Bakabelesya Bbaibbele Kwiingula Mibuzyo Yoonse!

MBONDAKABEDE KAINDI:

Ciindi nindakazyalwa, bazyali bangu bakajisi kafaamu kasyoonto mu Galicia, cisi ca Spain nkocili kunyika lwaambo. Ndakali wane kuzyalwa mumukwasyi wabana ibali lusele. Twakali kukkomana abuumi bubotu bwamumukwasyi. Aciindi eeco ku Spain, cakali dumide kapati kutuma mwana umwi wamumukwasyi kuyoonjila cikolo cakwiiya zyabukombi. Mumukwasyi wesu tobana totatwe twakanjila cikolo eeci.

Kandijisi myaka iili 13 yakuzyalwa, ndakamusangana mucizyi wangu mucikolo eeci icakali mudolopo lya Madrid. Bukkale bwakucikolo eeci tiibwakali kabotu. Bantu kunyina nobakali kumvwana—kwakali buyo milawo amipailo, alimwi zintu tiizyakali kweenda bweelede. Mafwumofwumo, twakali kuswaangana mucikombelo kutegwa tuzinzibale kuyeeya, nokuba kuti ziindi zinji tiindakali kuyeeya cili coonse. Mpoonya twakali kwiimba nyimbo zyabukombi akusekelela Misa, zyoonse zyakali kucitwa mumwaambo waci Latin. Kwaamba masimpe, kunyina ncendakali kumvwa alimwi ndakalimvwa mbuli kuti Leza uli kulamfwu andime. Buumi bwakali kulendelezya. Nociba ciindi notwakali kuswaangana amwanookwesu musimbi, twakali kwaamba buyo kuti, “Aatembaulwe Maliya musaante.” Bamasiite bakali kutuzumizya buyo kwaambaula kwamaminiti aali 30 twamana kulya. Eelo kaka buumi oobu bwakaliindene kapati abuumi bukkomanisya mbondakali kupona kuŋanda! Ndakali kulimvwa kulendelelwa alimwi kanji-kanji ndakali kulila.

Nokuba kuti ndakali kulimvwa kuba kulamfwu a Leza, ndakaba siite kandijisi myaka iili 17 yakuzyalwa. Mubwini, ndakacita zyoonse nzyondakali kuyandika. Pele tiilyakalampa, ndakatalika kulibuzya naa ncobeni Leza wakandisala kuba siite. Bamasiite bakali kwaamba kuti aabo badooneka kuti bakasalwa ncobeni a Leza, bakali kuyoopya mumulilo wahelo. Nokuba boobo, mebo tiindakaleka kudooneka. Ndakalizyi kuti Jesu Kristo tanaakalizandula, muciindi caboobo, wakajisi bubi mumulimo wakuyiisya akugwasya bantu. (Matayo 4:23-25) Nondakakkwanya myaka iili 20 yakuzyalwa, tiindakajisi kaambo kakuzumanana kuba siite. Pele cigambya ncakuti, mupati wabamasiite wakandaambila kuti ndakeelede kucileka kuba siite kakunyina kusowa ciindi ikuti naa ndakacili kudooneka kuba siite. Ndiyeeya kuti wakayoowa kuti inga ndayunga bamwi. Aboobo ndakazwa acikolo eeci.

Nindakapiluka kuŋanda, bazyali bangu bakanditambula buyo kabotu. Aboobo, mbwaanga tiikwakali milimo mumunzi wesu, ndakalongela ku Germany ikwakali kukkala mwanookwesu musankwa. Wakali wamukabunga ka Kkomyunizimu kababelesi baku Spain. Ndakalimvwa kabotu akati kabantu bakali kulwanina kuti babelesi kabalanganizyigwa kabotu alimwi akuti bamakaintu abalo kabalanganizyigwa. Aboobo ndakanjila mukabunga ka Kkomyunizimu alimwi mukuya kwaciindi ndakakwatwa kumwaalumi umwi wamukabunga aaka. Ndakali kuyeeya kuti ndicita cintu cigwasya, kwaabila mabbuku aamukabunga aaka alimwi akutola lubazu kutalisya manyongwe.

Nokuba boobo, mukuya kwaciindi ndakatyompwa alimwi. Ndakabona kuti bamukabunga ka Kkomyunizimu tiibakali kucita zintu nzyobakali kuyiisya. Eeci cakaindila mu 1971 ciindi bakubusi bamwi bamukabunga kesu nobakaumpa maofesi aabana Spain aategwa Spanish Consulate aakali mu Frankfurt. Bakacita oobo kutondezya kuti tiibakakkomene abweendelezi bwalunya bwakali mu Spain. Pele ndakabona kuti eeyi tiiyakali nzila mbotu yakutondezya kuti tabakkomene.

Ciindi nondakaba amwana wakusaanguna, ndakaambila balumi bangu kuti ndiyanda kucileka kujanika kumiswaangano ya Kkomyunizimu. Ndakali kulendelelwa kapati nkaambo kunyina beenzuma bakali kuboola kutuswaya mebo amwanaangu. Ndakatalika kulibuzya kujatikizya mpindu yabuumi. Sena ncobeni cakali kugwasya kusola kucinca zintu kuti zibote?

BBAIBBELE MBOLYACINCA BUUMI BWANGU:

Mu 1976, Bakamboni bobilo bana Spain bakandiswaya aŋanda akundipa mabbuku aamba zyamu Bbaibbele, mpoonya ndakaatambula. Nobakapiluka mulweendo lwabili, ndakatalika kubabuzya mibuzyo iijatikizya kupenga, kwiindana kwabukkale, alimwi akutalulama. Ndakagambwa kubona kuti bakabelesya Bbaibbele kwiingula mibuzyo yoonse! Aboobo, ndakazumina ciiyo ca Bbaibbele.

Kumatalikilo, ndakali kuyanda buyo kuti ndizyibe twaambo ntondatakazyi. Pele zintu zyakacinca ciindi mebo abalumi bangu notwakatalika kuswaangana ku Ŋanda ya Bwami ya Bakamboni ba Jehova. Aciindi eeco, twakajisi bana bobilo. Bakamboni bakali kututola kumiswaangano alimwi akutugwasyilizya kulanganya bana besu ciindi camiswaangano. Aboobo ndakatalika kubakkomanina Bakamboni.

Nokuba boobo, kuli zintu nzyondakacili kudooneka kujatikizya bukombi. Ndakayeeya kuti ndikaswaye mukwasyi wangu kucisi ca Spain. Baaisya, balo ibakali bapaizi, bakasola kundityompya kutegwa ndicileke kwiiya Bbaibbele. Pele Bakamboni ibakali kukkala kubusena oobu bakandigwasya kapati. Bakaingula mibuzyo yangu kubelesya Bbaibbele mbubwenya mbuli Bakamboni baku Germany mbobakacita. Nondakapiluka ku Germany, ndakasala kutalika alimwi kwiiya Bbaibbele. Nokuba kuti balumi bangu tiibakayanda kuzumanana kwiiya Bbaibbele, pele mebo ndakazumanana kwiiya. Mumwaka wa 1978, ndakaba Kamboni wa Jehova kwiinda mukubbapatizyigwa.

MBONDAGWASYIGWA:

Kuba aluzyibo lwini-lwini lwakasimpe kamu Bbaibbele, kwandigwasya kuzyiba ncondiponena alimwi akuba abusolozi mubuumi. Mucikozyanyo, lugwalo lwa 1 Petulo 3:1-4, lukulwaizya bamakaintu ‘kulibombya’ kubalumi babo alimwi akuba “abulemu kapati” amoyo “mubombe, ooyo uuyandika kapati mumeso aa Leza.” Njiisyo eezyi zyandigwasya kuzuzikizya mukuli wangu mbondili mukaintu alimwi amuzyali.

Lino kwainda myaka iili 35 kuzwa nondakaba Kamboni. Ndilakkomana kubelekela Leza antoomwe abakwesu abacizyi nyika yoonse, alimwi ndilikkomene kuti akati kabana bangu bosanwe, bone abalo balamubelekela Leza.