SENA MULIZYI?
Nkaambo nzi kujaya zigwebenga ncokwakali kubikkilizya akuzityola maulu?
Kujatikizya kujaigwa kwa Jesu alimwi azigwebenga zyobilo azisamu zyakupenzyezya, cibalo ca Makani Mabotu caamba kuti: “Iba Juda bakalomba Pilato kuti maulu aabo atyolaulwe akuti mibili yabo igusyigwe.”—Johane 19:31.
Mulawo waba Juda wakali kwaamba kuti mitunta yazigwebenga zyajaigwa acisamu ‘tiiyakeelede kusiigwa acisamu masiku oonse, pe.’ (Deuteronomo 21:22, 23) Kuboneka kuti ba Juda bakabelesya mulawo ngoonya ooyu kubantu mbobakali kujaila acisamu bana Roma. Aciindi eeci, kutyola maulu abaalumi aaba kwakali kupa kuti bafwambaane kufwa kutegwa bazikwe kaitanatalika Sabata lyabbila zuba.
Ciindi banji nobakali kujaigwa munzila eeyi, maanza amaulu aamwaalumi ulaamulandu akali kugagailwa acisamu ampikili. Ciindi cisamu nocakali kwiimikwa, wakali kumvwa kucisa kapati naakali kusiigwa kalengelela aampikili. Kutegwa acikonzye kuyoya, wakeelede kusiminina kumpikili izyakali kumaulu aakwe. Pele kuti mafwuwa aamaulu aakwe atyolwa, tanaakali kucikonzya kucita boobo. Aboobo, wakali kufwambaana kufwa akaambo kakucisa kupati naa kwaalilwa kuyoya.
Ino nkwisyo zyakali kubelesyegwa buti munkondo kaindi?
Davida wakabelesya nkwisyo kujaya Goliati. Kuboneka kuti Davida wakaiya mbocibelesyegwa cilwanyo eeci naakacili mweembezi uucili mwana.—1 Samuele 17:40-50.
Zyakuzekaula zitondezya basikubelesya nkwisyo bana asuri nobakali kulwana munzi waba juda iwakajisi bulambo
Nkwisyo zilitondezyedwe muzyakuzekaula zyakaindi zyabana Egepita alimwi abana Asuri. Cilwanyo eeci cakajisi kakomo kacikutu naa kacisani, ikakajisi ntambo zyobilo. Sikubelesya cilwanyo eeci, wakali kubikka bbwe mukakomo, ibbwe libulungene lilampa masentimita aali 5 kusika ku 7.5 mubwamba alimwi lilema magilamu aali 250. Mpoonya wakali kwiizingulusya nkwisyo atala aamutwe akulekezya ntambo yomwe, calo cakali kupa kuti ibbwe lizwe anguzu kapati alimwi akutainzya.
Muzintu zyakaindi zyakavwukkulwa ku Middle East, kwakajanika mabwe aamu nkwisyo manji aakali kubelesyegwa munkondo kaindi. Mabwe ngobakali kufwusa basikalumamba bacibwene, akali kubalika makkilomita aali 160 kusikila 240 muwoola lyomwe. Basikwiiya zyamu Bbaibbele balakazyanya ikuti naa nkwisyo yakali mbuli buta, pele nkwisyo ayalo yakali kukonzya kujaya.—Babetesi 20:16.