakwe uucinyonka? Sa ulaleka kufwida mwana ngwazyede luzyalo? Aba ambweni balaluba, pele mebo nsikonzya kukuluba uwe pe.”—Isaya 49:15.

Ncobeni, ikwiinda mutumbu muntunsi uuli woonse, Leza ulatuyanda kapati alimwi ulazibikkila maanu kapati zyoonse nzotuyandika. Kunyina makani naa muli bakubusi naa bapati, naa mujisi penzi nzi, tamuli nyolikke pe. Mulengi wanu ulayanda kumugwasya alimwi ulabubikkila maanu bukkale bwanu. Mumajwi aasintembauzyo aamba kuti, “taata aba[a]ma nebandisia, Jehova ulandibamba.”—Intembauzyo 27:10.

Nyika yoonse mbwiizulwa, imamagazini aa Ngazi Yamulindizi a Awake! alamwaigwa kutegwa ape luzibo lwa “Leza mwini-mwini, [uuli alikke],” Jehova a Mwanaakwe Jesu Kristo lwalo ilupa buumi butamani kuli baabo ibalwiiya cakusinizya.—Johane 17:3.