Mbolucisa Lufwu

Bantu banji tabaangulukide kubandika makani aajatikizya lufwu. Alimwi buya tabayandi akwaabandika makani aaya. Pele tuyande tutayandi, lufwu lulakonzya kutusikila. Alimwi lufwu lulacisa kapati.

Tatukonzyi kulibambila lufwu lwamuzyali, lwamuntu ngotukwetene limwi naa lwamwana. Lufwu lulakonzya kucitika cakutayeeyela nokuba muntu kupenga kwaciindi cilamfwu. Kufwumbwa mbolukonzya kucitika, lufwu lulacisa. Alimwi cilacisa kapati kuzyiba kuti tamukonzyi kuzicinca zyintu.

Ba Antonio, ibakafwidwa bausyi muntenda yamumugwagwa bapandulula kuti: “Cili mbuli kuti muntu umwi waikkiya ŋanda yanu kumane waabweza makkii. Tamukonzyi kunjila muŋanda pe, nokuba kwaciindi cisyoonto. Musyaala buyo amizeezo. Oobu zyintu mbozibede lino. Nokuba kuti tamubuzumini bukkale oobu akaambo kakuti muyeeya kuti tabuli kabotu, kunyina ncomukonzya kucita pe.”

Abalo ba Dorothy nobakafwidwa balumi kabajisi myaka yakuzyalwa iili 47, bakali kuyanda kujana bwiinguzi kumibuzyo njobakajisi. Mbuli mwiiyi waku Sunday-school, bakali kuyiisya bana kuti tulazumanana kupona twafwa, nokuba boobo, balo tiibakazyi cini cicitika ikuti naa muntu wafwa. Aboobo, bakabuzya mupati wacikombelo cabo ca Anglican kuti: “Ncinzi cicitika kulindiswe twafwa?” Wakabaingula kuti: “Mubwini kunyina uuzyi. Tweelede buyo kulindila.”

Sena tweelede “buyo kulindila”? Sena kuli mbotukonzya kuzyiba naa lufwu ngamamanino aazyintu zyoonse?