Sena Mwalizyi?
Ino nkaambo nzi Bbaibbele ncolyaamba kuti kukomba leza wakubeja Bbaala kuleendelana akutalyeendelezya mumakani aakoonana?
Leza wabana Kanana Bbaala wakali leza wabuzyazi. Bantu bakali kukomba bakali kusyoma kuti Bbaala nguwakali kupa kuti kababa aabutebuzi bubotu alimwi akuti zivwubwa zyabo kazizyalana. Ibbuku liitwa kuti Manners and Customs in the Bible lyaamba kuti, “bantu bakali kusyoma kuti balakonzya kuba aabutebuzi bunji alimwi azivwubwa zinji kwiinda mukoonana kutempele kwalo kwakali kupa kuti awalo Bbaala atalike koonana amukaintu wakwe wiitwa kuti Ashehrah.”
Bana Kanana bakali kusyoma kuti ciindi cacilimo Bbaala wakali kubbila munyika akaambo kakuzundwa a Mot, leza wacimpayuma alufu. Ikutalika kwamvwula kwakali kubonwa kuti ncitondezyo cakuti kulaba buumi azisyango akaambo kakuti Bbaala watalika kulela alimwi. Bana Kanana bakali kusekelela kutalika kwamainza kwiinda mukoonana. Aaka nkakaambo kakapa kuti bana Israyeli ibakakomba Bbaala-Peori ‘batalike kuvuula abana basimbi ba-Moabu.’—Myeelwe 25:1-3.
Ino Jesu wakali kwaamba nzi, naakaamba kuti balembi aba Farisi bakali mbuli “tubanda tulambidwe amulambo uutuba”?
Jesu wakaamba kuti balembi aba Farisi bakali basikuupaupa ameso alimwi wakabaambila kuti: “Mulikozyene atubanda tulambidwe amulambo uutuba, ntubotu atala anukuti mukati tulizwide zifuwa zyabafu azisofweede zyoonse.” (Matayo 23:27) Mubuzuba bwa 15 mumwezi wa Adar, kakuseede mwezi omwe kuti kube Pobwe Lyakwiindilila, ba Juda bakajisi cilengwa cakuzila bulambo butuba (lime) azyuumbwe mbwaamanina buyo mainza kutegwa bantu boonse kabazyibona. Imvwula njiyakali kubugusya bulambo butuba.
Ibbuku liitwa kuti The Jewish Encyclopedia lyaamba kuti zyuumbwe zyakali kulambwa bulambo butuba kutegwa “basimweenda nzila banji ibakali kwiinda kabaya ku Pobwe Lyakwiindilila batasofwaazyigwi.” Mulawo uulembedwe kulugwalo lwa Myeelwe 19:16 wakali kwaamba kuti muntu uuli woonse uujata mutunta, cifwuwa camuntu naa cuumbwe wakali kusofweede kwamazuba aali ciloba. Muna Israyeli iwakasofweede munzila eeyi tanaakeelede kucita mulimo uuli woonse wabukombi busalala akaambo kakuti ikuti wacita boobo wakali kujaigwa. (Levitiko 15:31) Jesu wakaamba cikozyanyo eeci kakuceede mazuba masyoonto kuti kube Pobwe Lyakwiindilila; aboobo aabo bakali kumuswiilila bakacili kwaayeeyede makani aakubikka bulambo butuba ikwakali kucitwa amwaka. Kaambo nkaakali kwaamba Jesu nkakuti, basinkondonyina aabo bakali basikuupaupa ameso alimwi akuti bakali kukonzya kusofwaazya muntu kumuuya iwakali kuyanzana ambabo.
[Cifwanikiso icili apeeji 32]
Census edict by Roman governor of Egypt, 104 C.E.
[Kulumba]
© The British Library Board, all rights reserved (P.904)