Ino Leza Nguni?

Bantu banji baamba kuti balasyoma kuti Leza nkwali. Pele ikuti mwababuzya kuti ino Leza nguni, muyoomvwa bwiinguzi bwiindene-indene. Bantu bamwi baamba kuti Leza mubetesi silunya, walo uuyandisya buyo kusubula bantu akaambo kamicito yabo mibyaabi. Bamwi baamba kuti ngusiluyando alimwi lyoonse ulalekelela, tacikwe makani naa bacita cibi cili buti. Mpoonya bamwi basyoma kuti Leza uli kule andiswe alimwi tatubikkili maano. Mbwaanga kuli mizeezo iindene-indene, bantu banji inga balimvwa kuti tacikonzyeki kumuzyiba bwini mbwabede Leza.

Sena cilayandika kapati kumuzyiba mbwabede Leza? Inzya, cilayandika. Kuzyiba mbwabede Leza kulakonzya kutupa kupona buumi bulaampindu. (Milimo 17:26-28) Kuti mwazumanana kuswena afwaafwi a Leza, uyoomuyanda kapati alimwi akumugwasya. (Jakobo 4:8) Cakutadooneka, ikuti mwamuzyiba kabotu Leza, muyooba abuumi butamani.—Johane 17:3.

Ino inga mwamuzyiba buti Leza? Amweezyeezye kujatikizya muntu ngomuzyi kabotu, ambweni mulongwe wanu. Ino cilongwe canu cakatalika buti? Kweelede kuti mwakasaanguna kuzyiba zina lyakwe, bube bwakwe, nzyayanda anzyatayandi, zintu nzyaakacita kale anzyakanza kucita alimwi azimwi buyo. Eeco ncicakapa kuti mube balongwe amuntu ooyo, tee kayi? Mwakamuzyiba bwini mbwabede.

Ncimwi buyo, tulakonzya kumuzyiba bwini mbwabede Leza kwiinda mukulanga-langa mibuzyo iitobela:

• INO LEZA NGUNI ZINA?

• INO UJISI BUBE BULI BUTI?

• INO NCINZI LEZA NCAAKACITA KALE?

• INO NCINZI NCAYOOCITA KUMBELE?

• INO KUZYIBA LEZA INGA KWAMUGWASYA BUTI?

Magazini eeyi ibambilidwe kupa bwiinguzi bwamu Bbaibbele kumibuzyo eeyi. Zibalo zili mumagazini eeyi zilamugwasya kuzyiba bwini mbwabede Leza alimwi akumugwasya kuzyiba nzyamubambilide kumbele, mbomuyaabuba balongwe bakwe.