“Ndakazijana Zyoonse Nzyondakali Kuyandaula”

KWEELANA amboitondezya lipooti ya World Health Organization (Mbunga Iilanga Zyabuumi Munyika Yoonse), bantu bainda kutuulunzuma tuli 120 munyika yoonse balityompedwe. Mwaka amwaka, kaulunzuma komwe kabantu balalijaya naa kulisina alimwi tuulunzuma tuli akati ka 10 kusikila ku 20 bakanza kulijaya. Ino ndugwasyo nzi lukonzya kupegwa kuli baabo batyompedwe? Busilisi alimwi akubagwasya mizeezo kulakonzya kulicesya penzi eeli. Kuyungizya waawo, bamwi ibajisi penzi eeli alimwi bagwasyigwa amabbuku aabandika zya Bbaibbele aamwaigwa a Bakamboni ba Jehova kweelana ambolutondezya lugwalo lwa ku France.

“Imyaka misyoonto buyo yainda, kunyina nondakali kwiibona mpindu yakuzumanana kupona. Ndakapaila kuli Leza kutegwa ndifwe buyo. Cakali buyo mbuli kuti ndakalifwide mumoyo. Kandiyandaula busolozi, ndakapaila kuli Jehova camoyo woonse. Alimwi ndakatalika kubala 2002 Yearbook ya Bakamboni ba Jehova yalo njondakamanizya mumazuba otatwe. Yakandikulwaizya kapati alimwi lusyomo lwangu lwayuma.

“Ndakavwuntauzya mumamagazini aa Ngazi Yamulindizi alimwi a Galamukani!, elo kaka ndakagambwa kapati! Ndakali kwaabala mamagazini aaya lyoonse kwamyaka iinda ku 15, pele tiindakalina kubona mbwaakulwaizya alimwi akukondelezya muzibalo zili mumo. Zizwide buyo luyando, ibube butajaniki-janiki mazubaano. Ndakazijana zyoonse nzyondakali kuyandaula.”

Ibbaibbele lyaamba kuti: “Jehova uli afwaafwi kubawizukide mumoyo, ulafutula batete myuuya.” (Intembauzyo 34:18) Kakunyina akudooneka, boonse aabo “bawizukide mumoyo” naa “batete myuuya” balakonzya kukulwaizyigwa amakani aazwa mu Bbaibbele alimwi akujana bulangizi bwakumbele. Bakamboni ba Jehova balamwaya mabbuku aabandika Bbaibbele kugwasya baabo bayanda luumbulizyo oolu lwakasololelwa a Leza.