“Iyisya Mwana”

KUBA mulimi uuzwidilila kuyandika zintu zinji kunze lyakuminza buyo mbuto mubulongo akuzyoopilukila kwainda myeezi misyoonto kuzyootebula. Kuli mulimo muyumu uujatikizidwe mukubamba bulimo, kubyala mbuto, kwiida alimwi akubambila zisyango kutegwa zikakomene akusima.

Imulimo oyu utondezya kululama kwabbuku lya Tusimpi 22:6, lyaambwa kuti: “Iyisya mwana aende munzila iielede, lino akomena takooyooleya mulinjiyo.” Ncobeni, ikuyiisya kwabazyali nimbazu mpati mukuzwidilila kulela bana.

Pele munyika yamazubaano iinyina ncoikasya, ibazyali banji balakakilwa kutobela lulayo olu. Nobatobela busongo bwabantu bwakuti bana beelede kwiiya kulanganya mapenzi lwabo beni, bana kanjikanji balekelwa kuti balibonene beni. Ibukkale buli boobo bucitya kuti bana bakonzye kuyungwa abantu bacenjezu alimwi ibatatobeli milawo iili yoonse.—Tusimpi 13:20.

Cilainda kugwasya kaka ikuti bazyali bayiisya bana babo injiisyo zya Bunakristo kwiinda mulwiiyo lwabunaleza kabacili baniini! Aciimo nzi? ‘Nobacili bana’ naa bavwanda, mbwaamba mwaapostolo Paulo. Obo mbwaakayiisigwa mulombwana Timoteo. Banyina Timoteo ba Eunike alimwi abakaapanyina ba Loisi bakayiisya Timoteo “magwalo aasalala” cakuti ‘wakaiya’ alimwi ‘wakazuminisya.’ Icakacitika ncinzi? Ilwiiyo olo lwakabeleka kapati ‘mukumusongwaazya kweelela lufwutuko.’—2 Timoteo 1:5; 3:14, 15.

Mbubwena buyo asunu, ibazyali ‘ibatalengaani mukucita kabotu’ bayootebula bulumbu bubotu ikuti ‘tiibafwunuka.’ (Ba-Galatiya 6:9) Mwami musongo Solomoni waamba kuti: “Wisi mululami ulasekelela loko.”—Tusimpi 23:24.