‘Ikulampa Mbuli Kedari Lyaku Lebanoni’

MUZILUNDU zibotu zyaku Lebanoni kukomena masamu aategwa Arz Ar-rab, nkokwaamba kuti “Makedari aa Mwami.” Aaya masamu mapati aatakunkumuki pe, alo aakazivwumbide zilundu ezi cimwi ciindi, alaambwa mu Bbaibbele ziindi zisika ku 70—ikwiinda musamu uumbi uuli woonse.

Nokupandululwa masamu aamakedari mapati aaya aku Lebanoni, Imagwalo abelesya mabala aakuti “ncibotu” alimwi a “mubotu loko.” (Lwiimbo lwa-Solomoni 5:15; Ezekieli 17:23) Ibupati bwakedari alimwi akuyuma kwazikuni zyawo kuzwa kale-kale kwaucitya kuti ube musamu uubelesyegwa kapati mukuyaka maanda alimwi amaato mapati kubikkilizyaa zintu zyamumaanda mbuli zyuuno. Ikununkilila amusyobo uusubila wacisamu zilakwelelezya kulanga kapati alimwi ikuvwula kwamamina aacisamu eci kucitya kuti utabi musamu uubola buyo naa kusumpwa. Misamu eeyi milamfwu kapati alimwi mipati, ilalampa kusika kumamita aali 37 alimwi mubwaamba ilakomena kusika kumamita aali 12, alimwi ijisi miyanda miyumu iinjila kapati aansi. Anu basikukwabilila misamu ncobaapandulula kuti “misamu yeebeka akati kamisamu yamunyika yoonse”!

Sikulemba Bbaibbele Ezekiele mubusinsimi wakakozyanisya Mesiya kuntembwaani yakedari, yalo Leza lwakwe njasyanga. (Ezekieli 17:22) Atwaambe kuti, ibbala lya Cihebrayo ilyaamba “kedari” lizwa kubupanduluzi bwantalisyo ibwaamba “kuyuma.” Sunu, abalo basikutobela Mesiya, Jesu Kristo beelede ‘kukakatila mulusyomo, . . . kuyuma,’ mbuli kedari lilamfwu alimwi lizyatide. (1 Ba-Korinto 16:13) Ino mbuti mbocinga cakonzeka eci? Nkwiinda mukusinizya kukazya ziyanza zitali zyabunakristo alimwi akuzumanana mubukkale bwakusyomeka alimwi bwabukombi. Ibantu bacita boobo mu Bbaibbele bapandululwa kuba “balulami . . . ibakomena akulampa mbuli kedari lyaku Lebanoni.”—Intembauzyo 92:12, The New English Bible.